ངའི་གཉིད་བོར་སོང་།
-----བསོད་ནམས་འོད་འབར།
སའི་གོ་ལ། ཡང་ན་ངའི་མལ་གདན།
ངའི་གཉིད་བོར་སོང་བ། ཁྱེད་གཉིས་ལན་ནམ།
ཡང་ན། ང་ལན་པ་ཡིན།
འཕུར་མི་ཤེས་པའི་ཡུལ་བྱེའུ་དེ།
ངའི་སྒེའུ་ཁུང་ལ་ཐོགས་པ།
སྟབས་མ་ལེགས་པས་ཡིན་ནམ།
ཡང་ན་ངའི་སྒེའུ་ཁུང་ཆུང་དྲག་པས་ཡིན།
ས་གཞི་འཁྱག་གིས་བསྡམས་ཀྱང་།
སྐྱག་འབུ་དེ་དགུན་ཉལ་བྱེད་མི་ཤེས་པ་དེ།
ངའི་ཁང་མིག་དྲོ་དྲག་པས་ལན་ནམ།
ཡང་ན་ཕྱི་རོལ་འཁྱག་དྲག་པས་ཡིན།
ཨ། མི་ཞིག་བཟི་སོང་།
ཆང་ཁམ་གང་མཆོད་ནས་བཟི་སོང་།
ངའི་ཨ་མ་དང་ངའི་བར་ཐག
ང་ཡུལ་ལ་ཐོན་ཡོད།
རྡོ་ཁང་དེའི་སྒོ་ཁ་རུ།
ངའི་ཨ་མ།
སྒོ་བའི་ཡུ་བ་ལ་ཁེན་ཞོར།
ང་ལ་སྒུག་ཡོད་པ་འདྲ།
ཡིན་ནའང་ང་ཡོང་བ་མཐོང་དུས།
དགའ་བ་རུམ་ལ་བཅུག་ནས།
མི་སུན་ཁུལ་བྱེད་ཞོར་མ་ཏྲི་འདོན།
ངའི་ཨ་མ།
ངའི་ན་ཟུག་གི་སྙན་ངག་ཡིན།