བོད་ཀྱི་བག་སྟོན་གཏམ་བཤད་གསེར་གྱི་མེ་ཏོག་ཕྲེང་བ།

དེ་རིང་གནམ་ལ་བལྟས་ན་སྐར་མ་བཟང་།ས་ལ་བལྟས་ན་དུས་ཚོད་བདེ།བར་ལ་བལྟས་ན་ཚེས་གྲངས་བཟང་། བཟང་གསུམ་འཛོམས་པའི་ཉི་མ།བཀྲ་ཤིས་ཉི་མ་ཡར་ལོགདུང་གི་ཟླ་བ་ཚུར་གསལ།སྐར་མ་སྨིན་དྲུག་ཚུར་ཚོགས།རྒྱ་མཚོའི་ཁ་ལོ་ཡར་སྐོར། ཆུ་བོ་སྔོན་མོ་ཡར་འབྲུབ།རྟགས་རྟེན་འབྲེལ་གྱི་རང་བཞིན། ལས་སྨོན་ལམ་གྱི་རང་འགྲུབ།སྣང་ཟེར་ཏེ་ལབ་དོན་ཞུ་དགོས་སྣང་ལ།

དེའི་རྗེས་ལ་བོད་ཕོ་གཞི་མོ་གནས་གཉེན་གཞི་ཚང་གསུམ་ལ་ཆ་བཞག་ན།འཁོར་བའི་ས་ཆགས་ཐབས།རུས་པས་རྡོ་བཟོ་ཐབས། བུ་མོ་གཅིག་འདུག་ན་བུ་གཅིག་སྐུལ་དགོས།བུ་གཅིག་འདུག་ན་བུ་མོ་གཅིག་སྐུལ་དགོས།དང་པོ་གཉེན་ཨ་བྱེད་ཟེར་ནས་ཕ་རོལ་བྲག་དཀར་རྐེད་ལ་སྐད་གཏོང་། གཉེན་བྱེད་ཆོག་ཟེར་ཏེ་ཆ་རིང་རྒྱ་གྲོང་ནང་ལ་ལན་འོངས། ལེན་འོངས་སའི་ཐོག་ལ།འབྱུང་བའི་ཆ་མཉམ། རུས་པའི་བརྡ་བཞིན།ལྷས་འབོད་ན་ཨ་ཟེར། བདུད་རྩི་ཡོང་ན་ཁ་གདངས་བའི་སྐབས་སུ་ལ། བདག་ཕུན་འཛིན་གཉིས་རེད་ཐལ་གསུངས་ནས་ལ། ནས་སྲན་མ་མིན་པ་ཆང་བཙོ། འབྲུ་ཡུངས་གཞི་མིན་པ་ཕྱེ་བཏགས། རི་རྒྱལ་འབྲོང་མིན་པ་ཤ་བཤགབྱ་རྒོད་ལག་མིན་པ་མགྲོན་འབོད།དོ་ནུབ་འདིའི་བཀྲ་ཤིས་པའི་གཡང་གདན་ཐོག་ལ་བྱ་མས“སྒོང”ཟེར་རན་བྱ་ཆུང་གིས་“རོགས”ཟེར་ནས་འཛོམས་ཡོང་རོགས་པ་ལ་དགའ་སྤྲོ་དཔེ་དང་དམ་པ་ཆེ་སྣང་།

དོ་ནུབ་མགྲོན་ཚུར་བྱོན་མཁན་རྣམས་ལ་ཆ་བཞག་ན།མི་ཕོའི་ནང་དུ་མིག་རྩ་དྭངས་པ།རྟ་ཕོའི་ནང་དུ་རྔ་མཇུག་རིང་བ། གཏམ་གྱི་ནང་དུ་སྲོག་ཤིང་།དམག་གི་ནང་དུ་དཔའ་བོ།ལས་བྱེད་ཀྱི་ནང་དུ་སྔ་འགྲོ།མི་དམངས་ཀྱི་ནང་དུ་ཧུར་བརྩོན།མི་ལ་མ་ལྟ་གཏམ།བྱ་ལ་མ་ལྟ་སྒྲོ།ཟ་བ་ལ་མ་ལྟ་རུས་པ་ལ་ལྟ་ནས་དོ་ནུབ་བཀྲ་ཤིས་པའི་གཡང་གདན་ཐོག་ལ་ཕེབས་ཐུབ་རོགས་ཡོང་རྒྱུ་ལ་དགའ་སྤྲོ་དཔེ་དང་དམ་པ་ཆེ་སྣང་།

བག་མ་ལ་ཆ་བཞག་ན། རྒན་པོ་རྣམས་ཀྱིས་གཡང་གིས་གསོ། མ་སྲུ་རྣམས་ཀྱིས་གླུ་ཡིས་གསོ། བུ་ཚ་བུ་མོ་རྣམས་ཀྱིས་བྲོ་དང་ཁྲོམ་གཞས་ཀྱིས་གསོ།ཇ་ཆང་གཉིས་ཀྱིས་ཟམ་བཙུགས།ཕྲུག་དཀར་ལྗང་གཉིས་ཀྱིས་གདན་ཐོགགཡུ་བྱུ་རུ་གཉིས་ཀྱི་རྒྱན་ཆ།དར་གོས་ཅན་གཉིས་ཀྱི་ཐོག་ལ།དོ་ནུབ་བཀྲ་ཤིས་པའི་གཡང་གདན་ཐོག་ལ་བཞུགས་གདན་འཇགས་རོགས་བྱེད་རྒྱུ་ལ་དགའ་སྤྲོ་དཔེ་དང་དམ་པ་ཆེ་སྣང་ཟེར་ཏེ་ལབ་དོན་ཞུ་དགོས་སྣང་ལ།

དར་བཏགས་རྣམ་པ་བྱོན་རོགས་བྱེད་མི་རྣམས་ལ་ཆ་བཞག་ན།ལ་ཆེ་ནས་མ་བསམ་བྱོན་རོགས་བྱེད།ལ་ཁ་ཁ་བས་མ་བཀགཆུ་ཆེ་ནས་མ་བསམ་བྱོན་རོགས་བྱེད།ཆུ་རབ་ཟམ་གྱིས་མ་བཀགཁྲ་གསལ་གསལ། གྲལ་རོགས་རོགས། དོ་ནུབ་བཀྲ་ཤིས་པའི་གཡང་རའི་ནང་ཕེབས་ཐུབ་རྒྱུ་ལ་དགའ་སྤྲོ་དཔེ་དང་དམ་པ་ཆེ་སྣང་།

གནམ་འཁོར་ལོ་རྩིབས་དགུའི་གུར་ཕུབས།ས་པད་མ་འདབ་བརྒྱ་ཡིས་གདན་བཏིང་། བར་བཀྲ་ཤིས་རྟགས་བརྒྱད་ཀྱིས་གྲལ་བཀོད། གྲལ་གཡས་གྲལ་གཡོན་གྲལ་གདོང་གྲལ་གསུམ།གྲལ་གཡས་གྲལ་མགོ་ལ་ཉི་མ་ཤར།གྲལ་གཡོན་གྲལ་མགོ་ལ་ཟླ་བ་གསལ། གདོང་གྲལ་མགོ་ལ་སྨིན་དྲུག་ཚོགས།གྲལ་མགོ་ལ་ཕ་དང་ཨ་ཁུ་བཟང་པོ།གྲལ་རྐེད་ལ་མ་དང་མ་སྲུ།གྲལ་མཐར་བུ་ཚ་བུ་མོ་རྣམས་ཀྱིས་ཐབ་སྐོར་རོགས་བྱེད་པ་ལ་དགའ་སྤྲོ་དཔེ་དང་དམ་བ་ཆེ་སྣང་ཟེར་ཏེ་ལབ་དོན་ཞུ་དགོས་སྣང་ལ།

ཕྱིའི་འཇིག་རྟེན་གྱི་ཆགས་ཚུལ།ནང་གི་ཟས་ནོར་ལོངས་སྤྱོད་ཀྱི་འབྱུང་ཚུལ།འཁོར་བ་སེམས་ཅན་གྱི་འཁྲུངས་ཚུལ།རྟེན་འབྲེལ་དར་ཚུལ་ཚིག་གསུམ་གྱི་ཟུར།སྐར་མའི་སྨིན་དྲུག་གི་མགོ་ཚོགས།རྟེན་འབྲེལ་དར་ཚུལ་མདོ་ཙམ་ཞིག་ཞུ་ན། དང་པོ་གནམ་མ་ཆགས་གནམ་ནམ་མཁའ་སྔོན་པོ་གཡུ་རང་ཆགས།ས་གཞི་དང་པོ་མཐའ་འོག་མའི་རྒྱ་མཚོ་ཆེན་མོ་བར་གཡང་ཤེལ་དཀར་གྱི་མདོག་ཅན་ཆགས།གནམ་ལ་རྒྱ་མཚོའི་སྤྲིན་དམར་ཆགས།སྤྲིན་ཅན་གྱི་ཆར་བ་ལྔ་འབབ་ནས།མཐའ་འོག་མའི་རྒྱ་མཚོ་ཆེན་མོ་བར་གཡང་ཤེལ་དཀར་གྱི་མདོག་ཅན་ཆགས།དེའི་དེ་དང་འབྱུང་བའི་བག་ཆགས།དེའི་དེ་དང་བདུད་ཆགས།དེའི་དེ་དང་བག་བདུད་ཀླུ་གསུམ་ཆགས། དེའི་དེ་དང་རི་ཡི་རྒྱལ་པོ་རི་རབ།རྩི་ཤིང་ནགས་ཚལ་ཆགས།རི་རབ་དེ་ལ་བམ་རིམ་བརྒྱད་ཁྲི་བཞི་སྟོང་།བམ་རིམ་བཞི་ཁྲི་ཉིས་སྟོང་རྒྱ་མཚོའི་འོག་ལ་མར་སོང་།འོག་ལ་ཀླུ་ཆེན་བརྒྱད་ཀྱི་གྲོང་ཆེན་ཆགས།ཀླུའི་གྲོང་ཆེན་མང་པོ་ཆགས།ཀླུའི་རྒྱལ་པོ་དགའ་བོ་དང་མི་དགའ་བོ།རིན་པོ་ཆེ་སྣ་ལྔ་ལ་གྲུབ་པའི་བང་མཛོད་གྲངས་མེད་པ་ཆགས།

འཇིག་རྟེན་ཁམས་ཀྱི་ཟས་ནོར་ལོངས་སྤྱོད་དེ་འོག་ཕྱོགས་ཀླུའི་ཡུལ་ནས་ཡར་ཡོང་། རི་རབ་ཀྱི་དཔག་ཚད་བཞི་ཁྲི་ཉིས་སྟོང་རྒྱ་མཚོའི་སྟེང་ལ་ཡར་འཕགས། རི་རབ་ཀྱི་མཐའ་སྐོར་ཏུ་གསེར་གྱི་རིགས་བདུན། རིག་པའི་མཚོ་བདུན། རི་རབ་དེ་ལ་བམ་རིམ་བཞི།བམ་རིམ་དང་པོ་གནོད་བྱིན་གྱི་ནང་ལ་བཞུགས་ཐོགགཉིས་པ་ཁྲིམས་ཐོགགསུམ་པ་སྟག་གཞོན་གྱི་རིགས།བཞི་པ་རྒྱལ་ཆེན་སྡེ་བཞིའི་གནས།རི་རབ་ཀྱི་རྩེ་ལ་སུམ་ཅུ་རྩ་གསུམ་པའི་ལྷ་གནས་ཆགས།དེའི་སྟེང་དུ་དགའ་ལྡན་ཆགས།དེའི་སྟེང་དུ་འཕྲུལ་དགའ་ཆགས། དེའི་སྟེང་དུ་གཞན་འཕྲུལ་དབང་བྱེད་ཆགས།གཡུ་ཀླུ་སྐོར་པའི་ཞིང་ཁམས།ལྕང་ཀླུ་ཅན་གྱི་ཕོ་བྲང་།ཡར་གསལ་ལྷའི་ཞིང་ཁམས།གཟུགས་ཁམས་ཀྱི་གནས་རིགས་བཅུ་བདུན།གཟུགས་མེད་ཀྱི་ཁམས་བཞི་ལྟ་བུ་ཆགས་སྣང་ཟེར་ནས་ལབ་དོན་ཞུ་དགོས་སྣང་ལ།

རི་རབ་ཀྱི་རྐེད་ལ་ཡང་མི་དམག་ཡུལ་གྱི་གྲོང་ཆེན་ཆགས། རི་རབ་ཀྱི་མཐའ་ལ་གླིང་མཆོག་ཏུ་འགྱུར་པའི་ཕོ་རྒྱལ་འཛམ་པོ་གླིང་ཆགས། གསེར་གྱི་རྡོ་རྗེ་རྒྱ་དམ་གྱི་དཔེ་ལྟ་བུ་ལ་ཆགས།གླིང་བཞི་གླིང་ཕྲན་བརྒྱད།གླིང་མི་འདྲ་བ་བཞི།ཁ་དོག་མི་འདྲ་བ་བཞི།དབྱིབས་མི་འདྲ་བ་བཞི། སྐྱེ་གནས་མི་འདྲ་བ་བཞི།ལོངས་སྤྱོད་མི་འདྲ་བ་བཞི།

གླིང་མི་འདྲ་བ་བཞི་ལ་ཆགས་བཞག་ན། ཤར་ནི་ཁ་ཆེ་གླིང་།ལྷོ་རི་འཛིན་པོ་ཏཱ་གླིང་།ནུབ་པད་མ་རྔ་གཡབ་གླིང་།བྱང་ཤམ་བྷ་གླིང་། ཁ་དོག་མི་འདྲ་བ་བཞི་ལ་ཆགས་བཞག་ན།ཤར་ཤེལ་ལས་གྲུབ་པའི་ཤར་གླིང་དཀར་པོ་ཆགས། ལྷོ་བེེཌཱུར་ལས་གྲུབ་པའི་ལྷོ་གླིང་སེར་པོ་ཆགས།ནུབ་པད་མ་ར་ག་ལས་གྲུབ་པའི་ནུབ་གླིང་དམར་པོ་ཆགས།བྱང་ཨིན་ཊ་ནི་ལེ་ལས་གྲུབ་པའི་བྱང་གླིང་ལྗང་པོ་ཆགས།

དབྱིབས་མི་འདྲ་བ་བཞི་ལ་ཆ་བཞག་ན། ཤར་ལུས་འཕགས་པོ་ནི་ཟླུམ་པོ།ལྷོ་འཛམ་བུ་གླིང་ནས་ཟླ་གམ།ནུབ་བ་ལང་སྤྱོད་ནི་གྲུ་བཞི།བྱང་སྒྲ་མི་སྙན་ནི་ཟུར་གསུམ།

སྐྱེ་གནས་མི་འདྲ་བ་བཞི་ལ་ཆ་བཞག་ན།ཤར་ལུས་འཕགས་པོ་ནི་རྒྱལ་སྐྱེས།ལྷོ་འཛམ་པོ་གླིང་ནི་མངལ་སྐྱེས།ནུབ་བ་ལང་སྤྱོད་ནི་དྲོད་སྐྱེས།བྱང་སྒྲ་མི་སྙན་ནི་སྒོང་སྐྱེས།

ལོངས་སྤྱོད་མི་འདྲ་བ་བཞི་ལ་ཆ་བཞག་ན། ཤར་ལུས་འཕགས་པོ་ནི་རིན་པོ་ཆེའི་ལོངས་སྤྱོད།ལྷོ་འཛམ་པོ་གླིང་ནི་ཤིང་ཏོག་ཨ་མྲའི་ལོངས་སྤྱོད།ནུབ་བ་ལང་སྤྱོད་ནི་འདོད་ཕྱོགས་བའི་ལོངས་སྤྱོད།བྱང་སྒྲ་མི་སྙན་ནི་མ་མོས་པའི་ལོངས་སྤྱོད།སྣང་ཟེར་ཏེ་ལབ་དོན་ཞུ་དགོས་སྣང་ལ།

གླིང་མཆོག་ཏུ་འགྱུར་པ་ཨོ་རྒྱན་འཛམ་པོ་གླིང་གི་མིའི་འབྱུང་ཚུལ་མདོ་བསྡུས་ཙམ་ཞིག་ཞུ་ན།ཡབ་སྤྲེའུ་བྱང་ཆུབ་སེམས་པ་འཕགས་མཆོག་སྤྱན་རས་གཟིགས་ཀྱི་རྣམ་སྤྲུལ། ཡུམ་བྲག་སྲིན་མོ་རྗེ་བཙུན་སྒྲོལ་མའི་རྣམ་སྤྲུལ།འདོད་པ་བྲག་ལ་ཆགས་ནས།དང་པོ་སྤྲེའུ་ཕྲུག་དྲུག་འཁྲུངས།མདོག་མི་འདྲ་བ་དྲུགརིགས་མི་འདྲ་བ་དྲུགཁམས་མི་འདྲ་བ་དྲུག ལྷའི་རིགས་དང་མིའི་རིགས།ལྷ་མ་ཡིན་གྱི་རིགས་ལ་སོགས་པ་འགྲོ་བ་རིགས་དྲུག་གི་འཁྲུངས་ཚུལ།ཡབ་སྤྲེའུ་བྱང་ཆུབ་སེམས་པ་འཕགས་མཆོག་སྤྱན་རས་གཟིགས་ཀྱི་རྣམ་སྤྲལ། སྤྲེའུ་ཕྲུག་གསུམ་ཁྲིད་ནས་རི་བོ་ཆེན་མོ་གཡས་སྐོར། ཡུམ་བྲག་གི་སྲིན་མོ་རྗེ་བཙུན་སྒྲོལ་མའི་རྣམ་སྤྲལ། སྤྲེའུ་ཕྲུག་གསུམ་ཁྲིད་ནས་རི་བོ་ཆེན་མོ་གཡོན་སྐོར།རྒྱ་གར་རྡོ་རྗེ་གདན་ལ་ཚུར་འཛོམས་པའི་སྐབས་སུ།སྤྲེའུ་ཕྲུག་སྟོང་དང་ལྔ་བརྒྱ་འཁྲུངས་སྣང་ཟེར་ཏེ་ལབ་དོན་ཞུ་དགོས་སྣང་ལ།ཟས་ནོར་ལོངས་སྤྱོད་མེད་པ་ལ་ས་སྐྱ་དཀར་དམར་གྱི་ཟས་ལ་ལོངས་སྤྱོད།སྦྲང་རྩིའི་དཔེར་ལྟ་བུ།མགོན་པོ་འོད་དཔག་མེད་ཀྱིས་བྱ་མཁའ་ལྡིང་ཚངས་ཆེན་ལ་སྤྲུལ་ནས་རི་རབ་ཀྱི་ཁོངས་གསེང་ཀྱི་ནང་དུ་འོག་ཕྱོགས་ཀླུའི་ཡུལ་ཏུ་ཕེབས་པ།འབྲུ་སྣ་ཁ་བདུན་ལེན་ནས་འཕགས་མཆོག་སྤྱན་རས་གཟིགས་ཀྱི་ལྷུང་བཟེད་ལ་ཕུལ།འཕགས་མཆོག་སྤྱན་རས་གཟིགས་ཀྱིས་ཕྱག་གཡས་པས་ནམ་མཁའ་ལ་བཏབས་ནས་ས་གཞི་ལ་ཕུག་པ།ཟས་ནོར་ལོངས་སྤྱོད་དེ་ཆར་བཞིན་ཏུ་འབེལ་སྣང་ཟེར་ཏེ་ལབ་དོན་ཞུ་དགོས་སྣང་ལ།

དེའི་རྗེས་ལ་མི་རྣམས་ཚེ་ལོ་བཞི་ཁྲིའི་སྐབས་སུ།སྟོང་འཁོར་ལོ་རྗེའི་རྒྱལ་པོ་ཕེབས་ནས་སངས་རྒྱས་འཁོར་བ་འཇིག་པའི་ཆོས་ཀྱི་འཁོར་ལོ་སྐོར།མི་རྣམས་ཚེ་ལོ་གསུམ་ཁྲིའི་སྐབས་སུ།སངས་རྒྱས་ཕེབས་ནས་རྒྱལ་པོ་ཀུན་ཏུ་དགའ་བས་རྒྱལ་ས་མཛད།མི་རྣམས་ཚེ་ལོ་གསུམ་ཁྲིའི་སྐབས་སུ།རྒྱལ་པོ་ཆོས་རྒྱལ་ཕེབས་ནས་སངས་རྒྱས་འཁོར་བ་འཇིག་པའི་ཆོས་ཀྱི་འཁོར་ལོ་སྐོར།མི་རྣམས་ཚེ་ལོ་ཉིས་ཁྲིའི་སྐབས་སུ།རྒྱལ་པོ་གསེར་ཏོག་ཕེབས་ནས་སངས་རྒྱས་འོད་སྲུང་གིས་ཆོས་ཀྱི་འཁོར་ལོ་སྐོར། མི་རྣམས་ཚེ་ལོ་བརྒྱ་ཡི་སྐབས་སུ།ཡབ་རྒྱལ་པོ་སྲས་གཙང་དང་ཡུམ་སྒྱུ་མ་ལྷ་མཛེས་གཉིས་ལས་བཅོམ་ལྡན་འདས་རྒྱལ་བ་ཤཱཀྱ་ཐུབ་པ་རྫུ་འཕྲུལ་གྱི་སྒོ་ནས།ཡུམ་སྒྱུ་མ་ལྷ་མཛེས་ཀྱི་སྐྱེ་བོའི་ཐོག་ལ་ཕེབས་པ།གནས་འགའ་ཤས་ཀྱི་ཁང་པར་བཞུགས་ནས།མཆན་པ་གཡོན་པའི་ཐོག་ལ་ཕེབས་ནས།ལྷའི་བུ་དང་བུ་མོ་རྣམས་ཀྱི་འཇའ་འོད་ཀྱི་ཚོན་སྣ་ལྔ་གདན་འདྲེན་ཞུ།ལྷ་ཚངས་པ་དང་རྒྱལ་བྱིན་རྣམས་ཀྱི་ཁྲུས་གསོལ་ཏེ་ཕུལ།ཤར་ཆད་ཀྱི་གྲོང་ཆེན་དེའི་ནང་དུ།ས་ཆེན་དེའི་ནང་དུ་གོམ་པ་བདུན་ཕར་སྤོས་ནས།དཔག་བསམ་ཤིང་འདི་ལ་ཕྱག་གཡས་པས་འཇུས་ནས། གོམ་གཅིག་གོམ་གཉིས་གཙོ་བོ་ཁྱོད་རྣམས་ལ།ས་ཆེན་འདིའི་ནང་གོམ་པ་བདུན་ཕར་སྤོ།ང་ནི་འཇིག་རྟེན་འདི་ནང་ཆོས་གསུང་འོང་ཟེར་ནས་ཞལ་གསུངས་མཛད།དགུང་ལོ་བཞིའི་སྐབས་སུ་རང་གི་དབུ་སྐྲ་རང་གིས་བསྲེགས་ནས་མཆོད་རྟེན་རྣམ་དག་གི་དྲུང་དུ་དབུ་སྐྲ་ཕུལ། དགུང་ལོ་བརྒྱད་ཀྱི་སྐབས་སུ་རྒྱལ་ས་མཛད་ཞིང་ཆོས་མཛད།དགུང་ལོ་བཅུ་དྲུག་སྐབས་སུ།ཆུ་བོ་ན་ག་ར་ཛ་ནང་ལ་བཞུགས་ནས་ཐུགས་ཏིང་ངེ་འཛིན་ལ་རྣམ་པ་བཞག་པ།དང་པོ་བྱང་ཆུབ་ཀྱི་སེམས་བསྐྱེད།བར་དུ་སྐལ་བ་གྲངས་མེད་ཀྱི་ཚོགས་བསགས།མཐར་འདོད་བརྒྱ་ལྔ་པ་རྫོགས་ནས་སངས་རྒྱས།བཅོམ་ལྡན་འདས་རྒྱལ་བ་ཤཱཀྱ་ཐུབ་པས་ཆོས་ཀྱི་ཕུང་པོ་སྟོང་ཕྲག་བརྒྱད་ཅུ་གྲངས་མེད་མཛད་སྣང་འདི་སྣང་ཟེར་ཏེ་ལབ་དོན་ཞུ་དགོས་སྣང་ལ།

དེའི་རྗེས་ལ་རྒྱལ་པོ་ཕེབས་ཚུལ་མདོ་བསྡུས་ཙམ་ཞིག་ཞུ་ན།རྒྱལ་པོ་ཕེབས་སྔ་བ་ལ་རྒྱལ་བོ་གཉའ་ཁྲི་བཙན་མོ། རྒྱ་གར་ལ་ཕེབས།ཉི་མའི་འཇའ་སྟབས་ལ་ཕེབས་ནས།ཉི་ཐང་གོང་མའི་ནང་དུ་འཇའ་འོད་སེར་པོ་ཞིག་གུར་ཕུབ་ནས་བཞུགས་ཚུལ།བོད་གངས་ཅན་ལ་ཕེབས་ནས་རྒྱལ་སྲིད་མང་པོ་ལུང་བསྟན་ཚུལ་མདོ་བསྡུས་ཙམ་ཞིག་ཞུ་ན། སྟེང་ལ་རྒྱལ་པོའི་ཁྲི་བརྒྱད།འོག་ལ་རྒྱལ་པོའི་བཙན་གསུམ། བར་ལ་རྒྱལ་པོའི་སྡེ་བཞི། རྒྱལ་པོ་གཉའ་ཁྲི་བཙན་མོ།མུ་ཁྲི་བཙན་མོ།ལི་ཁྲི་བཙན་མོ། རྒྱལ་པོ་བོདྷི་ས་ཏྭ།རྒྱལ་པོ་ཀུན་ཏུ་དགའ་བ།རྒྱལ་པོ་ཁྲི་སྲོང་སྡེ་བཙན། རྒྱལ་པོ་སྲོང་བཙན་སྒམ་པོ་བཅས་ཀྱི་བར་དུ་རྒྱལ་རབས་གསུམ་ཅུ་སོ་བདུན་དེ་གསལ་ཞིང་དྭངས་བ།  ཕྲ་ཞིང་ཕྲ་བ་ཞུ་རྒྱུ་ཡོད་པའི་གནས་ཚུལ་ཡིན་ལ་ཞུ་དགོས་པ་མི་སྣང་།

རྒྱལ་པོ་ཁྲི་སྲོང་ལྡེ་བཙན་གྱི་སྐབས་སུ། བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་རྒྱག་ཚུལ་མདོ་བསྡུས་ཙམ་ཞིག་ཞུ་ན། དང་པོ་མཁན་པོ་བོ་དྷི་ས་ཏྭས་འདྲེ་སྲིན་ཅུང་ཟད་དར་བ་ལ་འགྲུབ་མ་ཐུབ་པའི་དཔེ།སློབ་དཔོན་པད་མ་འབྱུང་གནས་གདན་དྲངས་འགྲོ་དགོས་ཚུལ་མདོ་བསྡུས་ཙམ་ཞུ་ན།རྒྱ་གར་རི་ལ་ནུབ་བྱང་མཚམས་སུ།སྡེ་ཀོ་ཤ་མཚོའི་ནང་དུ་མེ་ཏོག་པད་མ་འདབ་མ་སྟོང་དང་བདུན་བརྒྱའི་ཐོག་ལ།མགོན་པོ་འོད་དཔག་མེད་ཀྱི་ཚུལ་དུ་སློབ་དཔོན་པད་མ་འབྱུང་གནས་འཁྲུངས།རྒྱལ་པོ་ཨིན་ཊ་བོ་དྷིས་རྟ་མཆོག་ལྔ་བརྒྱར་གསེར་གྱི་ཤིང་རྟ་ལ་འདོད་ཡོན་ལྔའི་མཆོད་པ་བཀལ་ནས་བོད་གངས་ཅན་ལ་གདན་དྲངས།རྒྱལ་པོ་ཁྲི་སྲོང་ལྡེ་བཙན་གྱི་ཡོན་བདག་མཛད།མཁན་པོ་བོདྷི་ས་ཏྭས་རབ་གནས་མཛད།སློབ་དཔོན་པད་མ་འབྱུང་གནས་ཀྱི་འདྲེ་སྲིན་དམ་ལ་བཏགས།སངས་རྒྱས་ཀྱི་བསྟན་པ་དར་པའི་ཆེད་དུ།སེམས་ཅན་གྱི་བདེ་སྐྱིད་འབྱུང་བའི་ཆེད་དུ།རྒྱབ་ལ་བརྩིགས་པ་མེད་པ་གྲུ་བཞི།བར་ལ་ཀ་བ་མེད་པ་ཟུར་གསུམ།མཁས་བླུན་གཉིས་ལ་བཀའ་དྲིན་དྭངས་རག་འཕུལ་ཚུལ་གསལ་ཞིང་དྭངས་བ་ཞུ་མ་དགོས་སྣང་།དགའ་སྤྲོའི་ཚུལ་ཏུ།ལྕང་རྒན་ཨ་ཕོའི་གཏམ་བཤད། མི་ཉག་དང་ཕྲུག་གིས་གླུ་བྱེད།མི་ལ་རས་པས་མགུར་འཐེན།གཏམ་དང་པོ་བསམ་ཡས་འབྱུང་། བྲོ་དང་པོ་བསམ་ཡས་འབྱུང་།གླུ་དང་པོ་བསམ་ཡས་འབྱུང་སྣང་ཟེར་ཏེ་ལབ་དོན་ཞུ་དགོས་སྣང་།

དེའི་རྗེས་ལ་རྒྱལ་པོ་སྲོང་བཙན་སྒམ་པོའི་སྐབས་སུ།བཙུན་མོ་རྒྱ་བཟའ་ཀོང་ཇོ་དང་བལ་བཟའ་ཁྲི་བཙུན་གཉིས་བོད་གངས་ཅན་ལ་གདན་དྲངས་ཚུལ་མདོ་བསྡུས་ཙམ་ཞིག་ཞུ་ན།ཆོས་རྒྱལ་སྲོང་བཙན་སྒམ་པོ་འཕགས་མཆོག་སྤྱན་རས་གཟིགས་ཀྱི་རྣམ་སྤྲུལ།བོད་གངས་ཅན་ལ་སངས་རྒྱས་ཀྱི་བསྟན་པ་དར་བའི་ཆེད་དུ།སེམས་ཅན་གྱི་བདེ་སྐྱིད་འབྱུང་བའི་ཆེད་དུ།རྒྱ་བོད་གཉིས་ཀྱི་འདབ་འབྲེལ་བྱེད་པའི་ཆེད་དུ།འོད་ཟེར་དཀར་དམར་གཉིས་རྒྱ་ནག་ལ་འཕྲུལ། རྒྱ་ནག་ལ་བཙུན་མོ་རྒྱ་བཟའ་ཀོང་ཇོ་འཁྲུངས།འོད་ཟེར་དཀར་དམར་གཉིས་བལ་ཡུལ་དུ་འཕྲུལ་བ།བལ་བཟའ་ཁྲི་བཙུན་འཁྲུངས།བཙུན་མོ་རྒྱ་བཟང་ཀོང་ཇོ་གདན་དྲངས་འགྲོ་ཚུལ་ཞིག་ཞུ་ན།བོད་ཀྱི་བློན་པོ་རིག་པ་ཅན་རྒྱ་ནག་ལ་བཙུན་མོ་རྒྱ་བཟང་ཀོང་ཇོ་གདན་དྲངས་འགྲོ།བཙུན་མོ་རྒྱ་བཟའ་ཀོང་ཇོ་གདན་དྲངས་ཚུལ་དང་ཕན་བཏགས་འཕུལ་ཚུལ་མདོ་བསྡུས་ཙམ་ཞིག་ཞུ་ན།བཀྲ་ཤིས་པའི་བཏགས་བརྒྱད། རྒྱལ་སྲིད་རིན་པོའི་ཆེའི་སྣ་བདུན། འདོད་ཡོན་རིན་པོ་ཆེའི་སྣ་ལྔ།སྣ་དགུ་འཛིན་ལ་སོགས་ཕན་བཏགས་ལ་འཕུལ་ཚུལ།བཙུན་མོ་རྒྱ་བཟའ་ཀོང་ཇོ་དོན་ངོས་བཟུང་ཚུལ་མདོ་བསྡུས་ཙམ་ཞིག་ཞུ་ན།རྒྱ་ནག་ལ་བུ་མོ་གཅིག་དང་འདྲ་བ་བུ་མོ་ལྔ་བརྒྱ་ལྷན་གཅིག་ཏུ་བསྡུས་ནས།བཙུན་མོ་རྒྱ་བཟའ་ཀོང་ཇོ་ལྷ་ཡི་མི་རྒྱུད་ཡིན་པའི་སྟབས་ཀྱིས།དཀར་ཞིང་སེར་བ་སྔོ་ལ་དམར་བའི་མདངས་ཆགས་པ། སྐྱེས་སྟབས་ནས་ཉི་མའི་འོད་འཁྱིལ་བ།བོད་ཀྱི་བློན་པོ་རིག་པ་ཅན་ལྷའི་མི་རྒྱུད་ཡིན་པའི་སྟབས་ཀྱིས་བོད་གངས་ཅན་ལའང་གདན་དྲངས།རྫོངས་ཁུར་ཚུལ་ལ་ཆགས་བཞག་ན།དགོས་འདོད་ཀུན་ཏུ་གྲུབ་པའི་ཇོ་བོ་ཤཱཀྱ་མུ་ནེ་བོད་གངས་ཅན་ལ་གདན་དྲངས།ཀླུ་བདུད་ཀྱི་ཁ་སྣོན་གཙུག་ལག་ཁང་བཏབ་ཚུལ་མདོ་བསྡུས་ཙམ་ཞིག་ཞུ་ན།ཆོས་རྒྱལ་སྲོང་བཙན་གསེར་གྱི་ཁྲི་འཁོར་མཚོ་ལ་ཕེབས་ནས། གསེར་ཀྱི་ཁྲི་འཁོར་མཚོའི་ནང་དུ་དཔག་བསམ་་ཀྱི་ཤིང་སྐྱེས།དཔག་བསམ་ཤིང་དེ་ལའང་འབྱུང་བའི་བག་ཆགས།བདུད་ཆགས།བར་བདུད་ཀླུ་གསུམ་ཆགས།ཀླུ་བདུད་ཁ་སྣོན་གཙུག་ལག་ཁང་འགྲུབ་སྣང་ཟེར་ཏེ་ལབ་དོན་ཞུ་དགོས་སྣང་ལ།བལ་བཟའ་ཁྲི་བཙན་བོད་གངས་ཅན་ལ་གདན་དྲངས།ར་ས་འཕྲུལ་སྣང་གཙུག་ལག་ཁང་འགྲུབ།ཐུགས་རྗེ་ཆེན་མོ་རབ་འབྱམས་ལྔ་ལྡན་ལྷན་གཅིག་ཏུ་འགྲུབ།བོད་གངས་ཅན་ལ་སངས་རྒྱས་ཀྱི་བསྟན་པ་དར།སེམས་ཅན་གྱི་བདེ་སྐྱིད་འབྱུང་།ཟས་ནོར་ལོངས་སྤྱོད་ནི་ཆར་བཞིན་དུ་འབེལ།རྒྱ་བོད་ཀྱི་འདབ་འབྲེལ་གོང་མི་ཚད་ཡག་པོ་རེད་སོང་ཟེར་ཏེ་ལབ་དོན་ཞུ་དགོས་སྣང་ལ།

བསྟན་པ་སྔ་དར་ལ་ཆགས་བཞག་ན།བཅོམ་ལྡན་འདས་རྒྱལ་བ་ཤཱཀྱ་ཐུབ་པའི་བསྟན་པ།བསྟན་པ་བར་དར་ལ་ཆགས་ཆགས་ན།རྒྱལ་པོ་ལོང་རོང་བསྟན་པ་བོད་གངས་ཅན་ལ་ཕེབས་ནས་བཀའ་གདམས་པའི་བསྟན་པ།དར་ཚུལ་ཡང་ཞུ་མ་དགོས་སྣང། བསྟན་པ་ཕྱིར་དར་ལ་ཆགས་བཞག་ན།འཇམ་མགོན་བླ་མ་ཙོང་ཁ་པ་ཆེན་པོས་ཨ་མདོ་བྱང་ཆུབ་ཡུལ་དུ་ཤིང་མོ་གླང་གི་ལོ་ལ།ཡབ་ཤིང་རྟ་ཨ་ཆོས་དང་ཡུམ་ཀླུ་མོ་བཟང་མོ་གཉིས་ལ་སྐུ་བལྟམས་ནས།རྗེ་སྐུ་འབུམ་ཐང་ལ་གདན་འདྲེན་ཞུ།རྗེ་ཙོང་ཁ་པ་ཆེན་པོ་བོད་གངས་ཅན་ལ་ཕེབས་ནས་།རྗེ་ཙོང་ཁ་པ་ཆེན་པོས་དགའ་ལྡན་ཐེག་པ་ཆེན་པོའི་གླིང་བརྒྱབ།རི་བོ་རྩེ་ལ་ཉི་མ་ཤར་བ་ལྟ་བུ།བྱམས་ཅན་ཆོས་རྒྱལ་གྱིས་སེ་ར་བརྒྱབ།དབུ་ཐོག་ལ་སེར་བ་འབབ་པ་ལྟ་བུ།རྗེ་ཤེས་རབ་སེང་གེས་འབྲས་སྤངས་བརྒྱབ།སྤང་ཐོག་ལ་འབྲས་དཀར་འབབ་པ་ལྟ་བུ།རྗེ་ཤེས་རབ་སེང་གེས་རྒྱུད་སྨད་པ་བཏབས།རྗེ་མཚན་ཀུན་དོན་འགྲུབ་ཀྱིས་སྟོད་པ་བརྒྱབ།བོད་གངས་ཅན་ལ་འཇམ་མགོན་བླ་མ་ཙོང་ཁ་པོ་ཆེན་པོ་བསྟན་པ་ཞྭ་མོ་སེར་པོའི་བསྟན་པ་གྲིབ་མ་མེད་པ་གངས་ཅན་རི་ལ་ཉི་མ་ཤར་བ་ལྟ་བུ་དར་སྣང་ཟེར་ཏེ་ལབ་དོན་ཞུ་དགོས་སྣང་ལ།

གླིང་ཆེན་བཞིའི་ཆགས་ཚུལ་མདོ་ཙམ་ཞིག་ཞུ་ན། ཤར་དུ་ཨོ་རྒྱན་མཁའ་འགྲོ་གླིང་། ལྷོ་རི་འཛིན་པོ་ཏཱ་གླིང་། ནུབ་པད་མ་རྔ་གཡབ་གླིང་།བྱང་ནི་ཤམ་བྷ་གླིང་།གླིང་བཞིའི་ཆགས་ཚུལ་ཞིག་ཞུ་ན།གླིང་དང་པོ་རྒྱ་གར་ཡུལ་ལ་ཆགས།རྒྱ་གར་གྱི་མཐོ་རིས་ཕེབས་པ་ལྟ་བུ།ཆོས་རྟོགས་ཆེ་བའི་གནས་ཆགས།རྒྱ་ནག་ཡུལ་ལ་མེ་ཏོག་པད་མ་ཁ་ཕྱེ་བ་ལྟ་བུ། ངོ་མཚར་བའི་གནས་ཆགས།སོག་པོའི་ཡུལ་ལ་ཤེལ་རྟ་དབྱིབས་འདྲ་བ།འདོད་དགུ་ཆེ་བའི་གནས་ཆགས།བོད་གངས་ཅན་ལ་སྲིན་མོ་གན་རྐྱལ་སྟེང་ལ་ཆགས་པ་ལྟ་བུ།མི་རྣམས་བློ་རིག་རྒོད་པ་ཞིང་རྣམ་ཤེས་རྣོ་བའི་གནས་ཆགས།ས་ཆགས་ཀྱི་སྔ་བ་རྒྱ་གར་རྡོ་རྗེ་གདན།རྡོ་ཆགས་ཀྱི་སྔ་བ་ནོར་བུ་གླིང་ཁ།ཡུལ་ཆགས་ཀྱི་སྔ་བ་ནི་ལཱ་རཱ་ཎ་སཱི།ཆུའི་སྔ་བ་ཆུ་བོ་གང་གཱ མེའི་སྔ་བ་མེ་བོ་རི་ཆེན། བྱ་རིགས་སྔ་བ་མཁའ་ལྡིང་ཚངས་ཆེན། གཅན་གཟན་གྱི་སྔ་བ་གངས་ལ་སེང་གེདེའི་རྗེས་ལ་རྒྱ་ཞིང་ཆེན་བཅོ་བརྒྱད་བོད་ཁྲི་སྐོར་བཅུ་གསུམ་རེ་རེ་བཞིན་ཏུ་ཆགས་ལུགས་ཆགས་ཚུལ་ག་ཚོད་ཡོད་ནའང་ཚང་མ་ཞུ་རྒྱུ་ཡོད་པའི་གནས་ཚུལ་རེད་ལ་འདི་ན་ཕྲ་ཞིང་ཕྲ་བ། དྭངས་ཞིང་གསལ་བ་ཞུ་དགོས་པ་མི་སྣང་ཟེར་ཏེ་ལབ་དོན་ཞུ་དགོས་སྣང་ལ།

སྡེ་རོང་རྫོང་གི་ཆགས་ཚུལ་མདོ་བསྡུས་ཙམ་ཞིག་ཞུ་ན།སྔ་དང་མ་འདྲ་བ་ཏང་དང་སྲིད་ཇུས་བཟང་བའི་བཀའ་དྲིན་ལ།ཤར་རི་རྒྱ་ཏ་ཁྲ་མོ་ཐང་ལ་བདེ་བ་ལྟ་བུ།ལྷོ་རི་གཡུ་འབྲུག་སྔོན་པོ་གནམ་ལ་འཆོངས་པ་ལྟ་བུ།ནུབ་རི་མི་རྒྱ་དམར་པོ་གཤོག་པ་སྟབས་བ་ལྟ་བུ།བྱང་རི་ལྷ་ལུགས་སྐྱིད་པོ་ཐང་ལ་བདེ་བ་ལྟ་བུ།སྡེ་རོང་བྲག་སྤང་ལ་ཆགས་བཞག་ན།ཆགས་ཚུལ་མདོ་བསྡུས་ཙམ་ཞིག་ཞུ་ན།འབྲི་བརྒྱད་ལ་བཤད་ན།ཡ་ར་ཧ་ཆུང་མར་གྱིས་བཏབ་པ།འཇང་གླུ་དབྱངས་གངས་དཀར་ཡར་གྱིས་བཏབ་པ།གླིང་བརྒྱད་ལ་ཆགས་བཞག་ན།འོད་ཟེར་དཀར་འཛོམས་མར་གྱིས་བཏབ་པ།བལ་ཟུར་དཀར་ཁྲི་ཡར་གྱིས་བཏབ་པ།སྡེ་སྟོང་ཕྲག་གཅིག་དང་བདུན་རྒྱ་ལྷག་ཙམ་ཞིག་ནང་དུ་རེ་རེ་བཞིན་འགྲོ་གཞི་སྡོད་གནས་ཞུ་དགོས་ན་ཞུ་རྒྱུ་ཡོད་ལ་ཕྲ་ཞིང་ཕྲ་བ། གསལ་ཞིང་དྭངས་བ། གཅིག་ནས་གཉིས་མ་ལུས་པ་ཞུ་དགོས་པ་མི་སྣང་།

མི་ཚང་འདི་ལ་ཆགས་བཞག་ན།ཆགས་ལུགས་ཆགས་ཚུལ་མདོ་བསྡུས་ཙམ་ཞིག་ཞུ་དགོས་ན།དབུ་རྡོ་རིང་མགོ་རྟ་བཏགས་སྔ་བ།ཇོ་བོ་མགོ་ལ་བསིལ་ཡབ་འབུལ་སྔ་བ།རིན་པོ་ཆེ་ལ་གསེར་བྱུགས་སྔ་བ།རྒྱལ་པོའི་ཁྲུས་གཞོང་ནང་ལ་ཁྲུས་རྩ་སྔ་བ།ཤར་ཁང་པའི་ནང་དུ་ཐིག་བཏབ་སྔ་བ།རྐ་ནག་རིང་གི་ནང་དུ་ཆུ་ཁྲིད་སྔ་བ།ཞིང་བཟང་མོའི་ནང་དུ་རོལ་རྒྱང༼ལུད་རྒྱབ༽ སྔ་བ།མི་ཚང་འདི་ལ་ཆགས་བཞག་ན་ཕྲ་ཞིག་ཕྲ་བ།གསལ་ཞིང་དྭངས་བ་ག་ཚོད་བརྡ་ནའང་བརྡ་རྒྱུ་ཡོད་པའི་གནས་ཚུལ་ཞིག་རེད་ལ།མི་རྒན་རང་ལྟ་བུས་ཞུ་མི་དགོས་སྣང་།

ལུང་པ་ཕུ་བདེ་ན་མདའ་བདེ།།མཚོ་བདེ་ན་ཉ་ཆུང་བདེ།། མགོ་ལ་གངས་རི་དཀར་པོ་བདེ།། མདའ་ལ་མཆོད་རྟེན་དཀར་པོ་བདེ།།བར་ལ་རྒྱ་གྲོང་ཁྲ་མོ་བདེ།།རྒན་པོ་རྣམས་ཀྱི་ཆང་ར་བདེ།།མ་སྲུ་རྣམས་ཀྱི་ཇ་ར་བདེ།།བུ་ཆུང་རྣམས་ཀྱི་རྟ་ར་བདེ།།བུ་མོ་རྣམས་ཀྱི་ཐགས་ར་བདེ༎བུ་ཚ་རྣམས་ཀྱི་འཁྱམས་ར་བདེ༎ ཞབས་བྲོ་བརྒྱབ་པའི་མཁར་བདེ།།མགྲོན་ཆུང་འགྲོ་བའི་ལམ་བདེ།།གླུ་ཁ་རྒྱང་ལེན་པའི་སོ་བདེ།།

དེའི་རྗེས་ལ་དོ་ནུབ་འདིའི་ནང་དུ་དར་བཤད་མདོ་བསྡུས་ཙམ་ཞིག་བྱེད་ན།དར་དཀར་པོ་འབྱུང་འབྱུང་ག་ལ་འབྱུང་།།དར་དཀར་པོ་འབྱུང་འབྱུང་རྒྱ་ནག་མཐིལ་ནས་འབྱུང་།།རྒྱ་མོ་དར་ཐགས་ནང་བཏགས་པའི་དར།།ཚོང་དཔོན་ནོར་བུ་བཟང་པོས་སྒྲུབ་པའི་དར།།གཡུ་ལྗང་དྲེལ་གྱིས་ཁུར་པའི་དར།།ལག་རྡོ་བཟང་མོ་བཀལ་པའི་དར།།ལ་ཆེན་ལ་ཆུང་བརྒྱབ་པའི་དར།།ཆུ་ཆེན་ཆུ་ཆུང་བརྒལ་པའི་དར།།སྤང་དཀར་སྟོད་ལ་ཕུག་པའི་དར།།ང་བུ་བསོད་ནམས་ཅན་གྱི་ལག་ཏུ་འཕུལ་རོགས་བྱེད་རྒྱུ་དེ་ལ་བཀའ་དྲིན་ཤིན་ཏུ་ཆེ་སྣང་ཟེར་ཏེ་ལབ་དོན་ཞུ་དགོས་སྣང་།

དར་དཀར་པོ་དམར་པོ་སེར་པོ་གསུམ།།དར་དམར་པོ་བཏགས་ཆོག་ཚོན་ཁ་ཞན།།དར་སེར་པོ་བཏགས་ཆོག་གོང་ཐང་དམའ།།དར་བཏགས་ན་རྒྱ་དར་དཀར་པོ་བཏགས།།དར་མགོ་ལ་བཀྲ་ཤིས་རྟགས་བརྒྱད།།སྟེང་ཕྱོགས་ལྷ་གནས་སུམ་ཅུ་རྩ་གསུམ་བདེ་སྐྱིད་ལྡན་པའི་རྟེན་འབྲེལ།།དར་རྐེད་ལ་གཡུང་དྲུང་རི་མོ།།བོད་ཁྲི་སྐོར་བཅུ་གསུམ་བདེ་སྐྱིད་ལྡན་པའི་རྟེན་འབྲེལ།།དར་མཐར་ལ་རྒྱ་ནག་ལྕགས་རི།།རྒྱ་ཞིང་ཆེན་བཅོ་བརྒྱད་མཐར་སྐོར་པའི་རྟེན་འབྲེལ།།དར་དཀར་ཚར་ལོ་ཉི་ཟླ་སྐར་གསུམ་འཛོམས།།ཉི་མར་འདྲ་བ་དྲོད་འཇམ་ཆེ།།ཟླ་བར་འདྲ་བ་གསལ་ཆ་ཆེ།།སྐར་མར་འདྲ་བ་རྩིས་གྲངས་མང་།།དར་མར་བཏགས་གཙང་མོ་ཆུ་ལ་བཏགས།།ཆུ་ལ་ཉ་སྲམ་ལྕང་གསུམ་འཛོམས།།སྲམ་དཀར་དཀར་པོ་བྲག་སྲུབས་མཛེས།།གསེར་ཉ་སེར་པོ་གསེར་གཤོག་མཛེས།།ཆུ་བོ་སྔོན་མོ་ཡོན་ཆབ་བཤམས་པ་ལྟ་བུ།།དར་ཕར་བཏགས་དཀར་འཛོམས་བྲག་ལ་བཏགས།།བྲག་རྐེད་ལྷ་ཤུག་ཁུ་བྱུག་རྒོད་ཕྲུག་གསུམ།།ཐང་དཀར་རྒོད་ཕྲུག་གཤོག་རྩེའི་རྒྱན།།ལྷ་ཤིང་ཤུག་པ་དྲི་མ་ཞིམ།།ཁུ་བྱུག་སྔོན་མོ་གསུང་སྐད་སྙན།།དར་ཡར་བཏགས་ཨ་སྔོན་དགུང་ལ་བཏགས།།ཨ་སྔོན་དགུང་ལ་དར་བཏགས་མ་དགོས་སྣང་།།མི་མགོ་དགུང་ལས་མཐོ་བའི་རྟེན་འབྲེལ།།དར་ཕར་བཏགས་དཀར་འཛོམས་བྲག་ལ་བཏགས།།དཀར་འཛོམས་བྲག་ལ་དར་བཏགས་མ་དགོས་སྣང་།།མི་རྐང་བྲག་ལས་སྲ་བའི་རྟེན་འབྲེལ།།དར་མར་བཏགས་གཙང་མོ་ཆུ་ལ་བཏགས།།གཙང་མོ་ཆུ་ལ་དར་བཏགས་མ་དགོས་སྣང་།། མི་ཚེ་ཆུ་ལས་རིང་པའི་རྟེན་འབྲེལ།།དར་དཀར་པོ་ཚར་ལོ་དྲི་མེད་ཅན།། གོང་བླ་མ་རྣམས་ཀྱིས་བཏགས་ན་ཕུན་མདུད།།སྡེ་དཔོན་རྣམས་ཀྱིས་བཏགས་ན་དཔའ་དར།།བོན་སྔགས་འཆང་རྣམས་ཀྱིས་བཏགས་ན་སྲུང་མདུད།།ཕ་ཨ་ཁུ་རྣམས་ཀྱིས་བཏགས་ན་བཀྲ་ཤིས།མོ་མ་སྲུ་རྣམས་ཀྱིས་བཏགས་ན་གཡང་ཆགས།།བུ་ཚ་བུ་མོ་རྣམས་ཀྱིས་བཏགས་ན་ཚེ་རིང་།།བཀྲ་ཤིས་པའི་བཀྲ་ཤིས་ཁ་བཏགས།།

རྩོམ་སྒྲིག་པ། ཀླུ་མོ་མཚོ།

དཔྱད་མཆན 0 ཡོད།