ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ཀྲུང་གུང་ཀྲུང་དབྱང་གི་ཕྱི་ཕྱོགས་འབྲེལ་གཏུག་པུའུ་ཡི་མགྲིན་ཚབ་པ་ཧུའུ་ཀྲའོ་མིང་གིས་ཚེས5ཉིན་ཁྱབ་བསྒྲགས་གནང་དོན། ཀྲུང་གོ་གུང་ཁྲན་ཏང་དང་འཛམ་གླིང་སྲིད་ཏང་གི་མགོ་ཁྲིད་པའི་དབུ་ཚོགས་དེ་ཟླ7པའི་ཚེས6ཉིན་བརྙན་རིས་ཀྱི་ལམ་ནས་ཚོགས་རྒྱུ་ཡིན་པ་དང་། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅིའམ་རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་པེ་ཅིང་ནས་ཚོགས་འདུར་ཞུགས་རྒྱུ་ཡིན་པ་མ་ཟད་བརྗོད་དོན་གཙོ་བོའི་གཏམ་བཤད་གནང་རྒྱུ་རེད། ཐེངས་འདིའི་ཚོགས་འདུས“མི་དམངས་ལ་བདེ་སྐྱིད་སྐྲུན་པ་ནི་སྲིད་ཏང་གི་འགན་འཁྲི་ཡིན”ཞེས་པ་བརྗོད་དོན་དུ་བཟུང་ཡོད་ལ། རྒྱལ་ཁབ160ལྷག་གི་སྲིད་ཏང་དང་ཆབ་སྲིད་རྩ་འཛུགས་སོགས་ཀྱི་མགོ་ཁྲིད་པ500ལྷག་དང་། སྲིད་ཏང་གི་འཐུས་ཚབ་པ་མི་ཁྲི་ལྷག་ཚོགས་འདུར་ཞུགས་རྒྱུ་རེད།
ཐེངས་འདིའི་ཚོགས་འདུ་ནི་ཀྲུང་གོ་གུང་ཁྲན་ཏང་དབུ་བརྙེས་ནས་ལོ་འཁོར100ལོན་པར་སྒྲུབ་པའི་སྣེ་མང་ཕྱི་འབྲེལ་གྱི་བྱ་འགུལ་གལ་ཆེན་ཞིག་ཡིན་པ་དང་། དམིགས་ཡུལ་ནི་འཛམ་གླིང་གི་རྒྱལ་ཁབ་སོ་སོའི་སྲིད་ཏང་བར་གྱི་རྒྱལ་སྐྱོང་སྲིད་གཉེར་གྱི་ཉམས་མྱོང་བརྗེ་རེས་ལ་ཤུགས་བསྣན་ཏེ། ཐུན་མོང་ངང་འཛམ་གླིང་གི་ལོ་བརྒྱའི་འཕོ་འགྱུར་དང་དུས་རབས་རིམས་ནད་ཀྱིས་བསྐྱལ་ཡོང་བའི་འགྲན་སློང་ལ་ཁ་གཏད་ནས། མི་དམངས་ཀྱི་ཆེད་དུ་བདེ་སྐྱིད་བརྩོན་ལེན་བྱེད་པའི་འདུ་ཤེས་དང་ནུས་པ་ཇེ་ཆེར་གཏོང་བ་དང་། འཛམ་གླིང་ཞི་བདེ་དང་འཕེལ་རྒྱས་ལ་སྐུལ་འདེད་བཏང་སྟེ། མིའི་རིགས་ཀྱི་ལས་དབང་གཅིག་མཐུན་འདུས་གྲུབ་འཛུགས་སྐྲུན་ལ་སྐུལ་སྤེལ་བྱེད་པ་དེ་ཡིན། །