མཚན་བརྒལ་ནས་ལག་ཁྱེར་ཁ་པར་རྩེ་བ་ནི་ད་ལྟའི་ན་གཞོན་རྣམས་ཀྱི་རྒྱུན་རྣམ་ཞིག་རེད། མི་མང་ཤོས་ཤིག་གིས་མིག་འབྱེད་མི་ཐུབ་པའི་བར་དུ་ལག་ཁྱེར་ཁ་པར་རྩེས་རྗེས། ད་གཟོད་ལག་ཁྱེར་ཁ་པར་པང་དུ་རུམ་ནས་གཉིད་འགྲོ་བ་རེད། རྒྱུན་དུ་དེ་ལྟར་མཚན་བརྒལ་ན་མིའི་ལུས་སྟེང་གི་སྐྱེ་དངོས་ཆུ་ཟིན་འཁྲུགས་ཏེ་ནང་གི་ཟགས་ཐོན་གྱི་བྱེད་ནུས་མང་པོ་ཞིག་འཁྲུགས་ཤིང་རྙོག་འགྲོ་ལ། ནང་སྒོས་སུ་བུད་མེད་རྣམས་རྒྱུན་དུ་མཚན་བརྒལ་ན་མངལ་སྦྲུམ་པར་གནོད་པ་ཐེབས་སྲིད། དེའི་མི་ཚད་དུས་ཡུན་རིང་པོར་མཚན་བརྒལ་ན་ད་རུང་གཤམ་གྱི་གནོད་པ་འདི་དག་ཡོད་པ་སྟེ།
ཟླ་མཚན་མི་སྙོམས་པ།
རྒྱུན་དུ་མཚན་བརྒལ་ན་ལུས་སྟེང་གི་རྒྱུན་ལྡན་གྱི་སྐྱེ་དངོས་ཆུ་ཚོད་འཁྲུགས་ཏེ།སྐྱེ་དངོས་ཚིགས་འགྲོས་འཁྱོལ་འགྲོ་བ་དང་།ནང་གི་ཟགས་ཐོན་གྱི་བྱེད་ནུས་མང་པོ་ཞིག་འཁྲུགས་པའི་དབང་གིས།རྒྱུན་ལྡན་གྱི་ཁམས་དམར་འབུད་བའི་དུས་སྐབས་ལ་གནོད་འཚེ་ཐེབས་ཏེ།ཟླ་མཚན་སྙོམས་སྒྲིག་མི་ཡོང་བའི་གནས་ཚུལ་འབྱུང་སྲིད།གཞི་གྲངས་ལས་མངོན་པ་ལྟར་ན།རྒྱུན་དུ་མཚན་བརྒལ་བའི་བུད་མེད་ཀྱི་ཟླ་མཚན་མི་སྙོམས་པའི་ཚད་དུས་ཚོད་ལྟར་ངལ་གསོ་བྱེད་པའི་བུད་མེད་ལས་ལྡབ་གཉིས་ཀྱིས་མཐོ་བ་རེད།
གསང་ལམ་གཉན་ཚད།
གསང་ལམ་གཉན་ཚད་ཀྱང་འཚོ་བའི་གོམས་གཤིས་མི་ལེགས་པ་ལས་བྱུང་བའི་ནད་ཅིག་ཡིན་ཏེ།འཚོ་བ་དང་བྱ་བར་གནོན་ཤུགས་ཆེ་བའི་དབང་གིས།རྒྱུན་དུ་ལས་ཡུན་ཁ་སྣོན་བྱས་ཏེ་ནམ་གུང་ད་གཟོད་ངལ་གསོ་བྱས་ན།ལུས་སྟེང་གི་རིམས་འགོག་ནུས་པ་ཇེ་ཞན་དུ་འགྲོ་བ་དང་།གསང་ལམ་གྱི་རིམས་འགོག་ནུས་པ་བསྟུད་མར་ཇེ་ཞན་དུ་སོང་ནས་གནོད་འབུ་སྣ་ཚོགས་འབྱུང་སླ་བ་རེད།དུས་རྒྱུན་དུ་རང་སྟེང་གི་གཙང་སྦྲར་དོ་སྣང་ལེགས་པོ་བྱས་ནའང་རིམས་འགོག་ནུས་པ་ཞན་ན་གཉན་ཚད་རྒྱས་ཚད་སྔར་བཞིན་ཧ་ཅང་མཐོ།
བསམ་སེའུ་རྒུད་སྔ་བ།
བསམ་སེའུ་སྔ་མོ་ནས་ཉམས་རྒུད་འབྱུང་བ་ནི་བུད་མེད་ལ་མངལ་མི་སྦྲུམ་པའི་རྒྱུ་རྐྱེན་གཙོ་བོ་ཡིན་ལ།མཚན་བརྒལ་བ་ནི་བསམ་སེའུ་རྒུད་སྔ་བའི་འབྱུང་རྐྱེན་གཙོ་བོ་རེད།དེང་རབས་གསོ་རིག་ཞིབ་འཇུག་ལས་མངོན་པ་ལྟར་ན།དུས་ཡུན་ཐུང་ངུའི་རིང་མཚན་བརྒལ་ན་མཚན་རྨེན་མདའ་ཡི་བྱེད་ལས་འཁྲུགས་ཏེ་བུད་མེད་ཀྱི་སྐུལ་རྩི་ཟགས་ཐོན་མི་འབྱུང་བ་དང་ཟླ་མཚན་སྙོམས་པོ་མི་ཡོང་བར་མ་ཟད།རིམས་འགོག་ནུས་པ་ཡང་ཇེ་ཞན་དུ་འགྲོ་བའི་དབང་གིས།མོ་ནད་གཉན་ཚད་སྣ་ཚོགས་འབྱུང་བ་རེད།རྒྱུན་དུ་མཚན་བརྒལ་ན་བསམ་སེའུ་རྒུད་སྔ་བའི་ནད་རྟགས་འབྱུང་སླ་བས།མངལ་སྦྲུམ་པར་གནོད་པ་ཆེན་པོ་ཡོད།
ནུ་རྨེན་འཕར་སྐྱེ།
ནུ་རྨེན་འཕར་སྐྱེ་ནི་འབྱུང་ཚད་མཐོ་བའི་བུད་མེད་ཀྱི་ནད་རིགས་ཤིག་ཡིན་ཏེ།མི་མང་པོ་ཞིག་གིས་ཁོང་ཁྲོ་ལངས་པ་ནི་ནུ་རྨེན་འཕར་སྐྱེ་འབྱུང་བའི་རྒྱུ་རྐྱེན་ཡིན་པ་ཤེས་མོད།འོན་ཀྱང་མཚན་བརྒལ་བ་ཡང་དེའི་འབྱུང་རྐྱེན་གཙོ་བོ་ཞིག་ཡིན་པ་ཤེས་ཀྱིན་མེད།མཚན་བརྒལ་ན་ལུས་སྟེང་གི་མ་ལག་སྣ་ཚོགས་རྒྱུན་ལྡན་སྒོས་འཁོར་སྐྱོད་བྱེད་པར་གནོད་འཚེ་ཐེབས་པ་དང་།ནང་གི་ཟགས་ཐོན་སྙོམས་པོ་མི་ཡོང་བའི་དབང་གིས་ནུ་རྨེན་འཕར་སྐྱེ་འབྱུང་བ་རེད།
དེ་བས་འདི་རུ་བུད་མེད་རྣམས་ལ་དྲན་སྐུལ་ཞིག་བྱེད་རྒྱུ་ནི།དུས་ཚོད་ལྟར་ངལ་གསོ་བ་ལས་རྒྱུན་དུ་མཚན་བརྒལ་མི་རུང་ལ།རྒྱུན་དུ་མཚན་བརྒལ་ན་ནང་གི་ཟགས་ཐོན་གྱི་བྱེད་ནུས་འཁྲུགས་ཏེ།བདེ་ཐང་ལ་གནོད་པ་ཆེན་པོ་ཡོད། །