ནགས་ཁྲོད་ཀྱི་ལྷའི་རི་དྭགས།
རོལ་སྐུད། [ རྔ་བ། ]
རྨད་བྱུང་སྐུ་ལ་མཚན་དཔེའི་མེ་ཏོག་འཁྱིལ།།
ཐུགས་བརྩེའི་ཆར་རྒྱུན་ཐོག་མེད་འགྲོ་ལ་བསྩལད།།
དཔག་ཡས་ལེགས་ཚོགས་ནོར་བུའི་འོད་འགྱེད་པ།།
ཐུབ་དབང་བུ་རམ་ཤིང་པར་མགོས་བཏུད་བྱ།།
མཁའ་ཡི་ཆུ་འཛིན་འདབ་མའི་གདེངས་ཀ་རུ།།
ཟླ་བྲལ་རིན་ཆེན་ཐོགས་མེད་ཡེ་ཤེས་སྤྱན།།
གདུལ་བྱ་པདྨའི་དགའ་ཚལ་སྐྱོང་ཕྱིར་དུ།།
རྣམ་ཀུན་མཁྱེན་པ་རབ་ཡངས་གཅིག་ཏུ་བརྩོན།།
རྟེན་འབྱུང་གཏམ་གྱི་སྦྲང་ཆར་སིལ་མ་ཉིད།།
ཕྱོགས་བཅུར་འབེབ་མཛད་སྟོབས་བཅུའི་སྒྱུ་འཕྲུལ་ཅན།།
ངེས་དོན་ལམ་མཆོག་ས་ལ་དབུགས་དབྱུང་པའི།།
འཛུམ་དཀར་ལྕགས་ཀྱུའི་སྣང་བ་མངོན་པར་གསལ།།
མཐའ་མེད་འཁོར་བའི་རོལ་རྩེད་སྣང་བའི་གར།།
གཡོ་མེད་ཏིང་འཛིན་འགྲིམ་པའི་ཀློང་དུ་སིམ།།
འཁོར་འདས་སྒྱུ་མའི་རྩེད་འཇོ་གཡོ་བའི་ཁྱོན།
བདེན་དོན་མངར་བའི་བདུད་རྩིའི་དྲི་ངད་འཕུར།།
ཟླ་ཤེལ་ཅོད་པན་འཆང་བའི་ཞལ་རས་ཀྱི།།
ཐུགས་རྗེའི་དཀྱུས་རིང་འཁྱུགས་པའི་སྤྱན་མདའ་ཡིས།།
སྲིད་ཞིའི་རྨོངས་པའི་མཐོ་དམའ་དྲང་བར་བརྒྱུས།།
ཉོན་མོངས་དགྲ་བཞི་རྫོགས་སངས་རྒྱས་དེ་རྒྱལ།།
ཇི་ལྟར་མཛེས་དཔྱོད་ལྟ་བའི་མེ་ཏོག་གིས།།
འཕུར་ལྷོད་སྦྲང་ཆུང་སྐྱེ་བོ་རྩལ་གྱིས་བཏེགས།
གྲངས་མེད་ཆོས་ཀུན་མཁྱེན་པའི་གང་གི་ཐུགས།།
ཕྱོགས་མེད་བགྲངས་ཡས་འགྲོ་ལ་བུ་ལྟར་བརྩེ།།
དད་སྟོབས་ལང་ཚོའི་སྤུ་ལོང་རབ་འཁྲིགས་ཏེ།།
ཡིད་བརྙན་ཚིག་གི་མེ་ཏོག་ཆུན་པོའི་ཚལ།།
སྤྱན་འདྲེན་ཚེ་རབས་རྗེས་འཛིན་གསོལ་བཏབ་ན།།
སྐྱེ་ནས་སྐྱེ་བར་ཐུགས་རྗེའི་མ་གཡོལ་ཅིག།
དབྱངས་ཅན་མའི་སྐུ་པར་མཇལ་རྗེས།
ག་བུར་དོ་ཤལ་འཛུམ་པའི་རྩེ་དགའི་ཀློང་།།
སྣ་ཚོགས་མེ་ཏོག་ཚོན་བརྒྱའི་དྲི་བསུང་ཅན།།
མི་ཤེས་རྨོངས་མུན་མཐུག་པ་སྒྲིབ་པའི་ངོར།།
རབ་གསལ་ངག་རིགས་བྱེ་བ་ཐུགས་ལ་སིམས།།
མཐོན་མཐིང་རལ་བའི་མུ་ཁྱུད་དབུས་ལམ་དུ།།
སྟོང་ཉིད་སྙིང་རྗེ་ཆེན་པོས་དབུ་ལྕོག་ལྡེམ།།
ཟག་མེད་ལམ་གྱི་ཐར་བའི་རི་སུལ་ན།།
ཀུན་རྫོགས་སྲིད་གསུམ་མཛེས་སྡུག་ལང་ཚོ་འཛིན།།
ཟླ་ཤེལ་རབ་ཏུ་བརྩེགས་པའི་ཕོ་བྲང་དུ།།
ཉམ་དགའི་འོད་ཕུང་གཡོ་བའི་རོལ་རྩེད་འཕྱོ།།
ངེས་འབྱུང་བློ་མིག་ངོས་ཀྱི་ཡིད་འཕྲོག་མ།།
དཔྲལ་བའི་མིག་དང་ཁོག་པའི་སྙིང་དུ་དཔྱངས།།
ཀྱེ་ཀྱེ་ཚུར་བྱོན་དབྱངས་ཀྱི་དགའ་མ་ལགས།།
མ་གཡེལ་བུ་ལ་ངག་གི་གཏེར་མཛོད་སྩོལད།།
ནད་པའི་མིག་ནང་གི་སྐྱོ་བ།
ཁྱོད་ཀྱི་གདུང་བའི་མིག་ཟུང་ལས
རང་ཉིད་ཁེར་རྐྱང་ཡིན་པའི་སྒྲུང་ཞིག་འཆད
ཁྱོད་ཀྱི་ཉམ་ཐག་པའི་ལུས་ཟུང་ལས
འཁྱག་ཧྲུལ་ནང་རྒས་གྱིན་པའི་ཀེང་རུས་མངོན
ཁྱེད་ཀྱི་ཡི་ཆད་པའི་ངོ་གདོང་ལས
ལང་ཚོ བརྩེ་དུང
འཇིག་རྟེན་གྱི་བྱ་དངོས་མཐའ་དག་སྐྱོ་ཚུལ་ཁྲིད
ཡང་ན དུར་ཁྲོད་ཀྱི་བྱ་རྒོད་ལ་འཇིགས་ཚུལ་གླེང
2018.7.13
ལྐོག་གྱུར་གྱི་སྒྲུང་།
ངའི་ཡིད་གཤིས་ཀྱི་མེ་ཏོག
ན་ཚོད་སྒང་བུ་བཞིན་སྨིན་པའི
གཞོན་ནུ་མའི་བརྩེ་གཏམ་གྱིས་བརྐུས
ངའི་རང་ཚུགས་ཀྱི་ཀ་བ
ལམ་འགྲམ་གྱི་དཔུང་ཐུག་བརྒྱབ་པའི
གཞོན་ནུ་མའི་མིག་ཟུང་གིས་བཅགས
དོན་དངོས
བརྩེ་བ་ནི་ཤིན་ཏུ་ལྐོག་གྱུར་ཞིག་སྟེ
ཡིད་འོང་གི་སྐད་ཅིག་མ་དེ་དག་གཏན་དུ་བོར་ཐབས་བྲལ
2018.7:19
བློས་བསླངས་གི་སྒྲུང་།
གལ་ཏེ
ངས་ནམ་ཞིག་རང་གི་སྟོང་བསམ་གྱི་རྟ་ཁྱུ་དེད་ནས
སླར་ཡང་ཁྱེད་ཀྱི་མངའ་ཐང་དུ་གནས་བཅའ་བར་ཐོན་ཚེ
ཁྱེད་ཀྱིས་སྔར་བཞིན་ང་རང་རང་གི་མི་ཚེ་འཕྲོག་མཁན་གྱི
རྐུན་པོར་རློམ་ནས་རྒྱང་དུ་བསྐྲད་སྲིད་དམ
གལ་ཏེ
ངས་ནམ་ཞིག་མི་ལོ་དུ་མའི་སྔོན་དུ་འཁྱག་ཤི་ཐེབས་པའི
གཏམ་རྒྱུད་ཀྱི་ལྷུ་རྐང་ལ་སླར་ཡང་མེ་ཁ་བསྒོས་ཏེ
ཁྱེད་ལ་བཤད་པར་ཐོན་ཚེ
ཁྱེད་ཀྱིས་སྔར་བཞིན་སྐད་ཆའི་མདའ་མཚོན་གྱིས
ང་ལ་གཡུལ་བཤམས་སྲིད་དམ
གལ་ཏེ
ང་ནམ་ཞིག་སླར་ཡང་ཨུ་ཚུགས་ཀྱི་གྲུ་ཆུང་ལ་བསྡད་དེ
འཇིག་རྟེན་གྱི་གཙང་བོ་འདི་བརྒལ་ཏེ
ཁྱེད་ཀྱི་ཟུར་མིག་དང་རྒྱབ་གཟུགས་བཙལ་བར་ཐོན་ཚེ
ཁྱེད་ཀྱིས་སྔར་བཞིན་ང་རང་སེམས་སྐྱ་མོའི་ལས་ལ་བསྐོས་སྲིད་དམ