རེབ་གོང་ས་ཆའི་དྲུག་པའི་ཀླུ་རོལ།

༤.jpg

༡.jpg 

ལོ་རེའི་ཧོར་ཟླ་དྲུག་པའི་ཚེས་བཅུ་བདུན་ཉིན་ནས་བཟུང་། མདོ་སྨད་ཡུལ་དུ་ཆེས་མིང་གྲགས་ཆེ་བའི་རེབ་གོང་སྲོལ་རྒྱུན་རིག་གནས་དུས་ཆེན་དྲུག་པའི་ཀླུ་རོལ་གྱི་དུས་ཆེན་དེ་སྔར་རྒྱུན་བཞིན་ས་དཀྱིལ་སྡེ་བ་ནས་མགོ་བརྩམས་ཤིང་སྡེ་བ་སོ་སོ་ནས་བསྟུན་མར་སྤེལ་ལ་ཚེས་ཉེར་དྲུག་ཉིན་མཇུག་རྫོགས་པ་རེད། རེབ་གོང་ས་ཁུལ་གྱི་དྲུག་པའི་ཀླུ་རོལ་འདི་ནི་བོད་ཁུལ་གྱི་ས་ཆ་གཞན་པར་མཐོང་དཀོན་པའི་དམངས་ཁྲོད་ཀྱི་དུས་ཆེན་ཁྱད་པར་བ་ཞིག་གམ་བོད་ཀྱི་གདོད་མའི་སྤྱི་ཚོགས་ཀྱི་ཤེས་རིག་དང་དངོས་ཡོད་འཚོ་བའི་གྲུབ་ཆ་གལ་ཆེན་ཞིག་རེད། ཀླུ་རོལ་ལས་མངོན་པའི་ངོ་མཚར་ཞིང་ཡིད་དབང་འཕྲོག་པའི་རྩེད་མོའི་རྣམ་པ་དང་། ཐུན་མོང་མ་ཡིན་པའི་སྲོལ་རྒྱུན་ཤེས་རིག་གི་མཛེས་ཆོས། ལུས་ཀྱི་ཉམས་འགྱུར། འཁར་རྔའི་སྒྲ་གདངས། ལོ་རྒྱུས་ཀྱི་རྒྱབ་ལྗོངས་སོགས་ལས་བོད་ཀྱི་གདོད་མའི་ཤེས་རིག་གི་ཉིང་བཅུད་མཚོན་ནུས་སྟབས་རྒྱལ་ཁབ་ཕྱི་ནང་ཀུན་གྱི་ཞིབ་འཇུག་པ་དང་མགྲོན་པོ་མང་པོ་ཞིག་དུས་ལྟར་ཀླུ་རོལ་གྱི་དུས་ཆེན་འདིར་ཞུགས་ནས་རྒྱུས་ལོན་དང་ཞིབ་འཇུག་བྱེད་ཀྱིན་ཡོད།

༢.jpg

༣.jpg

རེབ་གོང་པ་རྣམས་དུས་སྟོན་རོལ་རྩེད་དེ་ལ་དགའ་ཞེན་ཆེན་པོ་ཡོད་ཅིང་།མི་རྣམས་ཀྱིས་རེབ་གོང་དྲུག་པའི་ཀླུ་རོལ་ནི།ཕོ་གསར་དང་མོ་གསར་རྩེ་ས།དཀར་བསང་དང་དམར་བསང་ཕུད་ས།ལྷ་རྩེ་དང་ཀླུ་རྩེ་བྱེད་ས། གླུ་ལེན་དང་གར་རྩེ་བྱེད་ས།ཞེས་དང་།དྲུག་པའི་ཀླུ་རོལ་ཕན་ལ་གོས་མི་གོན།།རྒྱ་ལོའི་ཚེས་གཅིག་ཕན་ལ་ཟས་མི་ཟ།།ཞེས་དང་།དྲུག་པའི་ལྷ་ཟླ་དཀར་པོ།ཡོད་པོས་བརྒྱ་འབུལ་སྟོང་འབུལ།མིད་པོས་མི་ཏོག་མཆོད་འབུལ།རྩེད་རིག་རྣམ་པ་སྣ་ཚོགས།རྩེ་སྣ་མ་ཚང་མིད་པ།བལྟས་ན་མི་མགུ་མིད་པ།མྱི་དགའ་དང་ལྷ་དགའ།ཞེས་པ་སོགས་ཀྱིས་མངོན་པར་མཚོན།

༧.jpg

༥.jpg

ཀླུ་རོལ་གྱི་མི་སྣ་གཙོ་བོ་ལྷ་པ་ནི་གནའ་ནས་རང་གི་རིགས་རུས་ཀྱི་སྟེང་ནས་ལྷ་རྒྱུད་ཡོད་པ་ཞིག་ཡིན་དགོས།རང་གི་ཕ་མིས་གང་རུང་ཞིག་དགུང་ལོ་མཐོ་རུ་ཕྱིན་པ་སོགས་ཀྱི་རྐྱེན་གྱིས་ལྷ་པའི་ལས་གནས་སྤོ་དགོས་ན།སྤྲུལ་སྐུ་ཞིག་ལ་དགོངས་པ་ཞུས་ཏེ་དེས་བུ་དང་ཚ་བོར་ལྷ་སྒོ་ཕྱེས་ནས་ལྷ་པར་ཐག་གཅོད་པ་ཡིན།དེ་ལྟར་མ་བྱས་ཚེ་ལྷའི་ཚབ་ཏུ་འདྲེ་བདུད་སོགས་ཁོག་ཏུ་ཞུགས་ཏེ་འབབ་པའི་སྣང་ཚུལ་ཡང་མཐོང་རྒྱུ་ཡོད།ལྷ་པ་གསར་པ་ཞིག་འདེམ་དགོས་པ་བྱུང་ན་དམག་དཔོན་ཁང་དུ་སྡེ་བའི་སྐྱེས་པ་ལོ་བཅོ་ལྔའི་ཡན་དང་ལོ་ཞེ་བརྒྱད་མན་རྣམས་ནང་དུ་བཀག་སྟེ་ཉིན་འགར་བསྐང་བ་སོགས་ཀྱི་རིམ་གྲོ་དང་བསང་མཆོད་བྱས་ཚེ་སྐྱེས་པ་རེ་ཟུང་གི་ལུས་པོ་འདར་བ་སོགས་ཀྱིས་ལྷ་དངོས་སུ་བབས་ཀྱང་དམག་དཔོན་ཁང་གི་སྒོའི་ཐེམ་ནས་ལྡིང་སྟེ་ནང་དུ་འགྲོ་མ་ཐུབ་ན་ལྷ་པ་དངོས་ཀྱི་གྲས་སུ་མི་བརྩི།ལྷ་པ་འགའ་རེ་བླ་མ་ག་གེ་མོ་ཞིག་གིས་ཐད་ཀར་ལྷ་སྒོ་ཕྱེས་པའང་ཡོད།རྟགས་ཅི་རིགས་ཐོན་ཞིང་ལྷ་པར་རུང་བ་ཞིག་ཡིན་ན།རྩ་བའི་བླ་མའི་མདུན་ནས་ཆོ་ག་ཅི་ཚང་སྒོས་ལྷ་ཕབ་པ་ལས་མི་གང་ཡིན་ལྷ་པར་མི་རུང་།བླ་མས་ལྷ་སྒོ་ཕྱེས་རྗེས་ལྷ་པ་རང་ཉིད་དངོས་སུ་ལྷ་བབ་ཆོག་ལ་འཇིག་རྟེན་གྱི་མངོན་ལྐོག་ཏུ་གྱུར་པའི་དོན་དག་གང་ཡང་ལུང་དུ་བསྟན་ཆོག

༦.jpg

༨.jpg

 ཀླུ་རོལ་རྩེ་བའི་དུས་ཆད་ཀྱི་ཆ་ནས་གཙོ་བོ་རིགས་གཉིས་ཡོད།རེབ་གོང་སྟོད་སྨད་གཉིས་སུ་ཕྱེ་བའི་སྟོད་ཕྱོགས་ཀྱི་སྡེ་བ་རྣམས་ལ་མཚོན་ན་རྒྱ་ལོའི་ཚེས་གཅིག་ནས་ཉི་ཤུ་བར་ཡིན་ལ།སྨད་ཕྱོགས་ཀྱི་སྡེ་བར་མཚོན་ན་དྲུག་པའི་ལྷ་ཟླ་དཀར་པོ་ཞེས་དབྱར་ཟླ་དྲུག་པའི་ཚེས་བཅོ་ལྔ་ནས་ཉི་ཤུ་རྩ་དྲུག་བར་ཡིན།  དེའི་ནང་ནས་སྨད་ཕྱོགས་སུ་གཏོགས་པའི་ས་དཀྱིལ་སྡེ་བའི་ཀླུ་རོལ་གླེང་ན།ལོ་རེའི་ཧོར་ཟླ་དྲུག་པའི་ཚེས་བཅུ་བདུན་ཉིན་ལ་ས་དཀྱིལ་སྟེང་འོག་གི་སྐྱེས་པ་ཚོས་ལུས་ལ་ཕྲུག་ལྭ་གྱོན་པ་དང་།སྟོད་གོས་བོད་བཟོ་བྲང་ཅན་གྱི་མཐའ་ལ་རྒྱ་འབྲུག་གིས་བརྒྱན་པ་དང་།སྐེ་ལ་གའུ་འདོགས་པ།རྐང་བར་ཧ་སག་དང་ཆུ་ཕྲུག་བརྒྱབ་པའི་འབོལ་རས་སྣེ་འཁྱིལ་གྱོན་པ།ཁྱད་པར་མགོ་ལ་ཨ་མྱེས་བྱ་ཁྱུང་གི་དབུ་ཞྭའི་དབྱིབས་ཅན་གྱི་ཕྱིང་ཞྭ་དཀར་པོ་ལ་ཐུར་དུ་དཔྱངས་པའི་ཅ་ལ་དམར་པོ་སྟར་བ་དེ་འདྲ་ཞིག་གོན་ནས་གཟབ་འཕྱོར་ལེགས་པར་སྤྲས་ཏེ།ཉི་རྩེ་ས་ལ་ཕོག་པའི་ཚེ་ཡུལ་ལྷའི་རྒྱལ་པོ་བྱ་ཁྱུང་གི་གནས་ཁང་དུ་འདུས་ནས་དེའི་ཕྱོགས་བཞི་ལ་སྟག་སེང་ཁྱུང་འབྲུག་གི་དམར་དར་བཞི་བསྒྲེངས་ཏེ་ལྷ་བསང་ཆེན་པོ་བཏང་ནས།  འབུད་རྡུང་དཀྲོལ་གསུམ་གྱི་རོལ་ཆ་དང་བསྟུན་ནས་མཆོད་པ་རྒྱ་ཆེན་པོ་བྱས་པའི་ཚེ།ཨ་མྱེས་བྱ་ཁྱུང་སྐུ་རྟེན་གྱི་ལུས་ཁོག་ཏུ་ཞུགས་པར་བྱེད།དེ་ནས་སྐུ་རྟེན་གྱིས་ལྷ་རྩེད་བྱེད་པ་དང་ལྷ་སྐད་གསུངས་ལ།སྟག་ཤར་ཚོས་བྱ་ཁྱུང་གི་མཛད་པ་རྣམ་ལྔའི་ཐང་ག་དང་།སྟག་སེང་ཁྱུང་འབྲུག་གི་དམག་དར་སྣ་ཚོགས།མདའ་མདུང་གྲི་གསུམ་གྱི་མཚོན་ཆ་སྣ་ཚོགས་འཕྱར་ཏེ་དམག་ལ་ཆས་པའི་སྟབས་ཀྱིས་བེ་ཧའི་གར་གྱིས་མཆོད་པ་ལན་གཅིག་འགྲོ་བ་དང་། སྟག་ཤ་ར་བཞིས་བྱ་ཁྱུང་གི་ལྷ་སྒམ་བཏེགས་ཏེ་ལྡིང་སྐོར་གྱིས་ལྷ་རྔ་ཐོགས་པའི་ལྷ་པ་དང་ལྷ་ཕྲུག་གི་རྗེས་འབྲངས་ཤིང་།གསར་བུ་རྣམས་ཀྱང་དེའི་རྗེས་དེད་དེ་གར་སྟབས་སྒྱུར་བཞིན་ཁྱིམ་ཚང་གཅིག་ཀྱང་མ་ལུས་པར་ལྷ་སྒམ་གདན་འདྲེན་ཞུ་དགོས།དེས་ཁྱིམ་དེའི་ལོ་གཅིག་གི་བར་ཆད་སེལ་བའི་ཡིད་ཆེས་བྱེད་པར་མ་ཟད།ནང་སྡེར་འཁྲུག་པ་སློང་མཁན་དང་།རྡུང་རེས་བྱེད་མཁན།ནང་མཐུན་མི་འོང་བའི་བཟའ་ཚང་བཅས་ལ་བཀའ་ཆད་དང་འདུམ་འགྲིག་ཡང་བྱེད་པ་ཡིན།དེ་ལྟར་དུད་ཁྱིམ་མ་ལུས་པར་གདན་འདྲེན་ཞུས་ཚར་རྗེས།སྔ་མ་ལྟར་ལྷ་རྩེ་རྩེད་ཞོར་ཕྱིར་ཕོ་བྲང་དུ་སོང་ནས་སང་ཉིན་གྱི་སྔོན་འགྲོ་ཚང་བར་བྱས་ནས་མཇུག་རྫོགས་པ་ཞིག་ཡིན།

༡༠.jpg

༩.jpg

 ས་དཀྱིལ་སྟེང་འོག་གི་ཀླུ་རོལ་རྩེད་སྟངས་ཀྱི་རིགས་རྣམས་གོ་རིམ་ལྟར་བྲིས་ན།སྐྱེས་པ་རྣམས་ཀྱི་བེ་ཧའི་གར་དང་ཕྱོགས་བཞིའི་བཀུར་སྟི།སྐྱེས་པའི་གར་སྟབས་ཀྱི་མཆོད་པ།སྐྱེས་མའི་གར་སྟབས་ཀྱི་མཆོད་པ།དགའ་བའི་རྩེད་འཇོ་སྣ་ཚོགས། སྟག་གཟིག་གི་གདོང་བ་དང་རྐང་ཤིང་གཉིས་ཀྱི་བེར་ཀའི་མཆོད་པ།ཨ་ཙ་རའི་བེར་ཀའི་མཆོད་པ།ཀི་བསྭོ་ཁ་གཡང་གི་རྩེད་འཇོ།རྔ་རྡུང་ལྷ་ངོམ་གྱི་མཆོད་པ།ཕོ་མོ་མཉམ་འཛོམས་སྒོས་ཐུགས་རྗེ་ཆེན་པོའི་ཕྱོགས་བཞིའི་གར་གྱི་མཆོད་པ།སྐྱེས་པའི་དམར་པོ་ཁྲག་གི་མཆོད་པ།ཀུ་རེ་རྩེད་འཇོའི་མཆོད་པ།རི་གླུའི་མཆོད་པ།ཡུལ་ལྷ་དང་ཞང་ལྷ་གཉིས་ཐུགས་ཤིན་ཏུ་དགྱེས་པའི་མཚོན་བྱེད་དུ་མི་གཉིས་ལྷའི་རྣམ་པར་རྩེ་བའི་མཆོད་པ།སླར་ཡང་ཐུགས་རྗེ་ཆེན་པོ་ཕེབས་སྟངས་ཀྱི་མཆོད་པས་རིག་རྩལ་གྱི་མཇུག་བསྡུ་བ་ཡིན།

༡༢.jpg

༡༡.jpg

རེབ་གོང་དྲུག་པའི་ཀླུ་རོལ་གྱི་རྩེད་སྟངས་དང་རིགས་ཀྱི་ཆ་ནས་དབྱེ་ན་ལྷ་རྩེད་དང་ཀླུ་རྩེད། སྐྱེས་མའི་གར་སོགས་མང་པོ་ཡོད་དེ། གཤམ་དུ་རེ་རེ་བཞིན་རགས་ཙམ་བརྗོད་པ་འདི་ལྟ་སྟེ། 

1 མིང་འདོགས་སྟངས།

དྲུག་པའི་ཀླུ་རོལ་གྱི་མིང་འདོགས་སྟངས་ལ་མཁས་པ་སོ་སོའི་བཞེད་ཚུལ་མི་འདྲ་བ་ཡོད་དེ། བཤད་ཚུལ་གཅིག་ནི་རེབ་གོང་གི“དྲུག་པའི་ལྷ་ཟླ་ཆེན་མོ”ཞེས་པའི་དམངས་ཁྲོད་སྲོལ་རྒྱུན་མཆོད་པའི་དུས་ཆེན་འདི་ནི་སྣ་མང་ཕུན་སུམ་ཚོགས་པའི་མཆོད་པ་དང་རྩེད་མོ་བརྒྱུད་ནས་ལྷ་ཀླུ་གཉན་གསུམ་དགྱེས་པར་བྱེད་པའི་ཆོ་ག་ཁྱད་པར་བ་ཞིག་ཡིན་པས་དྲུག་པའི་ཀླུ་རོལ་ཞེས་ཟེར་བ་ཡིན།

ཡང་བཤད་ཚུལ་གཅིག་ལ། དབྱར་ཟླ་དྲུག་པ་ནི་མདོ་སྨད་ལྷོ་རྒྱུད་འཛིན་མའི་གཞི་རུ་ལོ་ཏོག་དང་ཤིང་འབྲས་སྣ་ཚོགས་རབ་ཏུ་སྨིན་པའི་སྒང་ཡིན་ལ། དུས་སྐབས་དེར་རེབ་གོང་ཡར་ནང་མར་ནང་གཙོ་བྱས་པའི་ས་གནས་མང་ཤས་སུ་དབྱར་གྱི་སྤྲོ་གསེང་སྤེལ་ཏེ་བོད་རང་གི་ཁྱད་ཆོས་ལྡན་པའི་གླུ་ལེན་རྩེད་མོ་སྣ་ཚོགས་ལ་དགྱེས་དགུར་རོལ་བའི་དཔེ་ཡོད་ཅིང་། སྐྱེས་ཕོ་མོ་ཀུན་གྱིས་ལུས་ལ་གཟབ་མཆོར་ཕུན་སུམ་ཚོགས་པར་སྤྲས་ནས། དགའ་བའི་གླུ་དང་སྐྱིད་པའི་བྲོ་འཁྲབ་པའི་གོམས་སྲོལ་མ་ཉམས་པར་ཡོད་པས་གླུ་རོལ་ཞེས་འབྲི་བ་ཡང་ཡོད།

༡༤.jpg

2  ལྷ་རྩེད།

ལྷ་རྩེད་ནི་རྩེད་མོ་བ་སྐྱེས་བུ་དར་མ་དག་གིས་ལག་ཏུ་ལྷ་རྔ་བཟུང་སྟེ་གཡས་འཁོར་གཡོན་འཁོར་གྱིས་ཉིས་རྡུང་དང་སུམ་རྡུང་དགུ་རྡུང་ལ་སོགས་སྟངས་སྟབས་སྣ་ཚོགས་པའི་ལྷ་རྩེད་རྩེ་ཞོར་རྒྱབ་གཞུང་དང་ཁ་འགྲམ་ལ་ལྕགས་ཐུར་ལྟ་བུའི་འབིག་ཁབ་འཛེར་ནས་ཡུལ་ལྷ་གཞི་བདག་ལ་ཤ་ཁྲག་གི་མཆོད་པ་ཕུལ་ཏེ།  ལྷ་རྣམས་མཉེས་པར་བྱེད་པའི་རྩེད་མོའི་རིགས་ཤིག་ཡིན།

3  ཀླུ་རྩེད།

ཀླུ་རྩེད་ནི་རྩེད་མོ་བ་རྣམས་ཀྱིས་རུ་སྐོར་བསྒྲིགས་ཏེ་ཀླུ་ལ་ཇ་ཆང་གིས་མཆོད་པ་དང་། འཁར་རྔ་རྡུང་བའི་འགྲོས་དང་བསྟུན་ནས་སྟག་ཤར་གཞོན་ནུ་མང་བོ་གྲལ་ཕྲེང་བསྒྲིགས་ཤིང་རྐང་ལག་གི་སྟངས་སྟབས་གར་དུ་སྒྱུར་བཞིན་རྩེ་བ་དང་། སྨན་ཤར་ན་ཆུང་བུ་མོ་རྣམས་ཀྱིས་ལུས་སུ་གོས་ལྭ་ཕྲུག་ལྭ་གྱོན་ཞིང་རྒྱབ་ཏུ་དངུལ་གྱི་དུང་ཙེ་བཏགས་ནས་གཡུ་བྱུ་རུའི་སྐེ་རྒྱན་དང་གསེར་དངུལ་གྱི་རྒྱན་ཆ་གང་འཚམས་སྤྲས་ནས་གཟབ་མཆོར་གྱི་ཉམས་དང་བཅས་ཁེར་གཤར་ཉིས་གཤར་གྱིས་སྒེག་ཉམས་བཏོད་བཞིན་ཀླུ་རིགས་ལ་ཡིད་འོང་གི་མཆོད་པ་འབུལ་བར་བྱེད་ཅིང་། རྩེད་མོར་ཞུགས་མཁན་མང་ཆེ་བས་དྲི་མེད་ཀྱི་ཁ་བཏགས་མགུལ་དུ་འཕངས་ནས། ཞོ་དང་འོ་མའི་མཆོད་པ། སིལ་ཏོག་དང་མེ་ཏོག་གི་མཆོད་པ། ལོ་འབྲས་དང་ཤིང་ཏོག་གི་མཆོད་པ། བདུག་སྤོས་དང་བསང་རྫས་ཀྱི་མཆོད་པ་སོགས་དམར་མ་འདྲེས་པའི་མཆོད་པ་རྒྱ་ཆེན་པོ་བཤམས་པའི་ཞོར་དུ་ཀླུའི་ཆ་བྱད་ཀྱི་རྩེད་མོ་སྣ་ཚོགས་རྩེ་རྒྱུ་ཡོད།

༡༣.jpg

4 དམག་རྩེད།

དམག་རྩེད་ནི་བོད་བཙན་པོའི་སྐབས་ཀྱི་དམག་ཞུགས་ཀྱི་ལོ་ཚོད་ལྟར།  ལོ་བཅོ་ལྔ་ནས་བཞི་བཅུའི་བར་གྱི་སྐྱེས་པ་དག་གིས་ལག་ཏུ་དམག་དར་འཛིན་པ་དང་ཨེ་ཧ་ཨེ་ཨེ་ཨེ་ཞེས་ཀི་རིང་འདེབས་པ། གཡས་འཁོར་གཡོན་འཁོར་གྱིས་བརྗིད་ཉམས་དང་སྒེག་ཉམས་དོད་ནས་རྩེ་བ་དང་།  གོས་དར་ནམ་མཁར་འཕྱར་ནས་རྩེ་བ།  ན་གཞོན་རྩེད་མོ་བ་རྣམས་ཁག་གཉིས་སུ་བགོས་ནས་ཕྱིར་བཀྱེད་ནང་རུབ་བྱེད་བཞིན་རྩེ་བ། རྔོན་རྒྱག་པའི་ཉམས་དང་སྟག་མཆོང་བའི་ཉམས།  བྲེ་སེར་འབྲོང་རྒོད་འགྱིང་བའི་ཉམས་བཅས་ངོམ་ནས་རྩེ་ལ།  ད་དུང་ཞིང་འདེབས་པའི་ཚུལ་དང་རྒད་མོ་རྒན་མོ།  ཨ་མ་ཀླུ་མོ། ཐུགས་རྗེ་ཆེན་པོའི་གར་སོགས་འཁྲབ་བཞིན་དུས་སྟོན་ལ་དགྱེས་དགུར་རོལ་ལོ། །

དོན་དངོས་ཀྱི་ལོ་རྒྱུས་ལ་སྦྱར་ན། དུས་སྟོན་དེ་ནི་སྔོན་ཁྲི་རལ་བ་ཅན་གྱི་སྐབས་སུ་རྒྱ་བོད་འཁྲུག་མཚམས་བཞག་ནས་ཞོད་འཇགས་ཀྱི་ཆབ་སྲིད་བསྐྱངས་པར་འདུམ་འགྲིག་མཛད་དེ་བཀའ་གཙིགས་རྡོ་རིང་བཙུགས་ཤིང་། ཞི་བདེའི་འཚོ་བར་སྨོན་པའི་མཐའ་སྲུང་དམག་དང་མི་དམངས་མང་ཚོགས་རྣམས་དགའ་བ་དཔག་ཏུ་མེད་པ་འཕེལ་ནས་ལག་ཏུ་མདའ་མདུང་གྲི་གསུམ་དང་རུ་དར་སྣ་ཚོགས་ཐོགས་ཏེ།  དུང་འབུད་པ་དང་རྔ་རྡུང་བ་སོགས་ཀྱིས་ལྷ་ཀླུ་གཉན་གསུམ་དགྱེས་པའི་རྩེད་མོ་སྣ་ཚོགས་འཁྲབ་ཅིང་།  གླུ་ལེན་གར་རྩེན་སོགས་ཡུན་རིང་བྱུང་མ་མྱོང་བའི་སྟོན་མོའི་མཛད་སྒོ་རྒྱ་ཆེན་བསྡུས་པ་ལས་རིམ་བཞིན་དེང་གི་ལྷ་རྩེད་དང་ཀླུ་རྩེད། དམག་རྩེད་བཅས་དར་བར་བཤད་དོ། །

༡༥.jpg

5 རྐང་ཤིང་། 

རྐང་ཤིང་ནི་ཆ་བྱད་རྫོགས་པའི་གསར་བུ་གཉིས་རིང་ཚད་ལ་འདོམ་གང་ཙམ་ཡོད་ཅིང་། སྟག་དང་གཟིག་གི་རི་མོ་ཕབ་པའི་རྐང་ཤིང་སྟེང་བུད་དེ་རྩེ་བ་ཞིག་ཡིན་ལ། རྩེད་དུས་ལག་ཏུ་དབྱུག་པ་མཚོན་རིང་ཅན་དང་མདུང་རྩེ་གསུམ་ཅན། ལྷ་རྔ་འབྲུག་རིང་ཅན། ཅ་ལ(རལ་བ་རྫུན་མ)རེ་བཟུང་ནས་དམག་དཔོན་ཁང་གི་གྲུ་བཞི་བོར་ཕག་སྒུར་བ་ཡིན། ངག་རྒྱུན་དུ་རྒྱ་བོད་འདུམ་འགྲིག་གི་སྟོན་མོ་རྒྱ་ཆེན་བཤམས་ཏེ་གླུ་གར་ལ་རོལ་བའི་སྐབས། དར་རྒྱལ་གཡུ་མཚོ་ལས་སྟག་མགོ་ཅན་དང་གཟིག་མགོ་ཅན་གཉིས་བྱོན་ཏེ། དེ་གཉིས་རྐང་ཤིང་ལ་བུད་དེ་གླུ་གར་ལ་རོལ་བས། རྗེས་སོར་མང་ཚོགས་དང་འཁོར་འབངས་ཐམས་ཅད་ཀྱིས་དེ་དྲན་གསོ་ཡི་ཚུལ་དུ་རྐང་ཤིང་ཞེས་པ་འདི་བྱུང་བ་རེད།

6 ཨ་ཙ་ར།

ཨ་ཙ་ར། འདི་ནི་བྱིས་པ་ཆུང་ཆུང་ལྡེམ་མྱུར་ལྡན་པ་གཉིས་རྩེད་དགོས་ལ། དེ་གཉིས་ཀྱིས་དེང་སྐབས་ཞལ་ཐང་སོགས་ན་མཐོང་རྒྱུ་ཡོད་པའི་མིག་གཉིས་འབུར་ཚུགས་སུ་མངོན་ཞིང་། ཐོད་པ་འབུར་བ། རལ་བ་དཀར་པོ་ཡིན་པའི་ཆ་བྱད་ཅན། རྐང་བ་དང་ལག་པར་སིལ་སྙན་གྱི་གདུ་བུ་འདོགས་པ། ལུས་ལ་འཕུར་ལྭ་གྱོན་པ། ལག་ཏུ་དབྱུ་གུ་མཚོན་རིས་ཅན་ཐོགས་པའི་ཆ་བྱད་སྟོན་ལ། ལག་ནས་དབྱུ་གུ་བསྐོར་བ་དང་། དབྱུ་གུ་ལག་ཏུ་བཟུང་སྟེ་དེའི་ཐོག་ནས་ལྡིང་བ་སོགས་གཙོ་བོ་ལུས་ཀྱི་ལྡེམ་མྱུར་གྱི་ཆ་སྟོན་པའི་རྩེད་མོ་ཞིག་ཡིན། ཨ་ཙ་ར་ཞེས་དེབ་ཐེར་དག་ལས་རྒྱ་གར་བའི་མི་རིགས་ཤིག་ཡིན་ལ། དེར་མ་ཟད་རིགས་འདི་ཚེ་ལོ་རིང་ཞིང་དཔལ་འབྱོར་རྒྱས་པ་ཞིག་ཀྱང་ཡིན་པར་བཞེད། དེ་བས་ཀླུ་རོལ་གྱི་མཛད་སྒོ་འདི་བཀྲ་ཤིས་པ་མཚོན་པའི་དགའ་སྟོན་ཞིག་ཡིན་པས། ཨ་ཙ་རའི་རྩེད་མོ་འདི་ཡང་ཡུལ་ཕྱོགས་ཐམས་ཅད་ལ་ཚེ་རིང་ནད་མེད། དཔལ་དང་ལོངས་སྤྱོད་རྒྱས་ཤིང་བཀྲ་ཤིས་བདེ་ལེགས་འབྱུང་བའི་མཚོན་བྱེད་ཅིག་ཡིན།

༡༧.jpg

7 སྐྱེས་མའི་གར།

སྐྱེས་མའི་གར། འདི་ནི་བུ་མོ་ཚོས་སྐྲ་ལྷོད་སླས་བྱས་ནས་མ་གདན་བཏགས་ཡོད་པ་དང་། མ་གདན་སྟེང་གོས་སྣ་ཚོགས་ཀྱི་འཇའ་དྲུག་འཐེན་ཡོད་ལ། མ་གདན་གྱི་མགོ་དཀྱིལ་ལ་བྱུ་རུའི་ཕྲ་བརྒྱབ་པའི་དངུལ་སྡོང་ཉིས་སྒྲིག་གིས་ཐུར་དུ་དཔྱངས་ཡོད། རྣ་འགྲམ་གཡས་གཡོན་དུ་བྱུ་རུའི་ཕྲེང་རྒྱན་བཏགས་ནས། ལག་པ་གཉིས་ཀ་སྔོན་ལ་བསྲིངས་ཏེ་མཐོ་དམའ་རན་པར་དོད་ཅིང་། ལག་ཏུ་ཁ་བཏགས་དང་མེ་ཏོག་བཟུང་སྟེ། མཁར་རྔའི་སྒྲ་དང་བསྟུན་ནས་རྩེ། རྩེད་སྟངས་ལས་ཐང་བོད་དམག་འཁྲུག་གི་སྐབས་སུ་དམག་མི་རྣམས་དམག་འཁྲུག་ལ་སོང་ནས་ཕྱིར་ལོག་ཚེ། ཁོ་མོ་ཚོས་གཡུལ་ལས་རྒྱལ་བའི་དམག་མི་རྣམས་ལ་དགའ་བསུ་དང་སྔོན་ལ་བུད་དེ་བསུ་མ་བྱེད་པ་ཡིན་པར་སྣང་།

8 ཐུགས་རྗེ་ཆེན་པོ།

ཐུགས་རྗེ་ཆེན་པོ་ནི་ཕོ་མོ་མཉམ་དུ་བསྲེས་ནས་རྩེ་བ་ཞིག་ཡིན་ལ། དེའི་རྩེད་སྟངས་ནི་རྩེད་མཁན་རྣམས་ཀྱིས་འཁར་རྔ་བརྡུངས་མཁན་གྱི་སྒྲ་དང་བསྟུན་ནས་ལག་པ་གཡས་གཡོན་བརྗེ་རེས་བྱས་ཏེ་ཡར་བཀྱགས་ནས་རྩེ་བ་དང་། ལག་པ་གཉིས་ཀ་ཡར་བཀྱགས་ནས་རྩེ་བ་དང་། ལག་པ་གཉིས་ཀ་གཡས་གཡོན་དུ་གཡུགས་ནས་རྩེ་ལ། དམག་དཔོན་ཁང་གི་གྲུ་རེ་ནས་ལུས་པོ་ལྷེམ་ཅིང་ལག་པ་མདུན་དུ་བསྲིངས་ནས་བསུ་མ་བྱེད་པའི་རྣམ་པ། མཚམས་རེར་སྐྱེས་པ་དག་གིས་དུང་འབུད་པ་བཅས་བྱེད་པའི་རྩེད་སྟངས་ཞིག་ཡིན། རྩེད་སྟངས་འདིའི་མིང་འདོགས་ཚུལ་དང་རྩེད་སྟངས་ཀྱི་ཉམས་དོད་སྟངས་ལས་དོན་བཟང་པོ་ཞིག་ལ་བསུ་མ་མཛད་པའི་རྣམ་པ་ཞིག་དང་ཐུགས་རྗེ་ཆེ་ཞུ་བའི་ཚུལ་ཞིག་རེད། 

༡༦.jpg

9  ཁ་ཕུག་པ་དང་ཚོན་རྒྱག་པ།

ཁ་ཕུག་པ་དང་ཚོན་རྒྱག་པ། རྒྱབ་ཕུག་པ་བཅས་ནི་སྡེ་བའི་ནང་གི་ཕོ་ལོ་ཉེར་ལྔ་ནས་སོ་ལྔའི་བར་གྱི་སྐྱེས་པ་དར་མ་རྣམས་ལ་ལྕགས་ཁབ་རྣོན་པོའི་སྣེ་མོར་གོས་སྐུད་དམར་སེར་གྱིས་བརྒྱན་པ་དག་གིས་ཁའི་གཡས་གཡོན་གྱི་འགྲམ་པ་དང་རྒྱབ་ཕུག་པ་དང་མགོ་ལ་ཕྱིང་ཞྭ་གྱོན་པ། ལག་ཏུ་ལྷ་རྔ་བཟུང་ནས་ལྷ་རྔའི་སྒྲ་དང་བསྟུན་ནས་རྩེད་པ་ཞིག་ཡིན། ངག་རྒྱུན་དུ་ཆོ་ག་འདི་ནི་སྐྱེས་ལྷ་ཨ་མྱེས་སྟག་ལུང་གི་ཆོ་ག་ཡིན་པར་བཤད། ཁ་ཕུག་ན་ཉེས་པ་ཐམས་ཅད་ཁ་ནས་འབྱུང་བའི་སྒོ་གཅོད་བྱེད་ལྟ་བུ་ཡིན་པར་བཤད་ལ། རྒྱབ་ལ་འཛེར་ནའང་རང་ལུས་ལ་ན་ཚ་སོགས་མི་འདོད་པའི་རྐྱེན་ངན་མི་འབྱུང་བར་བཤད།

10 དམར་མཆོད། 

དམར་མཆོད་ནི་ཚེས་ཉེར་ལྔའི་ཉིན་གྱི་ཁྱད་པར་བའི་རྩེད་སྟངས་ཤིག་ཡིན་ལ། རྩེད་རིགས་པ་འགའི་ལག་ཏུ་གྲི་དང་ཐག་པ་བཟུང་ཏེ་འཁར་རྔ་དང་ལྷ་རྔའི་སྒྲ་དང་བསྟུན་ནས་འཇིགས་རུང་གི་ཉམས་སྟོན་ཅིང་། ལག་གི་རལ་གྲིས་ར་མའི་སྐེ་བཅད་ནས། ནང་ཁྲོལ་དེ་ཁྲག་དམར་ཙར་ཙར་ཏུ་བསང་མགོར་ཕུད། དེའི་ཁྲག་རྩེད་རིགས་པ་ཚོའི་ཐོད་པ་དང་གདོང་ལ་བྱུགས་ནས་ལྷ་རྩེད་བྱེད། 

རྩོམ་སྒྲིག་པ། ཀླུ་མོ་མཚོ།

དཔྱད་མཆན 0 ཡོད།