ཀྲུང་གོ་བོད་ཀྱི་དྲ་བའི་འཕྲིན། ཟླ1པོའི་ཚེས17ཉིན། གསར་འགོད་པས་ཞིང་ཆེན་བུད་མེད་མཉམ་འབྲེལ་ལྷན་ཚོགས་ནས་ཤེས་རྟོགས་བྱུང་བ་ལྟར་ན། 《ཁྱིམ་སྐྱོང་ཞབས་ཞུའི་ལས་རིགས་ཀྱི་སྤུས་ཚད་དང་རྒྱ་སྐྱེད་ལ་སྐུལ་འདེད་གཏོང་རྒྱུའི་སྐོར་གྱི་རྒྱལ་སྲིད་སྤྱི་ཁྱབ་ཁང་གི་གཞུང་ལས་ཐིང་གི་བསམ་འཆར》གྱི་དགོངས་དོན་ལག་བསྟར་དོན་འཁྱོལ་གཏིང་ཟབ་བྱས། མཚོ་སྔོན་ཞིང་ཆེན་གྱི་ཁྱིམ་ལས་ཞབས་ཞུ་གྲགས་ཅན་དུ་གཏོད་རྒྱུར་ཤུགས་སྣོན་བརྒྱབ་ནས་ངལ་རྩོལ་པ་དང་ལྷག་པར་དུ་བུད་མེད་ངལ་རྩོལ་པ་དེ་ལས་མང་པོ་ཞིག་གི་ལས་ཞུགས་དང་བྱ་གཞག་གསར་གཏོད་བྱེད་རྒྱུར་སྐུལ་འདེད་བཏང་སྟེ། 2021ལོར་ཞིང་ཆེན་རིམ་པའི་བུད་མེད་མཉམ་འབྲེལ་ལྷན་ཚོགས་ཀྱིས་ཞིང་ཆེན་རིམ་པའི་མང་ཚོགས་ཚོགས་པའི་མཐུན་སྦྱོར་ཅན་གྱི་རྣམ་གྲངས་ལ་རྒྱབ་སྐྱོར་ཐོབ་རྒྱུར་བརྩོན་ལེན་བྱས་ནས། བུད་མེད་ཀྱི་ཁྱིམ་ལས་ཞབས་ཞུའི“སྣེ་ཁྲིད་པའི”བྱ་འགུལ་སྤེལ་ཞིང་། ཉེ་ཆར་ཞིང་ཆེན་བུད་མེད་མཉམ་འབྲེལ་ལྷན་ཚོགས་ཀྱིས་སྣེ་ཁྲིད་ཁེ་ལས3ལ་སྒོ་བྱང་བཀལ།
ཞིང་ཆེན་བུད་མེད་མཉམ་འབྲེལ་ལྷན་ཚོགས་ཀྱིས་མ་བུའི་ནད་གཡོག་དང་རྒན་གསོའི་ནད་གཡོག ཁྱིམ་ལས་ཞབས་ཞུ་བཅས་གཙོ་གནད་ཁྱབ་ཁོངས3ལ་དམིགས་ནས། ཁེ་ལས་ཀྱི་གཞི་ཁྱོན་དང་འཕེལ་རྒྱས་ཀྱི་མངོན་མེད་སྟོབས་ཤུགས། དཔེ་སྟོན་ཕན་འབྲས་སོགས་ཀྱི་རྒྱུ་རྐྱེན་ཕྱོགས་བསྡུས་དཔྱད་བསྡུར་གཏན་འབེབས་བྱས་ཏེ། མཚོ་སྔོན་ཞིང་ཆེན་གྱི་གསར་དུ་གསལ་སྟོན་བྱས་པའི་ཁྱིམ་སྡོད་རྒན་གསོའི་ཞབས་ཞུ་ལྟེ་གནས་དང་། མཚོ་སྔོན་དུ་ཁྱིམ་ཚང་ཞབས་ཞུའི་ཚད་ཡོད་ཀུང་སི། ཟི་ལིང་དམངས་དོན་ཁྱིམ་ལས་ཞབས་ཞུའི་ཚད་ཡོད་ཀུང་སི་བཅས་ཁེ་ལས་ཀྱི་སྣེ་ཁྲིད་དུ་བཟུང་། སྣེ་ཁྲིད་ཁེ་ལས་རེ་རེར་རོགས་སྐྱོར་མ་དངུལ་སྒོར་ཁྲི5རེ་སྤྲད་པ་དང་། དེ་དག་ལས་བཟོའི་ལས་སྒོའི་གསོ་སྦྱོང་དང་ཁེ་ལས་ཀྱི་སྤུས་ཚད་མཐོར་རུ་གཏོང་བ། ཡིད་རྟོན་མ་ལག་འཛུགས་སྐྱོང་སོགས་གཙོ་གནད་དུ་བཟུང་སྟེ། མཚོ་སྔོན་ཞིང་ཆེན་གྱི་བུད་མེད་ཁྱིམ་ལས་ཞབས་ཞུ་ཚད་ལྡན་ཅན་དང་ལས་རིགས་ཅན། ཚད་གཞི་ཅན། ཁ་དན་ཚིག་གནས་ཅན་བཅས་ཀྱི་འཕེལ་རྒྱས་ལ་སྐུལ་འདེད་བཏང་བ་རེད།
ཉེ་བའི་ལོ་ཤས་རིང་། མཚོ་སྔོན་ཞིང་ཆེན་གྱི་ཁྱིམ་ལས་ཞབས་ཞུའི་ཁེ་ལས་བདེ་འཇགས་དང་གོ་རིམ་ལྡན་པའི་ངང་འཕེལ་རྒྱས་སུ་ཕྱིན་ཡོད། སྣེ་ཁྲིད་ཁེ་ལས་ཀྱིས་དཔེ་སྟོན་གྱི་ནུས་པ་འདོན་སྤེལ་བྱ་རྒྱུར་སྣང་ཆེན་བྱས་ནས་ཁེ་ལས་ཀྱི་ལས་བཟོའི་ལས་སྒོའི་རྩལ་ནུས་དང་བཅའ་ཁྲིམས་སྲིད་ཇུས་གསོ་སྦྱོང་བྱེད་ཤུགས་ཆེ་རུ་བཏང་སྟེ་ལས་སྒོའི་བྱང་ཚད་དང་ནུས་པ་ཆེ་རུ་གཏོང་རྒྱུ་རེད། །