ཤུགས་རིང་མུན་པ་ཞིག་བཏུངས་པས། །
མཁའ་མཐའི་གློག་དམར་དེ་འཇགས་སོང་། །
ཨོ་ལོར་གཅེས་གཅེས་ཤིག་བྱས་པས། །
མིག་ཆུ་ཕོར་པ་གང་བཞུར་ཐལ། །
རྫོང་ནི་ཤོག་བུ་ཡི་རྩིག་པ། །
མཁར་ནི་བྱེ་མ་ཡི་འཆང་བུ། །
ལ་བརྒྱབ་ཀླུང་བརྒལ་ཞིག་བྱས་ཀྱང་། །
མཛའ་མོའི་གྲིབ་གཟུགས་ཙམ་མ་མངོན། །
སྙིང་ལ་སྦར་བཅང་ཞིག་བྱས་པས། །
ཡ་ཆུང་བསེར་བུ་བཞིན་འཁྱག་པ། །
ལམ་ལ་སྐྱོ་སྐྱོ་རང་མ་གནང་། །
རང་སེམས་གསོ་བྱེད་དུ་གཟེར་བྱུང་། །
འཕུར་འཕུར་མཁའ་དབྱིངས་ཀྱི་འཁོར་ལོ། །
གནམ་སའི་འདྲེས་མཚམས་སུ་གས་པས། །
བརྟེན་མེད་རྣམ་ཤེས་ཀྱི་རི་བོ། །
རྒྱ་ཆེན་མཚོ་མོ་རུ་ནུབ་ཐལ། །
ཁུར་མོང་རླུང་འཁྱེར།
གྲགས་སྙན་འབྲུག་ཆུང་དགུང་གི་ཡང་རྩེར་འཕྱོ། །
རྨི་ལམ་གློག་ཞགས་ལྗོན་པའི་གཟེབ་ཏུ་ལྷུང་། །
ཟླ་འོད་འཐུང་བའི་སྨན་ཤར་བཞིན་ལེགས་མ། །
དར་ཟབ་ན་བཟའ་སྤྲུག་ཅིང་གང་སར་འཕུར། །
ཉི་ཐིགས་སྒེའུ་ཁུང་ཟུར་ནས་སྔས་ལ་ལྷུང་། །
བྱེའུ་ཆུང་སྡོང་པོའི་ཡལ་གར་གླུ་དབྱངས་བྱེད། །
མཁའ་མཐའི་དུད་སྤྲིན་སྨིག་རྒྱུ་ལྟར་དུ་འགུལ། །
ཁོ་པའི་མིག་ལ་འཇའ་ཟེར་མེ་ཏོག་འབབ། །
སིར་སིར་སྦྲང་བུས་ལུས་ལ་གཙག་ཙམ་གྱིས། །
ཉལ་བའི་འཁྲུལ་བ་མལ་སྟན་སྟེང་ལ་འཁྱིལ། །
འོན་ཏེ་རི་ཆུ་སྔར་བཞིན་ལྷན་ནེར་གསལ། །
མི་ནི་རྣམ་ཤེས་ཁྱེར་བའི་འབའ་འབུ་ཙམ། །
ཐུན་གསུམ་མདུད་རྒྱའི་ཐ་གུ་རལ་བ་ན། །
གམ་དུ་རབ་རིབ་ན་བུན་ལྷོག་ལྷོག་ལྡང་། །
མི་ཚོགས་ས་ལ་སྦས་པའི་ཟླ་དགུ་པ། །
ཁྱིམ་གྱི་སྐྱོ་ངལ་སྐྱོང་བའི་གཏམ་དག་བྱེད། །
ད་དུང་གཙང་བོ་སྔར་བཞིན་ལྷུང་ལྷུང་བཞུར། །
མཁར་སྒོའི་ལྕུག་མ་དྲ་བ་དྲ་ཕྱེད་བྲེས། །
ངལ་ཡང་ཙག་ཙིག་བྲེལ་བའི་རྒྱུན་ཁྱེར་ལམ། །
ཕྱིར་འདང་འཆར་སྣང་ཁྲོད་དུ་ལམ་ལམ་གཡོ། །