གཅིག
ལས་ངན་བུ་ཆུང་ས་མཐའི་ཡུལ་དུ་ལུས། །
ནད་ངན་ཐོན་ཏེ་ཕྱོགས་བཞིའི་རྒྱུ་ལམ་བཅད། །
ལྟས་ངན་གཏམ་གྱི་མདུང་རྩེ་སྙིང་ལ་ཕོག །
མྱ་ངན་སྟུག་པོའི་ཕག་ཏུ་ཅུང་ཟད་ངུས། །
སྤྱི་ཚོགས་གསར་རྙིང་བར་གྱི་ལྷ་གསོན་པོ། །
ཁྱིམ་ཆེན་བརྒྱད་ཀྱི་ཁ་འཛིན་ཨ་ཕྱི་མ། །
ལྷག་པར་བདག་ལ་བརྩེ་བའི་ཡུམ་ཆེན་མོ། །
གློ་བུར་བཞུད་པའི་སྡུག་འདི་སུ་ཡིས་བཟོད། །
སྐྱོ་ཤས་མཁའ་རུ་བྲིས་ཀྱང་ཨ་ལན་མེད། །
ན་ཟུག་ས་ལ་བཤད་ཀྱང་སེམས་གསོ་བྲལ། །
སེམས་སུ་གྲང་རླུང་ལྡང་བས་ཁོག་འདར་རྒྱག །
འདས་དོན་ཞིབ་ཏུ་དྲན་གྱིན་གདུང་བ་འཕེལ། །
ནད་བརྒྱའི་ཚང་མིན་ཚེ་ལོ་གོ་བདུན་བརྒལ། །
སྙིང་རྗེའི་གཏེར་ཡིན་རིས་མེད་སྐྱོང་བར་བྲེལ། །
འདའ་ཁའི་མནར་གཅོད་མ་མྱངས་དྲིན་མོ་ཆེ། །
ནུབ་ཕྱོགས་བདེ་བ་ཅན་ནས་སྐྱེ་བར་ཤོག །
འཁོར་བའི་སྙིང་བོ་ཆོས་ཡིན་ཆོས་ལ་འདུད། །
གཤིན་པོའི་ར་མདའ་ཆོས་ཡིན་ཆོས་ལ་འབད། །
ཤུལ་འཛིན་བུ་རབས་མ་ཟད་ཚ་རྒྱུད་ཚོགས། །
རྣམ་དཀར་དགེ་ལ་དབྱེར་མེད་གཅིག་ཏུ་འཇུ། །
སྐྱབས་ཡུལ་གཅིག་ཆོག་དྲིན་ཅན་ཕ་བླ་མས། །
སྲིད་པ་བར་དོའི་འཇིགས་པ་སེལ་བར་མཛོད། །
ཕྱི་མར་ཞིང་མཆོག་དགའ་ལྡན་ཕོ་བྲང་ནས། །
ངོ་ཤེས་བཞིན་དུ་འཕྲད་པའི་སྨོན་ལམ་འདེབས། །
གཉིས།
མི་རྟག་འཆི་བའི་ཆོས་ཉིད་སྔ་མོ་ནས་རྟོགས་ཤིང་། །
ཟློག་མེད་འཆི་བའི་ངང་ཚུལ་བར་མེད་དུ་མཐོང་ཡང་། །
བྱམས་ལྡན་རྨོ་རྨོར་ཐ་མའི་ཞལ་བརྡ་ཙམ་མེད་པར། །
གཏན་དུ་བྲལ་བའི་སྐྱོ་སྣང་ཞེ་འགྱོད་ཀྱིས་མནན་ཡོང་། །
འགྱོད་པ་འགྱོད་པས་མི་མཚོན་དྲགས་དྲགས་ཀྱི་སྣེ་མོ། །
དབེན་པའི་དུར་ཁྲོད་ཚལ་དུ་ངར་ངར་གྱིས་འཐེན་རུང་། །
ལྐོག་ཏུ་སྡུག་ལ་འཐབ་པའི་བུ་རུལ་ངའི་བློ་སྤོབས། །
པྲོག་གསར་ནད་ཀྱི་བཀག་རྒྱས་རྨེག་མེད་དུ་བཅོམ་སོང་། །
དགེ་སྒྲུབ་མཆོད་འབུལ་སྟོང་གི་ཡུལ་དངོས་སུ་མ་ཐོན། །
རྣམ་ཤེས་བོར་བའི་ཕུང་པོར་གུས་ཕྱག་ཀྱང་མ་ནུས། །
ཁ་རོག་ཉེས་སྤྱོད་སྡོམ་པའི་ཆོ་ག་ཙམ་མ་གཏོགས། །
དྲ་སྒང་བརྒྱུད་ནས་དགོས་ངེས་མང་པོ་ཞིག་མི་འགྲུབ། །
རྒྱུན་གྱི་ལས་ཀ་ཚར་རྗེས་བཏང་སྙོམས་སུ་བསྡད་དེ། །
མཚན་ཐུབ་མར་མེའི་ངོགས་སུ་འདོན་པ་རེ་བགྲང་ནས། །
བུ་ཡི་རྣ་བར་དྲིན་ཅན་དགའ་ལྡན་མའི་གདུང་འཚོབ། །
ཁྱིམ་འདིར་ཁྱོད་ཀྱིས་ཉན་དགོས་ཟེར་ན་ཡང་འདོད་བྱུང་། །
དགེ་བ་ཡུན་གྱིས་མི་ཚད་རྒྱང་ནས་ཀྱང་བསྒྲུབ་ཆོག །
ཅེས་པའི་གཏམ་ནི་བདེན་པ་ཤ་སྟག་ཏུ་འདུག་ཀྱང་། །
དགུང་ཞག་འདི་ཚོར་ཁྱིམ་མིའི་གྲལ་ཟུར་དུ་མེད་པར། །
རང་གིས་རང་ལ་གུ་ཡངས་སྟེར་ཐབས་ཤིག་མི་འདུག །
ཚེ་འདིར་བུ་ངས་གཉོར་མཁན་སྐྱོང་མཁན་གྱི་ཐུགས་ལ། །
དྲན་གདུང་རེ་སྒུག་སེམས་ཁུར་གྲངས་མེད་ཅིག་བཞག་སྟེ། །
ས་མཐའ་བསྐོར་ཞོར་ལུས་སེམས་རྒྱ་ཡན་དུ་བཏང་བའི། །
ཉེས་ཆད་འདི་རང་ཡིན་ནམ་མཆོག་གསུམ་གྱིས་མཁྱེན་ནོ། །
ཕ་གཞིས་གླིང་གི་དགེ་སྟོབས་མངོན་སུམ་དུ་ཚོར་ཞིང་། །
སྐྱིད་སྡུག་མཉམ་པའི་ཕུ་ནུ་མིང་སྲིང་དག་བསྟོད་དོ། །
གཅིག་མཐུན་ལས་ཀྱི་བཀོད་པ་མ་རྫོགས་ཀྱི་བར་དུ། །
ཀུན་འགྲིག་མི་ཆོས་རྩ་བ་ཕྱོགས་མེད་དུ་རྒྱས་ཤོག །
བྱམས་བརྩེའི་འཛུམ་ཞལ་དྲོན་མོ་སྐད་ཅིག་ཏུ་ནུབ་ཅིང་། །
གཡར་མའི་སྒྱུ་ལུས་རྒོད་པོའི་ཁ་ཟས་སུ་གྱུར་བས། །
མ་ཡིག་རྒྱུན་ལ་བསྟར་བའི་སྙན་ངག་གི་མཆོད་པས། །
སྐྱོ་གདུང་མྱུར་བར་ཞི་བའི་དབུགས་དབྱུང་རེ་སྩོལ་ཅིག །
གསུམ།
ཟླ་མཆོད་དུས་ཆེན་གྱི་ཟླ་བ། །
བཟའ་མི་གོ་འདུས་ཀྱི་དྲན་སྐུལ། །
མུན་པའི་བྱང་ཁོག་གི་ང་ལ། །
སྐྱོ་ཤས་སྡུག་ཡུས་ཀྱི་ཁ་སྣོན། །
མ་ལོ་ཁྱིམ་རྒྱུད་འདིའི་དྲོད་ཡིན། །
ལྷན་འཛོམས་ཁྲི་ཕྲག་གི་རྒྱུ་ཡིན། །
ངེད་ཚང་ཁྱེད་ཚང་གི་ཁྱད་མེད། །
འདི་བཟང་གན་ངན་གྱི་ཚིག་མེད། །
སྐྱབས་འཇུག་གཙང་མ་ཡི་མཐུ་ལས། །
ལམ་གྱི་གེགས་བར་ཀུན་ཞི་ཞིང་། །
ཟས་གོས་ཕངས་མེད་ཀྱི་སྦྱིན་པས། །
གཞིས་འདི་ཀུན་སྨོན་དུ་བསྐྱངས་པ། །
གནག་པའི་ཁྲོ་གཉེར་ནི་མེད་ཅིང་། །
མི་མཐུན་ཕོག་ཐུག་ཀྱང་དཀོན་པས། །
རྩོད་མེད་ཁས་ལེན་གྱིས་བསྐོར་ཏེ། །
ཚད་མེད་གོང་བཀུར་ཞིག་ཐོབ་མྱོང་། །
ཅི་ཡོད་འབུལ་འདོད་ལ་མོས་ཤིང་། །
གང་མཁོ་སྟེར་འདོད་ཀྱིས་བྲེལ་བའི། །
དྲིན་ལྡན་ཡུམ་གཅིག་མའི་མཛད་པ། །
མི་བརྗེད་མེ་ལོང་དུ་གསལ་སོང་། །
དྲིན་གྱི་གུར་ཁང་ན་བཞུགས་ཉིན། །
མདུན་ནས་སྐྱིད་སྐྱིད་དུ་བསྡད་པས། །
འཇིག་རྟེན་ཕ་རོལ་ལ་ཆས་ཉིན། །
རྒྱང་ན་གདུང་འབོད་ཀྱིས་བཟི་ཡོད། །
ཡུལ་ལ་ནམ་ཐོན་སྐོར་འདྲི་མཁན། །
སྐྲ་ཉག་དཀར་པོ་དག་ཡིན་ལ། །
ཕྱིར་ལ་སྐྱེལ་མ་ཡང་གནང་མཁན། །
མིག་ཆུ་ཐར་ཐོར་དག་ཡིན་ནོ། །
མི་བརྟན་འཕྲལ་ཡུན་གྱི་བདེ་བ། །
ནམ་མཁའི་སྤྲིན་པ་དང་འདྲ་བྱུང་། །
འདུ་འབྲལ་རང་ཐོག་ཏུ་འབབ་དུས། །
རེ་ས་དམ་ཆོས་ལས་མི་འདུག །
དབྱར་ཟླ་སང་ལོ་ཡང་ཚེས་ཡོང་། །
མེ་ཏོག་དེ་བཞིན་དུ་བཞད་ཡོང་། །
མ་ལོར་ཞལ་མཇལ་གྱི་སྐལ་བ། །
གཏན་དུ་ཡོང་ཐབས་ཤིག་གང་ན། །
ཟིང་ལོང་འཚོ་བ་ཡིས་བསླུས་ཏེ། །
འདི་སྣང་རྨི་ལམ་ལྟར་ངེས་ཀྱང་། །
དོན་དངོས་བློ་ཡིད་དུ་དཔྱངས་ཚེ། །
གདུང་བ་ལྷོག་ལྷོག་ཏུ་གདུས་འགྲོ། །
ཀ་དག་བྱང་སེམས་ཀྱི་བདག་མོ། །
རྣམ་དག་ལས་འབྲས་ཀྱི་ཡུམ་ཆེན། །
བཀའ་དྲིན་གཞལ་མེད་ཀྱི་མ་ལོས། །
ཐར་བའི་གོ་འཕང་དེ་ཟིན་ཤོག །
བཞི།
སྤྲོ་སྣང་ཉམས་པའི་ཡ་ཁོག་སུན་སྣང་གིས། །
ཡོངས་སུ་བཟུང་བས་གཉིད་ནི་རིང་སར་གྱེས། །
སྟོན་ནམ་རིང་མོའི་སྟོང་འཇགས་སྲུང་ཞོར་དུ། །
རླབས་ཆེན་མ་ལོའི་སྣང་བརྙན་དྲན་ཏེ་བསྡད། །
མདང་ཡང་སྒེའུ་ཁུང་བརྒྱུད་ནས་དྲིན་མ་ལོས། །
ཁྱིམ་ན་ཞལ་ཏ་གནང་བ་གསལ་བོར་མཐོང་། །
དེ་འཕྲལ་དགའ་བ་རྒྱས་ཀྱང་རྨི་ལམ་ལས། །
སད་དུས་སྔས་འབོག་ཆུང་ཆུང་མཆི་མའི་རྟེན། །
སྤྱིར་ན་ལེ་བར་བཞི་བརྒྱའི་ལམ་ཐག་འདི། །
འཕྲུལ་གྱི་འཁོར་ལོས་སྐར་མ་བཞི་བརྒྱ་ཙམ། །
བཀག་ཆས་ཨར་ལ་གཏད་པའི་ཚུལ་བསམ་ན། །
ནམ་འཕང་གཅོད་པའི་བྱ་ཞིག་ཡིན་ན་འདོད། །
འདུན་མའི་རྟ་རྒོད་མ་ཐུབ་ཡུལ་ཕྱོགས་སུ། །
སླེབས་དུས་སྤང་གཞུང་མེ་ལ་ཤོར་བ་འདྲ། །
སྦྲ་དང་སྲོལ་རྒྱུན་ཅ་ལག་རྣམས་ཀྱིས་ཀྱང། །
མྱ་ངན་མ་བཟོད་རང་སྲོག་གཅོད་ལ་བྲེལ། །
དུས་འགྱུར་སྐབས་ཀྱི་ཆོས་མེད་ཤི་བོ་དག །
དུས་ཀུན་མ་བརྗེད་དགེ་ལ་བསྔོས་ན་ཡང། །
དུས་མཐའི་རྒུད་པ་ཅི་རིགས་མ་བཟློག་པར། །
དུས་འདིར་མ་ལོ་ཁྱེད་ཀྱང་རྒྱང་དུ་གཤེགས། །
སློབ་མཐར་ནམ་ཕྱིན་ཁྱིམ་སོ་ནམ་ཟིན་ལ། །
རེ་ལྟོས་གནང་ཞིང་བུ་ངའི་རྒྱབ་རི་མཛད། །
ང་རང་ལྡོམ་ནས་གར་སྡོད་འདིར་སྡོད་བྲལ། །
ཁྱེད་རང་ཡི་ཐང་ཆད་དེ་ཕེབས་ལགས་སམ། །
ཁྱེད་ནི་ཡིད་འགུལ་གཏམ་གྱི་མཛོད་དུ་གྲུབ། །
ཁྱེད་ཀྱི་བློ་རྒྱ་མཐའ་ཡས་རྒྱ་མཚོར་འགྲན། །
ཚེ་གཡང་ནོར་གཡང་སྐྱིད་གཡང་ཀུན་གྱི་གཞི། །
བྱམས་བརྩེའི་འབྱུང་གནས་མ་ལོ་ཁྱེད་མིན་སུ། །
འབུམ་ཁང་བཞེངས་ལ་ཐར་མདོ་རྩིག་པ་དང། །
རུས་པས་སཱཙྪ་དཔར་སོགས་དགེ་བའི་ལས། །
གང་ཡང་མ་ནུས་རྨོངས་རྒན་ཐ་ཤལ་ངའི། །
བྲང་ལ་འགྱོད་པས་རྐང་བརྡབ་གྲངས་མེད་བྱེད། །
ལྔ།
ཐད་གཏོགས་ཁྱིམ་མི་མ་རེད་ཟེར་ནས་འདས་མཆོད་གུང་སེང་མི་སྟེར་ལ། །
ཉེ་འབྲེལ་རྩ་ལག་ཕལ་བ་རེད་ཅེས་སྣང་ཆུང་ཚིག་གིས་བཙིར་ཡོང་དུས། །
ཡུལ་ལ་ལོག་འདོད་ཆེ་རུ་བཏང་བས་གཞུང་དོན་འཕྲལ་མར་ཐང་ལ་བཞག །
ལམ་གྱི་བཀག་རྒྱ་སྔར་བཞིན་དམ་མོད་འགྲོ་ལུགས་མ་ལུས་སྒྲུབ་སྟེ་ཚར། །
ད་རེས་འགྲོ་སྟངས་འགྲོ་འོང་ཀུན་དང་ཡེ་ནས་མི་གཅིག་འཁྱག་སིབ་སིབ། །
མ་རུང་འགག་སྒོ་ཐམས་ཅད་བརྟོལ་ནས་ཁྱིམ་སྒོར་སླེབས་ན་ཅི་ཞིག་བྱ། །
འཆི་བའི་མདུན་དུ་ང་མིན་ཁྱོད་ཀྱང་ཉམ་ཆུང་སྲོག་ལྡན་རྐང་གཉིས་པ། །
མྱོང་བ་དབུལ་བའི་ལོ་ཉུང་དག་ཀྱང་བསམ་ཤེས་གྲལ་དུ་འཁོད་ལ་ལྟོས། །
ཁྱོད་རང་སྐྱིད་དུས་དྲ་ལམ་བརྒྱུད་ནས་ང་ལ་བགོ་ཐབས་མི་འདུག་ཅིང་། །
ང་རང་སྡུག་ཚེ་མངོན་ལྐོག་འཕྲང་ནས་ཁྱོད་ལ་བསྐྱི་ཐབས་མི་ལྡན་པས། །
ཁ་ཟུར་འཛུམ་དང་མིག་འགྲམ་ཆུ་ཡིས་དོན་ལ་གང་ཡང་མི་མཚོན་ཏེ། །
སོ་སོའི་སྐྱིད་སྡུག་སོ་སོས་ཤེས་ན་ད་གཟོད་ཕལ་ཆེར་འགྲིག་སྟེ་འདུག །
འཕྱ་ཡང་མ་ལོའི་དྲན་གདུང་བྲིས་ནས་ཚ་བོའི་བསམ་དོན་འགྲུབ་པར་བྱེད། །
དམོད་ཀྱང་སྡུག་ལས་བདེན་པ་བསྔོགས་ཏེ་མཁོ་མིན་བྱ་བྱེད་རྒྱབ་ཏུ་འདོར། །
སྐྱེ་འཆི་འདི་ཉིད་སྔ་གཞུག་ཙམ་རེད་གཡོལ་ནས་འབྲོ་ཐབས་མེད་པའི་ཁར། །
དར་རྒུད་འདི་ཡང་སྨོན་ལམ་བཏབ་ཀྱང་བཟློག་པའི་དཔེ་ཞིག་གང་ན་ཡོད། །
སྐབས་རེར་རང་གི་གྲོགས་ཚོམས་འདི་ཀོ་རང་དང་འབྲེལ་བ་མེད་པ་འདྲ། །
དགའ་བའི་གླུ་སྒྲ་སིང་སིང་གཏོང་གིན་ཞེ་ལ་བཙན་གྱིས་འཇོག་ནི་མང་། །
སྤྱིར་ན་མ་ཕྱི་དྲིན་ཆེན་མ་གཏོགས་བརྩི་རྒྱུ་བཀུར་རྒྱུ་གྲངས་མེད་ཀྱང་། །
ཁོང་ཉིད་ཤོར་བའི་གདུང་འབོད་རེ་རེ་གཡང་འབོད་སྙན་ངག་རེ་རེ་ལགས། །
རྙེད་མེད་གཉེན་དང་འགྱུར་མེད་གྲོགས་ལ་ཞེ་མཐོང་ཆེ་མིན་མ་འདྲི་རོགས། །
ཁ་ཡག་མིན་ཞིང་ཁོག་དྲང་ཡིན་པའི་མི་རྣམས་ང་ལ་འགྲོགས་འདྲིས་རིང་། །
ས་མཐའི་ཐོབ་ཤོར་ཚང་རྩིས་མི་ཕོད་རེ་དོགས་བརྒྱ་དང་བརྒྱད་ཀྱིས་མནར། །
ཡིན་ཡང་སྡུག་འདི་འཕྲད་དུ་གཏུབ་ནས་སླར་ཡང་ལམ་དུ་ཆས་དགོས་ཡོད། །
དྲུག
ཁར་རྩང་རི་གྲོང་དྲོད་ཀྱིས་བཟུང་དང་གཅིག །
མདང་ནུབ་རི་ཟོམ་ཁ་བས་བཟུང་དང་གཉིས། །
ད་ནངས་རི་སུལ་སྨུག་པས་བཟུང་དང་གསུམ། །
མི་རྟག་སྒྱུ་མའི་གསལ་འདེབས་ཡིན་ཤས་ཆེ། །
མ་ལོའི་དཀར་གཙང་རུས་པ་འཐོར་སའི་གནས། །
ཐུགས་སྨོན་མཐའ་དག་ཡུན་དུ་རྫོགས་སའི་ཡུལ། །
ཆོས་གཡང་ཆར་ལྟར་འཇོ་སའི་ཆོས་ཀྱི་ལྗོངས། །
ཞིང་འདིར་ཏབ་ཅིག་བསྡད་ཀྱང་ཉམས་རེ་དགའ། །
ཡིག་ངོ་ཆོད་ཐབས་བྲལ་ཡང་སེམས་བསམ་པ། །
མཆོག་ཏུ་བཟང་བའི་ཁྱད་ཆོས་ད་རེས་བསྟན། །
ངོ་མཚར་འདི་ཡིས་སྡུག་བསྔལ་སིལ་བུར་བྱས། །
དྲིན་གྱིས་བསྐྱངས་མྱོང་ཁྱེད་ལ་ཕྱག་འཚལ་ལོ། །
རྨི་ལམ་དངོས་ཡོད་མིན་པའི་མཐིལ་རྟོགས་ཏེ། །
སེམས་ཐག་བཅད་ནས་མིག་ཆུ་མ་འབྱིན་ཡོད། །
ལས་ཀྱི་བུ་ཆུང་དཀར་པོས་གྲོགས་དན་མཛོད། །
གཤིན་རྗེ་ཆོས་ཀྱི་རྒྱལ་བོས་དཔུང་གཉེན་མཛོད། །
མ་ཎི་ཚར་གཅིག་ཡན་གྱི་དགེ་བའི་འབྲས། །
མ་ལོ་གཙོ་བྱས་དྲིན་ཅན་འགྲོ་རྣམས་ལ། །
རྣམ་གྲོལ་གོ་འཕང་འཐོབ་པའི་རྒྱུར་གྱུར་ཏེ། །
མཐའ་མེད་བདེ་བའི་དཔལ་ལ་སྤྱོད་པར་ཤོག །
བདུན།
ལྟོས་དང་མཁའ་ཡི་ཐང་དཀར་རྒོད་པོ། །
སྣ་ཚོགས་ཌཱ་ཀིའི་སྤྲུལ་བ་ཡིན་འདུག །
དུང་དཀར་ཞི་བའི་གནས་ལ་འཁོར་ན། །
གཤིན་ཡུལ་འགྲིམ་པའི་མ་ཕྱི་དྲན་ནོ། །
མ་ཕྱིའི་བསླབ་བྱ་སེམས་ལ་བརྐོས་ཏེ། །
སྐྱོ་སྡུག་འཛུམ་དུ་བསྒྱུར་ལ་འབད་ནས། །
རྒྱང་བཞུད་ལོ་ཟླའི་རྒྱུན་ཐག་སྟེང་ལ། །
སླར་ཡང་རེ་བའི་མདུད་ཅིག་བརྒྱབ་ཡོད། །
མིག་ཆུ་མེད་དུས་མི་སེམས་རྡོ་རེད། །
མིག་ཆུ་མང་ཡང་སྨོད་པའི་གཞི་རེད། །
གང་ལྟར་མ་བཅོས་རང་བཞིན་དྲང་པོས། །
ཀུན་ལ་བདེན་པ་བདར་ན་མཛེས་ཨང་། །
ལས་ཉོན་མ་བོས་མགྲོན་དུ་འདུས་ཏེ། །
ནང་གི་བརྩེ་བར་གས་ཆག་བྱུང་ཚེ། །
འཁོར་བར་སྙིང་པོ་ཡོད་མེད་རྩོད་རྒྱུར། །
ང་ཡང་ངལ་བ་ཁོ་ནས་དེད་ཡོང། །
ན་ཆུང་ཕལ་ཆེར་དབུགས་ལྒང་འདྲ་སྟེ། །
གཞན་དབང་རླུང་གི་རྒྱུ་བར་བསྟུན་པ། །
ཡིན་རུང་ཕ་ཁུ་འབྲོང་འདྲ་རྣམས་ལ། །
བསམ་གྱིན་སེར་སྣ་ཆེན་པོ་སྐྱེས་སོང་། །
ཞིབ་འདང་མི་ཕོད་སྐྱོ་སྣང་རྐྱང་རྐྱང་། །
མཚན་ལ་མ་ངེས་གཉིད་ཀྱང་བོར་འགྲོ། །
ཚིག་སྣ་རིང་བའི་གཏམ་གླེང་མི་འཐེན། །
བློ་སྣ་ཐུང་བའི་འབྲེལ་ཐག་མི་འཛིན། །
ད་ལྟའི་སྡུག་བསྔལ་འདི་ལ་བསམ་ནས། །
གཅིག་པུ་རི་ལ་འབྲོ་ཐབས་མེད་པས། །
ཚོར་བའི་ཁམས་ནས་རྩོམ་རེ་འབྲི་བཞིན། །
འཚོ་བའི་ངོགས་སུ་མི་འདུར་རང་འདུར། །
བརྒྱད།
འཚོ་ཚིས་ཀྱིས་གཉེན་མི་རྣམས། །
ཕྱོགས་མེད་དུ་གཏོར་ནས་སོང་། །
ལྷན་འཛོམས་ཀྱི་སྐལ་བ་ཡང་། །
ལམ་བར་ནས་རྫོགས་པར་གྱུར། །
ད་གཟོད་ངས་དྲིན་ཆེན་མའི། །
རེ་སྒུག་གི་མངའ་ཐང་ཚོར། །
འཆི་རྒྱུ་ཞིག་མེད་པ་ལྟར། །
གསོག་འཇོག་གི་སྐེ་རུ་འཐམ། །
འདོད་འདོད་ཅིག་མ་ཐེམ་གོང་། །
མི་འདོད་དག་ཕྲག་ལ་ལྷུང་། །
ད་གཟོད་ངས་དྲིན་ཆེན་མའི། །
མན་ངག་གི་བསྡུས་དོན་ཚོར། །
ཕྱུག་འགྱུར་གྱི་འདུན་མའི་སྟེང་། །
སུན་སྣང་གི་རླུང་ཆེན་ལྡང་། །
དགོད་སྒྲ་སོགས་ཁུར་ཤུལ་ན། །
ཕ་ཡུལ་ནི་འཇམ་ཅག་གེར། །
ད་གཟོད་ངས་དྲིན་ཆེན་མའི། །
སེམས་ཁུར་གྱི་ལྕི་ཚད་ཚོར། །
ཚིག་རྩུབ་ནི་རེས་ཀྱིས་འཕེན། །
བདེན་ལུགས་ནི་ཁད་ཀྱིས་ལྕེབ། །
ངོ་ཚ་ནི་སྟོབས་ཀྱིས་འདོར། །
གཡོ་ཁྲམ་ནི་ལྡབ་ཀྱིས་འཕར། །
ད་གཟོད་ངས་དྲིན་ཆེན་མའི། །
བྱམས་སེམས་ཀྱི་གཟི་འོད་ཚོར། །
ལྟ་ལོག་གི་ཚོགས་ཁག་བྱུང་། །
སྤྱོད་ལོག་གི་ཕྱོགས་ཁག་ཆད། །
ཕ་སྲོལ་གྱི་ཁ་མིག་བྲུས། །
ཕ་སྐད་ཀྱི་ཨོལ་བ་བསྒགས། །
ད་གཟོད་ངས་དྲིན་ཆེན་མའི། །
ཨམ་གཙིགས་ཀྱི་སྙིང་པོ་ཚོར། །
མ་རིག་པའི་ནད་ཕོག་སྟེ། །
བདག་འཛིན་གྱི་ཁ་དར་བས། །
ཚུལ་མིན་གྱི་སྦྱོར་བ་ལས། །
གུས་མེད་ཀྱི་གཤིས་ཀ་མཐོང་། །
ད་གཟོད་ངས་དྲིན་ཆེན་མའི། །
གཞན་གཅེས་ཀྱི་མཛད་པ་ཚོར། །
ཡིད་ཆེས་ཀྱི་རྩད་པ་རུལ། །
གཏོང་ཕོད་ཀྱི་གཞུང་རྟ་ཆག །
འགྲན་རྩོད་ཀྱི་སྟ་རེ་རྣོ། །
ཕྱི་ནང་གི་འབབ་སྒོ་དོག །
ད་གཟོད་ངས་དྲིན་ཆེན་མའི། །
བཟོད་སྒོམ་གྱི་འབྲས་བུ་ཚོར། །
དགུ།
ང་ནི་བྱམས་ལྡན་མ་ལོའི། །
འཇམ་འཇམ་ཕྱག་དང་ངག་གིས། །
ནོར་བུ་བཞིན་དུ་གཅེས་ཤིང་། །
མིག་འབྲས་ལྟར་དུ་བསྙོར་བས། །
ད་ནི་དུད་འགྲོ་འདུལ་བའི། །
ལྕག་དང་དབྱུག་པ་མི་འགྲོ། །
ད་ནི་འཇིགས་སྣང་སྐུལ་བའི། །
སྡང་སྡིགས་སྐད་ཀྱིས་མི་ཕན། །
ཡིན་ཡང་མི་སེམས་འགུལ་བའི། །
གཏམ་དང་ཚིག་གིས་བཙིར་ན། །
ཤ་ཡི་མིག་པགས་སྲུབས་ནས། །
མཆི་མ་དྲོན་མོ་བཞུར་ཡོང་། །
སྐྱེ་མགོ་ཤོར་བའི་ཉིན་ནས། །
འཆི་བ་ཡིད་དུ་འཇགས་ཤིང་། །
གདོང་ལེན་བགྱི་བ་མཛད་པས། །
མ་ལོའི་གྱེས་གདུང་འདི་ཡང་། །
ཅུང་ཟད་ཡང་དུ་ཆགས་འདྲ། །
མིན་ན་ང་ཉིད་སྡུག་གིས། །
གཏན་དུ་ལངས་རྒྱུ་མེད་པར། །
ཤིན་ཏུ་སྨྱོ་བར་ངེས་འདུག །
གང་ཡོད་རྒྱབ་ཏུ་བཞག་སྟེ། །
གོམ་ཁ་རྒྱང་ལ་གཏད་པས། །
མང་མང་ཞེན་ཆགས་བར་ནས། །
ཡང་ཡང་ཐང་ལ་འགྱེལ་མྱོང་། །
ཨ་གསར་དགུང་ལ་རེག་ནས། །
སྨིན་པའི་རང་འགུལ་ཉམས་ཏེ། །
སྡུག་འདི་བརྗེད་པར་དོགས་པས། །
དབྱངས་གསལ་གྲོགས་སུ་བོས་ཡོད། །
སྨིག་རྒྱུའི་གྲོང་གི་མི་ཚོགས། །
དབང་མེད་བྲལ་ནས་སོང་ཚེ། །
སེམས་ལ་བབས་པའི་ཆོས་ཉིད། །
ལོ་རེ་བཞིན་དུ་ཇེ་གསལ། །
རང་གི་འགྲོ་སྟངས་འདི་ལ། །
འགྱུར་བ་མེད་ན་བསམ་བྱུང་། །
རང་ཡིག་སྐྱོང་བའི་ལས་ལ། །
བར་ཆད་མེད་པའི་སྨོན་ལམ། །
བཅུ།
སྤྱི་སེམས་མི་ཚེའི་སྲོག་ཏུ་བསྟིམས་ཤིང་ལྷག་བསམ་ཉེ་རིང་མེད་པར་གནངས་ནས་ཀུན་དང་མཐུན་པའི་གསེར་ཟམ་འཛུགས་རྒྱུ་རྩ་བའི་འགན་དུ་གསལ་བོར་བསྟན། །
སྐྱེས་ལྷར་ལྷ་བསང་ཆད་དུ་མ་འཇུག་གཡེལ་མེད་སྡོང་གྲོགས་མངོན་སུམ་ཡོད་ཅེས་དངོས་བྱུང་གཏམ་དང་སྦྱར་ཏེ་བཤད་པའི་རྣམ་འགྱུར་གཙང་མ་ཡང་ཡང་དྲན། །
བཞུགས་ཉིན་ཞི་བདེའི་ཕྱཱ་གཡང་རང་འཁྱིལ་གཤེགས་པའི་ཚེ་ཡང་བདེན་པའི་སྟོབས་ཀྱིས་ངོ་མཚར་ས་བོན་ག་ལེར་གཏོར་བ་བླ་མས་རྟེན་འབྲེལ་བཟང་པོར་གསུངས། །
དགུང་ཞག་ཞེ་དགུའི་སྲད་བུར་བརྒྱུས་པའི་དགེ་རྩ་མཐའ་དག་མཆོག་ཏུ་བསྔོས་ཡོད་བདག་གི་དྲིན་མོ་ཆོས་བསོད་ཅན་ལ་ཐར་བ་འཐོབ་པར་བྱིན་གྱིས་རློབས། །
མཐོང་ཚེ་དྲན་པ་ཁོལ་དུ་འཕྱུར་བའི་གཞིས་འདི་བསྲུང་སྟེ་འདུག་འདོད་ཆེ་ཡང་རྒྱང་བཞུད་འཚོ་བའི་བྱ་གཞག་ཁག་ཅིག་མི་འདོད་བཞིན་དུ་འདོར་དགོས་ལ། །
སྐྱ་མདོག་ཤར་བའི་ངོ་གདོང་དག་ཀྱང་རེ་བཞག་མ་བཏང་ཡིད་ཆེས་མ་བརླག་སླར་ཡང་ཁྱོད་དགའ་ང་སྐྱིད་བར་ནས་བཙལ་ཅིང་གུས་པས་སྐྱོང་དགོས་སོ། །
མ་ངེས་འགྲོ་འོང་ཉེན་ཁས་བཟུང་རུང་གཏན་སྡོད་གནས་ཀྱི་གཏད་སོ་མེད་འདི་ལོ་ན་འཕར་གྱིན་ཁུར་གྱིས་དུད་ནས་ཨ་མའི་སེམས་ལ་ལྷུང་ཡང་སྲིད། །
གཞུང་ཕྱོགས་བྱ་བའི་རི་ལུང་ཀུན་ལ་ཕ་སྐད་མ་ཡིག་མེ་ཏོག་འདེབས་པར་མོས་པ་ཆེ་ཞིང་སུན་པ་མེད་ཀྱང་གེགས་ཀྱིས་བརླམ་ཚེ་བསྐྱུར་དགོས་འདུག །
ད་ཚོད་ཡིད་ལ་བསམ་དབང་མེད་པར་སོམ་ཉིའི་སྒག་ཟྭ་ཁྲོག་ཁྲོག་བརྒྱབ་པས་གློ་བུར་ཆང་གིས་དྲན་མེད་བཟི་བའི་སྣང་བ་ཞིག་གམ་གཞན་ཞིག་གིས། །
འབྱོར་ལྡན་ལྷམ་མཐིལ་ལྡག་པའི་ངལ་དུབ་རྒུད་པའི་ན་སྡུག་ཁ་རུ་བཞག་ན་ཅི་ཡང་མིན་པའི་དཔེ་དོན་ཟབ་མོ་གཅིག་མིན་གཉིས་མིན་དུ་མར་བསྒྲགས། །
རིགས་ཞེན་སྒོམ་པའི་དམ་བཅའ་དང་པོ་འཚོ་བའི་རྩོད་ཉོག་བརྒྱུད་ནས་ཡོང་དུས་གཏང་རག་མེད་པའི་ཁུར་བོ་རྡོག་ཅིག་དོར་ན་འགྲིག་ཀྱང་བློས་མི་ཐོངས། །
གདམ་གསེས་བརྡར་གཅོད་ཚར་དུ་དངར་བའི་འཁོར་བ་འདི་ཡི་རྒྱུགས་གཞི་སྣ་ཚོགས་བྲི་འདོད་མེད་ཀྱང་དེད་དེ་ཐོན་པས་གོམ་ཁ་རང་ལ་མ་དབང་ངོ། །
ཁོམ་མེད་ལས་ཀྱི་རྐྱེན་དུ་ངེས་པའི་མངོན་མེད་དུས་ཀྱི་རྐང་བ་རྣོན་པོས་ཚེ་ཡི་དར་ཐག་དུམ་བུར་གཅོད་ལ་དོ་སྣང་གཏན་ནས་མ་བྱས་པར། །
ལག་ལེན་སྟོང་བའི་དྲན་ཤེས་རུམ་སྟེ་རང་མགོ་རང་གིས་གཡོགས་པའི་རྒྱུན་སྲོལ་རྒྱན་དུ་ངོམ་ནས་འཁོར་འདོད་མིན་ཡང་ལུས་ལ་ལྡུམ་བུ་རེག་འབྱར་བཞིན། །
བདག་པོ་མེད་པའི་རྣམ་ཤེས་མང་པོས་ནམ་ཀུན་དྲ་རྒྱའི་བསླུ་བྲིད་མ་བཟློག་ཕ་ནོར་རིན་ཆེན་བང་མཛོད་ཤོར་འདི་སྙིང་ཤ་ན་བའི་དོན་དག་ཅིག །
མྱུར་བར་བག་ཡོད་ཚུལ་གྱིས་གསོན་ཏེ་ལས་དོན་འཁྱོངས་པའི་ལག་རྟགས་མེད་ཚེ་བརྩི་འཇོག་ལྟ་བ་གླེང་རྒྱུ་ཕར་ཞོག་མི་གྲལ་འདི་ཡང་ཟིན་པ་དཀའ། །
ཞེས་པ་ནི་རང་ལ་བཀའ་དྲིན་ཤིན་ཏུ་ཆེ་བའི་མ་ཕྱི་ལགས་ཀྱི་ཚེའི་འཕེན་པ་རྫོགས་པར་མར་མེ་ཚེ་འབར་ཞིག་གི་དོད་དུ་དགུང་ཞག་ཞེ་དགུའི་ནང་བྲིས་པའོ། །