ཀྲུང་གོ་བོད་ཀྱི་དྲ་བའི་འཕྲིན། ཟླ3པའི་ཚེས6ཉིན་ནས་ཚེས9ཉིན་བར། 2023ལོའི་རྨ་ཆུའི་སྟོད་རྒྱུད་ཀྱི་མི་དང་རང་བྱུང་ཁམས་འཆམ་མཐུན་མཉམ་གནས་ཀྱི་ཕྱོགས་བསྡུས་རྟོག་ཞིབ་བྱ་འགུལ་རྨ་ཆེན་གངས་རི་ནས་སྤེལ་མགོ་བརྩམས་པ་དང་། བྱ་འགུལ་སྤེལ་བའི་དམིགས་ཡུལ་ནི་གཏིང་ཟབ་མོས་ངང་རྨ་ཆུའི་ཆུ་མགོའི་སྐྱེ་ཁམས་ཁོར་ཡུག་གི་གནས་ཚུལ་ཤེས་རྟོགས་བྱས་ནས། དུས་ཐོག་ཏུ་འཁྱགས་རོམ་ཞན་འགྱུར་གྱི་གནས་ཚུལ་ཤེས་རྟོགས་བྱེད་པ་དང་། གཙང་གསུམ་འབྱུང་ཡུལ་རྨ་ཆུའི་སྟོད་རྒྱུད་ཀྱི་འབྲེལ་ཡོད་སྐྱེ་ཁམས་ཁོར་ཡུག་སྲུང་སྐྱོང་དང་ས་གཤིས་ཀྱི་གནོད་འཚེ་སྔོན་བརྡ་གཏོང་ཆེད་རེད།
ཐེངས་འདིའི་ཚན་རིག་རྟོག་ཞིབ་དེ་གཙང་གསུམ་འབྱུང་ཡུལ་སྐྱེ་ཁམས་སྲུང་སྐྱོང་ཐེབས་རྩ་ཚོགས་པས་སྣེ་ཁྲིད་པ་དང་། ཀྲུང་གོ་ཚན་རིག་ཁང་གི་སློབ་ཆེན་དང་ཀྲུང་གོ་ཚན་རིག་ཁང་ནུབ་བྱང་སྐྱེ་ཁམས་ཁོར་ཡུག་ཐོན་ཁུངས་ཞིབ་འཇུག་ཁང་། མཚོ་སྔོན་སློབ་ཆེན་རྒྱལ་ཁབ་གཙོ་གནད་ཚོད་ལྟ་ཁང་བཅས་མཉམ་དུ་སྤེལ་བ་རེད། རྟོག་ཞིབ་ཚོགས་པ་ཡུལ་དངོས་སུ་སོང་ནས་རྨ་ཆེན་གངས་རི་དང་དེའི་ཉེ་འཁོར་ས་ཁུལ་གྱི་འཁྱགས་རོམ་དང་ཆུའི་ཐོན་ཁུངས་ཀྱི་འགྱུར་ལྡོག གནམ་གཤིས་ངན་པའི་རྐྱེན་གྱིས་སྒོ་ཕྱུགས་དང་། རི་སྐྱེས་སྲོག་ཆགས། འབྲོག་པའི་འཚོ་གནས་བཅས་ལ་ཐེབས་པའི་ཤུགས་རྐྱེན་སོགས་ལ་རྟོག་ཞིབ་བྱས་པ་མ་ཟད། ཉེ་འཁོར་གྱི་སྐྱེ་ཁམས་ཕྱུགས་ལས་འཕེལ་རྒྱས་འགྲོ་ཚུལ་སོགས་ལ་དམིགས་ནས་ཡུལ་དངོས་སུ་རྟོག་ཞིབ་དང་ཞིབ་འཇུག་བྱས་པ་རེད།
ངོ་སྤྲོད་བྱས་པ་ལྟར་ན། རྟོག་ཞིབ་བྱ་ཡུལ་ནང་གི་འཁྱག་རོམ་སྲུང་སྐར་རྒྱང་ཚོར་བརྙན་ཕབ་དང་། ཞིབ་འཇུག་ཁུལ་གྱི་རང་བྱུང་མི་ཆོས་ཐོན་ཁུངས་བརྟག་དཔྱད་ཀྱི་མ་གནས། གཙང་བོ་སོ་སོའི་དཔེ་མཚོན་ཆུ་གནས་དང་ས་རྒྱུ། རྩི་ཤིང་ཐཱན་གསོག་ཚད་སོགས་དང་རྨ་ཆུའི་སྟོད་རྒྱུད་ཀྱི་ཆུ་བོ་འབབ་རྒྱུད་ཀྱི་མི་དང་རང་བྱུང་ཁམས་འཆམ་མཐུན་མཉམ་གནས་ཀྱི་གཅིག་གྱུར་འཆར་འགོད་སོགས་ཀྱི་སྙན་ཞུ་སྤེལ་རྒྱུ་ཡིན་ལ། ནང་དོན་ཐད་ཞིབ་འཇུག་ཁུལ་གྱི་རང་བྱུང་ཐོན་ཁུངས་གསོག་འཇོག་དང་། མི་ཆོས་མཛེས་ལྗོངས། རང་བྱུང་གནོད་འཚེའི་ཉེན་ཁའི་ཚོད་ཞིབ། ཉེ་འཁོར་གྱི་སྐྱེ་ཁམས་ཕྱུགས་ལས་འཕེལ་རྒྱས། དམངས་འཚོའི་གྲོང་གསེབ་དར་སྤེལ་སོགས་འདུས། །