ལོ་དང་ཟླ་བར་བསླས་པའི། །
ཚིག་གསུམ་སྐར་མའི་སྙན་ཤལ། །
ད་རུང་ཉི་ཟླའི་ཕྲེང་བ། །
གཙང་བོའི་གཞུང་ལ་མ་བཏབ། །
ཤར་བཞུད་སྤྲིན་ལ་བསྐུར་ཡོད། །
སྤྲིན་དཀར་སླེབས་པ་བྱུང་ན། །
མ་བྲིས་ཨ་ཡིག་དཀར་པོ། །
བྲག་དམར་ཐེམ་ལ་མ་རྐོ། །
སྤྲིན་པའི་ཟེ་བར་ཐོགས་དང་། །
ཚེ་འགྲོ་ཚེ་ཡི་ལམ་བྱང་། །
གཏན་དུ་ཞེ་ལ་དཔར་ཆོག །
དབྱར་གསུམ་དབྱར་ལ་བཏགས་པའི། །
སྙིང་གཏམ་བལ་དཀར་སྐ་རགས། །
ད་རུང་དངུལ་དཀར་གྲི་ཆུང་། །
སྡེ་ཆེན་ཁྲོམ་ལ་མ་འཚོང་། །
ལྷོ་བཞུད་རླུང་ལ་སྐུར་ཤོག །
རླུང་བུ་འདི་གར་བྱུང་ན། །
གཡས་འཁོར་གཡུང་དྲུང་རི་མོ། །
ཤིང་སྒོའི་ཐོད་ལ་མི་འབྲི། །
རླུང་གི་གཤོག་པར་འདོགས་ཡོང་། །
ཞེ་མཐུན་འཁོར་བའི་གླུ་ཆུང་། །
གཏན་དུ་ངག་ལ་གྱེར་ཤོག །
ཨ་འགྲིག་སྲིད་པའི་སྐར་ཁྱིམ། །
ཆ་འགྲིག་ཉི་མ་ཟླ་བ། །
ཡང་འགྲིག་འཁོར་བའི་བར་སྣང་། །
ལན་གཅིག་འགྲིམ་རྒྱུ་བྱུང་ན། །
ལྷ་ཡི་བྱུང་རབས་མི་འདེད། །
འདྲེ་ཡི་རྫུ་འཕྲུལ་མི་སྤྲོ། །
ཕུན་ཚོགས་འཁོར་བའི་ཐང་ལ། །
དགའ་བདེའི་དཔལ་གྱིས་ཆས་འགྲོ། །
སྲིད་པ་འཁོར་བའི་ཆུ་བཞི། །
འཇིག་རྟེན་སྲིད་པའི་ལ་དྲུག །
ཞེ་ཚིག་མགུར་མས་བརྒལ་ཆོག །
རང་བྱོན་བརྩེ་བས་འཕུར་འགྲོ། །
ཡ་གི་ལྷ་ཡི་དཀྱིལ་འཁོར། །
མ་གི་དམྱལ་བའི་ཟངས་དམར། །
སེམས་ཉིད་ལྡོག་ཏུ་འཕྲོས་པའི། །
སྣང་སེམས་དྲོན་མོ་ཡིན་ན། །
མི་ཡུལ་བདེ་བ་ཆེན་པོ། །
འཛུམ་ཆུང་འོ་མའི་ནང་ཡིན། །
ལས་ཡག་ལམ་འགྲིག་བྱུང་བ། །
བརྩེ་ཆེན་ནང་གི་རྟེན་འབྲེལ། །
འཁོར་བའི་སྨོན་ལམ་རང་འགྲུབ། །
ཨེ་མ་ང་ཡི་མི་ཡུལ། །