ཐུམ་འབུའི་ནད་ནི་ཇི་ལྟ་བུ་ཞིག་ཡིན།

ཐུམ་འབུའི་ནད་ནི་རྒྱ་ཆེའི་རོང་འབྲོག་མང་ཚོགས་ཀྱི་ལུས་ཕུང་བདེ་ཐང་ལ་གནོད་པ་ཤིན་ཏུ་ཆེ་བའི་གཞན་རྟེན་སྲིན་འབུའི་ནད་རིགས་ཤིག་ཡིན་ལ། དེ་མི་དང་ནོར་ལུག་སོགས་སྒོ་ཕྱུགས་ལ་འབྱུང་བ་ཡིན། ཐུམ་འབུའི་ནད་བྱུང་རྗེས། ཐུམ་སྐྲན་གྱི་འཁྲི་སྐྱེས་འབྱུང་སའི་གནས་དང་ཆེ་ཆུང་། གྲངས་ཚད་དང་ངོ་བོ་བཅས་མི་འདྲ་བ་ལྟར་དེ་དག་གི་ནད་རྟགས་ཀྱང་མི་འདྲ་བ་རེད། སྤྱིར་བཏང་དུ་མཆིན་པའི་ཐུམ་སྐྲན་དང་གློ་བའི་ཐུམ་སྐྲན་འབྱུང་ཚད་ཆེས་མཐོ་ལ། མཆིན་པའི་ཐུམ་སྐྲན་དང་གསུས་ཁོག་ཐུམ་སྐྲན་གྱི་ནད་རྟགས་ནི། ཕོ་བ་སྦོས་ཤིང་མི་བདེ་བ་དང་ཤ་སྐམ་ཞིང་ཡི་ག་མེད་པ་སོགས་འབྱུང་། གློ་བའི་ཐུམ་སྐྲན་གྱི་ནད་རྟགས་གཙོ་བོ་ནི། བྲང་ཁའི་གནས་སུ་ན་བའམ་མི་བདེ་བ་འབྱུང་བ་དང་། གློ་བའི་སྲིན་སྐྲན་ཆེ་བས་གློ་ཡུའི་ཡན་ལག་ལ་བཙིར་གནོན་ཐེབས་སུ་བཅུག་པ་ལས་སྐམ་ལུ་བྱེད་ཅིང་། གློ་བའི་ཕུང་གྲུབ་མནན་པ་ལས་སྙིང་ཁམས་མི་བདེ་བ་འབྱུང་། དེ་ལས་གཞན་ཀླད་པ་དང་མཁལ་མ། སྙིང་བཅས་ལ་ཐུམ་སྐྲན་བྱུང་ཚེ་དེ་ལས་ཀྱང་ཚབས་ཆེ།

མི་ལ་ཐུམ་འབུའི་ནད་ཇི་ལྟར་འགོ་བ་ཡིན་ནམ།

མི་དང་ནོར་ལུག་སོགས་ལ་ཐུམ་འབུའི་ནད་འགོ་སླ་སྟེ། ཐུམ་འབུའི་ནད་མཆེད་པའི་ས་ཁུལ་དང་ལྷག་པར་དུ་འགོས་མཆེད་ཚབས་ཆེ་བའི་ས་ཁུལ་དུ། ནམ་རྒྱུན་ཟླུམ་ཚེར་ཅན་གྱི་རྒྱུ་འབུ་ལེབ་རིང་གི་འབུ་སྒོང་གིས་བརྫད་སྐྱོན་བཟོས་ནས་ཐུམ་འབུའི་ནད་བགོ་སྲིད། ཟླུམ་ཚེར་ཅན་གྱི་རྒྱུ་འབུ་ལེབ་རིང་གི་འབུ་སྒོང་ནི་ཟླུམ་ཚེར་ཅན་གྱི་རྒྱུ་འབུ་ལེབ་རིང་ཆེ་བས་ཕྱིར་བཏང་བའི་སྒོ་ང་ཡིན། ཟླུམ་ཚེར་ཅན་གྱི་རྒྱུ་འབུ་ལེབ་རིང་ཆེ་བ་དེ་ཁྱི་དང་སྤྱང་ཀི ཝ་སོགས་ཤ་གཟན་སྲོག་ཆགས་ཀྱི་རྒྱུ་མའི་ནང་དུ་གནས་ཡོད་ཅིང་། ཚད་ངེས་ཅན་ཞིག་འགོར་རྗེས། སྲོག་ཆགས་དེ་དག་གིས་བྲུན་དང་མཉམ་དུ་ཕྱིར་ཕུད་པའི་འབུ་སྒོང་མང་པོས་ཁོར་ཡུག་ལ་བརྫད་སྐྱོན་བཏང་ཞིང་། ནོར་ལུག་སོགས་རྩ་གཟན་སྲོག་ཆགས་ཀྱིས་རྩྭ་ཟ་སྐབས་དང་ཆུ་འཐུང་སྐབས། འབུ་སྒོང་གིས་བརྫད་སྐྱོན་ཐེབས་པའི་རྩྭ་དང་ཆུ་སོགས་འཐུང་བ་ལས་ནད་དེ་འགོ་བ་རེད།

ཐུམ་འབུའི་ནད་ནི་ཟས་རིགས་ཀྱི་ནང་དུ་འབུ་སྒོང་འགོས་པ་ལས་ཁྱབ་པ་དང་། འབྲོག་ཁུལ་གྱི་ཁྱི་ནི་ནད་དེ་འགོ་ས་གཙོ་བོ་ཞིག་རེད། ཁྱིས་མི་ལ་སོ་འདེབས་པ་དང་། འབུ་སྒོང་ཡོད་པའི་ཚོད་རིགས་ཟ་བ། འབུ་སྒོང་ཡོད་པའི་ཆུ་འཐུང་བ། ཕྱུགས་རིགས་འཚོ་བ། སྤུ་བལ་འབྲེག་པ། འོ་མ་འཇོ་བ། པགས་རིགས་ལས་སྣོན་བྱེད་པ་སོགས་ལས་ནད་འདི་འགོ་བའི་ཉེན་ཁ་ཡོད། །

རྩོམ་སྒྲིག་པ། མཁའ་མཚོ་སྐྱིད།

དཔྱད་མཆན 0 ཡོད།