བུད་མེད་དང་བྱིས་པ་བསླུ་བྲིད་དང་གཡོ་འཚོང་བྱས་པའི་རིགས་ལ་དུས་བཙོན་ལོ5ཡན་ནས་ལོ10མན་བར་གྱི་ཉེས་ཆད་གཅད་རྒྱུ་དང་། གཤམ་གསལ་གནས་ཚུལ་གང་རུང་ཡོད་པའི་རིགས་ལ་དུས་བཙོན་ལོ10ཡན་དང་ཚེ་བཙོན་གྱི་ཉེས་ཆད་གཅད་རྒྱུ་དང་། ཉེས་ཚབས་ཧ་ཅང་ཆེ་བའི་རིགས་ལ་སྲོག་ཆད་གཅོད་པར་མ་ཟད། རྒྱུ་ནོར་ཡང་གཞུང་བཞེས་བྱ་དགོས་ཏེ།
1.བུད་མེད་དང་བྱིས་པ་བསླུ་འཚོང་བྱེད་མཁན་གྱི་ཚོགས་གཙོ།
2.བུད་མེད་དང་བྱིས་པ་བསླུ་བྲིད་དང་གཡོ་འཚོང་བྱེད་མཁན་མི་གསུམ་ཡན་གྱི་རིགས།
3.བསླུ་བྲིད་དང་གཡོ་འཚོང་བྱས་པའི་བུད་མེད་ལ་ལོག་གཡེམ་བྱས་པའི་རིགས།
4. བསླུ་བྲིད་དང་གཡོ་འཚོང་བྱས་པའི་བུད་མེད་ལ་མགོ་སྐོར་བསླུ་བྲིད་དང་བཙན་ཤེད་ཀྱི་སྒོ་ནས་སྨད་འཚོང་བྱེད་དུ་བཅུག་པའམ་བསླུ་བྲིད་དང་གཡོ་འཚོང་བྱས་པའི་བུད་མེད་གཞན་ལ་བཙོངས་ནས་དེར་བཙན་ཤེད་ཀྱིས་སྨད་འཚོང་བྱེད་དུ་བཅུག་པའི་རིགས།
5.བཙོང་བྱའི་དམིགས་ཡུལ་དུ་བཙོངས་ནས་དྲག་ཤུགས་དང་བཙན་ཤེད་ཀྱིས་བྱེད་ཐབས་སྤྱད་པའམ་སྤྲིད་པར་བྱེད་པའི་ཐབས་ཤེས་ལ་བརྟེན་ནས་བུད་མེད་དང་བྱིས་པ་བཙན་ཁྲིད་བྱས་པའི་རིགས།
6.བཙོང་བྱའི་དམིགས་ཡུལ་དུ་བཟུང་ནས་ཕྲུ་གུ་དམར་འབྱར་དང་བྱིས་པ་རྐུས་ཁྱེར་བྱེད་པའི་རིགས།
7.བསླུ་བྲིད་དང་གཡོ་འཚོང་བྱས་པའི་བུད་མེད་དང་བྱིས་པའམ་དེ་དག་གི་གཉེན་ཉེར་རྨས་སྐྱོན་ཆེན་པོ་བཏང་བ་དང་ཤི་སྐྱོན་ནམ་དེ་མིན་གྱི་ངན་འབྲས་ཚབས་ཆེན་བཟོས་པའི་རིགས།
8.བུད་མེད་དང་བྱིས་པ་རྒྱལ་ཁབ་ཀྱི་མངའ་ཁོངས་ལས་ཕྱིར་བཙོང་བ་དམིགས་ཡུལ་དུ་འཛིན་པ་སྟེ། བུད་མེད་དང་བྱིས་པ་མགོ་སྐོར་བསླུ་བྲིད་དང་བཙན་ཁྲིད། བསླུ་ཉོ། ལྐོག་འཚོང་། བསུ་སྐྱེལ། ལམ་བར་བརྒྱུད་སྤྲོད་བཅས་ཀྱི་བྱས་ཉེས་ལས་རིགས་གཅིག་ཡོད་པ་ལ་ཟེར། ’