ཀྲུང་གོ་བོད་ཀྱི་དྲ་བའི་འཕྲིན། ཟླ2པའི་ཚེས6ཉིན། གསར་འགོད་པས་མཚོ་སྔོན་གནམ་གྲུ་ཐང་ཚད་ཡོད་ཀུང་སིའི་ན་གོར་མོ་གནམ་གྲུ་ཐང་ཡན་ལག་ཀུང་སི་ནས་ཤེས་གསལ་ལྟར་ན། 2023ལོའི་ཟླ1པོར། ན་གོར་མོ་གནམ་གྲུ་ཐང་དུ་དུས་གཏན་གནམ་གྲུ་ཐེངས146འཕུར་བ་དང་། འགྲུལ་པ་སྐྱེལ་འདྲེན་བྱེད་ཚད་མི་ཐེངས11318ཟིན། དངོས་ཟོག་སྐྱེལ་འདྲེན་བྱེད་ཚད་ཏུན32ཟིན་པ་དང་། སོ་སོར་དུས་མཉམ་ལས1.4%དང་། 18.9%། 298%བཅས་འཕར་ཡོད། འགྲུལ་བའི་ཆ་སྙོམས་སྡོད་ཚད59.1%ཟིན་པ་དང་། དེ་ལོ་གོང་མའི་དུས་མཉམ་ལས་བརྒྱ་ཆའི་ཚེག8འཕར་ནས། འགྲུལ་པ་དང་དངོས་ཟོག་སྐྱེལ་འདྲེན་ཐད་ནས་གྲུབ་འབྲས་བཟང་བོ་བླངས།
མགྱོགས་མྱུར་ངང་ལས་རིགས་གཙོ་བོ་འཕེལ་རྒྱས་འགྲོ་རྒྱུར་སྐུལ་འདེད་གཏོང་ཆེད། ན་གོར་མོ་གནམ་གྲུ་ཐང་ཡན་ལག་ཀུང་སིས་མཁའ་འགྲུལ་ཀུང་སི་དང་འབྲེལ་གཏུག་མཐུན་སྦྱོར་བྱས་ནས། ཟླ1པོའི་ཟླ་འགོར་ཟི་ལིང་དང་ཞི་ཨན། ཝུན་ཀྲོའུ་བཅས་ཀྱི་དུས་གཏན་གནམ་གྲུ་སླར་གསོ་བྱས་ཏེ་འགྲུལ་པ་འགྲོ་སྐྱོད་ལ་སྟབས་བདེ་བསྐྲུན། དེ་དང་ཆབས་ཅིག ཟི་ལིང་ནས་ན་གོར་མོ་བར་གྱི་རིན་གོང་དམའ་ཤོས་ཀྱི་གནམ་གྲུའི་པ་སེ་སྒོར500མར་བཅག་ནས། “ཚོང་ར་དང་མཛེས་ལྗོངས་ཁུལ། ཁེ་ལས། ཟོག་འདྲེན”བཅས་ཀྱི་མཁའ་ལམ་གྱི་དུས་གཏན་གནམ་གྲུའི་ཆེད་དོན་གཉེར་ཚོང་བྱེད་སྒོ་སྤེལ་བ་དང་འབྲེལ། འགྲུལ་ཁུངས་སྒྲིག་འཛུགས་ལ་ཤུགས་སྣོན་བརྒྱབ་ནས། ཧྲུན་ཧྥུན་ན་གོར་མོ་ཡན་ལག་ཀུང་སིས་མཁའ་འགྲུལ་ཟོག་འདྲེན་གྲངས་འབོར་ཇེ་མང་དུ་བཏང་། །