གནམ་སྔོན་པོའི་གུར་ནང་དུ།
ཉི་ཟླའི་སྒྲོན་མེ་འཚེར།
ས་ཆེན་མོའི་གདན་སྟེང་དུ།
གངས་མཚོའི་གཡུང་དྲུང་མཛེས།
གནས་དེ་རུ།
ཡབ་ཡུམ་གཉིས་ཀྱིས་ནམ་མཁའ་ཟེར་བའི་འཁོར་བ་ཞིག་བཟུང་།
སྤྲིན་དཀར་ནག་གཉིས་ཀྱི་སྒོ་ཟོག་ནི།
རྟ་ཁྱུ་དང་འབྲོང་ཁྱུ་ཡིན།
དེ་དུས།
ཡབ་ཆེན་གྱིས་དགུ་ཚིགས་ཀྱི་སྐ་རགས་སུ་རྟ་ཁྱུ་འདེད་ཅིང་།
ཡུམ་ཆེན་གྱིས་སྟོང་ཁམས་ཆེན་མོ་ན་འབྲོང་ཁྱུ་འཚོ།
ཉི་མའི་འོད་ཟེར་ལ་བྱིན་ཆེ།
གངས་རིའི་བརྟན་བརླིང་ལ་རྔམ་ཆེ།
ཨོ། དེ་ནི་ཡབ་ཆེན་གྱི་ལྷག་བསམ་དང་རང་གཤིས་ཡིན།
ཉི་འོད་ལམ་ལམ་འཕྲོ།
གངས་རི་མཁའ་ལ་འཕགས།
ཟླ་བའི་འོད་ཟེར་ལ་ཕྱོགས་མེད།
མཚོ་མོའི་དྭངས་གཙང་ལ་ལྷད་མེད།
ཨོ། དེ་ནི་ཡུམ་ཆེན་གྱི་བརྩེ་བ་དང་ངང་རྒྱུད་ཡིན།
ཟླ་འོད་བསིལ་བསིལ་འཕྲོ།
མཚོ་མོ་ལྟེམ་མེར་འཁྱིལ།
ཡབ་ཆེན་གྱིས་རྟ་གོང་ནས་རྒྱང་ལ་གཟིགས་ཏེ།
རུམ་ནས་མགོ་དཀྲིས་དཀར་པོ་ཞིག་ལག་ཏུ་བླངས་པ་ལ་སྤྲིན་པ་ཟེར།
ལག་པ་གཡུག་གཡུག་ཅིག་བྱས་པ་ལ་གློག་དམར་ཟེར།
ཀི་སྒྲ་སིང་སིང་ཞིག་བཏབ་པ་ལ་འབྲུག་སྒྲ་ཟེར།
རྟ་ཕོའི་རྨིག་པས་ཆུ་ཟིལ་ཕྱོགས་བཞིར་སྟོར་བ་ལ་ཆར་བ་ཟེར།
ཡུམ་ཆེན་འབྲོང་ཁྱུའི་མཐའ་ནས་ཕྱིར་འཁོར་ཏེ།
བཞིན་ལ་འཛུམ་ཞིག་མངོན་པ་ལ་འཇའ་ཚོན་ཟེར།
ངག་ནས་གཞས་ཤིག་བཏང་བ་ལ་བསིལ་རླུང་ཟེར།
སེམས་ངལ་དྭངས་ཤ་ལེར་སོང་བ་ལ་གནམ་ཐིང་ཟེར།
ཡང་གཅིག་བཤད་ན།
སྤྲིན་དཀར་ནི་ཡུམ་ཆེན་གྱིས་བསྙལ་བའི་ཞོ་གསར་རེད།
རླུང་གིས་དེ་ཉིད་ཡར་ལ་མཆོད།
གློག་དམར་ནི་ཡབ་ཆེན་གྱིས་བྲིས་པའི་ཡི་གེ་རེད།
འབྲུག་གིས་དེ་ཉིད་ཀློག་འདོན་བྱེད།
ཆར་བ་ནི་ཡབ་ཆེན་གྱིས་སྟོར་བའི་སྤོས་ཆུ་རེད།
བར་སྣང་གིས་དེ་ཉིད་སྡེབ་སྦྱོར་བྱེད།
འཇའ་ཚོན་ནི་ཡུམ་ཆེན་གྱིས་གཙགས་པའི་མེ་ཏོག་རེད།
རང་བྱུང་ཁམས་ཀྱིས་དེ་ཉིད་འགྲེམ་སྟོན་བྱེད།
གནམ་ཐིང་བ་ནི་ཡུམ་ཆེན་གྱིས་སྒོ་ཕྱི་ནང་ལ་གད་བདར་བྱས་པའི་ཤུལ་རེད།
ད་ནི་ཡབ་ཆེན་ཕེབས་རྐྱང་ཡིན།
ས་སྲོད་རེ་རེར།
ཡབ་ཆེན་གྱིས་ཡུམ་ཆེན་ལ་བགྲང་གིས་མི་ལངས་པའི།
སྐེ་རྒྱན་མང་པོ་ཞིག་སྐྱེས་སུ་བསྟབས་ཡོང་།
དེ་ནི་མཚན་མོའི་སྐར་ཚོགས་རེད།
ཡུམ་ཆེན་གྱིས་དེ་ཡི་ཁྲོད་ནས་ཆེས་བཟང་བ་དག་སྐེ་རུ་བཏགས་ཏེ།
བལ་དཀར་ལ་བརྩེ་འདང་བསྲེས་ནས།
ལོ་རེ་རེར། ཡབ་ཆེན་ལ་ཕྱིང་ལྭ་དྲོན་པོ་རེ་བཟོ།
དེ་ནི་ཐགས་སྐུད་མེད་པའི་དགུན་ཁའི་ཁ་བ་རེད།
ཡང་གཅིག་བཤད་ན།
འཇའ་ཚོན་ནི་ཡབ་ཡུམ་གཉིས་ཀྱི་སྒྱུ་རྩལ་བརྩམས་ཆོས་ཀྱི་དྭངས་རྩེ་རེད།
རྒྱང་རིང་ནས་བལྟས་ན།
དེ་ནི་ཡབ་ཆེན་གྱིས་བརྐྱངས་པའི་གཡུང་དྲུང་རྨུ་ཐག་གི་སྐས་རྡང་རེད།
ཉེ་ས་ནས་བལྟས་ན།
དེ་ནི་ཡུམ་ཆེན་གྱིས་བརྩེགས་པའི་ལྷ་བབས་མཆོད་རྟེན་གྱི་བང་རིམ་རེད།
ལྷ་དང་མི་ཡི་བར་ཐག་དེ་ཡིས་ཉེ་རུ་གཏོང་ཞིང་།
བདེ་བ་དང་སྡུག་བསྔལ་གྱི་བར་ཁྱད་ཀྱང་དེ་ཡིས་སྙོམ་པར་བྱེད།
ཚེ་འདི་དང་ཕྱི་མའི་བར་དུ་ཡང་དེ་ཡིས་འོད་ཀྱི་གསེར་ཟམ་འཕེན།
ཡབ་ཆེན་གྱི་ཕྲེང་རྡོག་རེ་རེ།
སྟོང་ཁམས་ཀྱི་འཇིག་རྟེན་རེ་རེ་ཡིན།
མཐེ་བོང་དང་གོང་མཛུབ་ཀྱིས་ཚུར་ལ་མྱུག་ཅིང་འདྲེན།
ཡུམ་ཆེན་གྱི་མ་ཎི་འཁོར་ལོའི་གཟུང་ཐག་གིས།
མིའི་རིགས་ཀྱི་རྣམ་ཤེས་གཡས་ནས་གཡས་སུ་བསྐོར།
མིའི་རིགས་ཀྱི་ཤེས་རབ་དང་སྙིང་རྗེ་ཡང་།
གཡས་ནས་གཡས་སུ་བསྐོར། གཡས་ནས་གཡས་སུ་བསྐོར།
མདོར་ན།
ཡབ་ཆེན་གྱི་ཐུགས་དགོངས་ནི་གནམ་གྱི་ཁ་ཞེང་རེད།
ཡུམ་ཆེན་གྱི་བཟོད་པ་ནི་ས་གཞིའི་སྲ་འཐས་རེད།
གནམ་སའི་བར་དུ།
བུ་ཆུང་ང་མདུན་ནས་མདུན་དུ་སྙེག་གིན་ཡོད།
གངས་རིས་ང་ལ་རྒྱབ་དཔུང་མཛད་ཅིང་།
མཚོ་མོས་ང་ལ་སྨོན་ལམ་གསེང་མཐོར་འདེབས།
ཉི་མས་ང་ལ་བགྲོད་ལམ་བསྟན་ཅིང་།
ཟླ་བས་ང་ལ་སྐྱེལ་མ་ཡུན་རིང་གནང་།
འགྲུལ་བཞུད་ཀྱི་ལམ་དུ།
ངས་གོམ་པ་རེ་རེ་ཤུགས་ཀྱིས་ཕར་ལ་སྤོས་ཏེ།
ནང་སེམས་ཀྱི་གཏིང་སར་ལོག་གིན་ཡོད།
བྱང་སེམས་ནི་ང་ཡི་ལམ་ཡིག་ཡིན།
སྙིང་གའི་རྩ་འདབ་ནི་དེ་ལ་བརྒྱབ་པའི་ཐམ་ཀ་ཡིན།
སྐབས་འདིར།
དྲན་ཤེས་སུ་གསལ་ལེར་མངོན་པ་ནི།
རང་གི་སྙིང་ཁམས་ནི་གངས་རི་ཡིན་ཞིང་།
རང་གི་རྩ་ལམ་ན་གཙང་བོ་བཞུར་བ་ཉིད་དེ།
ད་ནི་གངས་རི་དྲག་ཏུ་མཆོང་ལྡིང་བྱེད།
གཙང་བོ་དྲག་ཏུ་ཤར་རྒྱུག་བྱེད། །
རྩོམ་ཁུངས། ༢༠༢༥ལོའི«སྦྲང་ཆར»དེབ་དང་པོ།