ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ཀྲུང་དབྱང་སྒྲིག་ཨུའི་རྒྱལ་ཁབ་ལྟ་ཞིབ་ཨུ་ལྷན་གྱི་དྲ་ཚིགས་ཐོག་ཚེས27ཉིན་རྒྱལ་ཡོངས་སུ་ཀྲུང་དབྱང་གི་གཏན་འབེབས་དོན་ཚན་བརྒྱད་ཀྱི་དགོངས་དོན་དང་འགལ་བའི་གནད་དོན་གནས་ཚུལ་གྱི་གཞི་གྲངས་ཡོངས་བསྒྲགས་བྱས་པ་རེད། བརྡ་ཁྱབ་ནང་མངོན་པར་གཞིགས་ན། ད་ལོའི་ཟླ5པར་རྒྱལ་ཡོངས་སུ་ཀྲུང་དབྱང་གི་གཏན་འབེབས་དོན་ཚན་བརྒྱད་ཀྱི་དགོངས་དོན་ལས་འགལ་བའི་གནད་དོན7778ཞིབ་བཤེར་ཐག་གཅོད་བྱས་པ་དང་། མི11299(ས་ཁུལ་དང་ཐིང་རིམ་པའི་ལས་བྱེད་པ36དང་རྫོང་དང་ཁྲུའུ་རིམ་པའི་ལས་བྱེད་པ692ཚུད)ལ་ཁ་ཏ་སློབ་གསོའི་རོགས་རམ་དང་ཐག་གཅོད་བྱས་ཤིང་། མི7822ལ་ཏང་གི་སྒྲིག་ཁྲིམས་དང་སྲིད་དོན་གྱི་ཆད་པ་བཅད།
བརྡ་ཁྱབ་བཏང་བར་གཞིགས་ན། ད་ལོའི་ཟླ5པར་རྒྱལ་ཡོངས་སུ་ཕྱི་ཚུལ་རིང་ལུགས་དང་དཔོན་ཉམས་རིང་ལུགས་ཀྱི་གནད་དོན3892ཞིབ་བཤེར་ཐག་གཅོད་བྱས་པ་དང་། མི6092ལ་ཁ་ཏ་སློབ་གསོའི་རོགས་རམ་དང་ཐག་གཅོད་བྱས། དེའི་ནང“འགན་འཁྲི་གཙང་སྒྲུབ་དང་དཔལ་འབྱོར་དང་སྤྱི་ཚོགས་འཕེལ་རྒྱས་ལ་ཞབས་འདེགས་ཞུ་བ། སྐྱེ་ཁམས་ཁོར་ཡུག་སྲུང་སྐྱོང་ལ་ཞབས་འདེགས་ཞུ་བའི་ཐད་འགན་འཁྲི་མི་འཁུར་བ་དང་།ལས་ཀ་མི་བྱེད་པ། ལས་ཀ་གང་བྱུང་བྱེད་པ། བྱ་སྤྱོད་རྫུན་མ་སྤེལ་བ་བཅས་ཀྱིས་སྤུས་ཚད་མཐོ་བའི་འཕེལ་རྒྱས་ལ་ཤུགས་རྐྱེན་ཚབས་ཆེན་བཟོས་པའི”གནད་དོན་རྩད་གཅོད་བྱས་པ་མང་ཤོས་ཡིན་ལ། གནད་དོན3250ཞིབ་བཤེར་ཐག་གཅོད་བྱས་པ་དང་། མི5097ལ་ཁ་ཏ་སློབ་གསོའི་རོགས་རམ་དང་ཐག་གཅོད་བྱས།
བརྡ་ཁྱབ་ལྟར་ན། ད་ལོའི་ཟླ5པར་རྒྱལ་ཡོངས་སུ་སྐྱིད་འདོད་རིང་ལུགས་དང་བག་མེད་ཆུད་ཟོས་ཀྱི་གནད་དོན3886ཞིབ་བཤེར་ཐག་གཅོད་བྱས་པ་དང་། མི་5207ལ་ཁ་ཏ་སློབ་གསོའི་རོགས་རམ་དང་ཐག་གཅོད་བྱས་ཡོད། དེའི་ནང་སྒྲིག་འགལ་ངང་རྩ་ཆེའི་ཁྱད་ལྡན་ཐོན་ཟོག་དང་ལག་རྟགས་དང་འབུལ་རྟེན་སྤྲོད་ལེན་བྱས་པའི་གནད་དོན1411ཞིབ་བཤེར་ཐག་གཅོད་དང་། སྒྲིག་འགལ་ངང་ཕོགས་སྣོན་དང་ཁ་གསབ་སྤྲད་པའམ་ཡང་ན་ཕན་བདེ་བྱིན་པའི་གནད་དོན798། སྒྲིག་འགལ་ངང་བཟའ་བཏུང་བྱས་པའི་གནད་དོན810བཅས་ཞིབ་བཤེར་ཐག་གཅོད་བྱས་ཡོད། །