སྟོད་ཀྱི་རི་གསུམ་རྩེ་ནས། །
རླུང་བུ་ལན་གསུམ་རྒྱུ་ཡོང་། །
ཨ་མའི་དཔྲལ་བའི་རི་མོ། །
གཟུགས་མེད་རླུང་བུས་འཁྱེར་རོགས། །
སྨད་ཀྱི་ལུང་གསུང་མདོ་ནས། །
གཙང་ཆུ་དལ་གྱིས་འབབ་པ། །
ཨ་མའི་མིག་ཆུའི་ཕྲ་མོ། །
ཆུ་མོའི་རླབས་ལ་བརྒྱུས་ཡོད། །
མཚན་ལྡན་བླ་མའི་དྲུང་ནས། །
སྐྱབས་འཇུག་ཡང་ཡང་ཞུས་པས། །
ཨ་མའི་ཚེ་སྨད་བདེ་སྡུག །
བླ་མའི་བྱིན་ལ་གཏད་སོང་། །
སྐྱེས་རིའི་ལུང་གསུམ་མདོ་་ནས། །
ལྷ་བསང་དགུང་ལ་མཆོད་པ། །
ཨ་མའི་རླུང་རྟའི་རི་མོ། །
ཡུལ་ལྷའི་ཐུགས་ལ་བརྐོས་ཡོད། །
དཔྱིད་གསུམ་ན་ཁའི་མེ་ཏོག །
འདབ་བརྒྱ་ལྷུག་པོར་བཞད་དུས། །
ཨ་མའི་ཕྱིར་དྲན་ལོ་ཟླ། །
ཡིད་ལ་ལྦ་ལེར་ལྦ་ལེར། །
དབྱར་གསུམ་ཆར་གྱི་རྒྱུན་ཐག །
དེ་འདྲའི་ལྷོད་ལྷོད་མ་གནང་། །
ཨ་མའི་སྐུ་ལུས་འདབ་མ། །
ཆར་ཆུས་བརྡབ་ཀྱིན་ལྕི་འགྲོ། །
སྟོན་གསུམ་བད་ཀྱི་གཤེད་མ། །
ཞོགས་ལ་གཙེས་གཙེར་མ་གནང་། །
ཨ་མའི་འཛུམ་ཞལ་ཡག་པོ། །
མི་འདོད་སད་ཀྱིས་བརླག་འགྲོ། །
དགུན་གསུམ་ཁ་བའི་འདབ་མ། །
ལ་འཕུར་ལུང་འཕུར་མ་གནང་། །
ཨ་མའི་བརྩེ་བའི་མིག་ཟུང་། །
ཁ་བ་དཀར་པོར་བྱིང་འགྲོ། །