བུ་མོ་ཆུང་ཆུང་ལ་གཅེས་སྐྱོང་བྱས་ཏེ་ལོག་གཡེམ་གནོད་འཚེ་ལས་རིང་དུ་གྱེས་དགོས།
བུ་མོ་ཆུང་ཆུང་གི་ལོག་གཡེམ་གནོད་འཚེ་ནི་བུ་མོ་ཆུང་ཆུང་གི་མིའི་ཐོབ་ཐང་ལ་ཐེབས་པའི་གཏུམ་སྤྱོད་ཀྱི་དྲག་ཤུགས་དངོས་ཡིན་ལ། བྱིས་པ་ཕོ་མོ་གཉིས་ལས་མོ་ལ་དམིགས་གསལ་གྱིས་ཐེབས་པའི་གཏུམ་སྤྱོད་ཀྱི་གནད་དོན་ཞིག་ཀྱང་ཡིན་པས། སྤྱི་ཚོགས་ཧྲིལ་བོས་དེར་བསྟུན་གྱིས་དོ་ཁུར་འཐུས་ཚང་དང་ཧུར་ཐག་གིས་ཟབ་ཞུགས་སྒོས་བུ་མོ་ཆུང་ཆུང་ལ་དོ་ཁུར་བྱས་ཏེ། བུ་མོ་ཆུང་ཆུང་ལ་བདེ་ཐང་དང་བདེ་འཇགས་ཀྱི་འཚོ་བའི་ཁོར་ཡུག་ཞིག་གསར་སྐྲུན་བྱེད་དགོས།
《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ཉེས་ཁྲིམས》དོན་ཚན་ཉིས་བརྒྱ་སོ་དྲུག་པའི་ནང་གི་གཏན་འབེབས་ལྟར་ན། གཏུམ་སྤྱོད་དང་འཇིགས་སྐུལ། ཡང་ན་བྱེད་ཐབས་གཞན་དག་སྤྱད་དེ་བུད་མེད་ལ་བཙན་གཡེམ་བྱས་པ་ལ་དུས་བཀག་བཙོན་འཇུག་ལོ་གསུམ་གྱི་ཡན་ནས་ལོ་བཅུའི་མན་གྱི་ཉེས་ཆད་གཅོད་དགོས། ལོ་བཅུ་བཞིར་མ་སོན་པའི་བུ་མོ་ཆུང་ཆུང་ལ་ལོག་གཡེམ་བྱས་པའི་རིགས་ལ་ཉེས་ཆད་ལྕི་མོ་གཅོད་དགོས། བུད་མེད་ལ་བཙན་གཡེམ་དང་བུ་མོ་ཆུང་ཆུང་ལ་ལོག་གཡེམ་བྱེད་མཁན་རིགས་ལ་གཤམ་གསལ་གྱི་གནས་ཚུལ་རིགས་གཅིག་ཡོད་ན། ལོ་བཅུའི་ཡན་གྱི་དུས་བཅད་བཙོན་འཇུག ཚེ་བཙོན་དང་ཡང་ན་སྲོག་ཆད་གཅོད་དགོས།
（དང་པོ།）བུད་མེད་ལ་བཙན་གཡེམ་དང་བུ་མོ་ཆུང་ཆུང་ལ་ལོག་གཡེམ་བྱས་པའི་གནས་ཚུལ་ལ་གདུག་རྩུབ་ཆེ་བ།
（གཉིས་པ།）བུད་མེད་ལ་བཙན་གཡེམ་དང་བུ་མོ་ཆུང་ཆུང་ལ་ལོག་གཡེམ་མང་པོ་བྱས་ཡོད་པ།
（གསུམ་པ།）ཐུན་མོང་གི་ཡུལ་དངོས་སུ་མི་དམངས་འདུ་སར་བུད་མེད་ལ་བཙན་གཡེམ་བྱས་པ།
（བཞི་པ།）མི་གཉིས་ཡན་གྱིས་རེས་མོས་སྒོས་བཙན་གཡེམ་བྱས་པའི་སྐོར།
（ལྔ་པ།）དེའི་རྐྱེན་གྱིས་གནོད་འཚེ་ཕོགས་མཁན་ལ་རྨས་སྐྱོན་ཚབས་ཆེན་བྱུང་བའམ་རྐྱེན་ལམ་དུ་ཤོར་བ། ཡང་ན་དེ་ལས་གཞན་པའི་མཇུག་འབྲས་ཚབས་ཆེན་བཟོས་ཡོད་པ།
《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ཉེས་ཁྲིམས》དོན་ཚན་ཉིས་བརྒྱ་སོ་བདུན་པའི་ནང་དུ་གཏན་འབེབས་བྱས་ཡོད་པ་འདི་ལྟར། གཏུམ་སྤྱོད་དང་འཇིགས་སྐུལ། ཡང་ན་བྱེད་ཐབས་གཞན་པ་སྤྱད་དེ་བཙན་ཤེད་ཀྱིས་བུད་མེད་ལ་འཆལ་སྤྱོད་དང་དམའ་འབེབས་བྱེད་མཁན་ལ་དུས་བཀག་བཙོན་འཇུག་ལོ་ལྔ་མན་གྱི་བཙོན་འཇུག་དང་བཀག་སྐྱིལ་བྱེད་དགོས།
མི་མང་མཉམ་རུབ་དང་ཡང་ན་ཐུན་མོང་གི་ཡུལ་དངོས་སུ་གོང་གསལ་གྱི་ནག་ཉེས་བསགས་ཡོད་པའི་རིགས་ལ་དུས་བཙོན་ལོ་ལྔའི་ཡན་གྱི་ཉེས་ཆད་གཅོད་དགོས།
བྱིས་པར་འཆལ་རྩེད་བྱས་པའི་རིགས་ལ་གོང་གསལ་ཚན་པ་གཉིས་ཀྱི་གཏན་འབེབས་ལྟར་ཉེས་ཆད་ལྕི་མོ་གཅོད་དགོས།
ལོག་གཡེམ་གྱི་གནོད་འཚེ་ཐོགས་པ་ན་ཇི་ལྟར་བྱ་དགོས་སམ།
ཁྲིམས་མེད་ལུགས་མེད་ཀྱི་ནག་ཉེས་མཁན་ལ་མཚོན་ནས་བཤད་ན“མི་སྒྲུབ་པ”ཅི་ཡང་མེད། རང་ཉིད་ཐར་ཐབས་བྱས་ཏེ་བདེ་འཇགས་ཀྱི་གནས་ཤིག་འཚོལ་དགོས།
ཁྱོད་ཀྱིས་ཡིད་ཆེས་བྱས་ཆོག་པའི་མི་བསམ་ཤེས་ལ་བཤད་དེ་མི་རྣམས་ཁྱོད་ཀྱིས་བཤད་པ་ལ་ཡིད་ཆེས་སུ་འཇུག་དགོས།
གནོད་འཚེ་ཐེབས་པའི་འབྲེལ་ཡོད་བདེན་དཔང་གང་མང་ཞིག་ཉར་ཚགས་བྱེད་དགོས། （མང་ཤོས་ནི་དངོས་པོའི་བདེན་དཔང་ཡིན་ན་འགྲིག་ལ། དཔེར་ན་གཏུམ་སྤྱོད་མཁན་གྱིས་གནོད་འཚེ་ཕོགས་མཁན་གྱི་ལྭ་བ་དང་ལུས་སྟེང་དུ་བཟོས་པའི་སྦགས་དངོས་ཀྱི་རིགས་སོགས་ལྟ་བུ། ）
དུས་ལྟར་གྱོད་དོན་སྙན་གསེང་ཞུས་ནས་སྤྱི་བདེ་མི་སྣ་ལ་རམ་འདེགས་བྱས་ཏེ་བདེན་དཔང་ལེན་དུ་འཇུག་པ།
ཡིད་ལ་འཛིན་རྒྱུ་ཞིག་ལ་གནོད་འཚེ་མཁན་གྱིས་རང་སྟེང་ནས་ཐག་གཅོད་བྱེད་རྒྱུར་སྒུག་མི་རུང་ལ། དེས་དུས་ཡུན་འགོར་འགྱངས་དང་བདེན་དཔང་རྩིས་མེད། གཏུམ་སྤྱོད་མཁན་གྱི་བཅའ་ཁྲིམས་ཀྱི་འགན་འཁྲི་འདེད་རྡུང་དཀའ་བ་བཅས་ཡིན།
ལུས་པོར་རྨས་སྐྱོན་ཐེབས་རྗེས་དུས་ལྟར་སྨན་ཁང་ལ་སོང་ནས་སྨན་བཅོས་བྱས་ཏེ་ནད་ཐོ་དང་ནད་རྟགས་ངོས་འཛིན་བྱས་པའི་དཔང་ཡིག རྨས་སྐྱོན་གསལ་འབྱེད་སྡོམ་ཚིག རིན་སྤྲད་འཛིན་ཤོག་བཅས་ཉར་ཚགས་བྱེད་དགོས།
སེམས་ཁམས་རིག་པའི་སྨན་པ་དང་སེམས་ཁམས་ཆེད་ལས་འདྲི་རྟོག་མི་སྣ་བཙལ་ནས་སེམས་ཁམས་ལ་མཛུབ་སྟོན་བྱེད་དུ་འཇུག་པ།
བུད་མེད་ལྷན་ཚོགས་དང་དམངས་ཁྲོད་བུད་མེད་ཚོགས་པ་སོགས་བཙལ་ནས་རོགས་སྐྱོར་བྱེད་པ་དང་བཅའ་ཁྲིམས་ཀྱི་རོགས་རམ་འཐོབ་དགོས།
རང་སྟེང་ནས་རང་ལུས་འགོག་སྲུང་ཐད་ཀྱི་གནད་དོན་ལ་ཕྱོགས་སྡོམ་བྱེད་དགོས།
ལྟ་སྐྱོང་མི་སྣས་འགོག་སྲུང་གི་བྱེད་ཐབས་གང་དག་སྤྱོད་དགོས་སམ།
འདྲ་རིས་དང་མ་དཔེ་ལ་བརྟེན་ནས་བྱིས་པར་ལུས་པོའི་ཆ་ཤས་སོ་སོ་གསལ་བོར་བཤད་དགོས།
བྱིས་པ་ལ་འཚོ་བའི་ཁྲོད་ཀྱི་མི་མངོན་པའི་ཉེན་ཁ་གང་མང་ཞིག་གསལ་བོར་བཤད་དགོས། དཔེར་ན་ཚད་ལྡན་མིན་པའི་ལུས་པོའི་རེག་ཐུག་སོགས་ལ་དོགས་ཟོན་བྱས་ཏེ་རྨས་སྐྱོན་ཐེབས་ཚད་ཇེ་དམའ་རུ་གཏོང་དགོས།
བྱིས་པའི་ཤ་འབྱར་དང་རྐང་ཐུང་གིས་ཁེབས་ཚད་ལ་མི་གཞན་པར་རེག་ཐུག་བྱེད་དུ་འཇུག་མི་རུང་བ་གསལ་བོར་བཤད་དགོས།
བྱིས་པ་ལ་མི་གཞན་པར་རེག་ཐུག་བྱེད་དུ་འཇུག་མི་རུང་བའི་གསང་བའི་ཆ་ཤས་སོགས་གསལ་བོར་བཤད་དགོས།
བྱིས་པར་རང་ཉིད་ལ་མི་སུ་དང་གང་གིས་ཀྱང་ཚད་ལྡན་མིན་པའི་རེག་ཐུག་དང་བླང་བྱ་གཏན་འགོག་བྱེད་པའི་བདག་དབང་ཡོད་པ་བཤད་དགོས་ཤིང་། ཐ་ན་ཁྱིམ་བདག་དང་དགེ་རྒན་ཡང་དེ་ལས་མ་འདས།
བྱིས་པར་ལོག་གཡེམ་གྱི་གནོད་འཚེ་ནི་ཉེས་འགལ་གྱི་བྱ་སྤྱོད་ཡིན་པ་བཤད་དགོས། གལ་ཏེ་དོན་དག་དེ་འདྲ་བྱུང་བ་ན་གསང་མི་རུང་བར་དུས་ལྟར་ཁྱིམ་མི་དང་བུད་མེད་རྩ་འཛུགས། རང་ཉིད་ཀྱིས་ཡིད་རྟོན་བྱེད་པའི་མི་སོགས་ལ་ཡར་ཞུ་བྱས་ཏེ་གཏུམ་སྤྱོད་མཁན་ལ་ཁྲིམས་ལྟར་ཁྲིམས་ཆད་ནན་མོ་གཅོད་དགོས།
བྱིས་པར་ཡིད་ཆེས་དང་བྱིས་པའི་བློས་ཐུབ་ཀྱི་གྲོགས་པོ་བྱས་ཏེ་འབྲེལ་འདྲིས་ལེགས་པོ་གསར་འཛུགས་ཀྱིས་ཕན་ཚུན་གྱི་འབྲེལ་བར་སྐུལ་འདེད་བཏང་ནས། དེའི་རིགས་ཀྱི་དོན་དག་བྱུང་རྗེས་བྱིས་པའི་ཁྱིམ་བདག་དང་ཕ་མར་མི་བཤད་པའི་འཇིགས་སྣང་གི་སེམས་ཁམས་དེ་མེད་པར་བཟོ་དགོས།
ལྟ་རྟོག་ལྷོད་གཡེང་དང་རྒྱང་འགྱེད་བྱེད་མི་རུང་ལ། ནང་སྒོས་སུ་ཕྲུ་གུ་མོ་དང་སློབ་ཆུང་སློབ་མ་མོ་དག་གི་ལྟ་རྟོག་ལྷོད་གཡེང་བྱེད་མི་རུང་།
བུ་མོ་ཆུང་ཆུང་ལ་ཁྱིམ་མི་ལས་གཞན་པར་གང་འདོད་དུ་ལྟ་རྟོག་བྱེད་དུ་འཇུག་མི་རུང་ཞིང་། ཐ་ན་སྐར་མ་འགའ་ཡང་དེ་ལས་མ་འདས།
རང་ནུས་ཅི་ལྕོགས་ཀྱིས་སློབ་ཆུང་སློབ་མ་བུ་མོ་དག་སློབ་གྲྭར་འགྲོ་སྐྱེལ་བྱེད་པར་སྐྱེལ་ལེན་བྱེད་དགོས་ཤིང་། ནང་སྒོས་སུ་ལམ་ཐག་ཅུང་རིང་ཞིང་མཐའ་འཁོབ་ཀྱི་གནས་ནི་དེ་ལས་མ་འདས།
བུ་མོ་ཆུང་ཆུང་དག་དྲ་ཁང་ནང་དུ་མི་འགྲོ་བ་དང་དེ་ལས་ཀྱང་དྲ་སྟེང་ནས་གང་འདོད་ཀྱིས་གྲོགས་པོ་མི་འཚོལ་བ། དྲ་གྲོགས་ལ་ངོ་ཐུག་པ་དང་ཁོར་འགྲོགས་ནས་ཕྱི་རོལ་དུ་འགྲོ་བ་སོགས་བྱེད་མི་རུང་བ་གསལ་བོར་བཤད་དགོས། གལ་ཏེ་གནས་ཚུལ་དེ་འདྲ་བྱུང་བ་ན་སློབ་གྲྭ་དང་འབྲེལ་ཡོད་ཕྱོགས་ལ་དུས་ལྟར་དེར་འབྲེལ་གྱི་བྱ་བ་སྒྲུབ་དུ་བཅུག་སྟེ་གཏན་འགོག་བྱེད་པར་ཤུགས་སྣོན་དགོས།
དུས་ལྟར་ཤེས་རྟོག་བྱུང་བ་ན་བུ་མོ་ཆུང་ཆུང་གི་རྒྱུན་ལྡན་མིན་པའི་སྐད་ཆ་དང་རྣམ་འགྱུར་ལ་བརྟག་པར་མཐོང་ཆེན་བྱས་ཏེ། རྒྱུ་རྐྱེན་ལ་རྩད་གཅོད་གསལ་བོ་བྱས་ནས་འགལ་རྐྱེན་མེད་པར་གཏོང་དགོས།
རྒྱུན་ལོབས་ཀྱི་གནོད་འཚེ་གཏོང་ཐབས།
གལ་ཏེ་གཏུམ་སྤྱོད་མཁན་ནི་དགེ་རྒན་ཡིན་ན་མང་ཤོས་ཀྱིས་གཅིག་པུ་ལ་སློབ་ཁྲིད་མཛུབ་སྟོན་དང་འཕྲོད་བསྟེན་གཙང་སྦྲ་བྱེད་པ། བྱ་དངོས་ལ་ལྟ་རྟོག་བྱེད་པ་སོགས་ཀྱི་ཁ་གཡར་ནས་སློབ་མ་བུ་མོ་དག་སློབ་གྲྭ་རུ་འདུག་པ་བཀོད་སྒྲིག་བྱེད་ངེས། ཡང་ན་སྦྱངས་འབྲས་སྐར་མ་མཐོ་བ་དང་སློབ་མ་ཕུལ་བྱུང་སོགས་ལ་བསམ་བློའི་ངར་ཤུགས་སྤྲོད་པའི་གཟན་འཕངས་ནས། དགེ་རྒན་གྱིས་སྒྲུབ་བཞིན་པ་དག་ནི་རང་ཉིད་ལ་གཅེས་སྐྱོང་དང་རོགས་རམ་ཡིན་པའི་གོ་འཛོལ་བྱུང་དུ་བཅུག་པས། དགེ་རྒན་གྱིས་འདི་ལྟ་བུའི་དམིགས་གསལ་གྱི་གཅེས་སྐྱོང་དེའི་འོག་ཏུ་ཀུན་སློང་དང་དམིགས་འབེན་གཞན་ཞིག་ཡོད་པའི་ཐེ་ཚོམ་སྐྱེས་མི་སྲིད།
གལ་ཏེ་གཏུམ་སྤྱོད་མཁན་ནི་ཁང་བདག་དང་ཁྱིམ་མཚེས། རྒན་པ། དངོས་པོ་ཕྲན་བུའི་སྦྱིན་གཏོང་མཁན་ （དཔེར་ན་ཟས་རིགས་ཕྲན་བུ་དང་ལེགས་སྐྱེས་ཆུང་ངུ་སོགས། ）ཡིན་ན། གནོད་འཚེ་ཐེབས་མཁན་བུ་མོ་ཆུང་ཆུང་དག་གིས་དེ་ནི་རང་ཉིད་ལ་གཅེས་པར་སེམས་པ་ལས་བྱ་དངོས་འདི་དག་གི་རྗེས་སུ་ལྐོག་གཡོ་དང་ཉེན་ཁ་ཡོད་པའི་འདུ་ཤེས་ཡོད་མི་སྲིད།
གལ་ཏེ་གཏུམ་སྤྱོད་མཁན་ནི་དྲ་གྲོགས་ཡིན་ན། མང་ཤོས་ཀྱིས་ཐོག་མར་བུ་མོ་ཆུང་ཆུང་དག་ལ་གྲོགས་པོ་བསྒྲིགས་པ་དང་ཐ་ན་སྐད་ཆ་ཅི་ཞིག་ཡོད་རུང་ཁོར་མ་གཏོགས་མི་བཤད་པའི་ཚད་ལ་སླེབས་ཡོད་དུས། དྲ་ཐོག་ནས་བསམ་བློ་བརྗེ་རེས་ཀྱི་ཚུལ་དུ་རང་ཉིད་ཁྱིམ་མི་དང་དགེ་རྒན་སོགས་ཀྱིས་བློར་འབབ་ཀྱིན་མེད་ཚུལ། སློབ་སྦྱོང་ལ་སུན་སྣང་སྐྱེ་བ་སོགས་བཤད་དེ་བུ་མོ་ཆུང་ཆུང་ལ་བསླུ་བྲིད་བཏང་ཞིང་། གཏུམ་སྤྱོད་མཁན་གྱི་ཕ་ཡུལ་དུ་ལྟ་སྐོར་ལ་འགྲོ་བ་དང་ཡང་ན་ཡོང་སྒོ་མཐོན་པོའི་ལས་ཀ་ངོ་སྤྲོད་བྱེད་པ་སོགས་ཀྱི་བསླུ་བྲིད་ཀྱིས་གནོད་འཚེ་གཏོང་བའི་གོ་སྐབས་དང་གཏུམ་སྤྱོད་ལ་བརྟེན་ནས་བུ་མོ་ཆུང་ཆུང་དག་བཙན་ཤུགས་ཀྱིས་ཚོང་ལས་རང་བཞིན་གྱི་འཁྲིག་སྲེད་ཞབས་ཞུར་ཞུགས་སུ་འཇུག་པ།
བུ་མོ་ཆུང་ཆུང་གི་འཁྲིག་སྲེད་གནོད་འཚེ།
《མཉམ་འབྲེལ་རྒྱལ་ཚོགས་ཀྱི་བྱིས་པའི་ཁེ་དབང་སྤྱི་ཆིངས》ཁྲོད“བྱིས་པ”ཞེས་པ་དེས་ལོ་ན18ལ་མ་སོན་པའི་མི་གང་རུང་ཞིག་བསྟན་ཡོད་ལ། འདི་ནི་རང་རྒྱལ་བཅའ་ཁྲིམས་ཀྱིས་གཏན་འབེབས་བྱས་པའི“ནར་མ་སོན་པའི་མི”ཞེས་པའི་གོ་དོན་དང་གཅིག་མཚུངས་རེད།
བུ་མོ་ཆུང་ཆུང་གི་འཁྲིག་སྲེད་གནོད་འཚེ་ཞེས་པ་དེས་གཏུམ་སྤྱོད་མཁན་གྱིས་བུ་མོ་ཆུང་ཆུང་དེ་འཁྲིག་སྤྱོད་ཀྱི་དམིགས་འབེན་དུ་བཟུང་ནས་དབང་ཤུགས་དང་ཟིལ་ཤུགས། དྲག་ཤུགས། རྒྱུ་ནོར། བྱ་དངོས་དང་ཡང་ན་སེམས་ཁམས་བཅས་ཀྱི་ཐད་ནས་བུ་མོ་ཆུང་ཆུང་ལ་ངར་སློང་དང་བསླུ་བྲིད། འཇིགས་སྐུལ། བཙན་ཤེད་བཅས་ཀྱིས་འཁྲིག་སྤྱོད་ཀྱི་འདོད་པ་སྐོང་དུ་འཇུག་པའི་བྱ་སྤྱོད་ཅིག་ཡིན། དེའི་ཁོངས་སུ་གཏུམ་སྤྱོད་མཁན་གྱིས་བུ་མོ་ཆུང་ཆུང་ལ་བཙན་གྱིས་རང་གི་ཕོ་མཚན་ལ་རེག་ཐུག་བྱེད་དུ་བཅུག་པ་དང་བུ་མོ་ཆུང་ཆུང་གི་མཚན་མར（ནུ་མ་དང་ཁོག་སྨད་སོགས）བཙན་གཡེམ་དང་མཚན་མ་ཕྱིར་མངོན་དུ་བཅུག་པ། དམར་རྗེན་གྱི་བརྙན་བླངས་ནས་ཁྱབ་སྤེལ་བཏང་བ་སོགས་བཙན་ཤུགས་ལ་བརྟེན་ནས་ཚོང་ལས་རང་བཞིན་གྱི་ཞབས་ཞུ་སྒྲུབ་དུ་འཇུག་པ།
དྲག་སྤྱོད་མཁན་གྱི་ལས་སྤེལ་མཁན།
གནོད་འཚེ་ཐེབས་མཁན་མང་ཤོས་ནི་རང་ལ་ཆ་རྒྱུས་ཡོད་པའི་མི་ཡིན་ཞིང་། དཔེར་ན་དགེ་རྒན་དང་སྨན་པ། རྒན་རབས་པ་དང་གྲོགས་པོ། ཁང་བདག ཁྱིམ་མཚེས། རང་སྡེ་བའི་སྡེ་མི་བཅས་ཡིན།
དེའི་ཁྲོད་ནས་ཉུང་ཤོས་ནི་ཕན་ཚུན་ངན་འབྲེལ་བྱས་པའི་མི་རྒྱུས་མེད་ཡིན།
མི་མངོན་པའི་དྲག་སྤྱོད་བྱེད་ཡུལ།
དྲག་སྤྱོད་མཁན་གྱི་རང་ཁྱིམ།
དྲག་སྤྱོད་མཁན་གྱིས་བྱ་བ་སྒྲུབ་པའི་ཡུལ་དངོས་དང་མལ་ཁང་། གལ་ཏེ་དྲག་སྤྱོད་མཁན་ནི་དགེ་རྒན་ཞིག་ཡིན་ན། དྲག་སྤྱོད་སྤེལ་ཡུལ་མང་ཤོས་ནི་དགེ་རྒན་གྱི་མལ་ཁང་དང་སློབ་ཁྲིད་བྱེད་སའི་སློབ་ཁང་ཡིན།
སློབ་གྲྭར་འགྲོ་བའི་ལམ་བར་དང་ཅུང་མཐའ་འཁོབ་ཀྱི་ས་སྟོང་། སྲང་ལམ་ཆུང་ངུ་། རི་ངོས། གཙང་འགྲམ། མཚེའུ་འགྲམ། ནགས་ཚལ་གྱི་ཁྲོད་བཅས་ཡིན།
ཚོང་གཉེར་རང་བཞིན་གྱི་གླུ་གར་ཁང་དང་ཁ་ཧྥེ་ཁང་། བརྙན་འབེབས་ཁང་། མཚན་མོའི་གློག་བརྙན་ཁང་སོགས་ཡིན།
འགོག་སྲུང་གི་འདུ་ཤེས་ཡང་དག་པ་ཞིག་ལྡན་དགོས།
བུ་མོ་ཆུང་ཆུང་གི་སྟེང་ལ་བཀོལ་བའི་རྣམ་པ་གང་རུང་གི་འཁྲིག་སྲེད་གནོད་འཚེ་ཡོད་ཚད་ནི་ཁྲིམས་འགལ་ནག་ཉེས་ཀྱི་བྱ་སྤྱོད་ཡིན།
རྣམ་པ་གང་རུང་གི་གནོད་འཚེ་ཅི་ཡང་མི་སྒྲུབ་པ་རྒྱུན་འཁྱོངས་བྱེད་དགོས།
གནོད་འཚེ་ཐེབས་མཁན་ནི་སུ་ཞིག་ཡིན་རུང་ཚང་མར་བཅའ་ཁྲིམས་ཀྱི་ཉེས་ཆད་ཕོགས་སྲིད།
གཞན་གྱི་བུ་མོ་ཆུང་ཆུང་ལ་རོགས་བྱས་ཏེ་འཁྲིག་སྲེད་ཀྱི་གནོད་འཚེ་ལས་ཐར་དུ་བཅུག་པ་ནི་རང་གི་བུ་མོ་དང་ཚ་མོ་སོགས་ལ་འཁྲིག་སྲེད་ཀྱི་དྲག་སྤྱོད་ལས་རིང་དུ་གྱེས་པར་རོགས་རམ་བྱས་པ་ཡང་ཡིན།
ཁ་རོག་གེར་འདུག་པ་ནི་བུ་མོ་ཆུང་ཆུང་གི་འཁྲིག་སྲེད་གནོད་འཚེ་ལ་དཀྱེལ་ཡངས་དང་དོ་སྣང་མ་བྱས་པ་རེད།
སྲོལ་རྒྱུན་གྱི“ལུས་སྲུང་མཐའ་འཁྱོལ”བྱེད་པའི་ལྟ་སྟངས་དོར་ནས་གནོད་ཐེབས་བུ་མོ་ཆུང་ཆུང་དང་ཁྱིམ་མི་དག་གི་རྐྱེན་ངན་ལས་བྱུང་བའི་གནོན་ཤུགས་ཇེ་ཡངས་དུ་གཏོང་བ། བཅའ་ཁྲིམས་ཀྱིས་རོགས་སྒྲུབ་བྱེད་པའི་རེ་འདུན་ལ་སྐུལ་སློང་བྱེད་དགོས།
སྲོལ་རྒྱུན་གྱི་དགེ་རྒན་གཙུག་ཏུ་བཀུར་ནས་བསླབ་བྱ་ཡོད་ཚད་དང་ལེན་བྱེད་པའི་འདུ་ཤེས་གཏོར་སྟེ། སློབ་རའི་འཁྲིག་སྲེད་ཀྱི་དྲག་སྤྱོད་འགོག་སྲུང་བྱེད་དགོས།
བདག་སྐྱོང་མེད་པའི་བུ་མོ་ཆུང་ཆུང་དག་གཏུམ་སྤྱོད་མཁན་གྱི་དམིགས་འབེན་དུ་འགྱུར་སླ་ངེས།
དུས་ལྟར་གྱོད་དོན་སྙན་ཞུ་བྱེད་པ་ནི་ཁྲིམས་ལྟར་དྲག་སྤྱོད་མཁན་ལ་བཅའ་ཁྲིམས་ཀྱི་འགན་འཁུར་དུ་བཅུག་པ་དང་ཁྲིམས་འཛིན་སྡེ་ཁག་གི་མྱུར་སྐྱོབས་ཐོབ་པའི་ཡང་དག་པའི་ཐབས་ལམ་ཉག་གཅིག་ཡིན།
བུ་མོ་ཆུང་ཆུང་ལ་འཁྲིག་སྲེད་ཀྱི་གནོད་འཚེ་ཐེབས་པ་དེ་ནི་བུ་མོ་ཆུང་ཆུང་རང་ཉིད་ཀྱི་ནོར་འཁྲུལ་མིན་པས། དེ་ནི་ངོ་ཚ་དགོས་པའི་དོན་དག་ཞིག་ཀྱང་མ་ཡིན། དེ་ལས་ཀྱང་ཁྱིམ་ཚང་དང་ཁྱིམ་རྒྱུད་དེའི་ངོ་ཚ་དང་རྐྱེན་ངན་ཞིག་མིན་པར། རྙོག་འཛིང་ཆེ་བའི་སྤྱི་ཚོགས་ཀྱི་གནད་དོན་ཞིག་རེད།
མི་སུ་དང་གང་གིས་ཀྱང་གནོད་འཚེ་ཐེབས་པའི་བུ་མོ་ཆུང་ཆུང་ལ་ལེ་བདའ་དང་སྡིགས་དམོད་མི་བྱེད་པར་གཅེས་སྐྱོང་དང་རོགས་རམ་བྱེད་དགོས།
བུ་མོ་ཆུང་ཆུང་དག་གིས་རང་ལུས་ལ་སྲུང་སྐྱོབ་བྱེད་པའི་ཐབས་ལམ།
འཁྲིག་སྲེད་ཀྱི་གནོད་འཚེ་ལས་ཁྱིམ་བདག་དང་དགེ་རྒན། གཉེན་ཉེ་གྲོགས་པོ་བཅས་ཀྱི་ནམ་རྒྱུན་གྱི་གཅེས་སྐྱོང་དང་བདག་སྐྱོང་བར་དུ་ངོ་བོའི་ཆ་ལ་ཁྱད་པར་ཅི་ཞིག་ཡོད་པ་ཤེས་དགོས།
སློབ་གྲྭར་འགྲོ་བ་དང་སློབ་གྲྭ་ནས་ཕྱིར་ལོག་པ། ཕྱི་རོལ་དུ་ལྟད་མོར་འགྲོ་བ་བཅས་ལ་འགྲོ་རོགས་དང་མཉམ་དུ་འགྲོ་དགོས།
རང་ཉིད་གཅིག་པུ་ཆུ་འགྲམ་དང་རི་ངོས། ནགས་ཚལ་སོགས་མཐའ་འཁོབ་ས་ཁུལ་དུ་དཔེ་ཀློག་སློབ་སྦྱོང་དང་རྩེད་འཇོ་སོགས་ལ་འགྲོ་མི་རུང་།
ནམ་གུང་མི་མེད་པའི་སྐབས་སུ་རང་ཉིད་གཅིག་པུ་མཐའ་འཁོབ་ཀྱི་སྲང་ལམ་དུ་འགྲོ་མི་རུང་།
ཚོང་གཉེར་རང་བཞིན་གྱི་གླུ་གར་ཁང་དང་ཁ་ཧྥེ་ཁང་། དྲ་ཁང་། བརྙན་འབེབས་ཁང་། མཚན་གཏོང་གློག་བརྙན་ཁང་སོགས་མིག་གིས་མཐོང་ཐབས་བྲལ་ཞིང་བདེ་འཇགས་ཀྱི་གཞི་རྒྱུ་དཀོན་ས་རུ་རྩེད་འཇོར་གཡེང་མི་རུང་།
སློབ་གྲྭ་གྲོལ་རྗེས་རང་ཉིད་གཅིག་པུ་སློབ་ཁང་དང་ཡང་ན་སྐྱེས་པ་དགེ་རྒན་གྱི་མལ་ཁང་དུ་འགྲོ་མི་རུང་།
སྔ་མོ་ནས་གོམས་སྲོལ་ལེགས་པོ་ཞིག་ཆགས་སུ་བཅུག་ནས་མི་རྒྱུས་མེད་ཀྱིས་བྱིན་པའི་བྱ་དངོས་གང་འདོད་དུ་ཟ་མི་རུང་།
ཕྲུ་གུའི་དུས་སུ་གཅིག་པུ་ཡུལ་དུ་སྡོད་དུས（ཁྱིམ་མི་ལས་གཞན།）མི་གང་རུང་ཡུལ་ལ་འོངས་དུ་འཇུག་མི་རུང་ཞིང་། ཐ་ན་མི་རྒྱུས་ཡོད་ཀྱང་དེ་ལས་མ་འདས།
སེམས་མི་སྐྱིད་པའི་དོན་དག་འབྱུང་བའི་ཚོར་བ་ཡོད་དུས་ངེས་པར་དུ་དུས་ལྟར་ཁྱིམ་མི་དང་དགེ་རྒན་དག་ལ་ཡར་ཞུ་བྱས་ནས། འཁྲིག་སྲེད་ཀྱི་གནོད་འཚེ་ཐེབས་པར་སྐྲག་སྣང་མེད་པའི་སྒོ་ནས་སྤོབས་པ་ཆེར་སྐྱེད་ཀྱིས་ཕ་རོལ་བོ་ཁྲིམས་གཏུག་བྱེད་དགོས།
རང་སྲུང་ལ་ཤུགས་བསྣན་ནས་བརྐུ་འཚོང་སྔོན་འགོག་བྱེད་པ།
བུད་མེད་དང་བྱིས་པ་བརྐུ་འཚོང་བྱེད་པའི་ནག་ཉེས་ལ་རྡུང་རྡེག་ནན་མོ་བཏང་ནས་བྱིས་པ་བདེ་འཇགས་ངང་འཚར་ལོངས་བྱུང་བར་སྲུང་སྐྱོབ་དང་བུད་མེད་དག་གི་འགྲོ་བ་མིའི་ཐོབ་ཐང་ལ་འགེབས་སྲུང་སྒོས། མི་རྣམས་ཀྱི་དུས་བདེ་ཞོད་འཇགས་དང་སྤྱི་ཚོགས་འཆམ་མཐུན་ལ་སྐུལ་འདེད་དང་བརྟན་བརླིང་གི་ཁག་ཐེག་བྱེད་རྒྱུ་ནི་སྤྱི་ཚོགས་ཧྲིལ་བོའི་ཐུན་མོང་གི་འགན་འཁྲི་ཡིན་པས། སྤྱི་ཚོགས་ཧྲིལ་བོ་ཐུན་མོང་གིས་འབད་བརྩོན་དང་དམངས་ཡོངས་ཟབ་ཞུགས་བྱེད་དགོས།
བུད་མེད་དང་བྱིས་པ་བརྐུ་འཚོང་བྱེད་པའི་ནག་ཉེས་ནི་ཅི་ཞིག་ཡིན་ནམ།
བུད་མེད་དང་བྱིས་པ་ནི་མི་ཡིན་པ་ལས་ཚོང་རྫས་མིན། བུད་མེད་དང་བྱིས་པ་བརྐུ་འཚོང་བྱེད་པ་ནི་ཧ་ཅང་ཚབས་ཆེ་བའི་གནོད་འཚེ་དང་ཁྲིམས་འགལ་གྱི་བྱ་སྤྱོད་ཅིག་ཡིན། རང་རྒྱལ་གྱི《ཉེས་ཁྲིམས》དོན་ཚན240ཡི་ནང་གཏན་འབེབས་བྱས་ཡོད། བུད་མེད་དང་བྱིས་པ་བརྐུ་འཚོང་བྱེད་པ་ཞེས་པ་ནི་བུད་མེད་དང་བྱིས་པའི་ཉོ་འཚོང་དམིགས་འབེན་དུ་བཟུང་སྟེ་བསླུ་བྲིད་དང་བཙན་ཁྲིད། བསླུ་ཉོ། ལྐོག་འཚོང་། བསླུ་སྐྱེལ། ལམ་བར་བརྒྱུད་སྤྲོད་བཅས་ཀྱི་བྱ་སྤྱོད་རིགས་གཅིག་ཡོད་པ་དེར་ཟེར།
བུད་མེད་དང་བྱིས་པ་བརྐུ་འཚོང་བྱེད་པའི་གནས་ཚུལ་གྱི་ཡང་ལྕི་གཞིར་བཟུང་སྟེ། དུས་བཀག་བཙོན་འཇུག་དང་ཐ་ན་སྲོག་ཁྲིམས་སོགས་ཉེས་ཁྲིམས་མི་འདྲ་བ་གཅོད་པ་མ་ཟད། ད་རུང་དངུལ་ཆད་དང་རྒྱུ་ནོར་གཞུང་བསྡུ་བྱེད་ངེས།
མུ་འགོད།