ཀྲུང་གོ་བོད་ཀྱི་དྲ་བ།

རྒྱ་བོད་ལོ་ཙཱའི་སྐོར།

ཡོང་ཁུངས། : སྲིད་པའི་མཛོད་ཕུགས།   རྩོམ་པ་པོ། : འཆད་ཁྲིད་གནང་མཁན།དཔའ་རིས་སངས་རྒྱས།   སྤེལ་དུས། : 2020-06-03
ཡིག་གཟུགས། :ཆུང་། འབྲིང་། ཆེ།

སྟོད་ཆ།

སྨད་ཆ།


འཆད་ཁྲིད་གནང་མཁན་ངོ་སྤྲོད།

 དགེ་རྒན་ཆེན་མོ་དཔའ་རིས་སངས་རྒྱས། 1931ལོར་མདོ་སྨད་རྟའི་ཆོལ་ཁ་མཁས་མང་བྱེ་བའི་འབྱུང་གནས་ཏེ།  དེང་གི་ཀན་སུའུ་ཞིང་ཆེན་ཝུའུ་ཝེ་གྲོང་ཁྱེར་དཔའ་རིས་བོད་རིགས་རང་སྐྱོང་རྫོང་དུ་ཡབ་རྡོ་རྗེ་ཚེ་རིང་དང་ཡུམ་གདུགས་དཀར་སྐྱིད་གཉིས་ཀྱི་སྲས་སུ་སྐུ་བལྟམས། དགུང་ལོ་ཆུང་དུས་ནོར་ལུག་གི་རྗེས་བསྙེག་པའི་རྫི་བོའི་རྣམ་ཐར་བསྐྱངས།  1943ལོར་ཕ་ཡུལ་དང་ཐག་ཉེ་བའི་རྒྱ་ཡིག་སློབ་གྲྭ་ཞིག་ཏུ་ཐོག་མར་ཞུགས་ནས་རིག་པའི་གནས་ལ་འཇུག་པའི་གོམ་པ་དང་པོ་སྤོས།  སྐབས་དེར་དགེ་རྒན་གྱིས་རྒྱ་སྐད་གྱི་ལམ་ནས་ཁྱེད་ཀྱི་རུས་གང་ཡིན་ཞེས་དྲིས་པར་ཁོང་ལོ་ན་གཞོན་ཞིང་རྒྱའི་སྐད་མ་མཁྱེན་སྟབས་ཐུགས་སུ་ལོ་རྟགས་འདྲི་བ་རེད་སྙམ་ནས་རྟ་ཡིན་གསུངས་པ་ན།  དགེ་རྒན་གྱིས་ཀྱང་རུས་རྟ་ཡིན་པར་འཁྲུལ་ནས་སྐབས་དེའི་འཐབ་འཁྲུག་དང་གཡུལ་འགྱེད་སོགས་ལས་རྣམ་པར་རྒྱལ་བའི་རྟེན་འབྲེལ་གྱི་སྒོ་ནས་མཱ་ཅིན་ཝུའུ་ཞེས་མཚན་བཏགས་པ་རེད། དེ་ནས་བཟུང་ཁོང་གི་མཚན་གཞན་ལ་མཱ་ཅིན་བུའུ་ཞེས་ཀྱང་འབོད།  སློབ་གྲྭ་དེ་ནས་མཐར་ཕྱིན།  1951ལོར་སྔོན་གྱི་བོད་རིགས་སློབ་གྲྭ་སྟེ་ནུབ་བྱང་མི་རིགས་སློབ་གླིང་དུ་ཞུགས་ནས་སྤྱི་ལོ1954ལོར་མཐར་ཕྱིན་ཏེ་སློབ་གྲྭ་དེ་གར་དགེ་རྒན་གྱི་བྱ་བར་ཞུགས།  1955ལོར་སློབ་གླིང་དེའི་གྲ་སྒྲིག་སློབ་སྐོར་གྱི་མི་རིགས་སྐད་ཡིག་ཁྲིད་དཔྱོད་ཁང་གི་ཀྲུའུ་རིན་གྱི་འགན་ཁུར། དེའི་ཕྱི་ལོར་རིག་གནས་གསར་བརྗེ་ཆེན་པོའི་ལས་འགུལ་གྱིས་ནུབ་བྱང་མི་རིགས་སློབ་གླིང་གཏོར་རྗེས་ཁོང་ཀན་ལྷོ་ཁུལ་ཀླུ་ཆུ་རྫོང་ཟམ་ཚ་སློབ་འབྲིང་དུ་ཕེབས་ནས་སྔ་རྗེས་སུ་དགེ་རྒན་དང་སློབ་དཔོན་གྱི་འགན་བཞེས་ནས།  ས་གནས་མང་ཚོགས་ལ་བྱིས་པ་སློབ་གྲྭར་བསྐྱལ་དགོས་པའི་ཁ་ཏ་སློབ་གསོ་དང་ཆེད་དོན་ཚོགས་འདུ་བསྡུས་ནས་མི་རིགས་སློབ་གསོའི་བྱ་བ་ལ་ཤ་ཐང་རུས་ཐང་གིས་འབད་པ་བྱས།  སྐབས་དེར་ཀླུ་ཆུ་རྫོང་གི་ཟམ་ཚ་སྡེ་བའི་བོད་ཀྱི་སློབ་མ་རྣམས་ཁོང་དང་དམངས་སྒྲུབ་དགེ་རྒན་རྒྱ་ལོ་རྣམ་གཉིས་ཀྱིས་སློབ་ཆུང་གི་བསླབ་བྱ་ཡོངས་རྫོགས་སློབ་ཐབས་བྱས།  1970ལོར་ཀན་ལྷོ་བོད་རིགས་རང་སྐྱོང་ཁུལ་ཟམ་ཚ་སློབ་འབྲིང་གི་སློབ་གཙོའི་འགན་ཁུར།  1974ལོའི་བར་ཀན་ལྷོ་མི་རིགས་སློབ་གྲྭ་འཛུགས་གྲབས་ལ་ཞུགས་པ་དང་སློབ་དེབ་སྒྲིག་པའི་འགན་བཞེས།  ཁུལ་སློབ་གསོ་ལས་ཁུངས་ཀྱི་སློབ་ཆུང་དང་སློབ་འབྲིང་གི་བོད་ཡིག་སློབ་དེབ་སྒྲིག་པའི་འགན་ཡང་བཞེས་ཏེ་སློབ་གྲྭའི་བོད་ཡིག་སློབ་དེབ་དྲུག་དང་གཞན་སློབ་ཆུང་གི་སློབ་དེབ་བཅུ་ཐམ་པ་བསྒྲིགས།  1978ལོར་ནུབ་བྱང་མི་རིགས་སློབ་གླིང་སླར་སོས་པའི་དབུ་འདྲེན་གྱིས་གདན་འདྲེན་ལྟར་ཕེབས་ནས་སློབ་མ་རྣམས་ལ་སློབ་ཁྲིད་དང་སློབ་དེབ་སྒྲིག་པའི་ལས་ཀ་སོགས་ཉིན་མཚན་མེད་པར་འབད་ནས་དགེ་རྒན་མཆོག་ཏུ་གྱུར་པའི་མཚན་སྙན་ཐོབ།  དེ་རྗེས་གྲངས་ཉུང་མི་རིགས་སྡེ་ཁག་གི་མགོ་འདྲེན་དང་ཞིབ་འཇུག་སློབ་མའི་མཛུབ་སྟོན་པའི་འགན་བཞེས། བོད་ཡིག་ཁྲིད་སྟོབས་ཇེ་ཆེར་གཏང་ཆེད།  དགེ་རྒན་ཁོང་གིས་སློབ་གྲྭའི་དབུ་ཁྲིད་ལ་རེ་བ་ནན་ཏན་ཞུས་ནས་མཁས་དབང་ཆེན་མོ་རྗེ་ཚེ་ཏན་ཞབས་དྲུང་དང་།  ཨ་ལགས་དོར་ཞི་རིན་པོ་ཆེ།  ཆུ་སྐྱེས་དགེ་འདུན་བསམ་གཏན་སོགས་གདན་དྲངས་ནས་བོད་རིག་པའི་སློབ་གླིང་གི་དགེ་རྒན་མཆོག་ཏུ་གྱུར་བར་འཁོད།  ཁོང་གིས་བརྡ་སྤྲོད་ཁྲིད་ནས་མཁས་དབང་དུ་གྱུར་བ་བཞག་པ་རིན་པོ་ཆེ་དང་།  བློ་བཟང་བསྟན་པ་རྒྱ་མཚོ་རིན་པོ་ཆེ་དག་ཡོད།  ཁོང་གི་སློབ་མ་མིང་གྲགས་ཅན་རྒྱལ་མོ་འབྲུག་པ་དང་ལྕགས་ཐར་རྒྱལ།  རྡོར་ཕྲུག  ཆ་རིས་བསྐལ་བཟང་ཐོགས་མེད།  ཨ་གྲོ་ཟླ་བ་ཕུན་ཚོགས།  སྟོད་གཙང་དཔལ་ཆེན་རྒྱལ།  ཁ་སྒང་དཔལ་ཆེན་ཐར་སོགས་ཡོད།  བརྩམས་ཆོས་ལ།  «བརྡ་སྤྲོད་གསལ་བྱེད་ངག་སྒྲོན»«མངོན་བརྗོད་ཁུངས་བཙུན་རྒྱ་མཚོ»«སྡེབ་སྦྱོར་རིག་པའི་སྲོལ་འབྱེད»«བོད་ཡིག་འབྲི་ཚུལ་མཐོང་བ་ཀུན་སྨོན»«བརྡ་སྤྲོད་སྦྱོར་བ་རྣམ་བཞི་རབ་གསལ» «དག་ཡིག་རིག་པ་གབ་པ་མངོན་ཕྱུང»«དཔེ་ཆོས་རྣ་བའི་བདུད་རྩི»«དཔེ་ཆོས་ཚིག་མཛོད»(རྒྱ་བོད་ཤན་སྦྱར) «རྒྱ་བོད་སྒྲ་རིག་པའི་དཔྱད་རྩོམ་ཕྱོགས་བསྒྲིགས»སོགས་ཡོད། «ཀྲུང་གོའི་བོད་རིག་པ»«བོད་ལྗོངས་ཞིབ་འཇུག»«མཚོ་སྔོན་སློབ་གསོ» «བོད་ལྗོངས་སྒྱུ་རྩལ་ཞིབ་འཇུག» «མཚོ་སྔོན་བོད་ཡིག་གསར་འགྱུར»«ནུབ་བྱང་མི་རིགས་སློབ་གྲྭ་ཆེན་མོའི་རིག་གཞུང་དུས་དེབ»«གཙོས་དགེ་འོས་ཆེད་སྦྱོང་སློབ་གྲྭའི་རིག་གཞུང་དུས་དེབ»སོགས་ཀྱི་རྩོམ་སྒྲིག་པའི་རེ་འདོད་ལྟར་དུ་ནང་དོན་དང་རྣམ་པ་མི་འདྲ་བའི་བརྩམས་ཆོས་མང་དུ་བཀོད།  དཔྱད་རྩོམ་ལ«སྐད་ཆ་དང་ཡི་གེ་ནི་རིག་གནས་ཀྱི་གཏེར་མཛོད་ཆེ་ཤོས་ཡིན»ཞེས་པ་དང་། «བྱ་བའི་མིང་གི་རིགས་གསུམ་གྱི་དབྱེ་བ་དང་འབྲེལ་བའི་ངེས་སྲོལ་རྣམ་པར་བཤད་པ»  «བོད་ཡིག་གི་བྱུང་རབས་དང་རྩོད་གཞིའི་མཐའ་དཔྱད»  «བོད་ཀྱི་སྒྱུ་རྩལ་རྩོམ་པའི་ཁོག་འབུབས»  «མངོན་བརྗོད་ཀྱི་བྱུང་རབས་དང་ཕན་ཡོན»  «ངག་གི་སྒྱུ་རྩལ་བང་མཛོད་གེ་སར་སྒྲུང་ཟུར་ཙམ་གླེང་བ»  «བོད་འགྱུར་བྱ་བའི་མིང་གི་སྦྱོར་བ་ཉོག་ཚུལ་དག་པར་བྱ་བར་རེམ་རེམ»ཞེས་པ་སོགས་རྒྱལ་ཁབ་ཕྱི་ནང་གི་མཁས་པའི་དབང་པོ་དག་གི་ཡིད་ཀྱི་བརྟན་པ་འཕྲོག་པའི་བརྩམས་ཆོས་མང་དུ་མཆིས།

རྩོམ་སྒྲིག་པ། : མཁའ་འགྲོ་ཚེ་བརྟན།