ཆུང་འདྲིས་ཤར་གྱི་གནམ་མཚོ།།
དྭངས་ཤ་ཆགས་པའི་མཚོ་རེད།།
ང་རང་གནམ་མཚོའི་གཏིང་གི།
ཉ་ཞིག་ཡིན་ན་བསམ་བྱུང་།།
ཆུང་འདྲིས་བྱམས་པ་རྫ་རེད།།
རྫ་རི་སྨུག་གིས་བཟུང་ཡོད།།
ཆུང་འདྲིས་བྱམས་པ་ཆུ་རེད།།
ཆུ་ལ་ཉ་སྲམ་འཁོར་ཡོད།།
ཆུང་འདྲིས་བྱམས་པ་ལྷ་རེད།།
ལྷ་ཞལ་ཉི་མས་དྲོས་ཡོད།།
ཆུང་འདྲིས་བྱམས་པ་མགུར་རེད།།
ངག་གིས་འགུགས་ལུགས་དེ་རེད།།
ཆུང་འདྲིས་རིན་ཆེན་གཟི་རེད།།
ལུས་ཀྱི་འཇམ་སར་གླན་ཡོད།།
ཆུང་འདྲིས་གདུགས་དང་འཁོར་ལོ།།
དཔོན་དང་བླ་མར་མི་བསྐོར།།
ཆུང་འདྲིས་སེམས་སུ་སྡོད་དུས།།
ཞེ་དང་སྣང་བ་སྐྱིད་པ།།
ཆུང་འདྲིས་འགྲོ་ལ་བབས་དུས།།
གློ་སྙིང་སྟེང་འོག་བརྗེས་སོང་།།
ཆུང་འདྲིས་ལོ་ཆང་ཁམས་པ།།
མཆོད་གསུམ་ལྷ་ལ་མཆོད་ཡོད།།
ལྷ་དང་བླ་མ་ཡིན་ཡང་།།
མགོ་ལྕོག་ལྡེམ་ལྡེམ་གནང་སོང་།།
ཆུང་འདྲིས་ལུག་ཆུང་ཚར་དཀར།།
འཇམ་པ་བལ་ལས་འཇམ་སོང་།།
ཆུང་འདྲིས་གྲོ་མ་མར་ཁུ།།
བྱུ་རུའི་མདངས་སུ་འཁྲུངས་ཡོད།།
ཆུང་འདྲིས་ལྷ་སའི་ཇོ་རེད།།
ཐོད་པ་གཏུག་སའི་ཡུལ་ཡིན།།
ཆུང་འདྲིས་ལྷ་སའི་གསེར་ཏོག།
མ་ཁུག་བཏང་བའི་ཏོག་ཡིན།།
ཆུང་འདྲིས་འཁྲིས་སུ་སྡོད་དུས།།
ཡག་པ་བྲིས་པའི་ལྷ་རེད།།
ཤིང་ལ་སྦྲུལ་ལྟར་འཁྱུད་དུས།།
ཆུང་འདྲིས་འཇམ་པོ་བལ་རེད།།
ཆུང་འདྲིས་སྒྲུང་དུ་འཁྲུངས་པའི།།
གླིང་གི་གེ་སར་རྒྱལ་བོ།།
ཨ་ཅེ་སེང་ལྕམ་འབྲུག་མོ།།
ང་རང་ཡིན་ན་བསམ་བྱུང་།།
ཆུང་འདྲིས་གླིང་གི་དཔའ་རྟུལ།།
དགྲ་ལྷ་འཁོར་བའི་མྱི་རེད།།
ཆུང་འདྲིས་རླུང་ལ་བསྐྱོད་པའི།།
རྒྱལ་མཚན་རྩེ་མོའི་དར་ལྕོག།
ཆུང་འདྲིས་ཁ་ཚིག་ཅན་པོའི།།
ཚིག་སྟེ་རྗེ་བཙུན་མགུར་རེད།།
ད་ལོར་རང་སོར་གྱེས་དུས།།
བརྗེད་འགྲོ་བསམ་པ་མ་གནང་།།
ཆུང་འདྲིས་གཞུང་གི་ཆུ་རེད།།
ང་རང་ཆུ་ཁའི་ཉ་ཡིན།།
ཆུ་ཞེང་ཆེ་སྲོལ་མི་ལྟ།།
དྭངས་ཤ་ཆགས་ནོ་བལྟས་ཡོད།།
ཆུང་འདྲིས་ཐབ་ཀྱི་མེ་རེད།།
ང་རང་རྒྱུ་བའི་རླུང་ཡིན།།
ཐབ་ལྷ་བསམ་པ་མིན་ཏེ།།
དྲོད་ཁོལ་བསམ་སྟེ་ཡོང་ཡོད།།
ཆུང་འདྲིས་བྲག་དམར་ཐེམ་རེད།།
ང་རང་ཐང་དཀར་རྒོད་ཡིན།།
བྲག་རི་མཐོ་ལ་མ་བལྟས།།
བྲག་ཅ་བསམ་སྟེ་འཁོར་ཡོད།།
ཆུང་འདྲིས་རི་རྒྱུད་ལྷུན་པོ།།
ང་རང་ལུག་རྫི་གླུ་བ།།
རི་མགོ་མཐོ་བར་མ་བལྟས།།
ཁ་ཞེང་ཆེ་སྲོལ་བལྟས་ཡོད།།
ལྷ་བྱ་ཁྲུང་ཁྲུང་དཀར་མོ།།
ང་ཡི་གཤོག་མཐུན་བྱ་ཡིན།།
རྒྱ་བྱ་ཁུ་བྱུག་སྔོན་མོ།།
དབྱར་དགུན་མཁྱེན་པའི་བྱ་ཡིན།།
ཤ་རུས་གཙང་བའི་བྱམས་པ།།
མི་ཆེན་དཔོན་པོའི་སྲས་རེད།།
ཁྲལ་དང་འུ་ལག་འཇལ་ཞོར།།
ང་རང་མཁར་སྒོར་འབྱོར་ཡོད།།
འདུ་བྲལ་འཁོར་བའི་ཆོས་ཉིད།།
འགྱུར་མེད་གཤིན་རྗེའི་ཁྲིམས་རེད།།
ཁྲིམས་རའི་གཉའ་ཤིང་འདེགས་མཁན།།
ཁྱེད་དང་ང་གཉིས་ཡིན་སོང་།།
ཚེ་འདིར་ཆད་པའི་ལས་འཕྲོ།།
ཚེ་རབས་ཕྱི་མར་བཅོལ་བ།།
གཤིན་རྗེ་ཆོས་ཀྱི་རྒྱལ་བོར།།
ང་ཡིས་ཡར་ཞུ་བརྒྱབ་ཆོག།
ཟླ་འོད་སྔས་སུ་བཟུང་སྟེ།།
སྨག་རུམ་གདན་ལ་བཏིངས་པ།།
འུ་གཉིས་མི་ཡུལ་འདི་ཡི།།
མགྲོན་པོ་གཞན་ཞིག་ཡིན་སོང་།།
འཆི་བྲལ་མིན་པར་བྲལ་ཡང་།།
གསོལ་བ་ལྷ་ལ་བཏབ་ཡོད།།
སྐྱེ་བ་ཚེ་རབས་ཕྱི་མར།།
འཕྲད་ཡོང་སྟོན་པས་གསུངས་ཡོད།།
ཚེ་འདིའི་ཚེ་ནོམ་ཟེར་བ།།
རྒྱུ་དང་གོ་ས་མིན་འདུག།
ཆུ་དང་འོ་མ་བཞིན་དུ།།
ཡིད་སེམས་འདྲེས་པ་ཡིན་སོང་།།
ཆུང་འདྲིས་ཕྱིན་པའི་ཕྱོགས་སུ།།
ཉིན་བསྒུག་མཚན་བསྒུག་བྱས་ཡོད།།
ཉི་མ་ལོ་ལས་རིང་ཡང་།།
ལོག་ཡོང་བསམ་སྟེ་བསྒུག་ཡོད།།
ཉི་མ་ཟླ་བ་གཉི་ག།
འོད་ཁྱིམ་གཅིག་ཏུ་འཁོར་ཡོད།།
འཁོར་ཕྱོགས་ནོར་ཡོང་མི་བསམ།།
གཟའ་འཛིན་བྱུང་ཚེ་ལས་ཡིན།།
རང་སེམས་སོང་བའི་བྱམས་པར།།
གཏན་གྱི་འདུན་མ་བཅོལ་འདོད།།
ལས་ལ་འགྱུར་བ་བྱུང་ཡང་།།
འགྱོད་སེམས་མེད་པ་གནང་ཆོག།
འགྲོགས་འདྲིས་གནང་བའི་དུས་ལ།།
སྙིང་གཏམ་མགྲིན་པར་མ་བསྐྱིལ།།
ཡ་ཆུང་གངས་དཀར་སེམས་ཀྱིས།།
འཁྱེར་སོ་མི་གཅིག་ཁྱད་ཡོད།།
རྩྭ་མཆོག་གུར་ཀུམ་རྩ་སྨན།།
མ་སྦྱར་རང་གྲུབ་སྨན་རེད།།
དུག་ལྡན་སྤོད་ཡའི་རྫས་དང་།།
ཨེམ་རྗེས་མ་སྦྱར་ཨེ་ཆོག།
རྫ་རིའི་འོག་གི་ཆུ་མགོ།
ཆུ་མགོ་མུ་ཏིག་རང་འབབ།།
འདི་ལ་ཆུ་ལག་གཞན་གྱིས།།
འདྲེས་ལྷད་མ་གནང་ཨེ་ཆོག།
རླུང་རྟ་ཡར་འགྲོའི་སྒང་དེ།།
ང་གཉིས་ལས་ཀྱི་སྐྱེས་རི།།
ང་ཡི་ཆུང་འདྲིས་བྱམས་པའི།།
ལུས་ཀྱི་རླུང་རྟ་དར་ཤོག།
ཀ་མགོ་གདུགས་ཀྱིས་བསྐོར་ཡོད།།
ཀ་རྟིང་ཀ་རྡོས་བཟུང་ཡོད།།
ཁྱེད་དང་འུ་གཉིས་དབར་ལ།།
གདུགས་དང་ཀ་རྡོ་མི་དགོས།།
སྙིང་བོ་འདྲེན་པའི་ཆོས་སྒོར།།
ཞུགས་དགོས་བླ་མའི་བཀའ་རེད།།
ཆུང་འདྲིས་ཡིད་ལ་འཁོར་བས།།
ཕྱིར་ནུར་ལན་གསུམ་བརྒྱབ་སོང་།།
དགུན་ལ་ཁ་བ་དབབ་ན།།
ལ་ཐང་བསྐོར་ཏེ་ཕྱིན་ཤོག།
ང་ཡིས་སྒོ་འཕྱོར་འོག་ཏུ།།
རྟ་ཕོའི་རྨིག་སྒྲར་མཉན་ཆོག།
དབྱར་ལ་ཆར་ཆུ་ཆེ་ན།།
མཚོ་ལ་ཀོ་གྲུ་ཐོངས་ཤོག།
ང་ཡིས་མཚོ་མོའི་འགྲམ་དུ།།
ཆར་བཤོལ་བྱེད་ས་ཞུས་ཆོག།
འོ་སྤྲིའི་འོ་ཇ་དཀར་པོ།།
དཀར་ཡོལ་འབྲུག་མར་འཁྱིལ་ཡོད།།
དཀར་ཡོལ་འབྲུག་མ་རྟག་ཚེ།།
འཁྱིལ་ཐབས་འོ་ཇས་ཞུས་ཆོག།
སེམས་སོང་ཆུང་འདྲིས་བྱམས་པའི།།
སྤྱན་གྱིས་གཟིགས་ཕྱོགས་དྲན་ཚེ།།
དགོས་འདོད་ནོར་བུ་ཀུན་འབྱུང་།།
རེག་ཐབས་ང་ཡིས་ཞུ་འདོད།།
ནུབ་རིའི་ཉག་གའི་ཁ་རུ།།
བྱམས་པ་བཙལ་དུ་ཕྱིན་ཡང་།།
ཞེ་གནག་སྨུག་པ་དེ་ཡིས།།
ང་ལ་མགོ་བསྐོར་བཏང་བྱུང་།།
དུས་འཁོར་དབང་ལ་འཁོར་བའི།།
མཇལ་བའི་འཚང་ཁ་ཤིག་ཤིག།
ཆུང་འདྲིར་མཇལ་རྒྱུ་མེད་པས།།
སྙིང་གི་འཕར་རྩ་འགག་སོང་།།
བྱ་ཚང་གཅིག་གི་ལས་ལ།།
ང་གཉིས་བསྐོས་པ་མེད་ཀྱང་།།
ནགས་ཏེ་གཅིག་གི་ཁ་རུ།།
བརྒྱུད་རྒྱུ་བྱུང་ན་དགའ་བ།།