ལོ་དེ་ག་དུས་ཡིན་པ།།
ཟླ་དེ་ནམ་དུས་ཡིན་པ།།
འདི་རེད་བསམ་པ་ཞིག་ཀྱང་།།
ངེས་པའི་ཚད་ཐུབ་མེད་མོད།།
རེད་དེ་བདག་གིས་སྐྱེ་སྔོན།།
བསྐལ་མང་རྒྱ་ཆེན་བསོད་ནམས།།
བསགས་པའི་འབྲས་བུ་མ་ལུས།།
ཚེ་འདིར་སྨིན་པ་བྱུང་ངམ།།
ཡང་ན་ཀ་ཤི་ཡུལ་ཞེས།།
ཉམས་དགའི་ནགས་ཚལ་ཁྲོད་ཀྱི།།
མཐུན་པ་སྤུན་བཞི་ལྟ་བུ།།
སྟབས་ལེགས་སྟེས་དབང་ཡིན་ནམ།།
མཐོ་བ་ནམ་མཁའི་ལམ་གྱི།།
ཁྲི་གདུགས་ཉི་མ་དེ་དང་།།
དམའ་བ་ས་གཞི་གཉིས་པོ།།
མཐུན་པ་རྟེན་འབྱུང་ཡིན་པས།།
དེ་བཞིན་ཁྱོད་དང་ང་རང་།།
བར་ཐག་ཡུལ་གྱིས་བསྐལ་ཡང་།།
ཕན་ཚུན་མཐུན་པ་བྱུང་འདི།།
ལས་ཀྱི་བགོ་སྐལ་ལོས་ཡིན།།
ཁྱིམ་གྱི་ཀུན་དགའ་ར་དང་།།
མ་བཅོས་རང་བྱུང་ཁམས་ཀྱི།།
བཏབ་དང་མ་བཏབ་ཇི་སྙེད།།
མཛེས་བྱེད་མེ་ཏོག་སྣ་ཚོགས།།
མིག་ལྡན་སེམས་ཅན་ཀུན་ལ།།
མཛེས་དང་མི་མཛེས་བྱེ་བྲག།
ཁྱད་པར་དཔག་ཏུ་མེད་པ།།
འཁོར་བའི་ཆོས་ཉིད་ཡིན་འགྲོ།།
དེ་ལྟར་ཁྱེད་ཀྱི་ངོ་གདོང་།།
ཟླ་བའི་འོད་ལ་ནུས་ཀྱང་།།
སྐྱེ་འགྲོ་ཀུན་གྱི་མིག་དབང་།།
ཅིག་ཅར་འཕྲོག་པ་མི་སྲིད།།
ཁྱོད་རང་མཛེས་ཤིང་སྡུག་ཅེས།།
བཤད་ན་ཁ་ཕོ་ཆེ་མོད།།
འོན་ཀྱང་རང་གི་སེམས་ལ།།
ཧ་ཅང་འཚམ་པོ་ཡིན་འདུག།
ད་ཡང་དཔྱིད་ཀ་ཚེས་བྱུང་།།
ཆར་ཆུས་ས་གཞི་བརླན་ནས།།
དགུང་སྔོན་ས་ལ་འཕོས་ལྟར།།
ནོར་འཛིན་མཐོན་ཀའི་ཁ་དོག།
བདག་གིས་རིང་མོ་ཉིད་ནས།།
སྒུག་པ་ནང་བཞིན་འཕྲད་བྱུང་།།
དཀར་དམར་མེ་ཏོག་ཚོགས་ལ།།
སྦྲང་མ་སྤྲིན་ལྟར་འཐིབས་པས།།
བདག་ཀྱང་ཁྱོད་ཀྱི་ཕྱོགས་སུ།།
འགྲོ་འདོད་སེམས་ཀྱི་རྟ་ཕོ།།
སྲབ་ཁ་བཅད་ནས་ཤོར་ལྟར།།
ཁོག་པའི་ནང་དུ་ཤོང་དཀའ།།
ཡིན་ཡང་བས་མཐའི་ཡུལ་གྱི།།
ཁྱོད་རང་ཐག་ཀྱང་རིང་བས།།
བྱ་ཞིག་ཡིན་ན་མ་གཏོགས།།
འགྲོ་བའི་ཐབས་ཤིག་མི་འདུག།
ཉི་མས་ནུབ་རི་བརྒལ་དུས།།
སྐར་ཚོགས་ལུག་ཁྱུ་བཀྲམ་འདྲ།།
ཟླ་བ་ཁེར་འགྲོ་འོག་གི།།
བདག་ནི་གདུང་བས་བཅིངས་པ།།
གཅིག་པུ་འདུག་པའི་དུས་སུ།།
སྐྱོ་བ་ཆང་ལ་བསྲེས་ནས།།
ཆང་དམར་ཁོག་ལ་མིད་དུས།།
སྐྱོ་རོགས་ཆང་དེ་ཡིན་འགྲོ།།
མེ་ཏོག་སྦྲང་མ་ཞུགས་པས།།
འགུལ་ལྡེག་གཡོ་བ་མི་ཆད།།
དེ་ཚེ་གེ་སར་ལ་ཆགས།།
སྦྲང་མས་བཅུད་ནི་ལེན་བྱེད།།
གླང་ཆེན་ཆང་གིས་མྱོས་ཏེ།།
གཡོ་འགུལ་ཅི་ཡང་མ་ནུས།།
ཡུན་རིང་སྨྲ་བ་མེད་པའི།།
ཉམས་དགའི་ཚུལ་དེ་ཨེ་མ།།
བདག་ཀྱང་བག་ཡངས་ངང་གནས།།
སྤྲིན་པ་གདུགས་ལྟར་བཏེགས་ནས།།
སེམས་ཀྱི་གུར་ཁང་ནང་དུ།།
གཡུ་ཆུང་དྲུང་དམར་ཉར་ཡོད།།
ཉོས་པའི་གཡུ་ཡི་ཕྲེང་བ།།
སྐུད་ཐག་ཆད་ན་མི་འགྱོད།།
མ་ཉོས་གཡུ་ཆུང་དྲུང་དམར།།
ལུས་ནས་བོར་ན་ལོས་སྡུག།
འཁོར་བ་སྤང་རིའི་ལོགས་ཀྱི།།
ཆར་རྗེས་འཇའ་ཚོན་སྣ་ལྔ།།
འཇའ་ཚོན་ཁ་དོག་མཚར་ཡང་།།
སྙིང་པོ་དེ་ཙམ་མེད་ཀྱང་།།
རྐང་གཉིས་འགྲོ་བ་དང་ནི།།
མིག་མེད་གྲོག་མ་ཡན་ཆོད།།
སེམས་ཀྱི་ལོག་མལ་ཆེད་དུ།།
ཐམས་ཅད་ལང་ལོང་རྒྱུ་ཞིང་།།
གང་ལྟར་འཁོར་བ་འདི་ཡི།།
སྐྱིད་སྡུག་ས་ཁྲའི་ནང་དུ།།
སྣང་སྲིད་སྒྱུ་མའི་ཆོ་ག།
ཚིག་གི་གདངས་ལ་འཐེན་ཡོད།།
དུ་སྤྲིན་ནི་ནང་ཆེན་ཟུར་མང་གི་ཡུལ་ཕྱོགས་ཤིག་ཏུ་སྐྱེས2017ལོ་ནས་བཟུང་གསར་རྩོམ་གྱི་ལས་ལ་ཞུགས་ཏེ་ད་ལྟའི་བར《ཁམས་པའི་རྩོམ་རིག་སྒྱུ་རྩལ》《རྡོ་ཏི》《དྲི་ཟའི་གླིང་བུ》《མང་ཆུ་དུས་དེབ།》《ཤྭ་སྐྱ་དུས་དེབ།》《ཁྲི་ཤོར་རྒྱལ་མོའི་རླབས་སྒྲ》《མཚོ་སྔོན་བོད་ཡིག་གསར་འགྱུར།》《ཁམས་པའི་ཚགས་པར།》 《རྔ་བའི་ཚགས་པར།》《གཞིས་ཀ་རྩེ་ཉིན་རེའི་ཚགས་པར།》《མཚོ་ལྷོ་བོད་ཡིག་ཚགས་པར》《ཀྲུང་གོ་བོད་ཀྱི་དྲ་བ》《བཙན་པོ་མགར་གྱི་དྲ་བ》 《རྨ་ཀླུང་རིག་གནས་དྲ་བ》《ཁམས་པའི་དྲ་བ》 《ཁམས་པའི་སློབ་ཁྲིད་དྲ་བ》སོགས་དང་གཞུང་སྒེར་གང་རུང་གི་དྲ་ཚགས་དེབ་གསུམ་དུ་སྙན་ངག་ཅི་རིགས་འགའ་བཀོད་མྱོང་། །