འཇིགས་རྒོལ་མན་ངག་ཡིག་བརྒྱ་མ།
རྐང་ཚ། ཀ་བཀྲ་ཤིས།
འཇིགས་སྐུལ་གཏེ་བོས་ཀུན་ལ་གནོད་ཅིང་འཚེ། །
དཔུང་ཤུགས་རྣམ་གསུམ་གནོད་པའི་ཁུངས་ཡིན་ཏེ། །
མཐུན་སྒྲིལ་དམ་ཞིང་སྟོབས་ཤུགས་ཆེན་པོའི་སྒོས། །
དེ་ལ་དྲག་རྡུང་དམངས་སེམས་བདེ་ལ་འགོད། །
ཐོལ་བྱུང་དོན་རྐྱེན་བྱུང་ཚེ་འཚབ་མིན་ཏེ། །
དོན་དེའི་སྤྱི་ལ་བརྡར་ཤ་བཅད་དེ་སྒྲུབས། །
རང་གི་བདེ་འཇགས་སྲུང་བ་གཙོར་བཟུང་སྟེ། །
ཐབས་ཀྱིས་རྒོལ་དང་སྤོམས་སེམས་ཆེ་བ་གལ། །
གནད་དོན་མཐོང་ཚེ་ཡར་ཞུ་མྱུར་དགོས་ཤིང་། །
ཉེན་གཏུག་ཁ་པར་ཡིད་ལ་དམ་པོར་ཟུངས། །
ས་གནས་ཁྱད་ཆོས་དོན་རྐྱེན་ངོ་བོ་སོགས། །
མིང་རྟགས་དང་བཅས་གཏུག་ན་བྱ་དགའ་སྤྲོད། །
དྲ་བའི་འཕྲིན་པའི་གཏམ་ལ་རློམ་མི་རུང་། །
བདེ་ཐང་བརྩོན་པ་མཐར་ཐུག་གནས་ལུགས་ཡིན། །
ཁྱིམ་མཚེས་བར་ལ་རྒྱུན་དུ་གསལ་བཏབ་སྟེ། །
འཆལ་གཏམ་མཐའ་རུ་སྡུམ་པའི་ལས་ལ་འབོད། །
མི་ཚོགས་རྡོག་རྫིས་དོན་རྐྱེན་འཇིགས་པ་ཆེ། །
གལ་སྲིད་དེ་ལ་གློ་བུར་འཕྲད་པའི་ཚེ། །
སྐྲག་ཤོར་སྡར་མའི་བརྟུལ་ཞུགས་མི་འཛིན་པར། །
ཟུར་དུ་བྱོལ་ལས་ལྡོག་ཏུ་འགྲོ་བ་སྤོངས། །
མེ་དགྲའི་དུད་ཞག་ལུས་ལ་གནོད་པ་ཆེ། །
བདེ་འཇགས་གནས་སུ་མྱུར་བར་གཞའ་བ་གནད། །
ས་འོག་ལྕགས་ལམ་སྡོད་པའི་ཞིབ་བཤེར་དེ། །
དམངས་ཀྱི་ཆེད་ཡིན་སྤྲོ་བས་དང་དུ་ལོངས། །
དོན་རྐྱེན་གང་ལའང་བསམ་གཞིགས་མང་ཙམ་གྱིས། །
ལེགས་པར་བརྟག་ན་ཉེན་ཁ་སེལ་བར་ཕན། །
གྲི་དང་ལྕགས་དབྱུག་རྡོ་སྣུམ་ལ་སོགས་པ། །
ཧ་ཅང་ཉེན་ཁ་ཆེ་བའི་རྫས་ཡིན་ཕྱིར། །
སུ་ཡིས་ཐོགས་ཏེ་བགྲོད་པ་མཐོང་བའི་ཚེ། །
རིང་དུ་གྱེས་ནས་མྱུར་བར་ཉེན་གཏུག་མཛོད། །
སྡོད་ཁུལ་ནང་དུ་དོགས་གཞིའི་མི་སླེབས་ཚེ། །
ལས་སྒྲུབ་མི་སྣ་མགྱོགས་པོར་བཙལ་བ་དང་། །
གཞིས་ཁུལ་དམངས་དམག་རང་གི་ཉེ་སར་ཡོད། །
དེ་ཡི་ཨང་གྲངས་ཁ་པར་ནང་དུ་ཉོར། །
སྡོད་ཁང་གླ་བའི་མགྲོན་པོ་གསར་བ་ལས། །
ཉིན་མོར་མི་མཐོང་མཚན་ལ་རྒྱུ་བ་དང་། །
མི་དང་འཕྲད་ཚེ་གཡོལ་ནས་བགྲོད་པ་དག །
ཕལ་ཆེར་སེམས་སུ་ངན་དགུའི་ལས་ཀྱིས་ཁེངས། །
ལམ་འགྲམ་བདག་མེད་ཟོང་སྒམ་མཐོང་བའི་ཚེ། །
བདག་ཏུ་འཛིན་པའི་ཧམ་སེམས་མི་སྐྱེས་པར། །
དེ་ཡི་བདག་པོ་འདྲི་ཞིང་བརྩད་པ་དང་། །
ཉེན་རྟོག་མི་སྣ་འབོད་ཅིང་བཤེར་བར་རེམ། །
འཇིགས་རྒོལ་མན་ངག་འདི་དག་ཡིད་ལ་ཟུངས། །
སྔོན་འགོག་ལས་ཀྱི་སྦྱོར་བ་ལྷོད་མི་རུང་། །
ཅིའི་ཕྱིར་བསྒྲུབ་དང་ཇི་ལྟར་བསྒྲུབ་པ་ཡི། །
ལས་ལ་གོམས་ཚེ་ནམ་ཡང་བདེ་ཞིང་འཇགས། །