《རྒྱལ་ཁབ་ཀྱི་སྐྱེ་ཁམས་ཤེས་དཔལ་གྱི་མཐོ་ས་བསྐྲུན་རྒྱུའི་བོད་རང་སྐྱོང་ལྗོངས་ཀྱི་སྲོལ་ཡིག》ལག་ལེན་བསྟར་ནས་ལོ་གཅིག་འཁོར་བའི་བཞུགས་མོལ་ཚོགས་འདུའི་ཐོག་གི་སྤེལ་རེས་གཏམ་བཤད། (གནད་བསྡུས)

རི་སྔོ་ཆུ་དྭངས་དང་སྐྱེ་ཁམས་གནས་འཕྲོད་ཀྱི་ལྷ་ས་གསར་པ་འཛུགས་སྐྲུན་བྱེད་དགོས།

ལྷ་ས་གྲོང་ཁྱེར་མི་དམངས་འཐུས་ཚོགས་རྒྱུན་ལས་ཨུ་ལྷན། ཧོ་ཕུང་།

《སྲོལ་ཡིག》ཁྱབ་བསྒྲགས་དང་ལག་བསྟར་བྱེད་འགོ་ཚུཌ་པ་ནས་བཟུང་། ལྷ་ས་གྲོང་ཁྱེར་གྱི་རིམ་པ་ཁག་དང་སྡེ་ཚན་ཁག་གིས་སློབ་སྦྱོང་དང་དྲིལ་བསྒྲགས་ཀྱི་ལས་དོན་ལ་མཐོང་ཆེན་པོ་བྱས་ཤིང་། ལྷ་ས་གྲོང་ཁྱེར་མི་དམངས་འཐུས་ཚོགས་རྒྱུན་ལས་ཨུ་ལྷན་གྱིས“འཐུས་མི་སྟོང་གིས《སྲོལ་ཡིག》དྲིལ་བསྒྲགས”སོགས་ཀྱི་བྱེད་སྒོ་སྔ་རྗེས་སུ་སྤེལ་ཏེ། 《སྲོལ་ཡིག》དྲིལ་བསྒྲགས་དཔྱད་གཞིའི་ཡིག་རིགས་2000ལྷག་ཙམ་སྤྲད་པ་དང་། རྫོང(ཆུས)ཁག་གིས《སྲོལ་ཡིག》ཆེད་དོན་སྒྲོག་འགྲེལ་དང་འཆད་ཁྲིད་ཐེངས་10ལྷག་ཙམ་དང་གྲོང་གསེབ་ཏུ་དྲིལ་བསྒྲགས་དང་འཆད་ཁྲིད་ཐེངས་50ལྷག་ཙམ་བྱས་པ། རིམ་ཁག་མི་དམངས་འཐུས་ཚོགས་ཀྱི་འཐུས་མིས་དྲིལ་བསྒྲགས་པ་དང་ལྟ་སྐུལ་པའི་ནུས་པ་འདོན་སྤེལ་ཧུར་ཐག་བྱས་ཏེ། 《སྲོལ་ཡིག》སློབ་སྦྱོང་དང་། དྲིལ་བསྒྲགས། ལག་བསྟར་བཅས་རྒྱུན་ཆད་མེད་པར་གཏིང་ཟབ་ཏུ་གཏོང་བར་སྐུལ་འདེད་བཏང་ཡོད།

ལམ་སྲོལ་བཙུགས་ནས་འགན་སྲུང་བྱེད་ཤུགས་ཆེ་རུ་བཏང་ཞིང་། ལྷ་ས་གྲོང་ཨུད་ཀྱིས་འགོ་ཁྲིད་གཙོ་བོས་ཙུའུ་ཀྲང་བྱས་པའི་ལྷ་ས་གྲོང་ཁྱེར་གྱི“ཁུལ་གསུམ་དང་མཐོ་ས་གཅིག”ནུས་ཤུགས་ཡོད་རྒུས་གཏོད་པའི་འགོ་ཁྲིད་ཚོགས་ཆུང་བཙུགས་པ་དང་། རྒྱལ་ཁབ་ཀྱི་སྐྱེ་ཁམས་ཤེས་དཔལ་མཐོ་ས་འཛུགས་གཏོད་ཀྱི་གདོང་དམག་་ཡག་པོ་བྱེད་པའི་ཆེད་དོན་འཛིན་གྲྭ་བཙུགས་ཏེ། 《སྲོལ་ཡིག》ལག་བསྟར་ལ་དམ་འཛིན་ཡག་པོ་བྱས་ནས་རྒྱལ་ཁབ་ཀྱི་སྐྱེ་ཁམས་ཤེས་དཔལ་གྱི་མཐོ་ས་འཛུགས་གཏོད་ལ་སྐུལ་འདེད་བཏང་ཡོད། ད་ལོར་གྲོང་ཨུད་རྒྱུན་ལས་ཨུ་ཡོན་གྱི་ཚོགས་འདུ་ཐེངས་8དང་དེ་བཞིན་སྲིད་གཞུང་གི་རྒྱུན་ལས་ཚོགས་འདུ་དང་ཆེད་དོན་ཚོགས་འདུ་ཐེངས་10འཚོགས་ནས་འབྲེལ་ཡོད་ལས་དོན་ལ་སྐུལ་འདེད་གཏོང་རྒྱུར་ཞིབ་འཇུག་བྱས་པ་དང་འབྲེལ་བཀོད་སྒྲིག་ཀྱང་བྱས་ཡོད།

སྐྱེ་ཁམས་ཁྲིམས་འཛུགས་དང་ཁྲིམས་འཛིན་ལྟ་སྐུལ་ལ་དམ་འཛིན་ནན་པོ་བྱས་ཤིང་། ལྷ་ས་གྲོང་ཁྱེར་མི་དམངས་འཐུས་ཚོགས་རྒྱུན་ལས་ཨུ་ལྷན་གྱིས་ཐོག་མཐའ་བར་གསུམ་དུ་སྐྱེ་ཁམས་ཁོར་ཡུག་སྲུང་སྐྱོང་ཐད་ཀྱི་ཁྲིམས་འཛུགས་དང་ལྟ་སྐུལ་ལས་དོན་དེ་མི་དམངས་འཐུས་ཚོགས་ཀྱི་ལས་དོན་གཙོ་བོར་བརྩིས་པ་རེད། ཁྲིམས་ལུགས་ཀྱི་འགྱུར་མེད་གཅུན་སྡོམ་གྱི་ནུས་པ་ཆེ་རུ་བཏང་ཞིང་། བོད་རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི་ཚོགས་འདུར་ཞིབ་བཤེར་དང་ཆོག་མཆན་འགོད་རྒྱུར་ཕུལ་བ་བརྒྱུད《ལྷ་ས་གྲོང་ཁྱེར་གྱི་ལྷོ་རི་བྱང་རི་སྔོ་འགྱུར་དོ་དམ་སྲོལ་ཡིག》ཁྱབ་བསྒྲགས་ལག་བསྟར་བྱས་ཏེ། ལྗོངས་ཡོངས་སུ“བཅད་ཁ་ཆུང་ངུའི”སྐྱེ་ཁམས་སྲུང་སྐྱོང་གི་ཁྲིམས་འཛུགས་ཚོད་ལྟ་ཐོག་མར་བྱས་པ་རེད། 《ལྷ་ས་གྲོང་ཁྱེར་གྱི་ཆུའི་ཐོན་ཁུངས་དོ་དམ་སྲོལ་ཡིག》དང་། 《ལྷ་ས་གྲོང་ཁྱེར་གྱི་གྲོང་རྣམ་ཁོར་ཡུག་འཕྲོད་བསྟེན་དོ་དམ་སྲོལ་ཡིག》 《ལྷ་ས་གྲོང་ཁྱེར་གྱི་ལྷ་ཀླུ་འདམ་རའི་དོ་དམ་སྲོལ་ཡིག》སོགས་ཁྲིམས་ལུགས་དང་ཁྲིམས་སྲོལ་མང་པོ་བཟོས་པ་རེད། 《ལྷ་ས་གྲོང་ཁྱེར་གྱི་སྔོ་འགྱུར་སྲོལ་ཡིག》དང《ལྷ་ས་གྲོང་ཁྱེར་གྱི་འཕྲུལ་སྒུལ་འཁོར་རིགས་ཀྱི་བཙོག་དངོས་གཏོང་འབུད་ལ་ལྟ་སྐུལ་དོ་དམ་གྱི་བྱ་ཐབས》སོགས་བཟོས་པའམ་མགྱོགས་མྱུར་བཟོ་བཅོས་བརྒྱབ་ནས། སྐྱེ་ཁམས་ཁོར་ཡུག་སྲུང་སྐྱོང་དོ་དམ་སྒྲིག་སྲོལ་དང་ལམ་སྲོལ་འཐུས་སྒོ་ཚང་དུ་གཏོང་བར་སྐུལ་འདེད་བཏང་ཡོད། ཁྲིམས་འཛིན་ཞིབ་བཤེར་ལ་ཤུགས་སྣོན་བརྒྱབ་ཅིང་། རང་སྐྱོང་ལྗོངས་མི་དམངས་འཐུས་ཚོགས་ཀྱི་ཁྲིམས་འཛིན་ཞིབ་བཤེར་ལ་ཧུར་ཐག་ཞུགས་ཏེ། 《རླུང་ཁམས་ཆེན་པོའི་སྦགས་བཙོག་འགོག་བཅོས་བཅའ་ཁྲིམས》དང་། 《ཆུའི་སྦགས་བཙོག་འགོག་བཅོས་བཅའ་ཁྲིམས》 《ས་རྒྱུའི་སྦགས་བཙོག་འགོག་བཅོས་བཅའ་ཁྲིམས》 《ས་ཆའི་དོ་དམ་བཅའ་ཁྲིམས》 《སྲ་གཟུགས་ཟོག་རོའི་ཁོར་ཡུག་སྦགས་བཙོག་འགོག་བཅོས་ཀྱི་བཅའ་ཁྲིམས》སོགས་བཅའ་ཁྲིམས་དང་ཁྲིམས་སྲོལ་ལ་སྔ་རྗེས་སུ་ཁྲིམས་འཛིན་ཞིབ་བཤེར་བྱས་པ་དང་། དུས་མཚུངས་སུ་རང་སྐྱོང་ལྗོངས་མི་དམངས་འཐུས་ཚོགས་ཀྱིས་ལོ་ལྟར་སྤེལ་བའི“ཀྲུང་ཧྭའི་ཁོར་ཡུག་སྲུང་སྐྱོང་གི་དུས་རབས་ཀྱི་བྱ་སྤྱོད·བོད་ཀྱི་བྱ་སྤྱོད”ཅེས་པའི་བྱེད་སྒོར་ཧུར་ཐག་ཞུགས་ཡོད།

སྐྱེ་ཁམས་ཁོར་ཡུག་བཅོས་སྐྱོང་ལ་ལྟ་སྐུལ་ཞིབ་བཤེར་བྱེད་ཤུགས་ཆེ་རུ་བཏང་ཞིང་། ལྷ་ས་གྲོང་ཁྱེར་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི་བློ་མཐུན་5ཡིས་ཀྲུང་དབྱང་གི་ཁོར་ཡུག་སྲུང་སྐྱོང་ལྟ་བཤེར་ལྷ་སའི་ལྟ་སྐུལ་མཛུབ་ཁྲིད་ལས་དོན་ནང་ཞུགས་ཏེ། ཁོར་ཡུག་སྲུང་སྐྱོང་གི་ཞུ་གཏུག་གྱོད་གཞི་111ཐག་གཅོད་བྱས་པ་དང་། ལྷ་ས་གྲོང་ཁྱེར་གྱི་ཀྲུང་དབྱང་སྣོད་བཅུད་ཁོར་ཡུག་སྲུང་སྐྱོང་གི་ལྟ་བཤེར་དག་ཐེར་ཇུས་གཞི་འགོད་པའི་ནང་ཞུགས་ཏེ། “དུས་བཀག་ཐག་གཅོད་ལམ་ལུགས”དང“གནད་དོན་ཐོ་བསུབ་ལམ་ལུགས”ཀྱི་བཅོས་སྒྲིག་ལས་དོན་དོན་འཁྱོལ་ནན་པོ་བྱས་པ་རེད། འབྲེལ་ཡོད་སྡེ་ཚན་གྱིས་ས་འོག་ཆུའི་ཁོར་ཡུག་གི་གནས་ཚུལ་ལ་བརྟག་དཔྱད་བྱེད་རྒྱུར་སྐུལ་འདེད་བཏང་ཞིང་། སེར་རྟགས་རླངས་འཁོར་དང་རླངས་འཁོར་རྙིང་པ་འདོར་བ་དང་ཟོག་འདྲེན་རླངས་འཁོར་ཆེ་གྲས་འགྲོ་སྐྱོད་ལ་ཚོད་འཛིན་གྱི་བྱ་སྤྱོད་ལ་རྒྱུན་མཐུད་སྐུལ་འདེད་བཏང་སྟེ། གྲོང་ཁྱེར་ཡོངས་ཀྱི་སྤྱི་སྤྱོད་འགྲིམ་འགྲུལ་གྱི་ནུས་རྒྱུ་གསར་པའི་རླངས་འཁོར་100%ཟིན་ཡོད།

གོམ་སྟབས་རྗེས་མར་ང་ཚོས་གཤམ་གྱི་ཕྱོགས་གསུམ་གྱི་ཐད་ནས་ཤུགས་སྣོན་རྒྱག་རྒྱུ་སྟེ།

“སྲོལ་ཡིག”སློབ་སྦྱོང་དང་དྲིལ་བསྒྲགས་ཀྱི་ལས་དོན་སྤེལ་ཤུགས་རྒྱུན་ཆད་མེད་པར་ཆེ་རུ་གཏོང་རྒྱུ་ཡིན་ཞིང་། གྲོང་ཁྱེར་དང་། རྫོང་། ཤང་བཅས་རིམ་གསུམ་མི་དམངས་འཐུས་ཚོགས་ཀྱིས་ལོ་ལྟར་མི་དམངས་འཐུས་ཚོགས་ཀྱི་འཐུས་མི་ཐེངས་གཅིག་སྒྲིག་འཛུཌ་བྱས་ཏེ། 《སྲོལ་ཡིག》ལ་ཁྲིམས་འཛིན་ལྟ་བཤེར་བྱས་ནས《སྲོལ་ཡིག》གི་བླང་བྱ་ཚང་མ་དོན་ཐོག་ཏུ་འཁྱོལ་རྒྱུར་སྐུལ་འདེད་གཏོང་རྒྱུ་དང་ཆབས་གཅིག འཛམ་གླིང་ཁོར་ཡུག་ཉིན་མོ་དང་། སའི་གོ་ལའི་ཉིན་མོ། “ཀྲུང་ཧྭའི་ཁོར་ཡུག་སྲུང་སྐྱོང་གི་དུས་རབས་ཀྱི་བྱ་སྤྱོད”སོགས་ཀྱི་བྱེད་སྒོར་བརྟེན་ཁར། “ལོ་ལྔ་ཚན་བརྒྱད་པའི”བཅའ་ཁྲིམས་ཁྱབ་གདལ་དྲིལ་བསྒྲགས་དང་། སློབ་གྲྭར་སྐྱེ་ཁམས་ཤེས་དཔལ་དྲིལ་བསྒྲགས་བྱེད་སྒོ་སྤེལ་བ། ཁོར་ཡུག་སྲུང་སྐྱོང་གི་སྤྱི་ཕན་བྱེད་སྒོ། དཔོད་ཆུང་ངམ་སྐད་འཕྲིན་དྲ་བའི་སྟེགས་བུ་གསར་འཛུགས་སོགས་ཀྱི་བྱ་ཐབས་སྤྱད་དེ《སྲོལ་ཡིག》སློབ་སྦྱོང་དང་དྲིལ་བསྒྲགས་ལ་སྐུལ་འདེད་གཏོང་རྒྱུ་ཡིན།

སྐྱེ་ཁམས་ཁོར་ཡུག་སྲུང་སྐྱོང་གི་ཁྲིམས་འཛུགས་ལས་དོན་ལ་རྒྱུན་མཐུད་སྐུལ་འདེད་གཏོང་རྒྱུ་ཡིན་ཞིང་། ལྷ་ས་གྲོང་ཁྱེར་གྱི་དོན་དངོས་ལ་གཞི་ཚུགས་ཏེ“ལོ་ལྔ་ཚན་བཅུ་བཞི་པའི”འཆར་འགོད་དང་འབྲེལ་ཡོད་ཆེད་དོན་འཆར་འགོད་བཟོ་འགོད་དང་ཟུང་འབྲེལ་གྱིས་སྐྱེ་ཁམས་ཁོར་ཡུག་སྲུང་སྐྱོང་གི་ཁྲིམས་འཛུཌ་དམིགས་ཚད་དང་ལས་འགན་བརྒྱུད་རིམ་ལྡན་པའི་ངང་གསེད་བཀྲོལ་དང་། ཁྲིམས་འཛུགས་ཀྱི་རྣམ་གྲངས་ཚན་རིག་དང་མཐུན་པའི་ངང་སྤྱི་འདོམས་དང་ཇུས་འགོད་བྱེད་པ། ཁྲིམས་འཛུགས་ཐད་རིགས་པས་ཁུངས་སྐྱེལ་ཡག་པོ་བྱེད་པ། “བཅད་ཁ་ཆུང་ངུ”དང“ཕྲན་མྱུར་བསྟུན་གསུམ”གྱི་ཁྲིམས་འཛུགས་ལ་ཤུགས་སྣོན་རྒྱག་པ་བཅས་བྱས་ནས་ཁྲིམས་འཛུགས་ཀྱི་ཚན་རིག་རང་བཞིན་དང་། དམིགས་སའི་རང་བཞིན། སྤྱོད་འཐུས་རང་བཞིན། བཀོལ་སྤྱོད་རང་བཞིན་བཅས་ཆེ་རུ་གཏོང་རྒྱུ་ཡིན།

ཁྲིམས་འཛིན་ལྟ་སྐུལ་བྱེད་ཤུགས་ཆེ་རུ་གཏོང་རྒྱུ་ཡིན་ཞིང་། ལྷ་ས་གྲོང་ཁྱེར་གྱི་རྒྱལ་ཁོངས་བར་སྟོང་གི་སྤྱིའི་འཆར་གཞི་བཟོ་འགོད་དང་། གྲོང་ཁྱེར་གྱི་ཆུ་རྒྱུད་བསྐྱར་གསོ། འཆར་གཞི་ལག་བསྟར། བཙོག་ཆུ་གཙང་གསིང་། ལྷ་སའི་སྐྱིད་ཆུ་འབབ་རྒྱུད་ཕྱོགས་བསྡུས་བཅོས་སྒྲིག་བཅས་ཀྱི་ལས་གྲྭའི་ལྟ་སྐུལ་ཞིབ་བཤེར་ལ་ཤུགས་སྣོན་བརྒྱབ་སྟེ། ཆུ་ལམ་གྱི“གང་བྱུང་བཞི་གཙང་སེལ”ལ་སྐུལ་འདེད་གཏོང་བའི་ཆེད་དོན་བྱ་སྤྱོད་ལ་ལྟ་བཤེར་ཧུར་ཐག་བྱ་རྒྱུ་དང་། གྲོང་ཁྱེར་དང་གྲོང་གསེབ་འཛུགས་སྐྲུན་གྱི་ལྗང་མདོག་འཕེལ་རྒྱས་ལ་སྐུལ་འདེད་གཏོང་བ་དང་། སྒྲིག་སྦྱོར་རྣམ་པའི་ཨར་སྐྲུན་དང་ལྗང་མདོག་ཨར་ལས་རྒྱུ་ཆས་ཁྱབ་སྤེལ་གཏོང་བ། འཚོ་བའི་གད་སྙིགས་བཙན་གྱིས་དབྱེ་འབྱེད་བྱེད་པ་བཅས་ཀྱི་ཐོག་ནས་ལྗང་མདོག་གི་འཚོ་བ་སྐྱེལ་སྟངས་ཆགས་པར་སྐུལ་འདེད་གཏོང་རྒྱུ་ཡིན།

ང་ཚོས་མཛེས་སྡུག་ལྡན་པའི་གཞིས་རྩེ་མཉམ་དུ་སྐྲུན།

གཞིས་རྩེ་གྲོང་ཁྱེར་མི་དམངས་འཐུས་ཚོགས་རྒྱུན་ལས་ཨུ་ལྷན། ཡུས་ཏེ་ཕིང་།

གཞིས་རྩེ་གྲོང་ཁྱེར་གྱིས་ཐོག་མཐའ་བར་གསུམ་དུ་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་མཛུབ་ཁྲིད་དུ་བྱ་རྒྱུ་མཐའ་འཁྱོངས་ཀྱིས་ཞི་ཅིན་ཕིང་གི་སྐྱེ་ཁམས་ཤེས་དཔལ་གྱི་དགོངས་པ་ལག་བསྟར་དོན་འཁྱོལ་གཏིང་ཟབ་བྱས་ཤིང་། སྔ་རྗེས་སུ་གྲོང་ཁྱེར་ཨུ་ལྷན་གྱི་སྐྱེ་ཁམས་ཤེས་དཔལ་འགོ་ཁྲིད་ཚོགས་ཆུང་གི་ཚོགས་འདུ་ཐེངས་2འཚོགས་པ་དང་རྒྱལ་ཁབ་ཀྱི་སྐྱེ་ཁམས་ཤེས་དཔལ་གྱི་མཐོ་ས་ནུས་ཤུགས་ཡོད་རྒུས་འཛུགས་གཏོད་ལས་དོན་གྱི་ཆེད་དོན་ཚོགས་འདུ་ཐེངས་5འཚོགས་ནས《རྒྱལ་ཁབ་ཀྱི་སྐྱེ་ཁམས་ཤེས་དཔལ་གྱི་མཐོ་ས་ནུས་ཤུགས་ཡོད་རྒུས་འཛུགས་གཏོད་བྱེད་པའི་གདོང་དམག་དཔའ་ངར་ཆེན་པོས་བྱེད་པའི་གཞིས་རྩེ་གྲོང་ཁྱེར་གྱི་ལག་བསྟར་ཇུས་གཞི》དང《རྒྱལ་ཁབ་ཀྱི་སྐྱེ་ཁམས་ཤེས་དཔལ་གྱི་མཐོ་ས་ནུས་ཤུགས་ཡོད་རྒུས་འཛུགས་གཏོད་བྱེད་པའི་གདོང་དམག་དཔའ་ངར་ཆེན་པོས་བྱེད་པའི་གཞིས་རྩེ་གྲོང་ཁྱེར་གྱི་2022ལོའི་ལས་ཀའི་འཆར་གཞི》སོགས་ཀྱི་ཡིག་ཆ་བཀྲམ་ནས་ལག་བསྟར་བྱས་པ་རེད། ཆེད་དོན་ཚོགས་ཆུང་གི་ལས་ཀའི་སྒྲིག་སྲོལ་གཏན་འབེབས་བྱས་ཤིང་། འབྲེལ་གཏུག་པ་དང་། གཟའ་འཁོར་རེའི་སྙན་སེང་། ཟླ་རེར་བཀོད་གཏོང་སོགས་ཀྱི་ལས་ཀའི་ལམ་སྲོལ་བཙུགས་ནས་2022ལོའི་ལས་ཀའི་ལས་འགན་59དང་དམིགས་ཚད་ལས་འགན་གྱི་ཞིབ་ཕྲའི་འགན་འཁུར་སྡེ་ཁག་ཁ་གསལ་བཟོས་པ་དང་། བཀོད་སྒྲིག་ཚོགས་འདུ་འཚོགས་ཏེ་ལས་འགན་ཁག་བགོས་ཀྱིས་ལས་ཀར་དམ་འཛིན་བྱེད་མཁན་ཡོད་པ་དང་། དོ་དམ་བྱེད་མཁན་ཡོད་པ། དོན་འཁྱོལ་བྱེད་མཁན་ཡོད་པ་བཅས་ཀྱི་འགན་ལེན་བྱས་ཡོད།

《སྲོལ་ཡིག》སློབ་སྦྱོང་བྱེད་ཤུགས་ཆེ་རུ་བཏང་ཞིང་། གྲོང་ཁྱེར་ཡོངས་ཀྱི་རིམ་ཁག་ཏང་ཙུའུ་ཡིས《སྲོལ་ཡིག》ཏང་ཙུའི་ཚོགས་འདུ་དང་། རིགས་པའི་གཞུང་ལུགས་ལྟེ་བའི་ཚོགས་ཆུང་། ཏང་ཀྲི་པུའི་ཚོགས་འདུ་བཅས་ཀྱིས་ངེས་པར་དུ་སྦྱོང་དགོས་པའི་ནང་དོན་ཁྲོད་བཅུག་ནས་དྲ་ཐོག་རང་སྦྱོང་། དྲ་ཕྱིར་མཉམ་སྦྱོང་བྱེད་པའི་སློབ་སྦྱོང་གི་ཐབས་ལམ་གསར་གཏོད་བྱས་པ་དང་། འགོ་ཁྲིད་ཀྱིས་སྣེ་ཁྲིད་དེ་སློབ་སྦྱོང་དང་བགྲོ་གླེང་ལ་བརྟེན་ནས་སློབ་སྦྱོང་ལ་སྐུལ་འདེད་བཏང་སྟེ་སློབ་སྦྱོང་གི་གཡུལ་ས་གསར་པ་བཏོད་ཡོད། 《རྒྱལ་ཁབ་ཀྱི་སྐྱེ་ཁམས་བདེ་འཇགས་སྲུང་བཅད་བརྟན་པོ་བཙུགས་ནས་མཛེས་སྡུག་དང་ཞི་མཐུན་གྱི་བོད་ལྗོངས་འཛུགས་སྐྲུན་བྱེད།——བོད་རང་སྐྱོང་ལྗོངས་ཏང་གི་འཐུས་མི་ཚོགས་ཆེན་ཐེངས་བཅུ་པའི་དགོངས་དོན་སློབ་སྦྱོང་ལག་བསྟར་བྱེད》དང《ཞི་ཅིན་ཕིང་གི་སྐྱེ་ཁམས་ཤེས་དཔལ་གྱི་དགོངས་པ་སློབ་སྦྱོང་དང་གོ་བ་ལེན་པ》སོགས་འབྲེལ་ཡོད་ཆེད་དོན་སློབ་ཚན་4བཀོད་སྒྲིག་བྱས་པ་དང་། སྐྱེ་ཁམས་ཤེས་དཔལ་འཛུགས་སྐྱོང་གི་ཆེད་དོན་བགྲོ་གླེང་འཛིན་གྲྭ་དང་སྐྱེ་ཁམས་ཤེས་དཔལ་འཛུགས་སྐྱོང་དཔེ་སྟོན་འཛུགས་གཏོད་ལས་དོན་གྱི་ཆེད་དོན་གསོ་སྦྱོང་འཛིན་གྲྭ་གཉེར་བ་མ་ཟད། ཏང་གི་སྐབས་བཅུ་དགུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་དྲུག་པའི་ཆེད་དོན་བགྲོ་གླེང་འཛིན་གྲྭ་སོགས་འཛིན་གྲྭ་15རུ་ཞི་ཅིན་ཕིང་གི་སྐྱེ་ཁམས་ཤེས་དཔལ་དགོངས་པའི་འབྲེལ་ཡོད་སློབ་ཚན་བཀོད་སྒྲིག་བྱས་ནས་ཏང་ཡོན་དང་ལས་བྱེད་པ་མི་ཐེངས་1000ལྷག་ཙམ་ལ་སློབ་གསོ་ཐེབས་པ་རེད། 《སྲོལ་ཡིག》དྲིལ་བསྒྲགས་བྱེད་ཤུགས་ཆེ་རུ་བཏང་ཞིང་། “གྲོང་གསེབ་ཏུ་སྐྱེ་ཁམས་ཤེས་དཔལ་དྲིལ་བསྒྲཌ་བྱེད། ང་ཚོས་མཛེས་སྡུག་ལྡན་པའི་གཞིས་རྩེ་མཉམ་དུ་སྐྲུན”སོགས་དྲིལ་བསྒྲགས་བྱེད་སྒོ་གསར་པ་བཏོད་ཡོད། དེ་དང་ཆབས་ཅིག་གྲོང་ཁྱེར་ཡོངས་ཀྱི་རྒྱ་ཆེའི་གྲོང་སྡོད་ལས་བྱེད་པས་ཞིང་འབྲོག་པའི་ཏང་ཡོན་དང་ལས་བྱེད་དང་མང་ཚོགས་ཁྲོད་ཞི་ཅིན་ཕིང་གི་སྐྱེ་ཁམས་ཤེས་དཔལ་གྱི་དགོངས་པ་སྒྲོག་འགྲེལ་ཤུགས་ཆེན་བྱས་ནས་སྒྲོག་འགྲེལ་ཐེངས་1300ལྷག་ཙམ་བྱས་པ་དང་། དྲིལ་བསྒྲགས་སྦྱར་ཡིག་1000ལྷག་ཙམ་བཀལ་བ། དྲིལ་བསྒྲགས་ལག་དེབ་སྣ་ཚོགས་བསྡོམས་ཁྲི་1.4ལྷག་ཙམ་སྤྲད་པ་རེད། གྲོང་ཁྱེར་ཡོངས་ཀྱི་རིམ་ཁག་མི་དམངས་འཐུས་ཚོགས་ཀྱིས“6·5”ཁོར་ཡུག་ཉིན་མོ་དང“ལོ་ལྔ་ཚན་བདུན་པའི་བཅའ་ཁྲིམས་ཁྱབ་གདལ་ཉིན་མོ”སོགས་ཀྱི་མཚམས་ཚིགས་བེད་སྤྱད་དེ་སྲོལ་ཡིག་དྲིལ་བསྒྲགས་བྱས་པ་རེད། དྲིལ་བསྒྲགས་ཐབས་ལམ་རྒྱ་སྐྱེད་དང་གནད་སྨིན་ཁྱབ་གདལ་གཏོང་བར་ཤུགས་སྣོན་བརྒྱབ་ཅིང་། གཞི་རིམ་གྱི“མི་དམངས་འཐུས་ཚོགས་ཀྱི་འཐུས་མིའི་ཁྱིམ”དང“འཐུས་མིའི་ཚོགས་ཆུང”གང་ལེགས་སྤྱད་དེ་སྡེ་ཁུལ་དང་། གྲོང་ཚོ་དང་གྲོང་ལྷན། ཁང་པའི་ནང་དང་ཁང་པའི་ཕྱི་བཅས་ཡོངས་ལ་ཁྱབ་པའི་ཕྱོགས་བསྡུས་དྲིལ་བསྒྲགས་ཀྱི་དྲ་བ་ཞིག་བསྐྲུན་ནས་སྲོལ་ཡིག་ཁྱབ་གདལ་གཏོང་ཤུགས་དང་སེམས་སུ་ཐིམ་ཤུགས་ཆེ་རུ་ནུས་ལྡན་བཏང་ཡོད།

མིག་སྔར། གཞིས་རྩེ་གྲོང་ཁྱེར་དུ་རང་སྐྱོང་ལྗོངས་རིམ་པའི་སྐྱེ་ཁམས་ཤེས་དཔལ་འཛུགས་སྐྱོང་གི་དཔེ་སྟོན་རྫོང་1དང་། ཤང་6 གྲོང་ཚོ་233བཅས་བསྐྲུན་ཡོད། མཛེས་སྡུག་ལྡན་པའི་གྲོང་གསེབ་མགྱོགས་མྱུར་འཛུགས་སྐྲུན་བྱེད་ཆེད། སྔ་རྗེས་སུ་གཞིས་རྩེ་གྲོང་ཁྱེར་གྱི་སྐྱེ་ཁམས་དར་རྒྱས་ཚོགས་ཆུང་གི་ཆེད་དོན་ཚོགས་འདུ་ཐེངས་3འཚོགས་ནས་དབུལ་སྒྲོལ་འགག་སྒྲོལ་གྱི་གྲུབ་འབྲས་སྲ་བརྟན་དང་རྒྱ་སྐྱེད་གཏོང་རྒྱུ་དེ་གྲོང་གསེབ་དར་རྒྱས་དང་འབྲེལ་མཐུད་ནུས་ལྡན་བྱ་རྒྱུར་སྐུལ་འདེད་ཧུར་ཐག་བཏང་ཡོད། སྐྱེ་ཁམས་ཁོར་ཡུག་སྲུང་སྐྱོང་ཁྱབ་ཁོངས་ཀྱི་ལྟ་སྐུལ་ལ་ཤུགས་སྣོན་བརྒྱབ་ནས《ཁོར་ཡུག་སྲུང་སྐྱོང་བཅའ་ཁྲིམས》དང《སྲོལ་ཡིག》གི་གཏན་འབེབས་གཞིར་བཟུང་ཁོར་ཡུག་གི་གནས་ཚུལ་དང་ཁོར་ཡུག་སྲུང་སྐྱོང་གི་དམིགས་ཚད་ལེགས་སྒྲུབ་བྱས་ཚུལ་གྱི་སྙན་སེང་དང་དེ་བཞིན་སྐྱེ་ཁམས་ཤེས་དཔལ་གྱི་མཐོ་ས་སྐྲུན་ཚུལ་གྱི་སྙན་སེང་ཉན་ནས་གྲོས་ཞིབ་བྱས་པ་དང་འབྲེལ་གྲོས་ཞིབ་བསམ་འཆར་ཡང་བཏོན་པ་རེད། འཐུས་མིའི་བྱེད་པོའི་ནུས་པ་བཏོན་ནས་སྐྱེ་ཁམས་ཀྱི་དོན་ཆེན་དོན་ཐོག་ཏུ་འཁྱོལ་བར་སྐུལ་འདེད་གཏོང་བ་དང་། “འབྲེལ་གཏུག་གཉིས”ཀྱི་ལམ་ལུགས་ཟབ་ཏུ་གཏོང་བ། འཐུས་མིའི་བྱེད་སྒོ་ཕུན་སུམ་ཚོགས་སུ་གཏོང་བ་བཅས་བྱས་ཏེ། སྔ་རྗེས་སུ་གྲོང་ཁྱེར་དང་། རྫོང་། ཤང་བཅས་རིམ་པ་གསུམ་གྱི་མི་དམངས་འཐུས་ཚོགས་ཀྱི་འཐུས་མི་སྒྲིག་འཛུགས་བྱས་ནས་ཁོར་ཡུག་འཕྲོད་བསྟེན་ལས་དོན་ལ་དམིགས་ནས་གཅིག་སྡུད་ལྟ་ཞིབ་དང་། ཁྲིམས་བསྟར་ཞིབ་བཤེར། ཆེད་དོན་བརྟག་དཔྱད་ཞིབ་འཇུག་བཅས་ཀྱི་བྱེད་སྒོ་སྤེལ་བ་རེད། གྲོང་ཁྱེར་མི་དམངས་འཐུས་ཚོགས་རྒྱུན་ལས་ཨུ་ལྷན་གྱིས《སྲོལ་ཡིག》སློབ་སྦྱོང་དང་དྲིལ་བསྒྲགས་ལག་བསྟར་གྱི་བཞུགས་མོལ་ཚོགས་འདུ་འཚོགས་ནས《སྲོལ་ཡིག》གི་འབྲེལ་ཡོད་དོན་ཚན་ལ་འགྲེལ་བཤད་བརྒྱབ་པ་དང་། རྫོང(ཆུས)མི་དམངས་འཐུས་ཚོགས་རྒྱུན་ལས་ཨུ་ལྷན་དང་། གྲོང་ཁྱེར་ཐད་གཏོགས་འབྲེལ་ཡོད་སྡེ་ཚན། དེ་བཞིན་གྲོང་ཁྱེར་དང་རྫོང་བཅས་ཀྱི་མི་དམངས་འཐུས་ཚོགས་ཀྱི་འཐུས་མིས་རང་སོ་སོའི་ལས་ཀའི་དོན་དངོས་ནས་འགོ་བཙུགས་ཏེ་གོམ་སྟབས་རྗེས་མའི《རྒྱལ་ཁབ་ཀྱི་སྐྱེ་ཁམས་ཤེས་དཔལ་གྱི་མཐོ་ས་བསྐྲུན་རྒྱུའི་བོད་རང་སྐྱོང་ལྗོངས་ཀྱི་སྲོལ་ཡིག》ལག་བསྟར་དོན་འཁྱོལ་ཐད་སྤེལ་རེས་བྱས་ཏེ《སྲོལ་ཡིག》དོན་འཁྱོལ་ལ་སྐུལ་འདེད་བཏང་ཡོད།

གོམ་སྟབས་རྗེས་མར་གཞིས་རྩེ་གྲོང་ཁྱེར་གྱིས་རྒྱལ་ཁབ་ཀྱི་སྐྱེ་ཁམས་ཤེས་དཔལ་གྱི་མཐོ་ས་ནུས་ཤུགས་ཡོད་རྒུས་འཛུགས་གཏོད་བྱེད་པ་དང་སྐྱེ་ཁམས་ཤེས་དཔལ་འཛུགས་སྐྱོང་རྒྱལ་ཡོངས་ཀྱི་མདུན་གྲལ་དུ་ཧུར་ཐག་གིས་སླེབས་པར་བྱ་རྒྱུའི་སྐོར་གྱི་ལྗོངས་ཏང་ཨུད་དང་གྲོང་ཨུད་ཀྱི་བཀོད་སྒྲིག་བླང་བྱ་གཞིར་བཟུང་། རང་རེའི་གྲོང་ཁྱེར་གྱིས་རྒྱལ་ཁབ་ཀྱི་སྐྱེ་ཁམས་ཤེས་དཔལ་གྱི་མཐོ་ས་འཛུགས་གཏོད་ཀྱི་དུས་བབ་དང་ལས་འགན་ལ་ངོས་འཛིན་གང་ལེགས་བྱེད་པ་དང་། འཛུགས་གཏོད་ཀྱི་དུས་ཡུན་དང་མཚམས་ཚིགས་ཁག་ལ་དམ་པོར་དམིགས་ཏེ་ལས་ཀའི་ཤུགས་རྒྱག་ས་དང་གཙོ་རྒོལ་བྱ་ཡུལ་འཕྱུགས་མེད་བཙལ་ཏེ། གཞིས་རྩེ་གྲོང་ཁྱེར་གྱི་སྐྱེ་ཁམས་ཤེས་དཔལ་གྱི་མཐོ་ས་འཛུགས་སྐྱོང་སྐས་རིམ་གསར་པ་ཞིག་ཏུ་སླེབས་རྒྱུར་སྐུལ་འདེད་གཏོང་རྒྱུ་ཡིན།

སྐྱེ་ཁམས་ཤེས་དཔལ་དར་སྤེལ་བཏང་ནས་མཛེས་སྡུག་ལྡན་པའི་ལྷོ་ཁ་སྐྲུན།

ལྷོ་ཁ་གྲོང་ཁྱེར་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་། ཝང་ཏེ་ཝུན།

《སྲོལ་ཡིག》ཁྱབ་བསྒྲགས་དང་ལག་བསྟར་བྱས་རྗེས་ལྷོ་ཁ་གྲོང་ཁྱེར་གྱིས་སློབ་སྦྱོང་དང་གོ་བ་ནན་ཏན་བླངས་པ་དང་ལག་བསྟར་དོན་འཁྱོལ་གཏིང་ཟབ་བྱས་པས་གཤམ་གསལ་གྱི་བྱེད་ཐབས་གཙོ་བོ་དག་གྲུབ་ཡོད།

2021ལོར་གྲོང་ཁྱེར་མི་དམངས་འཐུས་ཚོགས་རྒྱུན་ལས་ཨུ་ལྷན་གྱིས་ཚོགས་འདུ་ཐེངས་མང་འཚོགས་ཏེ《སྲོལ་ཡིག》སློབ་སྦྱོང་དང་གོ་བ་གཏིང་ཟབ་བླངས་ཤིང་། ད་ལོའི་ལོ་སྟོད་དུ་གྲོང་ཁྱེར་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི་ཏང་ཙུའི་རིགས་པའི་གཞུང་ལུགས་སློབ་སྦྱོང་ལྟེ་བའི་ཚོགས་ཆུང་གིས“ཞི་ཅིན་ཕིང་གི་སྐྱེ་ཁམས་ཤེས་དཔལ་གྱི་དགོངས་པ་སློབ་སྦྱོང་ལག་བསྟར་གཏིང་ཟབ་བྱས་ཏེ་རྒྱལ་ཁབ་ཀྱི་སྐྱེ་ཁམས་ཤེས་དཔལ་གྱི་མཐོ་ས་འཛུགས་གཏོད་ལ་ཤུགས་སྣོན་རྒྱག་པ་དང་སྐྱེ་ཁམས་ཤེས་དཔལ་འཛུགས་སྐྱོང་རྒྱལ་ཡོངས་ཀྱི་མདུན་གྲལ་དུ་ཧུར་ཐག་གིས་སླེབས་པར་བྱེད་པའི”བརྗོད་དོན་གཙོ་བོར་སློབ་སྦྱོང་བགྲོ་གླེང་བྱས་ཏེ། སྐྱེ་ཁམས་ཤེས་དཔལ་འཛུགས་གཏོད་བྱེད་ཤུགས་ཆེ་རུ་བཏང་བས་གྲོང་ཁྱེར་ཡོངས་ཀྱི་སྐྱེ་ཁམས་ཁོར་ཡུག་འཛུགས་སྐྲུན་སྲུང་སྐྱོང་དང་སླར་གསོ་བཅོས་སྐྱོང་ལས་དོན་ལ་གྲུབ་འབྲས་མངོན་གསལ་དོད་པོ་ཐོབ་ཡོད།

སྐྱེ་ཁམས་གྲོང་ཁྱེར་སྟོབས་ཆེན་གྱི་འཐབ་ཇུས་ལག་བསྟར་ཤུགས་ཆེན་བྱས་ནས“ཏང་སྲིད་འགན་འཁྲི་གཅིག་མཚུངས་དང་ལས་གནས་གཅིག་ལ་འགན་འཁྲི་གཉིས”ཀྱི་བྱེད་པོའི་འགན་འཁྲི་དོན་འཁྱོལ་ནན་ཏན་བྱས་ཤིང་། འཆར་འགོད་སྣེ་ཁྲིད་མཐའ་འཁྱོངས་བྱས་ཏེ《བོད་ལྗོངས་ལྷོ་ཁ་གྲོང་ཁྱེར་གྱི་སྐྱེ་ཁམས་ཤེས་དཔལ་འཛུགས་སྐྱོང་འཆར་འགོད(2020ལོ་ནས་2025ལོ་བར)》སོགས་འཆར་འགོད་རབ་དང་རིམ་པ་དང《ལྷོ་ཁ་གྲོང་ཁྱེར་གྱི་སྐྱེ་ཁམས་ཤེས་དཔལ་འཛུགས་སྐྱོང་ལྗོངས་ཡོངས་ཀྱི་མདུན་གྲལ་དུ་སླེབས་རྒྱུར་སྐུལ་འདེད་ཤུགས་ཆེན་གཏོང་བའི་ལག་བསྟར་ཇུས་གཞི》དང་དེ་བཞིན་འབྲེལ་ཡོད་ཀྱི་སྲིད་ཇུས་རང་བཞིན་གྱི་ཡིག་ཆ་དང་འགན་འཁྲིའི་གསལ་ཐོ་བཟོས་ནས་ལག་བསྟར་བྱས་ཡོད། ལྷོ་ཁ་གྲོང་ཁྱེར་མི་དམངས་འཐུས་ཚོགས་རྒྱུན་ལས་ཨུ་ལྷན་གྱིས་ན་ནིང་གི་ཟླ་གསུམ་པར“ལོ་ལྔ་ཚན་བཅུ་བཞི་པའི”རིང་གི་མི་དམངས་འཐུས་ཚོགས་ལས་དོན་གྱི་ལོ་ལྔའི་འཆར་འགོད་གཙོ་གནད་གསར་གཏོད་དང་གཏན་འཁེལ་བྱས་ཤིང་། ད་ལོའི་ཟླ་བཞི་པར་བཟོས་པའི་གྲོང་ཁྱེར་མི་དམངས་འཐུས་ཚོགས་སྐབས་གཉིས་པའི་རྒྱུན་ལས་ཨུ་ལྷན་གྱི་ལོ་ལྔའི་ཁྲིམས་འཛུགས་འཆར་འགོད་ཁྲོད་སྐྱེ་ཁམས་ཁོར་ཡུག་སྲུང་སྐྱོང་གི་ནང་དོན་གྱིས་བསྡུར་ཚད་མཐོ་པོ་བཟུང་ཡོད།

ལྷོ་ཁ་གྲོང་ཁྱེར་གྱིས་ཆ་ཚང་ཞིང་གནད་ལ་འཁེལ་བ་དང་ཕྱོགས་ཡོངས་ཀྱི་སྒོ་ནས་འཕེལ་རྒྱས་ཀྱི་འདུ་ཤེས་གསར་པ་ལག་བསྟར་བྱས་ཏེ་སྐྱེ་ཁམས་ཞིང་འབྲོག་ལས་དང་། ཁྱད་ལྡན་ཐོན་ལས། ནུས་རྒྱུ་གཙང་མ། སྐྱེ་ཁམས་ཡུལ་སྐོར་སོགས་འཕེལ་རྒྱས་གཏིང་ཟབ་འགྲོ་བར་སྐུལ་འདེད་ཤུགས་ཆེན་བཏང་སྟེ། སྐྱེ་ཁམས་ཤེས་དཔལ་འཛུགས་སྐྱོང་གི་དཔེ་སྟོན་འཛུགས་གཏོད་ལ་སྐུལ་འདེད་ཧུར་ཐག་བཏང་ཡོད། ལྷོ་ཁ་གྲོང་ཁྱེར་གྱིས“རྒྱལ་ཁབ་ཀྱི་སྐྱེ་ཁམས་ཤེས་དཔལ་འཛུགས་སྐྱོང་གི་དཔེ་སྟོན་གྲོང་ཁྱེར”གྲུབ་འབྲས་ཐོབ་པའི་ངང་འཛུགས་གཏོད་བྱས་པ་དང་། ལྷུན་རྩེ་རྫོང་གིས་ལྗོངས་ཡོངས་ཀྱི་རྒྱལ་ཁབ་ཀྱི“རི་སྔོན་ཆུ་དྭངས་གསེར་དངུལ་ལས་ལྷག་པའི”ལག་ལེན་གསར་གཏོད་རྟེན་གཞི་ཐོག་མ་གྲུབ་འབྲས་ཐོབ་པའི་ངང་འཛུགས་གཏོད་བྱས་ཡོད། རིམ་རྩིས་བྱས་ན་རང་སྐྱོང་ལྗོངས་རིམ་པའི་སྐྱེ་ཁམས་རྫོང(ཆུས)7དང་། སྐྱེ་ཁམས་ཤང(གྲོང་རྡལ)73 སྐྱེ་ཁམས་གྲོང་ཚོ(གྲོང་ལྷན)518བཅས་འཛུགས་གཏོད་བྱས་པ་རེད། ཡར་ཀླུང་གཙང་པོ་རྒྱུག་ཁུལ་དང་ལྷུན་རྩེ་གཙང་པོ་རྒྱུག་ཁུལ་སོགས་སྐྱེ་ཁམས་མ་ལག་སྲུང་སྐྱོང་དང་སྐྱེ་ཁམས་འདུ་འགོད་གལ་ཆེན་སྐྲུན་ཐབས་ལག་བསྟར་གཏིང་ཟབ་བྱས་ཡོད།

མིག་སྔར། ལྷོ་ཁ་གྲོང་ཁྱེར་མི་དམངས་འཐུས་ཚོགས་རྒྱུན་ལས་ཨུ་ལྷན་གྱིས《ལྷོ་ཁ་གྲོང་ཁྱེར་གྱི་གླ་ཚེར་ནགས་ཚལ་སྲུང་སྐྱོང་གི་སྲོལ་ཡིག》ལ་གྲོས་ཞིབ་ཐེངས་གཉིས་པ་བྱེད་གྲབས་ཡོད་ལ། ལྷོ་ཁ་གྲོང་ཁྱེར་གྱིས་སྣེ་ཁྲིད་དེ་སྒྲིག་འཛུགས་བྱས་ཤིང་ཡར་ཀླུང་གཙང་པོ་དང་འབྲེལ་བའི་གྲོང་ཁྱེར་བཞི་ཡིས་སྡེབ་གཅིག་ཏུ་སྐུལ་འདེད་གཏོང་རྒྱུའི《ཡར་ཀླུང་གཙང་པོ་རྒྱུག་ཁུལ་གྱི་སྐྱེ་ཁམས་ཁོར་ཡུག་སྲུང་སྐྱོང་སྲོལ་ཡིག》མཉམ་དུ་བཟོས་པ་དང་སྲོལ་ཡིག་འཆར་ཟིན་ལེགས་གྲུབ་བྱས་ཏེ། ལྷོ་ཁ་གྲོང་ཁྱེར་གྱི“གཙང་པོ་གཅིག་དང་། མཚོ་གཅིག ལྗོན་ཤིང་གཅིག”བཅས་ཕྱོགས་ཡོངས་ནས་སྲུང་སྐྱོང་གི་ལས་དོན་ཁྲིམས་སྐྱོང་ཅན་གྱི་ལམ་དུ་བསྐྱོད་ཡོད།

ད་ལོར“ཁོར་ཡུག་སྲུང་སྐྱོང་གི་བཅོས་སྒྲིག་ལ་དམ་འཛིན་གྱིས་དྭངས་གཙང་་ཆུ་མོ་དང་ནམ་མཁའ་སྔོན་པོ་སྲུང་སྐྱོང”བརྗོད་དོན་གཙོ་བོར་བྱས་པའི“ཡར་ཀླུང་གཙང་པའི་ཁོར་ཡུག་སྲུང་སྐྱོང་བྱ་སྤྱོད”ལ་བརྟེན་པ་དང་། ཁོར་ཡུག་སྲུང་སྐྱོང་བཅའ་ཁྲིམས་དང་། རང་སྐྱོང་ལྗོངས་ཀྱི་རྒྱལ་ཁབ་ཀྱི་སྐྱེ་ཁམས་ཤེས་དཔལ་གྱི་མཐོ་ས་འཛུགས་གཏོད་སྲོལ་ཡིག་དང་ཁོར་ཡུག་སྲུང་སྐྱོང་ལྟ་ཞིབ། ནགས་ཚལ་ལྟ་སྐུལ་ཞིབ་བཤེར་གྱི་གནད་དོན་བཅོས་སྒྲིག་དོན་འཁྱོལ་ལ་གཙོ་གནད་ཐོག་ཤུགས་སྣོན་རྒྱག་པ་བཅས་ལ་དམ་པོར་དམིགས་ནས་ཞན་ཆ་བཙལ་འཚོལ་གྱིས་བསམ་འཆར་དང་གྲོས་འགོ་བཏོན་པ་རེད། དེ་དང་ཆབས་ཅིག་གྲོང་ཁྱེར་མི་དམངས་འཐུས་ཚོགས་རྒྱུན་ལས་ཨུ་ལྷན་གྱིས་ལོ་ལྟར་ལོ་འཁོར་གོང་མའི་ཁོར་ཡུག་སྤུས་ཚད་ཀྱི་གནས་ཚུལ་དང་ཁོར་ཡུག་སྲུང་སྐྱོང་གི་དམིགས་ཚད་ལེགས་སྒྲུབ་བྱས་ཚུལ་སྐོར་གྱི་གྲོང་ཁྱེར་སྲིད་གཞུང་གི་སྙན་སྒྲོན་ལ་གྲོས་ཞིབ་བྱས་པ་དང་། འབྲེལ་ཡོད་བཅའ་ཁྲིམས་དང་ཁྲིམས་སྲོལ་ཐད་ཁྲིམས་འཛིན་ཞིབ་བཤེར་དང་བློ་ཡིད་ཚིམ་ཚད་བརྟག་ནས་ལྟ་སྐུལ་བྱེད་ཤུགས་ཟམ་མི་ཆད་པར་ཆེ་རུ་བཏང་ཡོད།

2021ལོར་གྲོང་ཁྱེར་ཡོངས་ཀྱི་མི་དམངས་འཐུས་ཚོགས་ཁོངས་གཏོགས་རྩ་འཛུགས་ཀྱིས“སྐྱེ་ཁམས་ཤེས་དཔལ་དར་སྤེལ་བཏང་ནས་མཛེས་སྡུག་ལྡན་པའི་ལྷོ་ཁ་སྐྲུན་པའི”བརྗོད་དོན་གཙོ་བོའི་བྱེད་སྒོ་སྤེལ་བ་དང་། རིམ་ཁག་མི་དམངས་འཐུས་ཚོགས་ཀྱི་འཐུས་མི་3000ཙམ་ཞུགས་ནས་དྲིལ་བསྒྲགས་དཔྱད་ཡིག་ཁྲི་10ལྷག་ཙམ་སྤྲད་ཡོད། གྲོང་ཁྱེར་ཡོངས་ཀྱི་རིམ་ཁག་མི་དམངས་འཐུས་ཚོགས་ཀྱི་འཐུས་མིས་གྲོང་ཁྱེར་དང་གྲོང་གསེབ་ཀྱི་ཁོར་ཡུག་མཛེས་བཟོའི་ལྟ་སྐུལ་ཞིབ་བཤེར་བྱེད་སྒོར་ཧུར་ཐག་ཞུགས་ནས་སྐྱེ་ཁམས་ཁོར་ཡུག་སྲུང་སྐྱོང་དང་། ཉམས་གསོ། སྦགས་བཙོག་འགོག་བཅོས་དང་ཁོར་ཡུག་སྲུང་སྐྱོང་གི་མངོན་གསལ་དོད་པའི་གནད་དོན་བཅོས་སྒྲིག་བཅས་ནང་དོན་གཙོ་བོར་བྱས་པའི་འཐུས་མིའི་ལྟ་ཞིབ་བྱེད་སྒོ་གཏིང་ཟབ་སྤེལ་ཞིང་། གད་སྙིགས་གཙང་སེལ་དབོར་འདྲེན་དང་། མཛེས་སྡུག་ལྡན་པའི་གྲོང་གསེབ་འཛུགས་སྐྲུན་དྲིལ་བསྒྲགས། ཤེས་དཔལ་གྲོང་ཚོ(གྲོང་ལྷན) ཤེས་དཔལ་ཁྱིམ་ཚང་འཛུགས་གཏོད་སོགས་ཀྱི་བྱེད་སྒོ་སྤེལ་ཡོད།

ང་ཚོས《སྲོལ་ཡིག》མུ་མཐུད་སློབ་སྦྱོང་དང་ལག་བསྟར་གཏིང་ཟབ་བྱས་ཏེ་སྐྱེ་ཁམས་ཁོར་ཡུག་སྲུང་སྐྱོང་སྐོར་གྱི་ཁྲིམས་སྲོལ་ལམ་ལུགས་ལ་དམ་འཛིན་ཏན་ཏིག་དང་། སྐྱེ་ཁམས་ཁོར་ཡུག་སྲུང་སྐྱོང་གི་ལྟ་སྐུལ་ལས་དོན་གྱི་ཕན་འབྲས་ཟམ་མི་ཆད་པར་ཆེ་རུ་གཏོང་བ། རིམ་ཁག་མི་དམངས་འཐུས་ཚོགས་ཀྱི་འཐུས་མིའི་ནུས་པ་འདོན་སྤེལ་གང་ལེགས། “སྐྱེ་ཁམས་སྲུང་སྐྱོང་གི་དམར་ཐིག་དང་། ཁོར་ཡུག་སྤུས་ཚད་ཀྱི་མཐའ་ཚད། ཐོན་ཁུངས་བེད་སྤྱོད་ཀྱི་ཚད་གཞི། ཁོར་ཡུག་ཆོག་འཐུས་ཀྱི་གསལ་ཐོ”བཅས་དོན་འཁྱོལ་ནན་པོ་བྱས་ཏེ་ལྷོ་ཁ་གྲོང་ཁྱེར་གྱི་སྐྱེ་ཁམས་ཤེས་དཔལ་འཛུགས་སྐྱོང་ལྗོངས་ཡོངས་ཀྱི་མདུན་གྲལ་དུ་སླེབས་རྒྱུར་སྐུལ་འདེད་གཏོང་ཆེད་མི་དམངས་འཐུས་ཚོགས་ཀྱི་ལེགས་སྐྱེས་འབུལ་བར་བརྩོན་རྒྱུ་མ་ཟད། བྱ་སྤྱོད་དངོས་ཀྱི་ཐོག་ནས་ཏང་གི་ཚོགས་ཆེན་ཉི་ཤུ་པ་རྒྱལ་ཁའི་ངང་འཚོག་རྒྱུར་བསུ་བ་ཞུ་རྒྱུ་ཡིན།

རྩོམ་སྒྲིག་པ། ཀླུ་འབུམ་ཚེ་རིང་།

དཔྱད་མཆན 0 ཡོད།