དབྱི་རག་དམག་ཕྱོགས་ཀྱིས་སི་རི་ཡཱ་ནས་ཕྱིར་འཐེན་བྱས་པའི་ཨ་མེ་རི་ཁའི་དམག་དཔུང་དབྱི་རག་ཏུ་བཀོད་སྒྲིག་བྱེད་པའི་ཆོག་མཆན་ཐོབ་མེད་པའི་ཚུལ་བསྟན།

ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། དབྱི་རག་དམག་ཕྱོགས་ཀྱིས་ཚེས་ཉེར་གཉིས་ཉིན་བསྟན་དོན། སི་རི་ཡཱའི་བྱང་ཤར་ས་ཁུལ་ནས་ཕྱིར་འཐེན་བྱས་པའི་ཨ་མེ་རི་ཁའི་དམག་མི་སྟོང་གཅིག་ཙམ་པོ་དེ་དབྱི་རག་གི་མངའ་ཁོངས་བརྒྱུད་པ་ཙམ་ཡིན་ལ། ཁོ་ཚོ་དབྱི་རག་ཏུ་བཀོད་སྒྲིག་བྱེད་པའི་ཆོག་མཆན་ཐོབ་མེད་ཟེར། 

དབྱི་རག་མཉམ་འབྲེལ་འགུལ་སྐྱོད་བཀོད་འདོམ་པུའུ་ཡིས་ཉིན་དེར་སྤེལ་བའི་གསལ་སྒྲོག་ལྟར་ན། སི་རི་ཡཱ་ནས་ཕྱིར་འཐེན་བྱས་པའི་ཨ་མེ་རི་ཁའི་དམག་དཔུང་དེ་དབྱི་རག་གི་ཁུའུ་ཨར་ཏི་ས་ཁུལ་དུ་འགྲོ་བར་ཆོག་མཆན་ཐོབ་ཡོད་ཀྱང་། ཁོ་ཚོ་དབྱི་རག་གི་མངའ་ཁོངས་སུ་བཀོད་སྒྲིག་བྱེད་པའི་ཆོག་མཆན་ཐོབ་མེད་པས། དམག་དཔུང་དེ་དབྱི་རག་དང་ཁ་འབྲལ་ངེས་ཡིན་ཟེར། 

ཨ་མེ་རི་ཁའི་རྒྱལ་སྲུང་བློན་ཆེན་ཨེ་སི་པའོ་ཡིས་ཚེས་བཅུ་དགུའི་ཉིན་བསྟན་དོན། སི་རི་ཡཱའི་བྱང་ཤར་ཕྱོགས་ནས་ཕྱིར་འཐེན་བྱས་པའི་ཨ་མེ་རི་ཁའི་དམག་མི་སྟོང་གཅིག་ཙམ་པོ་དེ་དབྱི་རག་ནུབ་ཕྱོགས་ས་ཁུལ་དུ་བཀོད་སྒྲིག་བྱས་ཏེ། དབྱི་སི་ལན་རྒྱལ་ཁབ་ཅེས་པའི་ཐལ་སྤྱོད་རྩ་འཛུགས་ལ་ཆམ་ཕབ་གཏོང་བ་སོགས་ཀྱི་ལས་འགན་ལག་བསྟར་བྱེད་རྒྱུ་ཡིན་ཟེར། །

རྩོམ་སྒྲིག་པ། ཚེ་མཁར་རྒྱལ།

དཔྱད་མཆན 0 ཡོད།