སྐུ་མདོག་དུང་ཟླའི་མདངས་བཞིན་ཡིད་འཕྲོག་པ། །
སྙན་པའི་རྒྱུད་མངས་དཀྲོལ་ལ་རབ་མཁས་པའི། །
སྒྲ་དབྱངས་རྒྱལ་མོའི་སྐུ་གསུང་ཐུགས་གསུམ་ལ། །
ཇི་སྲིད་བར་དུ་མི་འབྲལ་ཕྱག་འཚལ་ལོ། །
རྣམ་དཔྱོད་ཆུ་འཛིན་དཀར་པོའི་ལྡིང་ཁང་དུ། །
རབ་མཛེས་མཚོ་བྱུང་ལྷ་མོའི་ཐུགས་རྗེའི་འོད། །
བདག་ཡིད་མ་རིག་ཀློང་ལ་འཕྲོས་གྱུར་ནས། །
ཟབ་གསལ་མྱུར་བའི་ཤེས་རབ་ད་སྩོལ་ཅིག །
འཇོ་སྒེག་མཛེས་སྡུག་ལང་ཚོས་ས་གསུམ་གཡོ། །
སྙན་འཇེབས་སྒྲ་དབྱངས་རྣ་བའི་བུ་གར་སྨིན། །
དབྱངས་ཅན་ལྷ་མོའི་བརྩེ་བས་རྗེས་བཟུང་ནས། །
སྐུ་ཡི་དངོས་གྲུབ་བདག་ལ་སྩོལ་བར་ཤོག །
བདུད་རྩི་རྒྱ་མཚོའི་གནས་ལས་བྱུང་བ་ཡི། །
འཛུམ་མདངས་འབྲས་ལྡན་ཟླ་བ་རྒྱས་འདྲ་བ། །
ངག་དབང་ལྷ་མོའི་གསང་གསུམ་འཕྲིན་ལས་ཀྱི། །
གསུང་གི་དངོས་གྲུབ་བདག་ལ་སྩལ་དུ་གསོལ། །
ཤེས་བྱའི་གནས་ཀུན་མ་ལུས་མཁྱེན་པའི་གཏེར། །
རོལ་སྒེག་གར་གྱིས་འགྱིངས་པའི་ཚངས་སྲས་མའི། །
མ་ལྟར་བརྩེ་བ་ཆེན་པོས་རྗེས་བཟུང་ནས། །
ཐུགས་ཀྱི་འཕྲིན་ལས་བདག་ལ་དབབ་པར་མཛོད། །
མཛེས་སྡུག་ལང་ཚོའི་སྐུ་ཡི་དཔལ་འབར་ཞིང་། །
གསུང་གི་དངོས་གྲུབ་མཆོག་གིས་བཅུད་ལྡུད་པ། །
ཐུགས་ཀྱི་བརྩེ་བས་འགྲོ་ཀུན་སྐྱོང་མཛད་པའི། །
དབྱངས་ཀྱི་རྒྱལ་མོས་རྗེས་སུ་འཛིན་གྱུར་ཅིག །
རབ་དཀར་དུང་མདོག་སྟོང་གི་འཛུམ་རྒྱ་གྲོལ། །
རྒྱུད་དྲུག་པི་ཝང་ཐོས་འཛིན་བུ་གར་སྙན། །
ཕྲ་ཞིབ་ཤེས་བྱས་ཐུགས་རྒྱུད་རབ་མཛེས་པའི། །
དྲི་ཟའི་བུ་མོས་བདག་བློ་སྐྱོང་གྱུར་ཅིག །
དད་པའི་རླབས་ཕྲེང་གཡོ་བའི་གུར་ཁང་ནས། །
མཛེས་སྡུག་ལྷ་མོའི་འཕྲིན་ལས་གངྒཱའི་རྒྱུན། །
བདག་སོགས་འགྲོ་བའི་བློ་ཡིས་ཚིམས་གྱུར་ནས། །
མ་རིག་མུན་པའི་ཚོགས་ཀུན་འཇོམས་གྱུར་ཅིག །
ལྷ་ལམ་དབྱིངས་ན་རྩེན་པའི་ཚངས་སྲས་མའི། །
ཞལ་རས་ཟླ་བ་རྒྱས་པའི་འཛུམ་མདངས་ཀྱིས། །
བློ་དམན་ཡིད་ཀྱི་རྨོངས་མུན་དཔུང་ཚོགས་ལ། །
ཡེ་ཤེས་འོད་ཀྱི་སྣང་བས་བསལ་བར་མཛོད། །