ཅེས་ཀྱང་འཆི་བར་ངེས་པའི་རང་ཉིད།
འཇིག་རྟེན་དཀར་ངོགས་ཤིག་ཕར་ལ་སོང་ཞིང་།།
མུན་པས་མུན་བརྩེགས་ཤིག་ཚུར་ཚུར་བཅར་དུས།།
བདག་མེད་གཉོམ་ཆུང་གི་སྣང་བ་འདི་ཀོ །
ཁེར་རྐྱང་བྱ་སྒྲོ་དེ་རླུང་ཁྱེར་འདྲ་འམ།།
དབེན་པའི་རི་སུལ་གྱི་དྲིལ་ཆུང་སིང་སིང་།།
ཉོན་པའི་ལས་སྐལ་ཞིག་སུ་ལའང་ཡོད་ཀྱང་།།
ཏིང་འཛིན་གདེང་ལྡན་གྱི་ཉམས་ལེན་གནད་སྨིན།།
རྣམ་གཡེང་འབྱུང་པོ་ཡི་ཁ་ལ་ཤོར་སོང་།།
དབང་ཆེན་རྒྱུ་ཡོད་ཀྱི་སྒྱུ་མའི་རྟ་གླང་།།
ཁྱེར་བའི་ལས་སྐལ་ནི་བདག་ལ་མི་འདུག །
མཁོས་ངན་བདེན་པ་ཡི་ཁ་སྟབས་འདི་ཡིས།།
གསོན་པའི་རིན་ཐང་ཡང་ཆུང་ཆུང་མ་རེད།།
རྫི་རོགས་ཆུང་ཆུང་གི་འཛུམ་ལ་བལྟས་ན།།
གཤིན་ཐང་ནག་པོ་དེ་འགྲིམ་འདོད་མེད་ཀྱང་།།
ཨ་བ་གླང་མགོ་ཡི་བཀའ་དམ་བཙན་པོས།།
མི་འདོད་གཉོམ་ཆུང་གི་གཉའ་ནས་མནན་ངེས།།
དབྱར་གསུམ་མེ་ཏོག་གི་ཞལ་རས་སྣུམ་པོ།།
སད་དང་སེར་བ་ཡིས་འཕྲོག་པ་མཐོང་བྱུང་།།
བློ་ངན་གཡག་རྭ་ལྟར་གྱོང་བའི་བདག་ལ།།
ངེས་འབྱུང་བཅོས་མིན་ཞིག་མ་སྐྱེས་ཞེ་ཁྲལ།།
དུང་སེམས་དམ་ཚིག་གི་དར་དཀར་མདུད་བརྒྱ།།
བཤིག་མེད་ཚིག་མཐའ་ལ་གནའ་ཡིས་གནན་ཡང་།།
འདུས་པའི་མཐའ་མ་ལ་དབང་མེད་འབྲལ་བ།།
བསྒྱུར་མེད་ཆོས་ཉིད་ཀྱི་དོན་དུ་ལགས་སོ།།
བདག་འཛིན་ཆེ་བ་ལ་རི་རྒྱལ་ལྷུན་པོ།།
ངན་རྟོག་རླུང་འཚུབ་འདི་དུས་མཐའི་རླུང་དམར།།
བདག་སྟོད་གཞན་སྨོད་ཀྱི་དུས་བཞིའི་འཁོར་ལོ།།
རྫོགས་པའི་བུ་རུལ་ལ་སྐྱོ་ཤས་ཆེ་འམ།།
དྭང་གསལ་རྫ་ཆུ་ཞིག་སྟོད་ནས་འབབས་ཤིང་།།
གཡང་དཀར་ལུག་ཁྱུ་ཞིག་སྤྲིན་དཀར་དུམ་བུ།།
མཉེན་འཇམ་ལྕུག་ལྡན་གྱི་ཨུཏྤལ་འདི་དག །
མདང་ནུབ་ཐུན་གསུམ་གྱི་རྨི་ལམ་ཙམ་པོ།།
སྐྱིད་པའི་མཐའ་སྣེ་ལ་སྡུག་གི་ཨ་ལོང་།།
སྡུག་གི་ཡང་མཐའ་ལ་སྐྱིད་པའི་ཡང་ལོང་།།
ཐུག་མེད་འཁོར་བ་འདི་ཤིང་རྟའི་འཁོར་ལོ།།
སོང་སོང་སོང་བ་ཡི་མཐའ་ཞིག་མི་འདུག །
སེར་ཆེན་མེ་ཏོག་གི་མཛེས་པའི་ཞལ་ཁྱིམ།།
རྐང་དྲུག་བུང་བ་ལ་འཁོར་བ་བདེན་ཡང་།།
དུས་བཞི་འཁོར་བསྐྱོད་ཀྱི་རླུང་གི་ཕོ་ཉས།།
བཙན་གྱིས་འབྲེལ་བ་ཡི་ལག་པ་གཏོར་སོང་།།
ཕར་ཀིའི་འཇིག་རྟེན་འདི་འཇའ་ཚོན་ཁྲ་མོ།།
བལྟས་པས་སུན་སྣང་ཞིག་སྐྱེས་པ་མེད་ཀྱང་།།
མི་འདོད་ལས་དབང་གིས་རྒྱབ་ནས་དེད་ན།།
སྐྱེ་འཆི་ཆོས་ཉིད་འདི་སུ་ཡིས་ཟློག་ཨང་།།
ཀུན་རྫོབ་ངོ་བོ་ཡི་སྒྱུ་མའི་ཚིག་ཚོགས།།
རྣམ་རྟོག་ཁྲ་མོ་དང་ལྷན་དུ་བསྡེབས་སྟེ།།
ཚིགས་དྲུག་སྨྱུག་མ་ཡི་ལོ་འདབ་ངོས་ལ།།
སྐྱོ་བའི་སེམས་གསོ་རུ་མགུར་འདི་བཞེངས་སོ།།
དྲན་གདུང་དབྱིངས་སུ་གྱེར་བའི་སྙན་ཚིག་མེ་ཏོག་གི་དོ་ཤལ།
གཅིག་སེམས་གཅིག་ལ་ཤོར་བ་ཚེ་སྔོན་གྱི་སྨོན་ལམ།།
ད་ལྟ་ཡང་བསྐྱར་མཇལ་བ་ཟློག་མེད་ཀྱི་ལས་དབང་།།
ལས་སྨོན་རྟེན་འབྲེལ་བཟང་པོས་ལྷན་འཛོམས་འདི་བྱུང་བས།།
མི་འགྱུར་དུང་བའི་མདུད་རྒྱ་སྦྲུལ་ནག་ལ་རྒྱབ་ཡོད།།
གཅིག་རྒྱུས་གཅིག་གིས་ལོན་པའི་གོ་རིམ་ཞིག་བརྒྱུད་དུས།།
མི་སེམས་མི་ཡིས་ཤེས་པའི་ཉམས་མྱོང་ཞིག་ཐོབ་བྱུང་།།
ཚད་དང་གཏིང་དཔག་དཀའ་བའི་བརྩེ་འདང་གི་རྒྱ་མཚོ།།
ཤ་དང་རུས་པའི་གསིང་གི་ཟུངས་ཁྲག་ལ་འདྲིས་སོང་།།
དྲན་གདུང་ན་ཟུག་རི་བོའི་ལྗིད་གོག་དང་མཚུངས་ཀྱང་།།
ཐེངས་གཅིག་མཇལ་འཕྲད་བྱུང་བས་བ་མོ་བཞིན་ཞུ་བྱུང་།།
མཛེས་འཛུམ་ཞལ་རས་སླར་ཡང་མཇལ་སྐལ་ཞིག་ལྡན་ན།།
སྐྱེ་འཆི་འཁོར་བའི་གནས་ལ་འཇིགས་སྐྲག་ཅིག་མི་འདུག །
ཁྱེད་ཉིད་ང་ལ་ཡོད་པས་བདེ་སྐྱིད་དེ་ཤེས་བྱུང་།།
ཁྱེད་ཉིད་རང་ལ་དབང་བས་བསོད་ནམས་འདི་ཚོར་བྱུང་།།
ཁྱེད་ཉིད་ང་ལ་ཡོད་ན་འཇིག་རྟེན་འདི་ཡོད་ལ།།
ཁྱེད་ཉིད་རང་ལ་དབང་ན་ཡོད་ཚད་ཀྱང་ཡོད་འདུག །
ཡུལ་དང་སྡེ་བའི་མི་ཁ་རལ་གྲི་ལས་རྣོ་ཡང་།།
གཉེན་དང་ཉེ་ཐག་ཁ་ཏ་ལུག་བལ་ལས་འཇམ་ཡང་།།
ལྷད་མེད་དུང་བ་འདི་ཡི་ངོ་བོ་ལ་ལྟོས་ནས།།
ཕན་ཚུན་ལག་པ་ནམ་ཡང་གཏོང་བ་དེ་མ་གནང་།།
མ་ཤི་ཚེ་ཐག་རིང་བའི་སྐལ་བ་ཞིག་ལྡན་ན།།
ནད་མེད་ཡུན་དུ་གསོན་པའི་ལམ་འགྲོ་ཤིག་ཡོད་ན།།
དྲན་པའི་མཚོ་མོ་མི་བསྐམ་རྒྱ་མཚོ་བཞིན་འཁྱིལ་ཡོད།།
བརྩེ་བའི་རི་མོ་མི་འགྱུར་རི་བོ་ལྟར་བརྟན་ངེས།།
དྲན་པའི་མེ་ལོང་ངོས་ཀྱི་གནག་སྣུམ་གྱི་སྐྲ་ལོ།།
རླུང་དང་སད་ཀྱིས་སྒུལ་བའི་བར་ཆད་ཤིག་བྱུང་ན།།
རྒྱུས་མེད་མི་ཡུལ་འགྲིམ་པའི་འཁྱམས་པོ་ངའི་སེམས་ལ།།
ཚད་མེད་ན་ཟུག་འབུམ་གྱིས་མགོ་བོ་ནས་མནོན་ངེས།།
ཤི་ཡང་མི་འགྱུར་ཚིག་མཐའ་མནའ་ཚིག་གིས་གནན་ཡོད།།
མ་ཤི་གསོན་བྲལ་མི་བྱེད་དམ་ཚིག་གིས་སྒྲིལ་སོང་།།
སྐྱིད་སྡུག་སྣེ་ཁ་མང་བའི་འཇིག་རྟེན་འདིའི་ཐོག་ནས།།
གཉོམ་ཆུང་སེམས་པ་འདི་ནི་ཁྱེད་ཉིད་དང་འགྲོགས་ཡོད།།
ཕར་དགའ་བྱམས་པའི་ཡི་གེ་རྫོགས་མཐའ་ཞིག་མི་འདུག །
ཚུར་དུང་སྙིང་གི་སྐད་ཆ་ད་དུང་ཡང་ཉོན་འདོད།།
ཁྱོད་དང་ང་ཡི་བརྩེ་བ་གཡུ་ཆུང་གི་དྲུག་དཀར།།
གནམ་ས་ཁ་སྤྲད་འདི་ཉིད་དཔང་པོ་རུ་འཇོག་འདོད།།
རིན་གྱིས་མ་ཉོས་ལས་དང་བསོད་ནམས་ཀྱིས་གནང་བའི།།
བྱམས་པ་དུང་སེམས་ཅན་མའི་ཞལ་རས་ཀྱི་མཛེས་པ།།
ཉིན་མཚན་གཉིས་ལ་དྲན་པའི་ན་ཟུག་འདི་ཆེ་ཡང་།།
ད་ནི་ཁོ་བོའི་སེམས་ཀྱི་གཤིས་ཀ་རུ་ཆགས་སོང་།།
སྐྱེ་འཆི་ཟློག་མེད་ཡོངས་བ་མི་རྟག་པའི་ངོ་བོ།།
འདུས་པའི་མཐའ་མ་འབྲལ་བ་ཆོས་ཉིད་དུ་ལགས་ཀྱང་།།
ཚེ་སྲོག་དབུགས་ཀྱི་རྒྱུ་བ་མ་འགག་གི་བར་དུ།།
བྱམས་པའི་ལས་འཕྲོ་རྫོགས་པའི་བར་ཆད་ཅིག་མ་གནངས།།
ཁྱེད་ཉིད་དྲན་པའི་ཡིག་ཆུང་ཤོག་དཀར་རུ་ཕབས་ནས།།
མཚོ་མཐའི་ངང་པ་སེར་པོའི་གཤོག་སྣེ་ལ་བཏགས་ཡོད།།
མཚོ་མོ་འཁྱག་གིས་བསྡམས་ཀྱང་ངང་ཆུང་གི་སེམས་པ།།
བརྩེ་བས་དྲོད་ཁུལ་ལྡན་བཞིན་ལག་ཟུངས་ཀྱིས་བཏེགས་ཡོངས། །
དོ་ཞག་འཚོ་བ་ཅི་འདྲ་རེད།
གསེར་ལམ་ལམ་གྱི་བྱ་འདབ་འོག་ནས།།
གཡིལ་དྲིལ་ཆུང་གི་སིལ་སྒྲ་སིང་སིང་།།
འདོན་དབྱངས་རྟ་ཡིས་མགུར་མ་འུར་འུར།།
ཚོན་དཀར་དམར་ཅན་ཁང་ཆུང་ནང་དུ།།
དུས་དེང་སང་ལ་བདེ་བར་བཞུགས་སམ།།
ཕྱི་སྡོམ་པ་ཡི་ལོ་འདབ་མ་སྐམ།།
ནང་དམ་ཚིག་གི་མེ་ཏོག་མ་རྙིང་།།
ཞལ་འཛུམ་ཆུང་ལ་ནག་ནོག་བྲལ་བའི།།
དགོན་ཁྲ་ཆུང་གི་བཙུན་མ་ཆུང་ཆུང་།།
འདང་ད་ནང་གི་ཚོར་བ་ཅི་འདྲ།།
མགོའི་སྐྲ་ལོ་ཚོགས་ཐབ་ནང་གཡུགས་ནས།།
གོས་ངུར་སྨིག་ལ་ཤ་འཇམ་བཅོལ་ནས།།
ས་འབྲོག་སྡེ་ལ་གྱེས་བརྡ་ཕུལ་ཞིང་།།
ཡུལ་ཐག་རིང་ནས་ཐག་རིང་བཞུད་དུས།།
ཞེ་འཕྲང་བ་ཡི་དངན་པ་ཤོར་རམ།།
བྱ་བྱེའུ་ཡི་གླུ་སྐད་ཀྱུར་ཀྱུར།
ཤིང་ལྗོན་པ་ཡི་ལོ་འདབ་ལྷབ་ལྷུབ།
དབེན་རི་སུལ་དུ་སྒོམ་ལ་བཞུགས་པའི།།
རི་ཕར་རྒྱབ་ཀྱི་དགེ་མ་ཆུང་ཆུང་།།
ཆུང་རོགས་ལོ་དེ་དྲན་པས་གདུང་ངམ།།
གནམ་དགུ་ཚིགས་དང་མཉམ་དུ་ལངས་དུས།།
དགུན་ཟླ་གསུམ་གྱི་གྲང་བ་ངར་ངར།།
ཕྱག་པད་མ་ལ་གས་ཁ་དོད་པའི།།
རྒས་ཐོད་གཉེར་གྱི་རི་མོ་གསལ་བའི།།
མ་དྲིན་ཆེན་མ་དྲན་པ་ཨེ་བྱུང་།།
དངོས་མིང་བསམ་གཏན་སེང་གེའམ་པིར་མིང་ལྗང་སྨྱུག 1993ལོའི་ཟླ12པའི10ཉིན་ཁམས་ནང་ཆེན་སྡོམ་པ་རུ་འབྲོག་ཁྱིམ་དཀྱུས་མ་ཞིག་ཏུ་སྐྱེས། འབྲོག་ཁུལ་དེར་མྱི་ལོ་ལྔ་ཙམ་ལ་སློབ་ཆུང་བཏོན། དེ་རྗེས་གཞུང་དབུ་ཚད་སོགས་དང་སྙན་ངག་བརྡ་སྤྲོད་སོགས་ལ་སྦྱང་བ་བྱས། དོ་མི་མཉམ་པའི་འཇིག་རྟེན་གྱི་གྲུ་ཟུར་འདི་ནས་སྙན་ངག་ཟེར་བ2013ལོ་ཡར་མར་ཞིག་ལ་གསར་དུ་ངོ་ཤེས། དེ་ནས་བཟུང་སྙན་ངག་ཟེར་བ་འདི་ལ་ཁ་གཏན་ནས་འབྲལ་མ་ཕོད། 2015ལོའི་ལོ་སྨད་ལ་རང་གི་དགའ་ཕྱོགས་གཙོར་འཛིན་གྱིས་སྙན་དེབ་ཐོག་མ་《སྡོང་བོར་རྒྱབ་གཏོད་པ》ཞེས་པའི་སྙན་དེབ་གཅིག་འགྲེམས་སྤེལ་བྱས། ལོ་དེ་ལ《གངས་དཀར་རི་བོ》དང་《ནང་ཆེན་དུས་དེབ》སོགས་སུ་སྙན་ངག་འགའ་བདམས་བཀོད་བྱས་ལ། 2017 ལོར་ཡང《གངས་དཀར་རི་བོའི》དུས་དེབ་དང་སྤྱི་དེབ་གང་རུང་ལ་རྩོམ་མང་པོ་སྤེལ། རྒྱུན་དུ《རྫ་ཆུའི་རླབས་སྒྲའི》དྲ་ཚིགས་དང་《ཀྲུང་གོ་བོད་ཀྱི་རྩོམ་རིག་དྲ་བ》《བཙན་པོའི་མགར་གྱི་དྲ་བ》《རྨ་ཀླུང་རིག་གནས་དྲ་བ》སོགས་སུ་རྩོམ་འགོད་རྒྱུར་དགའ་བོ་ཡོད། ད་ལྟའང་མུ་འཐུད་ནས་སྙན་ངག་ཟེར་བའི་སྨྲ་བསམ་བརྗོད་འདས་དེ་འཚོལ་བཞིན་ཡོད།
སྙན་ངག་ལ་སྒེར་གྱིས་ལྟ་ཚུལ། སྙན་ངག་ནི་འབྲི་མི་ཤེས་བ་ཞིག་མ་ཡིན་མོད། འོན་ཀྱང་། དེ་འདྲ་འབྲི་སླ་མོ་ཞིག་དེ་བས་ཀྱང་མ་ཡིན། ཆོས་ལུགས་དང་སྲིད་ལུགས་གང་གིས་ཀྱང་ཚད་བཀག་མི་ཐུབ་པའི་གདོད་མའི་སེམས་གཤིས་ཁྲ་མོ་ལ་ཐ་སྙད་ཀྱི་རྒྱན་ཆ་བཏགས་ན་ད་གཟོད་སྙན་ངག་གི་མཛེས་པ་ཕྱི་རུ་མངོན་ངེས། །