ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྒྱལ་གཅེས་རིང་ལུགས་ཀྱི་སློབ་གསོའི་བཅའ་ཁྲིམས།

ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྒྱལ་གཅེས་རིང་ལུགས་ཀྱི་སློབ་གསོའི་བཅའ་ཁྲིམས།

（2023ལོའི་ཟླ10པའི་ཚེས24ཉིན་སྐབས་བཅུ་བཞི་པའི་རྒྱལ་ཡོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་གྲོས་ཚོགས་ཐེངས་དྲུག་པའི་ཐོག་གྲོས་འཆམ་བྱུང་།）

དཀར་ཆག

ལེའུ་དང་པོ།　སྤྱིའི་རྩ་དོན།

ལེའུ་གཉིས་པ།　འགན་འཁྲི་ལས་འགན།

ལེའུ་གསུམ་པ།　ལག་བསྟར་བྱེད་ཐབས།

ལེའུ་བཞི་པ།　རྒྱབ་སྐྱོར་འགན་སྲུང་།

ལེའུ་ལྔ་པ།　ཞར་བྱུང་དོན་ཚན།

ལེའུ་དང་པོ།　སྤྱིའི་རྩ་དོན།

དོན་ཚན་དང་པོ།　དུས་རབས་གསར་པའི་རྒྱལ་གཅེས་རིང་ལུགས་ཀྱི་སློབ་གསོར་ཤུགས་སྣོན་པ་དང་།　རྒྱལ་གཅེས་རིང་ལུགས་ཀྱི་དགོངས་དོན་རྒྱུད་འཛིན་དང་དར་སྤེལ་གཏོང་བ།　ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་འཛུགས་སྐྲུན་དང་ཀྲུང་ཧྭ་མི་རིགས་ཀྱི་རླབས་ཆེའི་བསྐྱར་དར་གྱི་སྟོབས་ཤུགས་ཆེན་མོ་གཅིག་ཏུ་སྡུད་པ་བཅས་ཀྱི་ཆེད་དུ།　རྩ་ཁྲིམས་ལ་གཞིགས་ཏེ་ཁྲིམས་ལུགས་འདི་བཟོས་པ་ཡིན།

དོན་ཚན་གཉིས་པ།　ཀྲུང་གོ་ནི་འཛམ་གླིང་སྟེང་ལོ་རྒྱུས་ཆེས་ཡུན་རིང་བའི་རྒྱལ་ཁབ་ཀྱི་གྲས་ཤིག་ཡིན་པ་དང་།　ཀྲུང་གོའི་རིགས་སོ་སོའི་མི་དམངས་ཀྱིས་ཐུན་མོང་ཐོག་འོད་སྟོང་འབར་བའི་རིག་གནས་གསར་སྐྲུན་བྱས་པ་དང་།　ཐུན་མོང་ཐོག་གཅིག་གྱུར་གྱི་མི་རིགས་མང་བའི་རྒྱལ་ཁབ་གསར་འཛུགས་བྱས་ཡོད།　རྒྱལ་ཁབ་ཀྱིས་མི་དམངས་ཡོངས་ཀྱི་ཁྲོད་རྒྱལ་གཅེས་རིང་ལུགས་ཀྱི་སློབ་གསོ་སྤེལ་ཏེ།　ཀྲུང་ཧྭ་མི་རིགས་དང་རླབས་ཆེ་བའི་མེས་རྒྱལ་ལ་བཅངས་པའི་བརྩེ་བ་གསོ་སྐྱོང་དང་ཡར་སྐུལ་བྱེད་དགོས་ལ།　མི་རིགས་ཀྱི་སྙིང་སྟོབས་རྒྱུད་འཛིན་དང་རྒྱལ་ཁབ་ཀྱི་འདུ་ཤེས་ཇེ་ཆེར་བཏང་སྟེ།　རྒྱལ་གཅེས་ཀྱི་སྟོབས་ཤུགས་ཡོད་ཚད་ཇེ་དྲག་དང་དེ་དག་ལ་མཐུན་སྒྲིལ་བྱས་ནས།　རྒྱལ་གཅེས་རིང་ལུགས་དེ་དམངས་ཡོངས་ཀྱི་འགྱུར་མེད་ཀྱི་དད་སེམས་དང་བསམ་པའི་སྟོབས་ཤུགས།　རང་འགུལ་གྱི་བྱ་སྤྱོད་དུ་འགྱུར་བར་བྱེད་དགོས།

དོན་ཚན་གསུམ་པ།　རྒྱལ་གཅེས་རིང་ལུགས་ཀྱི་སློབ་གསོ་སྤེལ་བར་ངེས་པར་དུ་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་རླབས་ཆེའི་དར་ཆ་མཐོན་པོར་བསྒྲེངས་ནས།　མར་ཁེ་སི་ལེ་ཉིང་རིང་ལུགས་དང་མའོ་ཙེ་ཏུང་གི་དགོངས་པ།　ཏིན་ཞའོ་ཕིན་གྱི་རིགས་པའི་གཞུང་ལུགས།　མཚོན་བྱེད་གསུམ་གྱི་དགོངས་པ་གལ་ཆེན།　ཚན་རིག་དང་མཐུན་པའི་འཕེལ་རྒྱས་ལྟ་བ།　ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་བཅས་མཛུབ་སྟོན་དུ་འཛིན་རྒྱུ་རྒྱུན་འཁྱོངས་བྱེད་པ་དང་།　རྒྱལ་ཁབ་ལ་དགའ་བ་དང་ཏང་ལ་དགའ་བ།　སྤྱི་ཚོགས་རིང་ལུགས་ལ་དགའ་བ་བཅས་གཅིག་གྱུར་བྱས་ཏེ།　རྒྱལ་ཁབ་གཅིག་གྱུར་ལ་སྲུང་སྐྱོབ་དང་མི་རིགས་མཐུན་སྒྲིལ་ལ་སྲུང་སྐྱོབ་བྱེད་པ་ཤུགས་རྒྱག་ས་བྱས་ནས།　ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་སྟོབས་ལྡན་འཛུགས་སྐྲུན་དང་ཀྲུང་ཧྭ་མི་རིགས་ཀྱི་རླབས་ཆེའི་བསྐྱར་དར་མངོན་འགྱུར་བྱེད་པ་དེ་བརྗོད་དོན་ཁ་གསལ་དུ་འཛིན་དགོས།

དོན་ཚན་བཞི་པ།　རྒྱལ་གཅེས་རིང་ལུགས་ཀྱི་སློབ་གསོ་སྤེལ་བར་ཀྲུང་གོ་གུང་ཁྲན་ཏང་གི་སྣེ་ཁྲིད་རྒྱུན་འཁྱོངས་བྱས་ཏེ།　གཅིག་གྱུར་སྣེ་ཁྲིད་དང་མཉམ་འཛིན་དོ་དམ།　ཕྱོགས་ཡོངས་ཞུགས་པ།　ཐུན་མོང་སྐུལ་འདེད་བཅས་ཀྱི་བྱ་བའི་རྣམ་པ་འཐུས་ཚང་དུ་གཏོང་དགོས།

དོན་ཚན་ལྔ་པ།　རྒྱལ་གཅེས་རིང་ལུགས་ཀྱི་སློབ་གསོ་སྤེལ་བར་ངེས་པར་དུ་བསམ་བློའི་སྣེ་ཁྲིད་དང་རིག་གནས་ཀྱི་གསོ་སྐྱོང་།　སློབ་གསོའི་སྣེ་ཁྲིད།　ལག་ལེན་གོམས་གཤིས་བཅས་རྒྱུན་འཁྱོངས་བྱས་ནས།　བརྗོད་དོན་གསལ་བ་དང་ཉིན་རྒྱུན་དང་འདྲེས་པར་བྱས་ཏེ།　ཡུལ་བབ་དང་བསྟུན་ནས་ཕན་འབྲས་དངོས་ཐོན་པར་གཙིགས་མཐོང་བྱེད་དགོས།

དོན་ཚན་དྲུག་པ།　རྒྱལ་གཅེས་རིང་ལུགས་སློབ་གསོའི་ནང་དོན་གཙོ་བོ་ལ།

（གཅིག）　མར་ཁེ་སི་ལེ་ཉིང་རིང་ལུགས་དང་མའོ་ཙེ་ཏུང་གི་དགོངས་པ།　ཏིན་ཞའོ་ཕིན་གྱི་རིགས་པའི་གཞུང་ལུགས།　མཚོན་བྱེད་གསུམ་གྱི་དགོངས་པ་གལ་ཆེན།　ཚན་རིག་དང་མཐུན་པའི་འཕེལ་རྒྱས་ལྟ་བ།　ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་བཅས།

（གཉིས）ཀྲུང་གོ་གུང་ཁྲན་ཏང་གི་ལོ་རྒྱུས་དང་ཀྲུང་གོ་གསར་པའི་ལོ་རྒྱུས།　བཅོས་སྒྱུར་སྒོ་འབྱེད་ཀྱི་ལོ་རྒྱུས།　སྤྱི་ཚོགས་རིང་ལུགས་ཀྱི་འཕེལ་རྒྱས་ལོ་རྒྱུས།　ཀྲུང་ཧྭ་མི་རིགས་ཀྱི་འཕེལ་རྒྱས་ལོ་རྒྱུས།

（གསུམ）ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་ལམ་ལུགས་དང་ཀྲུང་གོ་གུང་ཁྲན་ཏང་གིས་མི་དམངས་ལ་སྣེ་ཁྲིད་དེ་མཐུན་སྒྲིལ་འབད་འཐབ་བྱས་པའི་གྲུབ་འབྲས་གལ་ཆེན་དང་ལོ་རྒྱུས་ཉམས་མྱོང་།　གསོན་ཉམས་ལྡན་པའི་ལག་ལེན་བཅས།

（བཞི）　ཀྲུང་ཧྭའི་ཕུལ་བྱུང་གི་སྲོལ་རྒྱུན་རིག་གནས་དང་གསར་བརྗེའི་རིག་གནས།　སྤྱི་ཚོགས་རིང་ལུགས་ཀྱི་སྔོན་ཐོན་རིག་གནས།

（ལྔ）　རྒྱལ་དར་དང་རྒྱལ་གླུ།　རྒྱལ་རྟགས་སོགས་རྒྱལ་ཁབ་ཀྱི་མཚོན་བྱེད་དང་མཚོན་རྟགས།

（དྲུག）　མེས་རྒྱལ་གྱི་རྔམ་བརྗིད་ལྡན་པའི་རི་ཀླུང་དང་ལོ་རྒྱུས་རིག་གནས་ཤུལ་བཞག

（བདུན）　བཅའ་ཁྲིམས་དང་ཁྲིམས་ལུགས།　རྒྱལ་ཁབ་གཅིག་གྱུར་དང་མི་རིགས་མཐུན་སྒྲིལ།　རྒྱལ་ཁབ་བདེ་འཇགས་དང་རྒྱལ་སྲུང་སོགས་ཐད་ཀྱི་འདུ་ཤེས་དང་ལྟ་བ།

（བརྒྱད）　སྔོན་གཤེགས་དཔའ་བོ་དང་སྔོན་ཐོན་དཔེ་མཚོན་མི་སྣའི་བྱས་རྗེས་དང་དེས་མཚོན་པའི་མི་རིགས་ཀྱི་སྙིང་སྟོབས་དང་དུས་རབས་ཀྱི་སྙིང་སྟོབས།

（དགུ）　རྒྱལ་གཅེས་རིང་ལུགས་ཀྱི་སྙིང་སྟོབས་ཀྱིས་ཕྱུག་པའི་ནང་དོན་གཞན་པ།

དོན་ཚན་བདུན་པ།　རྒྱལ་ཁབ་ཀྱིས་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་སློབ་གསོ་སྤེལ་ཏེ།　རིགས་སོ་སོའི་མི་རིགས་ཀྱི་འགྲོ་འོང་བརྗེ་རེས་དང་མཉམ་འདྲེས་ལ་སྐུལ་འདེད་གཏོང་བ་དང་།　རླབས་ཆེའི་མེས་རྒྱལ་དང་ཀྲུང་ཧྭ་མི་རིགས།　ཀྲུང་ཧྭའི་རིག་གནས།　ཀྲུང་གོ་གུང་ཁྲན་ཏང་།　ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་ངོས་འཛིན་ཇེ་ཟབ་ཏུ་གཏོང་དགོས་ཤིང་།　ཀྲུང་ཧྭ་མི་རིགས་ཐུན་མོང་གི་བསམ་པའི་ཁྱིམ་གཞིས་འཛུགས་སྐྲུན་བྱེད་དགོས།

དོན་ཚན་བརྒྱད་པ།　རྒྱལ་གཅེས་རིང་ལུགས་ཀྱི་སློབ་གསོ་སྤེལ་བར་ངེས་པར་དུ་ཀྲུང་ཧྭའི་ཕུལ་བྱུང་གི་སྲོལ་རྒྱུན་རིག་གནས་རྒྱུད་འཛིན་དང་འཕེལ་རྒྱས་གཏོང་བ་དང་།　སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་ལྟ་བ་དར་སྤེལ་བཏང་སྟེ།　ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་རིག་གནས་འཛུགས་སྐྲུན་ལ་སྐུལ་འདེད་གཏོང་བ་དང་།　རིག་གནས་ཀྱི་ཡིད་རྟོན་སྲ་བརྟན་དང་ཀྲུང་ཧྭ་མི་རིགས་ཀྱི་དེང་རབས་དཔལ་ཡོན་འཛུགས་སྐྲུན་བྱེད་དགོས།

དོན་ཚན་དགུ་པ།　རྒྱལ་གཅེས་རིང་ལུགས་ཀྱི་སློབ་གསོ་སྤེལ་བར་ངེས་པར་དུ་རྒྱལ་གཅེས་རིང་ལུགས་ཀྱི་སྙིང་སྟོབས་དང་ཕྱི་ཕྱོགས་སྒོ་འབྱེད་རྒྱ་བསྐྱེད་པ་གཉིས་ཟུང་འབྲེལ་བྱས་ནས།　རྗེས་དཔག་དང་ཁོངས་ཡངས།　སྒོ་འབྱེད་བཅས་རྒྱུན་འཁྱོངས་བྱེད་པ་དང་།　རྒྱལ་ཁབ་སོ་སོའི་ལོ་རྒྱུས་ཁྱད་ཆོས་དང་རིག་གནས་སྲོལ་རྒྱུན་ལ་བརྩི་བཀུར་བྱས་ནས་མིའི་རིགས་ཀྱི་ཕུལ་བྱུང་དཔལ་ཡོན་གྲུབ་འབྲས་ཡོད་ཚད་བསྡུ་ལེན་དང་དཔྱད་གཞིར་འཛིན་དགོས།

དོན་ཚན་བཅུ་པ།　ལོ་རེའི་ཟླ10པའི་ཚེས1ཉིན་ནི་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྒྱལ་སྟོན་ཉིན་མོ་ཡིན་པ་དང་།　རྒྱལ་ཁབ་དང་སྤྱི་ཚོགས་ཕྱོགས་སོ་སོས་རྣམ་པ་སྣ་ཚོགས་ཀྱི་དགའ་སྟོན་བྱ་འགུལ་སྤེལ་ནས།　གཅིག་སྡུད་ཐོག་རྒྱལ་གཅེས་རིང་ལུགས་སློབ་གསོ་སྤེལ་དགོས།

ལེའུ་གཉིས་པ།　འགན་འཁྲི་ལས་འགན།

དོན་ཚན་བཅུ་གཅིག་པ།　ཀྲུང་དབྱང་རྒྱལ་གཅེས་རིང་ལུགས་སློབ་གསོ་གཙོ་གཉེར་སྡེ་ཁག་གིས་རྒྱལ་ཡོངས་ཀྱི་རྒྱལ་གཅེས་རིང་ལུགས་ཀྱི་སློབ་གསོའི་ལས་དོན་ལ་མཛུབ་སྟོན་དང་ལྟ་སྐུལ།　སྤྱི་འདོམས་མཐུན་སྦྱོར་བཅས་བྱེད་པའི་འགན་འཁུར་དགོས།

ཀྲུང་དབྱང་དང་རྒྱལ་ཁབ་ལས་ཁུངས་ཀྱི་སྡེ་ཁག་སོ་སོས་རང་སོ་སོའི་འགན་འཁྲིའི་ཁྱབ་ཁོངས་ནང་།　རྒྱལ་གཅེས་རིང་ལུགས་ཀྱི་སློབ་གསོའི་ལས་དོན་རྩ་འཛུགས་བྱས་ནས་སྤེལ་དགོས།

དོན་ཚན་བཅུ་གཉིས་པ།　ས་གནས་ཀྱི་རྒྱལ་གཅེས་རིང་ལུགས་སློབ་གསོའི་གཙོ་གཉེར་སྡེ་ཁག་གིས་རང་ས་ཁུལ་གྱི་རྒྱལ་གཅེས་རིང་ལུགས་ཀྱི་སློབ་གསོའི་ལས་དོན་ལ་མཛུབ་སྟོན་དང་ལྟ་སྐུལ།　སྤྱི་འདོམས་མཐུན་སྦྱོར་བཅས་བྱེད་པའི་འགན་འཁུར་དགོས།

རྫོང་རིམ་པ་ཡན་གྱི་ས་གནས་མི་དམངས་སྲིད་གཞུང་གི་སློབ་གསོ་སྲིད་འཛིན་སྡེ་ཁག་གིས་ངེས་པར་དུ་སློབ་གྲྭའི་རྒྱལ་གཅེས་རིང་ལུགས་སློབ་གསོའི་རྩ་འཛུགས་དང་མཐུན་སྦྱོར།　མཛུབ་སྟོན།　ལྟ་སྐུལ་བཅས་ལ་ཤུགས་སྣོན་དགོས།　རྫོང་རིམ་པ་ཡན་གྱི་ས་གནས་རིག་གནས་དང་ཡུལ་སྐོར།　གསར་འགྱུར་པར་སྐྲུན།　རྒྱང་སྒྲོག་བརྙན་འཕྲིན།　གློག་བརྙན།　དྲ་འཕྲིན།　རིག་དངོས་སོགས་སྡེ་ཁག་དང་གཞན་པའི་འབྲེལ་ཡོད་སྡེ་ཁག་གིས་ངེས་པར་དུ་རང་སོ་སོའི་འགན་འཁྲིའི་ཁྱབ་ཁོངས་ནང་།　རྒྱལ་གཅེས་རིང་ལུགས་ཀྱི་སློབ་གསོའི་ལས་དོན་སྤེལ་དགོས།

ཀྲུང་གོ་མི་དམངས་བཅིངས་འགྲོལ་དམག་དང་ཀྲུང་གོ་མི་དམངས་དྲག་ཆས་ཉེན་རྟོག་དམག་དཔུང་གིས་བཅའ་ཁྲིམས་འདི་དང་ཀྲུང་དབྱང་དམག་དོན་ཨུ་ཡོན་ལྷན་ཁང་གི་འབྲེལ་ཡོད་གཏན་འཁེལ་ལ་གཞིགས་ཏེ་རྒྱལ་གཅེས་རིང་ལུགས་ཀྱི་སློབ་གསོའི་ལས་དོན་སྤེལ་དགོས་པ་མ་ཟད།　རང་སྟེང་གི་ཐོན་ཁུངས་བེད་སྤྱོད་གང་ལེགས་བྱས་ཏེ་སྤྱི་ཚོགས་ལ་ཁ་ཕྱོགས་ནས་རྒྱལ་གཅེས་རིང་ལུགས་ཀྱི་སློབ་གསོ་སྤེལ་དགོས།

དོན་ཚན་བཅུ་གསུམ་པ།　བཟོ་ཚོགས་དང་གུང་ཁྲན་རིང་ལུགས་ཀྱི་ན་གཞོན་ཚོགས་པ།　བུད་མེད་མཉམ་འབྲེལ་ལྷན་ཚོགས།　བཟོ་ཚོང་ལས་རིགས་ཀྱི་མཉམ་འབྲེལ་ལྷན་ཚོགས།　རྩོམ་རིག་སྒྱུ་རྩལ་མཉམ་འབྲེལ་ལྷན་ཚོགས།　རྩོམ་པ་པོའི་མཐུན་ཚོགས།　ཚན་རིག་ལག་རྩལ་མཐུན་ཚོགས།　རྒྱལ་ནང་དུ་ལོག་པའི་ཕྱིར་སྡོད་རང་མིའི་མཉམ་འབྲེལ་ལྷན་ཚོགས།　ཐའེ་ཝན་སྤུན་ཟླའི་མཉམ་འབྲེལ་ལྷན་ཚོགས།　དབང་བོ་སྐྱོན་ཅན་མཉམ་འབྲེལ་ལྷན་ཚོགས།　ན་གཞོན་མཉམ་འབྲེལ་ལྷན་ཚོགས་དང་གཞན་པའི་མང་ཚོགས་རྩ་འཛུགས་བཅས་ཀྱིས་ངེས་པར་དུ་རང་སོ་སོའི་ལེགས་ཆ་འདོན་སྤེལ་བྱས་ནས།　འབྲེལ་གཏུག་ཁྱབ་ཁོངས་དང་མང་ཚོགས་ལ་ཁ་ཕྱོགས་ནས་རྒྱལ་གཅེས་རིང་ལུགས་ཀྱི་སློབ་གསོ་སྤེལ་དགོས།

དོན་ཚན་བཅུ་བཞི་པ།　རྒྱལ་ཁབ་ཀྱིས་རྣམ་པ་སྣ་མང་སྤྱད་དེ་ཁྲིམས་སྐྱོང་དྲིལ་སྒྲོག་སློབ་གསོ་དང་རྒྱལ་ཁབ་བདེ་འཇགས།　རྒྱལ་སྲུང་སློབ་གསོ་བཅས་སྤེལ་ནས་སྤྱི་དམངས་ཀྱི་ཁྲིམས་སྐྱོང་འདུ་ཤེས་དང་རྒྱལ་ཁབ་བདེ་འཇགས།　རྒྱལ་སྲུང་འདུ་ཤེས་བཅས་ཇེ་ཆེར་གཏོང་དགོས་པ་དང་།　སྤྱི་དམངས་ལ་རང་འགུལ་ངང་རྒྱལ་ཁབ་གཅིག་གྱུར་དང་མི་རིགས་མཐུན་སྒྲིལ་ལ་སྲུང་སྐྱོབ་བྱེད་པར་སྣེ་ཁྲིད་དེ།　རྒྱལ་ཁབ་ཀྱི་བདེ་འཇགས་དང་མཚན་སྙན།　ཁེ་ཕན་བཅས་ཀྱི་འོས་འགན་སྲུང་སྐྱོབ་བྱེད་དགོས།

དོན་ཚན་བཅོ་ལྔ་པ།　རྒྱལ་ཁབ་ཀྱིས་རྒྱལ་གཅེས་རིང་ལུགས་སློབ་གསོ་དེ་རྒྱལ་དམངས་སློབ་གསོའི་མ་ལག་ནང་འཇུག་དགོས།　རིམ་པ་སོ་སོ་དང་རིགས་སོ་སོའི་སློབ་གྲྭས་ངེས་པར་དུ་རྒྱལ་གཅེས་རིང་ལུགས་སློབ་གསོ་དེ་སློབ་གྲྭའི་སློབ་གསོའི་གོ་རིམ་ཧྲིལ་བོའི་ནང་ཁྱབ་པར་བྱས་ནས།　བསམ་བློའི་ཆབ་སྲིད་ཀྱི་གཞུང་ལུགས་སློབ་ཚན་ལེགས་པོར་སྒྲུབ་པ་དང་སློབ་ཁྲིད་གང་ལེགས་བྱེད་དགོས་པ་མ་ཟད།　རྒྱལ་གཅེས་རིང་ལུགས་ཀྱི་སློབ་གསོའི་ནང་དོན་དེ་རིགས་སོ་སོའི་བསླབ་ཚན་དང་བསླབ་གཞིའི་ཁྲོད་འདྲེས་པར་བྱེད་དགོས།

རིམ་པ་སོ་སོ་དང་རིགས་སོ་སོའི་སློབ་གྲྭ་དང་སློབ་གསོའི་ལས་ཁུངས་གཞན་པས་ངེས་པར་དུ་རྒྱལ་ཁབ་ཀྱི་གཏན་འཁེལ་ལྟར་རྒྱལ་གཅེས་རིང་ལུགས་ཀྱི་སློབ་གསོ་དང་འབྲེལ་བའི་བསླབ་ཚན་མཉམ་སྤྱོད་བྱེད་པའི་ལམ་སྲོལ་འཛུགས་པ་དང་།　སློབ་རིམ་མི་འདྲ་བའི་སློབ་མའི་ཁྱད་ཆོས་ལ་གཞིགས་ནས།　རྒྱལ་གཅེས་རིང་ལུགས་ཀྱི་སློབ་གསོའི་ནང་དོན་གཙོ་བོ་གཏན་འཁེལ་བྱེད་པ་དང་།　འོས་ཤིང་འཚམ་ལ་ཕུན་སུམ་ཚོགས་པའི་སློབ་ཁྲིད་བྱེད་ཐབས་སྤྱད་དེ།　རྒྱལ་གཅེས་རིང་ལུགས་སློབ་གསོའི་ཁ་གཏད་རང་བཞིན་དང་མ་ལག་རང་བཞིན།　མཉམ་འདྲེས་ནུས་ཤུགས།　ཡིད་དབང་འགུག་ནུས་བཅས་ཇེ་ཆེར་གཏོང་དགོས།

དོན་ཚན་བཅུ་དྲུག་པ།　རིམ་པ་སོ་སོ་དང་རིགས་སོ་སོའི་སློབ་གྲྭས་ངེས་པར་དུ་སློབ་ཁང་སློབ་ཁྲིད་དང་སློབ་ཕྱིའི་ལག་ལེན།　ཉམས་མྱོང་བཅས་ཟུང་འབྲེལ་བྱས་ཏེ།　རྒྱལ་གཅེས་རིང་ལུགས་ཀྱི་སློབ་གསོའི་ནང་དོན་དེ་སློབ་རའི་རིག་གནས་འཛུགས་སྐྲུན་དང་སློབ་གྲྭའི་བརྗོད་དོན་བྱ་འགུལ་སྣ་ཚོགས་དང་འདྲེས་པར་བྱེད་པ་དང་།　སློབ་མ་རྩ་འཛུགས་བྱས་ཏེ་རྒྱལ་གཅེས་རིང་ལུགས་ཀྱི་སློབ་གསོའི་རྟེན་གཞི་སོགས་གནས་གཞི་དང་སྒྲིག་བཀོད་ལ་ལྟ་སྐོར་བྱེད་དུ་འཇུག་པ་དང་།　རྒྱལ་གཅེས་རིང་ལུགས་ཀྱི་སློབ་གསོ་དང་འབྲེལ་བའི་སློབ་ཕྱིའི་ལག་ལེན་བྱ་འགུལ་ལ་ཞུགས་སུ་འཇུག་དགོས།

དོན་ཚན་བཅུ་བདུན་པ།　ནར་མ་སོན་པའི་མིའི་ཕ་མ་དང་གཞན་པའི་ལྟ་སྐྱོང་མི་སྣས་ངེས་པར་དུ་མེས་རྒྱལ་ལ་དགའ་ཞེན་བྱེད་པ་དེ་ཁྱིམ་ཚང་སློབ་གསོར་འདྲེས་སུ་འཇུག་དགོས་ལ།　སློབ་གྲྭས་རྒྱལ་གཅེས་རིང་ལུགས་ཀྱི་སློབ་གསོའི་སློབ་ཁྲིད་བྱ་འགུལ་སྤེལ་བར་རྒྱབ་སྐྱོར་དང་རམ་འདེགས་བྱས་ཏེ།　ནར་མ་སོན་པའི་མི་རྒྱལ་གཅེས་རིང་ལུགས་ཀྱི་སློབ་གསོ་སྤེལ་བའི་སྤྱི་ཚོགས་བྱ་འགུལ་ནང་ཞུགས་པར་སྣེ་ཁྲིད་དང་སྐུལ་ལྕག་བྱེད་དགོས།

དོན་ཚན་བཅོ་བརྒྱད་པ།　རྒྱལ་ཁབ་ལས་ཁུངས་ཀྱིས་ངེས་པར་དུ་གཞུང་ཞབས་མི་སྣར་རྒྱལ་གཅེས་རིང་ལུགས་ཀྱི་སློབ་གསོ་སྤེལ་བར་ཤུགས་སྣོན་པ་དང་།　གཞུང་ཞབས་མི་སྣས་རྒྱལ་ཁབ་ལ་གཞུང་དྲང་དང་རྒྱལ་ཁབ་ཀྱི་ཆེད་དུ་ལེགས་སྐྱེས་འབུལ་བ།　རྒྱལ་ཁབ་གཅིག་གྱུར་ལ་སྲུང་སྐྱོབ་དང་མི་རིགས་མཐུན་སྒྲིལ་ལ་སྐུལ་འདེད།　རྒྱལ་ཁབ་ཀྱི་བདེ་འཇགས་དང་མཚན་སྙན།　ཁེ་ཕན་བཅས་ལ་སྲུང་སྐྱོབ་བྱེད་པའི་ཐད་ནས་དཔེ་སྟོན་སྣེ་ཁྲིད་ཀྱི་ནུས་པ་འདོན་སྤེལ་བྱེད་དགོས།

དོན་ཚན་བཅུ་དགུ་པ།　ཁེ་ལས་ལས་དོན་ལས་ལས་ཁུངས་ཀྱིས་ངེས་པར་དུ་རྒྱལ་གཅེས་རིང་ལུགས་ཀྱི་སློབ་གསོ་དེ་རང་ལས་ཁུངས་ཀྱི་སློབ་གསོའི་འཆར་གཞི་ཁྲོད་བཅུག་ནས།　ཤུགས་ཆེན་པོས་ངལ་རྩོལ་དཔེ་ལེགས་ཀྱི་སྙིང་སྟོབས་དང་ངལ་རྩོལ་སྙིང་སྟོབས།　བཟོ་བའི་སྙིང་སྟོབས་བཅས་དར་སྤེལ་གཏོང་བ་དང་།　བདག་གཉེར་དོ་དམ་དང་ལས་སྒོ་གསོ་སྦྱོང་།　རིག་གནས་ལུས་རྩལ་སོགས་ཀྱི་བྱ་འགུལ་དང་འབྲེལ་ནས།　རྒྱལ་གཅེས་རིང་ལུགས་ཀྱི་སློབ་གསོ་སྤེལ་དགོས།

སློབ་གསོ་དང་ཚན་རྩལ།　རིག་གནས།　འཕྲོད་བསྟེན།　ལུས་རྩལ་སོགས་ལས་དོན་ལས་ཁུངས་ཀྱིས་ངེས་པར་དུ་ཤུགས་ཆེན་པོས་ཚན་རིག་པའི་སྙིང་སྟོབས་དང་ཆེད་ལས་སྙིང་སྟོབས་དར་སྤེལ་བཏང་སྟེ།　ཤེས་ལྡན་མི་སྣ་དང་ཆེད་ལས་ལག་རྩལ་མི་སྣ།　ལུས་རྩལ་པ་སོགས་ཀྱིས་སེམས་སུ་མེས་རྒྱལ་བཅངས་པ་དང་མི་དམངས་ལ་ཞབས་ཞུ་བྱེད་པ།　རྒྱལ་ཁབ་ཀྱི་ཆེད་དུ་བརྩོན་ལེན་བྱེད་པའི་རྒྱལ་གཅེས་བརྩེ་བ་དང་རྒྱལ་གཅེས་བྱ་སྤྱོད་དྲིལ་སྒྲོག་དང་གསོ་སྐྱོང་བྱེད་དགོས།

དོན་ཚན་ཉི་ཤུ་པ།　གཞི་རིམ་མི་དམངས་སྲིད་གཞུང་དང་གཞི་རིམ་མང་ཚོགས་རང་བཞིན་གྱི་རང་སྐྱོང་རྩ་འཛུགས་ཀྱིས་ངེས་པར་དུ་རྒྱལ་གཅེས་རིང་ལུགས་ཀྱི་སློབ་གསོ་དེ་སྤྱི་ཚོགས་རིང་ལུགས་ཀྱི་བསམ་པའི་དཔལ་ཡོན་འཛུགས་སྐྲུན་བྱ་འགུལ་དང་འདྲེས་པར་བྱས་ཏེ།　གྲོང་མིའི་སྤྱི་ཆིངས་དང་སྡེ་སྲོལ་དམངས་ཆིངས་ཁྲོད་རྒྱལ་གཅེས་རིང་ལུགས་ཀྱི་སྙིང་སྟོབས་མཚོན་པར་བྱེད་དགོས་ཤིང་།　རྒྱལ་གཅེས་རིང་ལུགས་བརྗོད་དོན་གཙོ་བོ་ཡིན་པའི་མང་ཚོགས་རང་བཞིན་གྱི་རིག་གནས་དང་ལུས་རྩལ་སོགས་ཀྱི་བྱ་འགུལ་སྤེལ་བར་རྒྱབ་སྐྱོར་དང་སྐུལ་ལྕག་བྱེད་དགོས།

དོན་ཚན་ཉེར་གཅིག་པ།　ལས་རིགས་མཐུན་ཚོགས་དང་ཚོང་ཚོགས་སོགས་སྤྱི་ཚོགས་ཚོགས་པས་ངེས་པར་དུ་རྒྱལ་གཅེས་རིང་ལུགས་ཀྱི་སྙིང་སྟོབས་དེ་ཚོགས་པའི་སྒྲིག་སྲོལ་དང་ལས་རིགས་ཚད་ལྡན་ཁྲོད་མཚོན་པར་བྱས་ཏེ།　རང་ཚོགས་པ་དང་རང་ལས་རིགས་ཀྱི་ཁྱད་ཆོས་ལ་གཞིགས་ཏེ་རྒྱལ་གཅེས་རིང་ལུགས་ཀྱི་སློབ་གསོ་སྤེལ་དགོས་པ་དང་།　ཁོངས་མིའི་རྒྱལ་གཅེས་ཀྱི་སྤྲོ་སེམས་དང་སྤྱི་ཚོགས་ཁག་ཁུར་གསོ་སྐྱོང་བྱས་ཏེ།　ཁོངས་མིའི་ཁྲོད་ཀྱི་སྤྱི་པའི་མི་སྣ་དང་སྤྱི་ཚོགས་ལ་ཤུགས་རྐྱེན་ཆེ་བའི་མི་སྣའི་དཔེ་སྟོན་ནུས་པ་འདོན་སྤེལ་བྱེད་དགོས།

དོན་ཚན་ཉེར་གཉིས་པ།　རྒྱལ་ཁབ་ཀྱིས་ཆོས་ལུགས་ཚོགས་པ་དང་ཆོས་ལུགས་དགོན་སྡེ།　ཆོས་ལུགས་བྱ་འགུལ་སྤེལ་ཡུལ་བཅས་ཀྱིས་རྒྱལ་གཅེས་རིང་ལུགས་ཀྱི་སློབ་གསོ་སྤེལ་བར་སྐུལ་ལྕག་དང་རྒྱབ་སྐྱོར་བྱེད་དགོས་ལ།　ཆོས་ལུགས་མི་སྣ་དང་ཆོས་དད་མང་ཚོགས་ཀྱི་རྒྱལ་ཁབ་འདུ་ཤེས་དང་སྤྱི་དམངས་འདུ་ཤེས།　ཁྲིམས་སྐྱོང་འདུ་ཤེས།　རྒྱལ་གཅེས་བརྩེ་བ་བཅས་ཇེ་ཆེར་བཏང་སྟེ།　ཆོས་ལུགས་དང་སྤྱི་ཚོགས་རིང་ལུགས་ཀྱི་སྤྱི་ཚོགས་གཉིས་ཕན་ཚུན་འཕྲོད་མཐུན་ཡོང་བར་སྣེ་ཁྲིད་བྱེད་དགོས།

དོན་ཚན་ཉེར་གསུམ་པ།　རྒྱལ་ཁབ་ཀྱིས་བྱེད་ཐབས་སྤྱད་དེ་ལོ་རྒྱུས་རིག་གནས་སློབ་གསོ་དང་རྒྱལ་ཁབ་གཅིག་ལ་ལམ་ལུགས་གཉིས་ཀྱི་ལག་ལེན་སློབ་གསོ་སྤེལ་ནས།　ཞང་ཀང་དམིགས་བསལ་སྲིད་འཛིན་ཁུལ་གྱི་སྤུན་ཟླ་དང་ཨའོ་མོན་དམིགས་བསལ་སྲིད་འཛིན་ཁུལ་གྱི་སྤུན་ཟླའི་རྒྱལ་གཅེས་སྙིང་སྟོབས་ཇེ་ཆེར་གཏོང་དགོས་ལ།　རང་འགུལ་ངང་རྒྱལ་ཁབ་ཀྱི་བདག་དབང་དང་གཅིག་གྱུར།　མངའ་ཁོངས་ཆ་ཚང་བཅས་ལ་སྲུང་སྐྱོབ་བྱེད་དགོས།

རྒྱལ་ཁབ་ཀྱིས་མེས་རྒྱལ་གཅིག་གྱུར་ལ་སྐུལ་འདེད་གཏོང་བའི་སྲིད་ཇུས་བྱེད་ཕྱོགས་ཀྱི་དྲིལ་སྒྲོག་སློབ་གསོར་ཤུགས་བསྣན་ནས།　ཐའེ་ཝན་སྤུན་ཟླ་འདུས་པའི་ཀྲུང་གོ་མི་དམངས་ཡོངས་ཀྱིས་མེས་རྒྱལ་གཅིག་གྱུར་གྱི་རླབས་ཆེའི་འགན་འཁྲི་ལེགས་འགྲུབ་བྱེད་པའི་ངེས་ཤེས་ཇེ་ཆེར་བཏང་སྟེ།　ཁྲིམས་ལྟར་ཐའེ་ཝན་སྤུན་ཟླའི་ཁེ་དབང་དང་ཁེ་ཕན་ལ་སྲུང་སྐྱོང་བྱེད་པ་དང་།　ཐའེ་ཝན་རང་བཙན་གྱི་ཁ་བྲལ་བྱ་སྤྱོད་ལ་མཐའ་གཅིག་ཏུ་ངོ་རྒོལ་བྱས་ནས།　ཀྲུང་ཧྭ་མི་རིགས་ཀྱི་གཞི་རྩའི་ཁེ་ཕན་ལ་སྲུང་སྐྱོབ་བྱེད་དགོས།

རྒྱལ་ཁབ་ཀྱིས་ཕྱིར་སྡོད་རང་མིའི་བརྗེ་རེས་ལ་ཤུགས་བསྣན་ཏེ།　ཁེ་དབང་འགན་སྲུང་དང་ཞབས་ཞུ་ལས་དོན་ལེགས་པོར་བསྒྲུབས་ནས།　ཕྱིར་སྡོད་རང་མི་སྤུན་ཟླའི་རྒྱལ་གཅེས་བརྩེ་བ་ཇེ་དྲག་དང་རྒྱལ་གཅེས་སྲོལ་རྒྱུན་དར་སྤེལ་གཏོང་དགོས།

ལེའུ་གསུམ་པ།　ལག་བསྟར་བྱེད་ཐབས།

དོན་ཚན་ཉེར་བཞི་པ།　ཀྲུང་དབྱང་དང་ཞིང་ཆེན་རིམ་པའི་རྒྱལ་གཅེས་རིང་ལུགས་ཀྱི་སློབ་གསོའི་གཙོ་གཉེར་སྡེ་ཁག་གིས་ངེས་པར་དུ་རྒྱལ་གཅེས་རིང་ལུགས་ཀྱི་སློབ་གསོའི་ལས་དོན་ལ་སྤྱི་འདོམས་བྱེད་པར་ཤུགས་བསྣན་ཏེ།　འབྲེལ་ཡོད་སྡེ་ཁག་དང་ལས་ཁུངས་ཀྱིས་རྒྱལ་གཅེས་རིང་ལུགས་ཀྱི་སློབ་གསོའི་བྱེད་ཐབས་གསར་སྐྲུན་བྱེད་པར་མཛུབ་སྟོན་སྐུལ་འདེད་གཏོང་བ་དང་།　རིགས་སོ་སོའི་རྒྱལ་གཅེས་རིང་ལུགས་ཀྱི་སློབ་གསོའི་ཐོན་ཁུངས་དང་སྟེགས་བུའི་གཞི་རྟེན་བེད་སྤྱོད་གང་ལེགས་བྱས་ནས།　རྒྱལ་གཅེས་རིང་ལུགས་ཀྱི་སློབ་གསོ་ལག་བསྟར་ནུས་ལྡན་བྱེད་པར་སྐུལ་འདེད་གཏོང་དགོས།

དོན་ཚན་ཉེར་ལྔ་པ།　རྫོང་རིམ་པ་ཡན་གྱི་མི་དམངས་སྲིད་གཞུང་གིས་ངེས་པར་དུ་གསར་བརྗེའི་ཐོན་ཁུངས་ལ་སྲུང་སྐྱོབ་དང་དོ་དམ།　བེད་སྤྱོད་བཅས་བྱེད་པར་ཤུགས་བསྣན་ཏེ།　ལོ་རྒྱུས་ཀྱི་རིན་ཐང་དང་རྗེས་དྲན་གྱི་དོན་སྙིང་ལྡན་པའི་གསར་བརྗེའི་ཐོན་ཁུངས་སྔོག་འདོན་བྱེད་པ་དང་།　གསར་བརྗེ་དང་ཡུལ་སྐོར་མཉམ་འདྲེས་འཕེལ་རྒྱས་ཀྱི་དཔེ་སྟོན་ཁུལ་འཛུགས་སྐྲུན་ལ་སྐུལ་འདེད་གཏོང་བ་དང་།　གསར་བརྗེའི་ཐོན་ཁུངས་སློབ་གསོའི་བྱེད་ནུས་འདོན་སྤེལ་བྱས་ནས་རྒྱལ་གཅེས་རིང་ལུགས་ཀྱི་སྙིང་སྟོབས་རྒྱུད་འཛིན་བྱེད་དགོས།

རྫོང་རིམ་པ་ཡན་གྱི་མི་དམངས་སྲིད་གཞུང་གི་རིག་གནས་དང་ཡུལ་སྐོར།　སྡོད་ཁང་དང་ཤང་གྲོང་འཛུགས་སྐྲུན།　རིག་དངོས་སོགས་སྡེ་ཁག་གིས་ངེས་པར་དུ་རིག་དངོས་གནའ་ཤུལ་དང་སྲོལ་རྒྱུན་སྡེ་བ།　སྲོལ་རྒྱུན་ལག་རྩལ་སོགས་ལོ་རྒྱུས་རིག་གནས་ཤུལ་བཞག་ལ་སྲུང་སྐྱོབ་དང་བེད་སྤྱོད་བྱེད་པར་ཤུགས་བསྣན་ཏེ།　དེའི་རྒྱལ་གཅེས་རིང་ལུགས་ཀྱི་སྙིང་སྟོབས་སྔོག་འདོན་བྱེད་པ་དང་།　རིག་གནས་དང་ཡུལ་སྐོར་མཉམ་འདྲེས་གཏིང་ཟབ་དང་འཕེལ་རྒྱས་ཡོང་བར་སྐུལ་འདེད་བཏང་ནས།　སྤྱི་དམངས་ཀྱིས་ཡུལ་སྐོར་ལྟ་སྐོར་ཁྲོད་རྔམ་བརྗིད་ལྡན་པའི་རི་ཀླུང་གི་མཛེས་པར་རོལ་མྱོང་དང་།　ཡུན་རིང་བའི་ལོ་རྒྱུས་དང་འོད་སྟོང་འབར་བའི་རིག་གནས་ལ་རོལ་མྱོང་བྱས་ཏེ།　རྒྱལ་གཅེས་ཀྱི་སྤྲོ་སེམས་སྐུལ་སྤེལ་བྱེད་དགོས།

དོན་ཚན་ཉེར་དྲུག་པ།　རྒྱལ་གཅེས་རིང་ལུགས་ཀྱི་སློབ་གསོའི་རྟེན་གཞིས་ངེས་པར་དུ་ནང་དོན་འཛུགས་སྐྲུན་ལ་ཤུགས་བསྣན་ཏེ།　འགྲེམ་སྟོན་བཤམ་སྟོན་བྱེད་ཐབས་ཕུན་སུམ་ཇེ་ཚོགས་སུ་གཏོང་བ་དང་།　ཕུལ་བྱུང་ཐོན་རྫས་བཤམས་སྟོན་བྱས་ཏེ།　རྒྱལ་ཁབ་ལས་ཁུངས་དང་ཁེ་ལས་ལས་དོན་ལས་ཁུངས།　སྤྱི་ཚོགས་རྩ་འཛུགས།　སྤྱི་དམངས་བཅས་ཀྱིས་རྒྱལ་གཅེས་རིང་ལུགས་ཀྱི་སློབ་གསོའི་བྱ་འགུལ་སྤེལ་བ་དང་ལྟ་སྐོར་སློབ་སྦྱོང་ལ་སྟབས་བདེའི་ཞབས་ཞུ་འདོན་སྤྲོད་བྱས་ཏེ།　རྒྱལ་གཅེས་རིང་ལུགས་ཀྱི་སློབ་གསོའི་བྱེད་ནུས་འདོན་སྤེལ་བྱེད་དགོས།　

རིགས་སོ་སོའི་དངོས་མང་བཤམ་སྟོན་ཁང་དང་རྗེས་དྲན་ཁང་།　དཔེ་མཛོད་ཁང་།　ཚན་རྩལ་ཁང་།　རིག་གནས་ཁང་།　མཛེས་རྩལ་ཁང་།　དུས་རབས་གསར་པའི་དཔལ་ཡོན་ལག་ལེན་ལྟེ་གནས་སོགས་ཀྱིས་ངེས་པར་དུ་རང་སྟེང་གི་ཐོན་ཁུངས་དང་ལེགས་ཆ་བེད་སྤྱོད་གང་ལེགས་བྱེད་པ་དང་།　དྲིལ་སྒྲོག་འགྲེམ་སྟོན་དང་རོལ་མྱོང་ལག་བསྟར་སོགས་ཀྱི་བྱེད་ཐབས་བརྒྱུད་དེ།　རྒྱལ་གཅེས་རིང་ལུགས་ཀྱི་སློབ་གསོའི་བྱ་འགུལ་སྤེལ་དགོས།

དོན་ཚན་ཉེར་བདུན་པ།　རྒྱལ་ཁབ་ཀྱིས་བྱས་རྗེས་ལ་གཟེངས་བསྟོད་བྱེད་པའི་ལམ་ལུགས་བརྒྱུད་དེ།　རྒྱལ་ཁབ་སྟོབས་ལྡན་འཛུགས་སྐྲུན་དང་མི་རིགས་བསྐྱར་དར་ཁྲོད་བྱས་རྗེས་འབུར་ཐོན་བཞག་པའི་མི་སྣར་གཟེངས་བསྟོད་བྱེད་པ་དང་།　རྒྱལ་གཅེས་རིང་ལུགས་དར་སྤེལ་གཏོང་བ་ལྟེ་བ་ཡིན་པའི་མི་རིགས་ཀྱི་སྙིང་སྟོབས་དང་བཅོས་སྒྱུར་གསར་སྐྲུན་སྲོག་ཤིང་ཡིན་པའི་དུས་རབས་ཀྱི་སྙིང་སྟོབས་དར་སྤེལ་གཏོང་དགོས།

དོན་ཚན་ཉེར་བརྒྱད་པ།　ཀྲུང་གོ་མི་དམངས་ཀྱི་འཇར་འགོག་དམག་འཁྲུག་ལ་རྒྱལ་ཁ་ཐོབ་པའི་རྗེས་དྲན་ཉིན་མོ་དང་སྔོན་གཤེགས་དཔའ་བོའི་རྗེས་དྲན་ཉིན་མོ།　ནན་ཅིན་དམར་གསོད་ཆེན་མོའི་ཁྲོད་རྐྱེན་ལམ་དུ་ཤོར་བའི་སྤུན་ཟླའི་རྒྱལ་ཁབ་ཀྱི་སྤྱི་སྒྲུབ་འདས་མཆོད་ཉིན་མོ་བཅས་ལ།　རྫོང་རིམ་པ་ཡན་གྱི་མི་དམངས་སྲིད་གཞུང་གིས་ངེས་པར་དུ་རྗེས་དྲན་བྱ་འགུལ་རྩ་འཛུགས་བྱས་ནས་སྤེལ་བ་དང་།　མེ་ཏོག་ཚོམ་བུ་འབུལ་བ་དང་རྗེས་དྲན་སྒྲིག་བཀོད་ལ་ལྟ་བ།　སྔོན་གཤེགས་དཔའ་བོར་དུར་མཆོད་བྱེད་པ།　སྤྱི་སྒྲུབ་འདས་མཆོད་སོགས་ཀྱི་རྗེས་དྲན་མཛད་སྒོ་སྤེལ་དགོས།

དོན་ཚན་ཉེར་དགུ་པ།　ལོ་སར་དང་རྒྱ་ལོའི་བཅོ་ལྔ།　དྭངས་གསལ་དུས་ཆེན།　ལྔ་པའི་ཚེས་ལྔའི་དུས་ཆེན།　ཟླ་མཆོད་དུས་ཆེན།　ལུགས་གསར་ལོ་སར།　རྒྱལ་སྤྱིའི་བུད་མེད་དུས་ཆེན།　རྒྱལ་སྤྱིའི་ངལ་རྩོལ་དུས་ཆེན།　ན་གཞོན་དུས་ཆེན།　རྒྱལ་སྤྱིའི་བྱིས་པའི་དུས་ཆེན།　ཀྲུང་གོའི་ཞིང་པའི་ལོ་ལེགས་དུས་ཆེན་དང་གཞན་པའི་དུས་ཆེན་གལ་ཆེན་སྐབས་སུ།　རང་སོ་སོའི་ཁྱད་ཆོས་ལྡན་པའི་དམངས་སྲོལ་རིག་གནས་བྱ་འགུལ་དང་རྗེས་དྲན་དགའ་སྟོན་བྱ་འགུལ་སྤེལ་ནས།　རྒྱལ་ཁབ་དང་ཁྱིམ་གཞིས་ཀྱི་བརྩེ་བ་ཇེ་ཟབ་ཏུ་གཏོང་དགོས།

དོན་ཚན་སུམ་ཅུ་པ།　དགའ་སྟོན་གལ་ཆེན་དང་རྗེས་དྲན་བྱ་འགུལ།　རིག་གནས་ལུས་རྩལ་བྱ་འགུལ་ཆེན་མོ།　འགྲེམ་སྟོན་ཚོགས་འདུ་བཅས་རྩ་འཛུགས་བྱས་ནས་སྤེལ་བར།　ཁྲིམས་ལྟར་རྔམ་བརྗིད་ལྡན་པ་དང་གཟབ་རྒྱས་ཡིན་པའི་རྒྱལ་དར་སྒྲེང་བ་དང་རྒྱལ་གླུ་དཀྲོལ་བའི་མཛད་སྒོ་སྤེལ་དགོས།

ཁྲིམས་ལྟར་བཅའ་ཁྲིམས་ལ་དམ་བཅའ་འཇོག་པའི་མཛད་སྒོ་སྤེལ་བ་དང་།　དམག་མི་དང་གྲ་སྒྲིག་དམག་ཞབས་མི་སྣས་དམག་ཞབས་དམ་བཅའ་འཇོག་པའི་མཛད་སྒོ་སྤེལ་སྐབས།　དམ་བཅའ་འཇོག་པའི་ཡུལ་དངོས་སུ་ངེས་པར་དུ་རྒྱལ་དར་འགེལ་བ་དང་རྒྱལ་གླུ་དཀྲོལ་དགོས་ལ།　དམ་བཅའི་མནའ་ཚིག་གིས་ངེས་པར་དུ་རྒྱལ་གཅེས་རིང་ལུགས་ཀྱི་སྙིང་སྟོབས་མཚོན་པར་བྱེད་དགོས།

དོན་ཚན་སོ་གཅིག་པ།　རྒྱང་སྒྲོག་ཁང་དང་བརྙན་འཕྲིན་ཁང་།　ཚགས་པར་པར་སྐྲུན་ལས་ཁུངས་སོགས་ཀྱིས་ངེས་པར་དུ་དྲིལ་སྒྲོག་བརྒྱུད་སྒྲོག་བྱེད་ཐབས་གསར་སྐྲུན་བྱས་ཏེ།　རྒྱལ་གཅེས་རིང་ལུགས་བརྗོད་གཞི་ཡིན་པའི་ཕུལ་བྱུང་བརྩམས་ཆོས་བཟོ་སྐྲུན་དང་བརྒྱུད་གཏོང་།　བརྒྱུད་འགོད་སོགས་བརྒྱུད་ནས།　ཆེད་དོན་ཆེད་སྒྲིག་སྤེལ་དགོས་ལ།　གསར་འགྱུར་བརྒྱུད་སྒྲོག་ལ་ཤུགས་བསྣན་ཏེ་སྤྱི་ཕན་བརྡ་ཁྱབ་གཏོང་བ་སོགས་ཀྱི་བྱེད་ཐབས་ཀྱིས་གསོན་ཉམས་ལྡན་པའི་སྒོ་ནས་རྒྱལ་གཅེས་གཏམ་རྒྱུད་ལེགས་པོར་བརྗོད་པ་དང་།　རྒྱལ་གཅེས་རིང་ལུགས་ཀྱི་སྙིང་སྟོབས་དར་སྤེལ་གཏོང་དགོས།

དོན་ཚན་སོ་གཉིས་པ།　དྲ་བའི་ཆ་འཕྲིན་ཞབས་ཞུ་འདོན་སྤྲོད་བྱེད་མཁན་གྱིས་ངེས་པར་དུ་དྲ་བའི་རྒྱལ་གཅེས་རིང་ལུགས་ཀྱི་སློབ་གསོའི་ནང་དོན་འཛུགས་སྐྲུན་ལ་ཤུགས་བསྣན་ནས།　རྒྱལ་གཅེས་རིང་ལུགས་ཀྱི་སྙིང་སྟོབས་མངོན་པར་མཚོན་པའི་དྲ་བའི་ཆ་འཕྲིན་དང་བརྩམས་ཆོས་བཟོ་སྐྲུན་དང་བརྒྱུད་སྒྲོག་བྱེད་དགོས་པ་དང་།　སྟེགས་བུ་གསར་བ་དང་ལག་རྩལ་གསར་བ།　ཐོན་རྫས་གསར་བ་བཅས་གསར་སྤེལ་དང་བེད་སྤྱོད་བྱས་ནས།　གསོན་ཉམས་ལྡན་པའི་སྒོ་ནས་དྲ་ཐོག་ཏུ་རྒྱལ་གཅེས་རིང་ལུགས་ཀྱི་སློབ་གསོའི་བྱ་འགུལ་སྤེལ་དགོས།

ལེའུ་བཞི་པ།　རྒྱབ་སྐྱོར་འགན་སྲུང་།

དོན་ཚན་སོ་གསུམ་པ།　རྒྱལ་ཁབ་ཀྱིས་ཁེ་ལས་དང་ལས་དོན་ལས་ཁུངས།　སྤྱི་ཚོགས་རྩ་འཛུགས།　སྤྱི་དམངས་བཅས་ལ་ཁྲིམས་ལྟར་རྒྱལ་གཅེས་རིང་ལུགས་ཀྱི་སློབ་གསོའི་བྱ་འགུལ་སྤེལ་བར་སྐུལ་ལྕག་དང་རྒྱབ་སྐྱོར་བྱེད་དགོས།

རྒྱལ་ཁབ་ཀྱིས་རྒྱལ་གཅེས་རིང་ལུགས་ཀྱི་སློབ་གསོའི་གཞུང་ལུགས་ལ་ཞིབ་འཇུག་བྱེད་པའི་བྱ་བར་རྒྱབ་སྐྱོར་བྱས་ཏེ།　རིམ་པ་མང་པོའི་ཆེད་ལས་འཇོན་མིའི་སློབ་གསོ་དང་གསོ་སྦྱོང་ལ་ཤུགས་སྣོན་དགོས།

རྒྱལ་གཅེས་རིང་ལུགས་ཀྱི་སློབ་གསོའི་ལས་དོན་ཁྲོད་བྱས་རྗེས་འབུར་ཐོན་བཞག་པའི་ལས་ཁུངས་དང་མི་སྒེར་ལ།　རྒྱལ་ཁབ་ཀྱི་འབྲེལ་ཡོད་གཏན་འཁེལ་ལྟར་གཟེངས་བསྟོད་དང་བྱ་དགའ་སྤྲོད་དགོས།

དོན་ཚན་སོ་བཞི་པ།　ཀྲུང་དབྱང་རྒྱལ་གཅེས་རིང་ལུགས་ཀྱི་སློབ་གསོ་གཙོ་གཉེར་སྡེ་ཁག་གིས་རྒྱལ་གཅེས་རིང་ལུགས་ཀྱི་སློབ་གསོའི་རྟེན་གཞིར་ངོས་འཛིན་དང་སྲུང་སྐྱོབ།　དོ་དམ་བཅས་བྱེད་པའི་ལམ་ལུགས་འཐུས་ཚང་དུ་གཏོང་བ་དང་།　རྒྱལ་གཅེས་རིང་ལུགས་ཀྱི་སློབ་གསོའི་རྟེན་གཞི་སྲུང་སྐྱོབ་བེད་སྤྱོད་བྱེད་པའི་འཆར་འགོད་བཟོས་ཏེ།　རྒྱལ་གཅེས་རིང་ལུགས་ཀྱི་སློབ་གསོའི་རྟེན་གཞིའི་སྲུང་སྐྱོབ་དང་དོ་དམ།　བེད་སྤྱོད་བཅས་ལ་མཛུབ་སྟོན་དང་ལྟ་སྐུལ་བྱེད་པར་ཤུགས་སྣོན་དགོས།

རིམ་པ་སོ་སོའི་མི་དམངས་སྲིད་གཞུང་གིས་ངེས་པར་དུ་རྒྱལ་གཅེས་རིང་ལུགས་ཀྱི་སློབ་གསོའི་རྟེན་གཞིའི་འཆར་འགོད་དང་འཛུགས་སྐྲུན།　དོ་དམ་བཅས་ལ་ཤུགས་སྣོན་པ་དང་།　རིན་མེད་ངང་སྒོ་འབྱེད་པའི་ལམ་ལུགས་དང་འགན་སྲུང་ལམ་སྲོལ་འཐུས་ཚང་དུ་གཏོང་དགོས།

དོན་ཚན་སོ་ལྔ་པ།　རྒྱལ་ཁབ་ཀྱིས་རྒྱལ་གཅེས་རིང་ལུགས་ཀྱི་སློབ་གསོ་བརྗོད་དོན་ཡིན་པའི་རྩོམ་རིག་དང་གློག་བརྙན།　གླུ་དབྱངས།　ཞབས་བྲོ།　ཟློས་གར།　མཛེས་རྩལ།　ཡིག་གཟུགས་སོགས་ཀྱི་རིག་རྩལ་བརྩམས་ཆོས་ལ་སྐུལ་ལྕག་དང་རྒྱབ་སྐྱོར་བྱས་ཏེ།　ཕུལ་བྱུང་རིག་རྩལ་བརྩམས་ཆོས་དཔྱད་འདེམས་དང་གཟེངས་བསྟོད།　འགྲེམ་སྟོན།　འགྲེམ་འཁྲབ་བཅས་བྱེད་པའི་སྐབས་སུ་རྒྱལ་གཅེས་རིང་ལུགས་ཀྱི་ནང་དོན་འབུར་དུ་གཏོད་དགོས།

དོན་ཚན་སོ་དྲུག་པ།　རྒྱལ་ཁབ་ཀྱིས་རྒྱལ་གཅེས་རིང་ལུགས་ཀྱི་སྙིང་སྟོབས་མངོན་པར་མཚོན་པའི་ཕུལ་བྱུང་གི་སློབ་ཕྱིའི་ཀློག་དེབ་པར་སྐྲུན་ལ་སྐུལ་ལྕག་དང་རྒྱབ་སྐྱོར་བྱེད་པ་དང་།　རྒྱལ་གཅེས་རིང་ལུགས་ཀྱི་སྙིང་སྟོབས་མངོན་པར་མཚོན་པའི་ན་གཞོན་དང་བྱིས་པར་ཁ་ཕྱོགས་པའི་འགུལ་རིས་དང་སྒྲ་གཟུགས་ཐོན་རྫས་སོགས་གསར་སྤེལ་བྱེད་པར་སྐུལ་ལྕག་དང་རྒྱབ་སྐྱོར་བྱེད་དགོས།

དོན་ཚན་སོ་བདུན་པ།　སྤྱི་དམངས་དང་རྩ་འཛུགས་སུ་ཡིན་ཡང་ངེས་པར་དུ་རྒྱལ་གཅེས་རིང་ལུགས་ཀྱི་སྙིང་སྟོབས་དར་སྤེལ་བཏང་སྟེ།　རང་འགུལ་ངང་རྒྱལ་ཁབ་ཀྱི་བདེ་འཇགས་དང་མཚན་སྙན།　ཁེ་ཕན་བཅས་ལ་སྲུང་སྐྱོབ་བྱེད་དགོས་ཏེ།　གཤམ་གྱི་བྱ་སྤྱོད་གང་རུང་ཡོད་མི་ཆོག

（གཅིག）　རྒྱལ་དར་དང་རྒྱལ་གླུ།　རྒྱལ་རྟགས་བཅས་ལ་དམའ་འབེབས་སམ་ཡང་ན་རྒྱལ་དར་དང་རྒྱལ་གླུ།　རྒྱལ་རྟགས་བཅས་ཀྱི་ཟིལ་ཤུགས་ལ་གནོད་སྐྱོན་གཏོང་བའི་བྱ་སྤྱོད།

（གཉིས།）　སྔོན་གཤེགས་དཔའ་བོའི་མཛད་རྗེས་དང་སྙིང་སྟོབས་ལ་འཁྱོག་བཤད་དང་སྒྲོ་སྐུར།　ཁྱད་གསོད་བྱེད་པ།

（གསུམ།）　བཙན་འཛུལ་དམག་འཁྲུག་དང་བཙན་འཛུལ་བྱ་སྤྱོད།　དམར་གསོད་དོན་རྐྱེན་འུད་སྒྲོག་དང་མཛེས་བཟོ།　ཁས་མི་ལེན་པ།

（བཞི།）　རྒྱལ་གཅེས་རིང་ལུགས་སློབ་གསོའི་སྒྲིག་ཆས་བཙན་བཟུང་དང་གཏོར་བརླག　ཉམས་ཆག་གཏོང་བ།

（ལྔ།　）ཁྲིམས་ལུགས་དང་སྲིད་འཛིན་ཁྲིམས་སྲོལ་གྱིས་གཏན་འགོག་བྱས་པའི་བྱ་སྤྱོད་གཞན་དག།

དོན་ཚན་སོ་བརྒྱད་པ།　སློབ་གསོ་དང་རིག་གནས།　ཡུལ་སྐོར།　དམག་ཁོངས་ནས་བུད་པའི་དམག་མིའི་ལས་དོན།　གསར་འགྱུར་པར་སྐྲུན།　རྒྱང་སྒྲོག་བརྙན་འཕྲིན།　གློག་བརྙན།　དྲ་འཕྲིན།　རིག་དངོས་སོགས་སྡེ་ཁག་གིས་ངེས་པར་དུ་ཁྲིམས་ལུགས་ཀྱིས་གཏན་འཁེལ་བྱས་པའི་འགན་འཁྲི་ལྟར།　བཅའ་ཁྲིམས་འདིའི་དོན་ཚན་སོ་བདུན་པའི་གཏན་འཁེལ་དང་འགལ་བའི་བྱ་སྤྱོད་དུས་ལྟར་བཀག་འགོག་བྱེད་དགོས་པ་དང་།　སྤྱི་ཚོགས་ལ་ཤུགས་རྐྱེན་ངན་པ་བཟོས་པར་ངེས་པར་དུ་དུས་ལྟར་སེལ་དགོས་པ་མ་ཟད་འབྲེལ་ཡོད་བཅའ་ཁྲིམས་དང་སྲིད་འཛིན་ཁྲིམས་སྲོལ་ལྟར་ཆད་པ་གཅོད་དགོས།　བདེ་སྲུང་དོ་དམ་དང་འགལ་བའི་བྱ་སྤྱོད་ལ།　ཁྲིམས་ལྟར་བདེ་སྲུང་དོ་དམ་གྱི་ཆད་པ་གཅོད་དགོས།　ནག་ཉེས་གྲུབ་པ་ལ་ཁྲིམས་ལྟར་ཉེས་དོན་འགན་འཁྲི་བདའ་འདེད་གཏོང་དགོས།

དོན་ཚན་སོ་དགུ་པ།　རྒྱལ་གཅེས་རིང་ལུགས་ཀྱི་སློབ་གསོའི་འགན་འཁྲི་ཡོད་པའི་སྡེ་ཁག་དང་ལས་ཁུངས་ཀྱིས་ཁྲིམས་ལྟར་རྒྱལ་གཅེས་རིང་ལུགས་ཀྱི་སློབ་གསོ་སྤེལ་བའི་འགན་འཁྲི་མི་སྒྲུབ་པ་ལ།　འགན་ཁུར་ཡོད་པའི་མགོ་ཁྲིད་མི་སྣ་དང་ཐད་ཀར་གྱི་འགན་ཁུར་མི་སྣར་ཁྲིམས་ལྟར་ཆད་པ་གཅོད་དགོས།

ལེའུ་ལྔ་པ།　ཞར་བྱུང་དོན་ཚན།

དོན་ཚན་བཞི་བཅུ་པ།　བཅའ་ཁྲིམས་འདི2024ལོའི་ཟླ1པའི་ཚེས1ཉིན་ནས་ལག་བསྟར་བྱ་རྒྱུ།　།