དོན་ཚན་དྲུག་པ། རྒྱལ་གཅེས་རིང་ལུགས་སློབ་གསོའི་ནང་དོན་གཙོ་བོ་ལ།
གཅིག མར་ཁེ་སི་ལེ་ཉིང་རིང་ལུགས་དང་མའོ་ཙེ་ཏུང་གི་དགོངས་པ། ཏིན་ཞའོ་ཕིན་གྱི་གཞུང་ལུགས། མཚོན་བྱེད་གསུམ་གྱི་གལ་ཆེའི་དགོངས་དོན། ཚན་རིག་གི་འཕེལ་རྒྱས་ལྟ་བ། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་བཅས།
གཉིས། ཀྲུང་གོ་གུང་ཁྲན་ཏང་གི་ལོ་རྒྱུས་དང་ཀྲུང་གོ་གསར་པའི་ལོ་རྒྱུས། བཅོས་སྒྱུར་སྒོ་འབྱེད་ཀྱི་ལོ་རྒྱུས། སྤྱི་ཚོགས་རིང་ལུགས་ཀྱི་འཕེལ་རྒྱས་ལོ་རྒྱུས། ཀྲུང་ཧྭ་མི་རིགས་ཀྱི་འཕེལ་རྒྱས་ལོ་རྒྱུས།
གསུམ། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་ལམ་ལུགས་དང་ཀྲུང་གོ་གུང་ཁྲན་ཏང་གིས་མི་དམངས་ལ་སྣེ་ཁྲིད་དེ་མཐུན་སྒྲིལ་འབད་འཐབ་བྱས་པའི་གྲུབ་འབྲས་གལ་ཆེན་དང་ལོ་རྒྱུས་ཉམས་མྱོང་། གསོན་ཉམས་ལྡན་པའི་ལག་ལེན་བཅས།
བཞི། ཀྲུང་ཧྭའི་ཕུལ་བྱུང་གི་སྲོལ་རྒྱུན་རིག་གནས་དང་གསར་བརྗེའི་རིག་གནས། སྤྱི་ཚོགས་རིང་ལུགས་ཀྱི་སྔོན་ཐོན་རིག་གནས།
ལྔ། རྒྱལ་དར་དང་རྒྱལ་གླུ། རྒྱལ་རྟགས་སོགས་རྒྱལ་ཁབ་ཀྱི་མཚོན་བྱེད་དང་མཚོན་རྟགས།
དྲུག མེས་རྒྱལ་གྱི་རྔམ་བརྗིད་ལྡན་པའི་རི་ཀླུང་དང་ལོ་རྒྱུས་རིག་གནས་ཤུལ་བཞག
བདུན། བཅའ་ཁྲིམས་དང་ཁྲིམས་ལུགས། རྒྱལ་ཁབ་གཅིག་གྱུར་དང་མི་རིགས་མཐུན་སྒྲིལ། རྒྱལ་ཁབ་བདེ་འཇགས་དང་རྒྱལ་སྲུང་སོགས་ཐད་ཀྱི་འདུ་ཤེས་དང་ལྟ་བ།
བརྒྱད། སྔོན་གཤེགས་དཔའ་བོ་དང་སྔོན་ཐོན་དཔེ་མཚོན་མི་སྣའི་བྱས་རྗེས་དང་དེས་མཚོན་པའི་མི་རིགས་ཀྱི་སྙིང་སྟོབས་དང་དུས་རབས་ཀྱི་སྙིང་སྟོབས།
དགུ། རྒྱལ་གཅེས་རིང་ལུགས་ཀྱི་སྙིང་སྟོབས་ཀྱིས་ཕྱུག་པའི་ནང་དོན་གཞན་པ།
དོན་ཚན་བདུན་པ། རྒྱལ་ཁབ་ཀྱིས་ཀྲུང་ཧྭ་མི་རིགས་ཀྱི་ཐུན་མོང་ཚོགས་པའི་འདུ་ཤེས་སློབ་གསོ་སྤེལ་ཏེ། རིགས་སོ་སོའི་མི་རིགས་ཀྱི་འགྲོ་འོང་བརྗེ་རེས་མཉམ་འདྲེས་ལ་སྐུལ་འདེད་གཏོང་བ་དང་། རླབས་ཆེའི་མེས་རྒྱལ་དང་ཀྲུང་ཧྭ་མི་རིགས། ཀྲུང་ཧྭའི་རིག་གནས། ཀྲུང་གོ་གུང་ཁྲན་ཏང་། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་ངོས་འཛིན་ཇེ་ཟབ་དུ་གཏོང་དགོས་ཤིང་། ཀྲུང་ཧྭ་མི་རིགས་ཀྱི་ཐུན་མོང་བསམ་པའི་ཁྱིམ་གཞིས་འཛུགས་སྐྲུན་བྱེད་དགོས།
དོན་ཚན་བརྒྱད་པ། རྒྱལ་གཅེས་རིང་ལུགས་སློབ་གསོ་སྤེལ་བར་ངེས་པར་དུ་ཀྲུང་ཧྭའི་ཕུལ་བྱུང་གི་སྲོལ་རྒྱུན་རིག་གནས་རྒྱུད་འཛིན་དང་འཕེལ་རྒྱས་གཏོང་དགོས་ལ། སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་ལྟ་བ་དར་སྤེལ་བཏང་སྟེ། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་རིག་གནས་འཛུགས་སྐྲུན་ལ་སྐུལ་འདེད་གཏོང་བ་དང་། རིག་གནས་ཀྱི་ཡིད་རྟོན་སྲ་བརྟན་དང་ཀྲུང་ཧྭ་མི་རིགས་ཀྱི་དེང་རབས་དཔལ་ཡོན་འཛུགས་སྐྲུན་བྱེད་དགོས།
དོན་ཚན་དགུ་པ། རྒྱལ་གཅེས་རིང་ལུགས་ཀྱི་སློབ་གསོ་སྤེལ་བར་ངེས་པར་དུ་རྒྱལ་གཅེས་རིང་ལུགས་ཀྱི་སྙིང་སྟོབས་དང་ཕྱི་ཕྱོགས་སྒོ་འབྱེད་རྒྱ་བསྐྱེད་པ་གཉིས་ཟུང་སྦྲེལ་བྱས་ནས། རྗེས་དཔག་དང་ཁོངས་ཡངས། སྒོ་འབྱེད་བཅས་རྒྱུན་འཁྱོངས་བྱེད་པ་དང་། རྒྱལ་ཁབ་སོ་སོའི་ལོ་རྒྱུས་ཁྱད་ཆོས་དང་རིག་གནས་སྲོལ་རྒྱུན་ལ་བརྩི་བཀུར་བྱས་ནས་མིའི་རིགས་ཀྱི་ཕུལ་བྱུང་དཔལ་ཡོན་གྲུབ་འབྲས་ཡོད་ཚད་བསྡུ་ལེན་དང་དཔྱད་གཞིར་འཛིན་དགོས།
དོན་ཚན་བཅུ་པ། ལོ་རེའི་ཟླ10པའི་ཚེས1ཉིན་དེ་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྒྱལ་སྟོན་ཉིན་མོ་ཡིན་པ་དང་། རྒྱལ་ཁབ་དང་སྤྱི་ཚོགས་ཕྱོགས་སོ་སོས་རྣམ་པ་སྣ་ཚོགས་ཀྱི་དགའ་སྟོན་བྱ་འགུལ་སྤེལ་ནས། གཅིག་སྡུད་ཐོག་རྒྱལ་གཅེས་རིང་ལུགས་སློབ་གསོ་སྤེལ་དགོས། （མུ་འགོད།）