1
ཁ་ཕྱིར་འཁོར་བ་ནི་འོབས་དོང་བཞིན།
ཁྱོད་རང་ནང་དུ་ལྕེབས་ཀྱང་འཛིན་རྒྱུ་ནི་མི་འདུག
2
ད་ལྟའི་ན་ཚོད་འདི་ལ།
ཕྱི་ནང་གི་གཟེབ་དྲ་སྣ་ཚོགས་ཀྱིས་བསྐོར་འདུག
3
ངས་རང་གི་རྨི་ལམ་ལ་གཤོག་པ་ཞིག་ཆད་པས་འཕུར་ཐབས་མ་བྱུང་།
ངས་བརྩེ་གདུང་གི་སྲོད་ཀ་འདི་ལ་ཕྱིར་མིག་ཅིག་ཆད་པས་ནུབ་ཐབས་མ་བྱུང་།
4
སྐྱོ་གདུང་གི་སྐྱེད་ཚལ་བསྙོར་རོགས་ཞེས།
ངས་སུ་ལའང་འབོད་ཐབས་མི་འདུག
5
ཁྱོད་ནི་མཐའ་མེད་པའི་གཙང་བོ་ཞིག་ལྟར།
ང་ཡིས་རྦ་རླབས་རེ་རེ་ལག་པས་ཕར་དེད་ནས་བརྒལ་ཐབས་མ་བྱུང་།
6
འཚོ་བ་ནི་ཉི་འོད་མ་ཡིན་པས།
ང་ཚོ་རྟག་ཏུ་དྲོས་ཐབས་མ་བྱུང་།
7
ངའི་བསྐྱར་དུ་མཐོང་འདོད་ཀྱི་ཞོགས་པ་དག་ནི།
རྒས་འཁོགས་ཀྱི་ར་བ་ལས་ཕྱིར་ཚེས་ཐབས་མི་འདུག
8
ལག་པས་བཟུང་བ་དག
བདེ་སྐྱིད་ཡིན་པར་ང་ལ་དོགས་པ་ཞིག་སྐྱེ་བཞིན་འདུག
9
ལག་པས་ཤོར་སོང་བ་དག་ཀྱང་།
སྡུག་བསྔལ་ཡིན་པར་ང་ལ་ཐེ་ཚོམ་ཞིག་སྐྱེ་བཞིན་འདུག
10
མི་ཚེ་ནི་དེ་ལྟར་མནོག་སླ་བའི་རེའུ་མིག་ཅིག་ལྟར།
གོ་རིམ་ཅི་ཡང་མེད་པ་ལྟ་བུའི་ངང་འཆི་བ་དང་ན་ཚ་ལ་སྒུག་མཁན་ཞིག
11
ཝ་ཡེ། ང་ལ་ཆང་ཁྱེར་ཤོག་དང་།
ངས་ཆང་རག་ཧུབ་ཀྱིས་བཏུང་ནས་ཅི་ཡང་བརྗེད་པར་གཏང་འདོད།
12
སྤར་ཁའི་ནང་གི་མེ་ཏོག་དག་རྙིད་ཙམ་བྱས་རྗེས།
སེམས་ཤུགས་ཀྱི་མཚོན་ཆ་ཇི་ལྟར་གཡུགས་ཀྱང་ལས་དབང་ནི་ཚལ་བར་གཤག་
མ་ཐུབ།
13
ནང་སེམས་ཀྱིས་དཀྲོལ་བའི་གཞས་དག་ས་རུ་འཐོར།
ངས་དེ་དག་ལས་ཅི་ཡང་ཡར་སྒྲུག་ཐབས་མ་བྱུང་།
14
ཁ་གྲག་མི་ཐུབ་པའི་རོ་སྒམ་སྟོང་བ་ཞིག་དང་འདྲ་བའི།
ཆགས་སྡང་གསལ་བའི་སྙིང་ཆུང་གི་དྲན་པ་སྐམ་པོ་དག་ལ་ཆར་དབབ་རོགས།