རྟ་བོ་གྲོང་རྡལ་ནས།
ཉི་ཟེར་ཀྲིག་ཀྲིག་གི་ངོགས།
ངས་མི་ཞིག་དྲན་ཡང་འདྲིས་མ་ཕོད།
རི་བོ་དཔངས་མཐོ་ལ་ཆུ་མོ་རྒྱུན་རིང་བས།
ངས་མི་དེར་ཅི་ཡང་ལབ་མ་ཕོད།
ཆགས་སྡང་གི་སྙིང་གར་ཟུག་པའི་མེ་ཏོག
བསིལ་རླུང་གི་དབུས་སུ་ལྡེམ་ལྕོག་གིས་བཞད།
མགྲིན་པ་ཡང་ཡང་བརྣངས་ནས་ཕྱི་མིག་འཕེན་དུས།
ལས་འཕྲོ་གངས་རི་ལ་བཅོལ།
སེམས་པ་ཤོར་སྟངས་ལ་མུ་མཐའ་བྲལ་ཡང་།
ཚེ་འདིའི་བར་ཐག་ཤར་ནུབ་ཀྱི་ནམ་མཁས་ཆོད་སོང་།
གླིང་གི་བུ་མོ་ཁྱེད།
སེང་ལྕམ་འབྲུག་མོ་ལོས་ཡིན།
མིག་གི་རྒྱལ་མོའི་སྐར་ཆེན།
ངག་གི་ཟིལ་བའི་དྲི་ཞིམ།
འཛུམ་གྱི་ཉི་འོད་དྲོན་མོ།
སྙིང་དུ་སྡུག་ཅིང་ཡིད་དུ་འོང་བ་རེ་རེ་ལ།
སྨོན་པ་ཁྲི་སྟོང་གིས་བསྐྱོད་ཀྱང་།
མཇལ་དུ་བསྐལ།
རྟ་བོ་ནི་སྔོན་ཆད་ཀྱི་རྟ་བོར་ཐང་ག་ལ་ཡིན།
དེ་ནི་གྲོང་ཁྱེར་ཆེན་པོ་ཞིག་རེད།
རྒྱུས་ཡོད་པ་དག་ངོ་ཤེས་སུ་འགྱུར་གྱིན།
ངོ་ཤེས་པ་དག་གི་རྒྱབ་གཟུགས་སུ་སྣང་།
ཡོད་ཚད་བཞུར་གྱིན་པའི་དུས་འདིར།
ང་ལ་ཆགས་སྡང་གིས་ཅི་བྱ།
བྱ་ལས་སྣ་ཚོགས་ཀྱི་འུར་ཟིང་ཁྲོད།
སྙི་ཞིང་མཉེན་པའི་སེམས་པ།
ཟླ་འོད་ཀྱི་རྫིང་དུ་བསྙལ་ཞིང་།
རྣོ་ཞིང་གསེག་པའི་ཚོར་བ།
ཉི་འོད་ཀྱི་དྭངས་སར་གཡེང་ནས།
སྙན་ངག་ཅིག་བྱུང་ན་དེ་ལས་ལྷག་པ་ཅི་ཞིག་ཡོད། །