བྱིས་པར་འཚར་ལོངས་འབྱུང་བའི་ཁོར་ཡུག་ཅི་འདྲ་ཞིག་བསྐྲུན་དགོས་པ་དང་། དགེ་རྒན་དང་ཕ་མས་སློབ་གསོ་ཇི་ལྟར་གནང་དགོས་པ་སོགས་ལ་སྔོན་བྱོན་སློབ་གསོ་མཁན་པོ་རྣམས་ཀྱིས་བརྟག་དཔྱད་ཞིབ་འཇུག་བྱས་པའི་གཏན་སྲོལ་འགའ་ཞིག་ཀུན་ལ་རྔོ་ཐོགས་པར་སྙམ་པས་ངོ་སྤྲོད་ཙམ་ཞུ་བར་བྱ།
1. ཉ་བུམ་གཏན་སྲོལ། སེམས་ཁམས་ཀྱི་འཚར་ལོངས་ལ་རང་དབང་མཁོ།
ཀུང་སི་ཞིག་གིས།ཉ་ཕྲུག་འགའ་ཉ་བུམ་ཆུང་ཆུང་ཞིག་ཏུ་གསོས།ལོ་འགའ་འགོར་རུང་ཉ་དེ་དག་གི་ལུས་པོ་སྔར་བཞིན་ཆེར་མ་བསྐྱེད། དེ་བས་མི་རྣམས་ཀྱི་སེམས་སུ་ཉ་ཕྲུག་དེ་དག་ནི་ལུས་པོ་ཆེར་ཆགས་རྒྱུ་མེད་པའི་ཉ་ཆུང་ཆུང་གི་རིགས་ཤིག་རེད་སྙམ།
ཉིན་ཞིག་ལ། ཉ་བུམ་དེར་གློ་བུར་དུ་ཆག་ཀྲུམ་ཤོར་བས་རེ་ཞིག་ཉ་བུམ་འོས་འཚམ་ཞིག་མ་རྙེད་པར།ཉ་ཆུང་ཆུང་དེ་དག་སྒོ་ཁའི་རྫིང་བུའི་ནང་དུ་བཏང་ནས་གསོས།བློ་ཡུལ་ལས་འགོངས་པ་ཞིག་ལ་ཉ་ཆུང་ཆུང་དེ་དག་ཉིན་བཞིན་ཇེ་ཆེར་སོང་སྟེ་ཉ་ཆེན་པོ་དག་ཏུ་ཆགས།
ཉ་ལ་རང་དབང་གི་བར་སྟོང་མཁོ་ལ། མི་ལ་དེ་བས་ཀྱང་ངོ་།།
ང་ཚོས་རྒྱུན་པར་བྱིས་པ་ཚོའི་ཚབ་བྱས་ཏེ་སློབ་གྲྭ་དང་ལྭ་བ།རྩེད་ཆས་སོགས་འདེམས་རོགས་བྱེད་ཀྱིན་ཡོད།རྒྱུན་པར་དེ་ལྟར་བྱས་ན་བྱིས་པ་དག་ལ་གདམ་གསེས་དང་བསམ་གཞིག་གི་ནུས་པ་མེད་པར་འགྱུར་ཞིང་།གསར་གཏོད་ཀྱི་འདུ་ཤེས་དང་ཚོད་ལྟའི་ནུས་པའང་མེད་པར་འགྱུར།ང་ཚོས་བྱིས་པ་ཚོའི་ཚབ་བྱས་ཏེ་འཚར་ལོངས་ཀྱི་ཁོར་ཡུག་ལ་ཚད་བཀག་བྱས་ཟིན་ཚེ།བྱིས་པ་དེར་ཤེས་བྱ་མང་པོ་ཞིག་རྟོགས་སུ་འཇུག་ཐུབ་པའི་དབང་དུ་བཏང་ནའང་། གཅིག་ཤེས་ཀུན་གྲོལ་བྱེད་པའི་བསམ་གཞིག་གི་ནུས་པ་སྐྱེད་སྲིང་བྱེད་མི་ཐུབ་ལ།དེ་ལས་ལྷག་པའི་ཐུན་མོང་མ་ཡིན་པའི་འཆར་རྟོག་གི་ནུས་པ་ལྷག་ཏུ་སྐྱེད་སྲིང་བྱེད་མི་ཐུབ་པས་ང་ཚོས་བྱིས་པའི་ཚོའི་སེམས་ཁམས་ཀྱི་འཚར་ལོངས་ལ་རང་དབང་གི་ཁོར་ཡུག་བསྐྲུན་དགོས།
2. ལུའོ་སེན་ཐ་ཨེར་ནུས་སྣང་།བྱིས་པར་རེ་བ་ཆེན་པོ་བཅངས་དགོས།
ཨ་རིའི་སེམས་ཁམས་རིག་པ་ལུའོ་སེན་ཐ་ཨེར་གྱིས་ལོ་རིམ་དང་པོ་ནས་དྲུག་པའི་བར་གྱི་འཛིན་གྲྭ3རེ་བདམས་ནས།འཛིན་གྲྭ18ཀྱི་སློབ་མ་ཚོར་འབྱུང་འགྱུར་འཕེལ་རྒྱས་ཕྱོགས་ཀྱི་ཚོད་ལྟ་ཐེངས་ཤིག་བྱས་རྗེས།དེ་དག་ནང་གི་བསྔགས་པར་འོས་པའི་འཕེལ་རྒྱས་ཀྱི་མདུན་ལམ་ཆེན་པོ་ལྡན་པའི་སློབ་མ་སྐོར་ཞིག་གི་མིང་ཐོ་སློབ་གྲྭའི་སློབ་གཙོ་དང་འབྲེལ་ཡོད་དགེ་རྒན་རྣམས་ལ་སྤྲད་པར་མ་ཟད།ད་དུང་ཁོང་ཚོར“དོན་འདི་གཞན་ལ་ཤེས་སུ་མི་འཇུག་པར་དགེ་རྒན་རྣམས་ཀྱིས་ངེས་པར་དུ་གསང་དགོས”ཞེས་བཤད།
དོན་དངོས་སུ་ལུའོ་སེན་ཐ་ཨེར་གྱིས་ཁོ་ཚོར་རྫུན་གཏམ་པ་རེད།གང་ཡིན་ཞེ་ན།མིང་ཐོའི་ཐོག་གི་སློབ་མ་རྣམས་ནི་རང་དགར་བདམས་པ་ཡིན་པ་ལས། ཁོས་བཤད་པ་ལྟར་འཕེལ་རྒྱས་འགྲོ་འོས་ཀྱི་རྟགས་མཚན་གཞི་འཛིན་ས་གང་ཡང་མེད།
སློབ་གྲྭའི་ཕྱོགས་སུ་སློབ་མ་དེ་དག་གི་མིང་ཐོ་བྱིན་ནས་ཟླ8འགོར་རྗེས། ལུའོ་སེན་ཐ་ཨེར་དང་ལས་གྲོགས་ཚོས་སླར་ཡང་འཛིན་གྲྭ18ཀྱི་སློབ་མ་ཚང་མར་བརྟག་དཔྱད་བྱས་ཚེ། མིང་ཐོའི་ནང་དུ་ཚུད་པའི་སློབ་མ་དེ་དག་ལ་ཐོན་པའི་མཇུག་འབྲས་ཀྱིས་ཁོ་ཚོ་ཧ་ལས་སུ་བཅུག ཅིའི་ཕྱིར་ཞེ་ན།མིང་ཐོའི་ནང་ཚུད་པའི་སློབ་མ་ཚང་མས་གྲུབ་འབྲས་ཆེན་པོ་བླངས་པར་མ་ཟད།གཤིས་ཀ་འཇམ་པ་དང་གྲུང་ཤ་དོད་པ།སྤོབས་པས་ཕྱུག་པ།ཤེས་འདོད་ཀྱི་འདུན་པ་ཤུགས་ཆེ་བ།མི་གཞན་དང་འབྲེལ་འདྲིས་བྱ་རྒྱུར་དགའ་ཞིང་རང་ཉིད་ལ་ཡིད་ཆེས་ཡོད་པ་དག་ཏུ་གྱུར་འདུག
དེ་ནས་ཁོ་ཚོས་དེ་ལྟར་གྱུར་པའི་རྒྱུ་མཚན་ལ་དཔྱད་དུས།ཁོ་ཚོའི་མིང་ཐོ་དེས་དགེ་རྒན་ཚོར་ཚོད་ལྟ་བྱ་ཡུལ་དེ་དག་ནི་གཞན་དང་མ་འདྲ་བའི་ནུས་པ་ཅན་དག་ཡིན་པའི་གསང་བརྡ་སྤྲད་ཡོད། དེ་བས་དགེ་རྒན་གྱིས་མིང་ཐོའི་ཐོག་གི་སློབ་མ་རྣམས་ལ་རེ་བ་ཆེན་པོ་བཅངས་པར་མ་ཟད།བསམ་བཞིན་དུ་རྣམ་འགྱུར་དྲང་པོ་དང་།བཟོ་ལྟ་ཡག་པོ།བསམ་ཤེས་བཅས་ཀྱི་སྒོ་ནས་དྲི་བ་འདོན་པ་དང་།ཟུར་ཁྲིད་བྱེད་པ།བསྟོད་བསྔགས་བྱེད་པ་སོགས་ཀྱི་བྱ་སྤྱོད་མང་དུ་སྤེལ་ནས་ལྐོག་གྱུར་གྱི་རེ་བ་སྣ་ཚོགས་སློབ་མ་དེ་དག་ལ་བརྒྱུད་སྤྲོད་བྱས་ཡོད་པས།སློབ་མ་ཚོས་ཀྱང་སྔར་ལས་ལྷག་པའི་བརྩོན་པ་བསྐྱེད་དེ། དགེ་རྒན་ལ་རང་ཉིད་ཀྱི་ཡར་རྒྱས་མཐོང་དུ་བཅུག དེའི་ཚེ་དགེ་རྒན་གྱི་སློབ་གསོའི་སྤྲོ་སེམས་དེ་བས་ཇེ་ཆེར་འཕེལ་ཏེ་སྔར་ཡོད་ཀྱི་རེ་བ་རྒྱུན་འཁྱོངས་བྱས་པར་མ་ཟད།སློབ་མ་དེ་དག་ལ་ལྟ་རྟོག་དེ་བས་མང་པོ་བྱས་འདུག དེ་ལྟར་ཡུན་རིང་བོར་བསྒྲུབས་པས། སློབ་མ་དེ་དག་གི་བློ་རིག་དང་། སྦྱངས་འབྲས། དེ་བཞིན་སྤྱི་ཚོགས་ཀྱི་བྱ་སྤྱོད་བཅས་ཕྱོགས་ཡོངས་ནས་དགེ་རྒན་གྱིས་རེ་སྒུག་བྱས་པ་ནང་བཞིན་གོང་ནས་གོང་དུ་འཕེལ་རྒྱས་བྱུང་ཡོད་པར་སྣང་། འདི་ནི་འཛམས་གླིང་ན་མིང་དུ་གྲགས་པའི་ལུའོ་སེན་ཐ་ཨེར་ནུས་སྣང་ཡིན། དེ་བས་ང་ཚོས་བྱིས་པ་ཚོར་འཇོན་ནུས་ལྡན་པར་འགྱུར་ཐུབ་པའི་ཡིད་ཆེས་དང་རེ་བ་ཆེན་པོ་བཅངས་ཏེ་ངང་སྒུག་དང་སྐུལ་ལྕག་བྱ་རྒྱུ་ཤིན་ཏུ་གལ་ཆེ།
3. གཏན་འཇགས་གཏན་སྲོལ། གོམས་གཤིས་བཟང་པོ་གསོ་སྐྱོང་བྱེད་དགོས།
ཚན་རིག་པས་འདི་འདྲའི་ཚོད་ལྟ་ཞིག་བྱས་མྱོང་། ཆུའི་ནང་དུ་ཆུ་སྲིན་དང་ཉ་ཆུང་ཆུང་སྐོར་ཞིག་བཏང་ཞིང་། དེ་དག་གི་བར་ལ་སོ་སོར་འགེར་བྱེད་ཀྱི་ཤེལ་གྱི་བར་ཆོད་ཅིག་བསླངས།ཐོག་མའི་དུས་སུ་ཆུ་སྲིན་གྱིས་ཤེད་ཤུགས་དྲག་པོས་ཤེལ་ལ་བརྡབས་ནས་ཁ་གཏད་ཀྱི་ཉ་ཕྲུག་དེ་དག་ཡོད་སར་རྐྱལ་འདོད་བྱས།དེ་འདྲའི་ཚོད་ལྟ་ཐེངས་མང་བྱས་རྗེས་དེ་ནི་མི་སྲིད་པའི་ངལ་བ་འབྲས་མེད་ཀྱི་དོན་ཞིག་ཡིན་པ་རྟོགས་ནས་ཤེལ་ལ་བརྡབས་མཚམས་བཞག ཕྱིས་སུ་ཚན་རིག་པས་ཤེལ་གྱི་བར་ཆོད་བླངས་ཀྱང་། ཆུ་སྲིན་གྱིས་སྔར་བཞིན་ཤེལ་གྱི་བར་ཆོད་ཡོད་པར་བསམས་ཏེ་རང་གི་ཆུ་ཁོངས་སུ་ཕར་རྐྱལ་ཚུར་རྐྱལ་བྱེད་པ་ལས།ཉ་ཕྲུག་ཡོད་སའི་ཕྱོགས་སུ་རྐྱལ་རྒྱུའི་ཚོད་ལྟ་ཙམ་ཡང་མ་བྱས།
མིའི་བྱ་སྤྱོད་ཀྱང་ཚོད་ལྟ་འདི་དང་འདྲ་བར།དུས་ཡུན་ངེས་ཅན་ཞིག་གམ་ཡང་ན་བསྐྱར་ཟློས་ཀྱི་གོ་རིམ་འགའ་བརྒྱུད་རྗེས། མཐར་གཏན་འཇགས་སུ་གྱུར་ཏེ་གོམས་གཤིས་སུ་ཆགས་འགྲོ།
གོམས་གཤིས་བཟང་པོ་ནི་དགོས་འདོད་ཀུན་འབྱུང་གི་ནོར་བུ་རྩ་ཆེན་བཞིན་རིན་ཐང་གཞལ་དུ་མེད་པས།བྱིས་པས་ཚེ་གང་བོར་ལོངས་སུ་སྤྱད་ཆོག་ན། ང་ཚོས་ཆུང་དུས་གོམས་གཤིས་བཟང་པོ་དག་རྒྱུད་ལ་གཏན་འཇགས་སུ་ཆགས་པར་རོགས་སྐྱོར་བྱེད་དགོས།
4. སྤྱང་གཤིས་གཏན་སྲོལ། བྱིས་པའི་མཚར་སྣང་སྐྱེད་སྲིང་བྱེད་དགོས།
སྤྱང་ཀི་ནི་འཛམ་གླིང་སྟེང་མཚར་སྣང་ཆེས་ཆེ་བའི་སྲོག་ཆགས་ཤིག་ཡིན་ལ།ཆ་རྒྱུས་ཡོད་པའི་ཁོར་ཡུག་དང་བྱ་དངོས་གང་ཞིག་ཡིན་ནའང་། ཁོ་ཚོས་དེ་དག་ནི་རྒྱུན་ལྡན་ལུགས་མཐུན་ཞིག་ཡིན་པར་མི་འདོད་པར། རང་བྱུང་ཁམས་ཀྱི་རུས་པ་སྐམ་པོ་དང་ཤྭ་རྭ་ཟད་པོ་ཞིག་ཡིན་ནའང་ཁོ་ཚོའི་མཚར་སྣང་ཅན་གྱི་རྩེད་ཆས་སུ་འགྱུར་སྲིད། སྤྱང་ཕྲུག་དག་ཀྱང་མཚར་སྣང་གི་འགུག་ཤུགས་འོག་རྒྱུན་ཆད་མེད་པར་སློབ་སྦྱོང་བྱས་ཏེ་འཚར་ལོངས་འབྱུང་བ་ཡིན།
དེ་བཞིན་དུ། བྱིས་པ་ཚོའི་ཆེས་ཐོག་མའི་གཉུག་གཤིས་ནི་མཚར་སྣང་གིས་ཁེངས་ཤིང་། དངོས་པོ་སྣ་ཚོགས་ལ་རྒྱུས་ལོན་དང་ཚོད་ལྟ་སྣ་ཚོགས་བྱེད་འདོད་པ་ཞིག་ཡིན་ལ། ང་ཚོས་ལན་འདེབས་མི་ཐུབ་པའི་དྲི་བ་འདྲ་མིན་སྣ་ཚོགས་འདྲི་སྲིད། དེ་འདྲའི་སྐབས་སུ་ཕ་མ་དང་དགེ་རྒན་ཚོས་བྱིས་པ་ཚོར་ཚོད་ལྟ་མང་ཙམ་བྱེད་དུ་འཇུག་པ་དང་། བྱིས་པ་ཚོ་དང་མཉམ་དུ་གནད་དོན་རྩད་ཞིབ་བྱས་ཏེ་ཤེས་བྱ་གསོག་འཇོག་བྱས་ཚེ་ཕྲུ་གུའི་མཚར་སྣང་སྲུང་སྐྱོང་དང་སྐུལ་སློང་ཡག་པོ་བྱེད་ཐུབ།
མཚར་སྣང་གིས་ཕྱུག་པའི་མི་རྣམས་ནི་ཕྱོགས་གང་ཐད་ནས་ལེགས་འགྲུབ་འབྱུང་སླ་བ་ཚན་རིག་གིས་བརྟག་དཔྱད་ར་སྤྲོད་བྱས་ཟིན།
5. ཕུགས་འདུན་གཏན་སྲོལ། ཆུང་དུས་ནས་ཕུགས་འདུན་གསལ་པོ་ཡོད་དགོས།
དགེ་རྒན་པེ་ཨར་གྱིས་མ་འོངས་པའི་ཕུགས་འདུན་དང་འབྲེལ་བའི་རྩོམ་ཡིག་ཅིག་འབྲི་དགོས་པའི་ལས་བྱ་བཀོད་སྒྲིག་བྱས། ལོ་ན་ཆུང་བའི་ལོ་པའོ་ཐི་ཡིས་ས་མུའུ200ཅན་གྱི་ཕྱུགས་སྐྱོང་ར་བ་ཞིག་འཛུགས་འདོད་པའི་ཕུགས་འདུན་བྲིས་པར་མ་ཟད།ཕྱུགས་རའི་རི་མོ་ཞིག་ཀྱང་ཇུས་འགོད་བྱས།དགེ་རྒན་གྱིས་ཁོའི་ལས་བྱ་དེ་ལས་བྱ་ཞན་པའི་གྲས་སུ་བཞག རྒྱུ་མཚན་ནི་ལོ་པའོ་ཐིའི་ཨ་ཕ་ནི་རྟ་འདུལ་མཁན་ཞིག་ཡིན་པས། དགེ་རྒན་གྱིས་ལོ་པའོ་ཐིའི་ཕུགས་འདུན་ནི་དོན་དངོས་དང་མི་མཐུན་པའི་སྟོང་བསམ་ཙམ་རེད་འདོད། ཁོང་གིས་ལོ་པའོ་ཐི་ལ་ལས་བྱ་ཡང་བསྐྱར་འབྲི་དགོས་པའི་རེ་བ་བཏོན་ཞིང་།དེ་ལྟར་ན་ལས་བྱར་སྐར་མ་མཐོན་པོ་བྱིན་ཆོག་པའི་ཁས་བླངས་མོད། འོན་ཀྱང་ལོ་པའོ་ཐི་ཡིས་བསམ་བློ་ཞིབ་མོ་བཏང་རྗེས་རང་གི་ཕུགས་འདུན་ལ་འགྱུར་བ་མ་བཏང་བས།ལོ་ངོ་དུ་མའི་རྗེས་སུ་ཁོ་རང་དངོས་གནས་ས་མུའུ200ཅན་གྱི་ཕྱུགས་ར་ཞིག་གི་བདག་པོར་གྱུར། དེ་དུས་དགེ་རྒན་པེ་ཨར་ལྟ་སྐོར་དུ་ཡོང་ནས་མིག་ཆུ་དབང་མེད་དུ་ཤོར་བཞིན་ཅུང་ཙམ་མིན་ཚེ་ངས་བྱིས་པ་ཞིག་གི་ཕུགས་འདུན་བརླག་སོང་ཟེར།
སྔོན་གྱི་ལྷ་སྒྲུང་གཏམ་རྒྱུད་དག་ཏུ་མི་རྣམས་གཤོག་པ་ཐོགས་པའི་བྱ་བཞིན་འཕུར་སོང་ཟེར་ན་ལྷ་སྒྲུང་ཙམ་ལས་དོན་དངོས་འཚོ་བའི་ཁྲོད་དཔེ་མི་སྲིད་པ་ལྟར་སྣང་མོད།འོན་ཀྱང་ད་ཆ་ཕུགས་འདུན་དེ་མངོན་འགྱུར་བྱུང་སྟེ་མི་རྣམས་གནམ་གྲུར་བསྡད་དེ་གང་འདོད་དུ་འཕུར་གྱིན་ཡོད་པ་མ་ཡིན་ནམ། དེ་བས་ང་ཚོས་བྱིས་པ་ཆུང་ཆུང་ཚོར་བྱ་བ་ཞིག་བཅོལ་སྐབས།ཁོ་ཚོར་ཇི་ལྟར་བསྒྲུབ་དགོས་པའི་ཐད་ཀྱི་གཏན་འཁེལ་མི་བྱེད་པར། ཁོ་ལ་གང་འདྲ་ཞིག་ཡིན་དགོས་པའི་དམིགས་ཚད་བཤད་པས་ཆོག དགོས་ངེས་ཀྱི་དུས་སུ་བདེ་འཇགས་ཐད་ཀྱི་དྲན་སྐུལ་ཁ་ཤས་བྱེད་དགོས་ཀྱང་སྲིད། ཐབས་ཤེས་ཅི་འདྲ་སྤྱོད་པའི་ཐད་ལ་ཁོ་ཚོར་བསམ་བློ་གཏོང་དུ་འཇུག་དགོས་པ་དང་།དེའི་བརྒྱུད་རིམ་ཁྲོད་ང་ཚོས་བསྒྲུབ་དགོས་པ་ནི་སྐུལ་ལྕག་དང་རྒྱབ་སྐྱོར་ཁོ་ན་ཡིན་ནོ། །
6. ལྷོ་རླུང་ནུས་སྣང་། བྱིས་པའི་རང་རྟོགས་ཀྱི་འདུ་ཤེས་གསོ་སྐྱོང་བྱེད་དགོས།
འཇར་མན་གྱི་རྩོམ་པ་པོ་ལ•ཧྥན་ཏན་གྱིས་བྲིས་པའི་གཏམ་རྒྱུད་ཅིག་ཏུ།ལྷོ་རླུང་དང་བྱང་རླུང་གཉིས་ལས་གང་ཞིག་གིས་མི་རྣམས་ཀྱི་རྒྱབ་ཀྱི་ལྭ་བ་ཕུད་ཐུབ་པའི་རྒྱན་བཙུགས་པའི་གཏམ་རྒྱུད་ཅིག་ཡོད།
བྱང་རླུང་གིས་གྲང་འཁྱག་དང་རླུང་ཤུགས་ལ་བརྟེན་ཏེ། མི་རྣམས་ཀྱི་རྒྱབ་ཀྱི་ལྭ་བ་ཕུད་དགོས་སྙམ་སྟེ་གྲང་ངར་ཤུར་ཤུར་དུ་ལྡང་བས། མི་རྣམས་གྲང་སྟེ་ལྭ་བའི་སྒྲོག་གུ་བསྒྲོགས་ཤིང་ལྭ་བ་ཇེ་མཐུག་ཏུ་གཏོང་བ་ལས་ལྭ་བ་ཕུད་དུ་འཇུག་མ་ཐུབ།ལྷོ་རླུང་དྲོད་འཇམ་ངང་དལ་གྱིས་ལྡང་བས།ཉི་མའི་དྲོད་ལ་གྲོགས་བྱས་ཏེ་མི་རྣམས་ཀྱི་ལུས་དྲོད་རྒྱས་པར་བྱས།སྐབས་དེར་མི་རྣམས་ངར་ཏེ་རང་རྟོགས་ཀྱིས་ཐོག་གི་ལྭ་བ་ཕུད་དེ་ཇེ་སྲབ་ཏུ་བཏང་།དེ་བས་ལྷོ་རླུང་ལ་རྒྱལ་ཁ་ཐོབ།
ལྷོ་རླུང་ལ་རྒྱལ་ཁ་ཐོབ་དོན་ཅི་ཡིན་ཞེ་ན།རྒྱུ་མཚན་ནི་དེས་མི་རྣམས་ཀྱི་བྱ་སྤྱོད་ནི་རང་རྟོགས་ཀྱིས་བྱེད་པ་ལས་བཙན་མི་ཚུགས་པའི་གནས་ལུགས་རྟོགས་པས་ཡིན།མི་རྣམས་ལ་རང་སྐྱོན་རང་བརྟག་བྱ་རྒྱུའི་བློ་སྒོ་ཕྱེས་པ་དང་།རང་སོ་སོའི་དགོས་མཁོ་བསྐངས་ནས་དམིགས་ཡུལ་འགྲུབ་པར་བྱེད་པའི་བྱེད་སྟངས་དེའི་རིགས་ལའང“ལྷོ་རླུང་ནུས་སྣང”ཞེས་ཟེར།
གནས་ཚུལ་ལ་རྒྱུས་ལོན་བྱེད་པ་དང་འོས་འཚམ་གྱི་ཐག་གཅོད་བྱེད་ཐབས་འཚོལ་བ་ནི་ཚོང་བའི་འཇིག་རྟེན་གྱི་མཉམ་རྒྱལ་གཏན་སྲོལ་རེད།བྱིས་པའི་ངོས་ཐད་ནས་བལྟས་ན་ཁོའི་ཡོད་ཚད་ནི་ཚོད་ལྟ་དང་འཚར་ལོངས་ཀྱི་དུས་རིམ་ཡིན། དེ་བས་ང་ཚོ་ཕ་མ་དང་དགེ་རྒན་ཚོས་བསྒྲུབ་དགོས་པ་ནི་བྱིས་པའི་ནང་སེམས་ལ་རྒྱུས་ལོན་བྱས་ཏེ།བཟོད་སྒོམ་མང་ཙམ་བྱེད་པ་དང་།སྣེ་ཁྲིད་བྱ་རྒྱུར་དོ་སྣང་ཆེན་པོ་བྱས་ཏེ་ཁོ་ཚོའི་དགོས་མཁོ་སྐོང་རྒྱུ་དེ་ཡིན།དེ་ལྟ་ན་བྱིས་པའི་རང་རྟོགས་ཀྱི་འདུ་ཤེས་གསོ་སྐྱོང་བྱེད་ཐུབ།གལ་ཏེ་ཁྱོད་རང་བྱིས་པ་གང་དེར་མི་དགའ་བའམ་ཡང་ན་ཡིད་ཆེས་མེད་ཚེ།ཁྱོད་ཀྱིས་ཅི་ཞིག་བཤད་ཀྱང་ཚང་མ་སྟོང་བཤད་ཡིན་པ་ལས་བྱིས་པ་དེར་ནུས་པ་ཐོན་པར་མི་འགྱུར་རོ། །
7.རང་བྱུང་ཆད་གཅོད་གཏན་སྲོལ། བྱིས་པར་མཇུག་འབྲས་ཁུར་དུ་ལེན་དགོས་པའི་འདུ་ཤེས་ཆགས་པར་བྱེད་དགོས།
ཨ་མ་ཞིག་གིས་རང་གི་བུ་ཡོའུ་ཧན་ལ་ཐེངས་མང་པོར་དྲན་སྐུལ་བྱས་མྱོང་ནའང་།ཁོས་རྒྱུན་དུ་སློབ་གྲྭར་འགྲོ་ཁར་བྲོ་ཁ་འཁྱེར་རྒྱུ་བརྗེད་འགྲོ། དེ་འདྲའི་སྐབས་རེ་རེར་ཨ་མ་དེས་རང་གི་བུའི་གྲོད་པ་ལྟོགས་པར་སེམས་ཁྲལ་བྱས་ཏེ་ཐེངས་གང་མང་ལ་ཟ་མ་བསྐྱལ་མྱོང་།ཉིན་ཞིག་ལ།ཨ་མ་དེས་རང་བྱུང་ཆད་གཅོད་གཏན་སྲོལ་གྱི་ནང་དོན་རྟོགས་རྗེས།སྔར་བཞིན་ཡོའུ་ཧན་ལ་ཟ་མ་འཁྱེར་རྒྱུ་བརྗེད་མི་རུང་ཞེས་དྲན་གསོ་བྱས་པ་དང་།ཞོར་དུ་གལ་ཏེ་ཁྱོད་ཀྱིས་བརྗེད་སོང་ན་རང་གི་ཕོ་བ་ལྟོགས་རྒྱུ་ལས་མེད་ཅེས་གསལ་འདེབས་བྱས།ཡོའུ་ཧན་གྱིས་ཡ་ཡ་ཞེས་ཁས་བླངས་མོད་སྔར་བཞིན་ཟ་མ་འཁྱེར་རྒྱུ་བརྗེད་སོང་།
ཕྱི་དྲོ་དེར་ཡོའུ་ཧན་གྱི་ཕོ་བ་ལྟོགས་ནས་བཟོད་དཀའ་ཡང་ཨ་མས་ཟ་མ་མ་བསྐྱལ།དེ་ནས་བཟུང་ཡོའུ་ཧན་གྱིས་ཟ་མ་མ་འཁྱེར་ན་རང་གི་ཕོ་བ་ལྟོགས་སྲིད་པ་དང་ཟ་མ་མ་འཁྱེར་བའི་མཇུག་འབྲས་ལ་རང་གིས་འགན་འཁུར་དགོས་པ་ལས་ཨ་མས་ཁ་ཡ་མི་བྱེད་པ་ཤེས་སོང་།
ཧྥ་རན་སིའི་སློབ་གསོ་མཁས་ཅན་ལུའུ་སུའོ་ཡིས་བྱིས་པར་ཆད་པ་ཕོག་པ་ནི་ཁོང་གི་ལས་འཛོལ་ལས་བྱུང་བའི་རང་བྱུང་གི་མཇུག་འབྲས་ཞིག་ཡིན་པར་ངོས་འཛིན་བྱེད་ཀྱིན་ཡོད། འདི་ལ་རང་བྱུང་ཆད་གཅོད་ཟེར།མི་ཆེ་ཆུང་སུ་ཞིག་ཡིན་ཡང་རང་ཉིད་ཀྱི་བྱ་སྤྱོད་ལ་རང་ཉིད་ཀྱིས་འགན་འཁུར་དགོས་པའི་གནས་ལུགས་བྱིས་པ་ཚོར་ཤེས་སུ་འཇུག་དགོས།བྱིས་པ་རང་ཉིད་དངོས་སུ་བརྒྱུད་པའི་ཉམས་མྱོང་ནི་སློབ་ཁྲིད་སོགས་ཀྱིས་མི་འཐུས།
8. བརྩི་འཇོག་གཏན་སྲོལ། བྱིས་པའི་བསམ་བློ་བདེ་ཐང་ངང་འཚར་ལོངས་འབྱུང་བ་ལ་བརྩི་མཐོང་མཁོ།
སློབ་ཁྲིད་སྐབས་སུ། དགེ་རྒན་གྱིས་འགུལ་རིས་འབྲི་མཁན་གྲགས་ཅན་ཞིག་གི་དཔེ་ཆ་བླངས་ཏེ། བྱིས་པ་ཚོར་དཔེ་ཆ་དེའི་ནང་གི་གཏམ་རྒྱུད་བཤད་པ་དང་། ཞོར་དུ་བྱིས་པ་ཚོ་ལའང་གཏམ་རྒྱུད་རེ་བཤད་དུ་བཅུག་ཅིང་དེ་དང་འབྲེལ་བའི་རི་མོ་འབྲི་རུ་བཅུག བྱིས་པ་ཚོའི་གཏམ་རྒྱུད་ནི་གཏམ་རྒྱུད་ཞིག་ཏུ་མི་གྲུབ་པ་དང་།རི་མོའང་ཡག་པོ་ཞིག་འབྲི་མི་ཤེས་ནའང་།དགེ་རྒན་གྱིས་ནན་ཏན་གྱིས་གཏམ་རྒྱུད་དག་ཟིན་བྲིས་སུ་བཏབ་པར་མ་ཟད།ཟིན་བྲིས་སུ་བཏབ་པའི་གཏམ་རྒྱུད་རྣམས་རི་མོ་དང་མཉམ་དུ་བཙེམས་ཏེ་དེབ་ཅིག་བསྒྲིགས།
ཁོང་གིས་སློབ་བུ་ཚོར་འདི་ནི་ཁྱོད་ཚོས་བྲིས་པའི་དཔེ་དེབ་དང་པོ་ཡིན།ད་ལྟ་ཁྱོད་ཚོ་ལོ་ན་ཆུང་ནའང་དེབ་ཅིག་བྲིས་ཟིན།རྗེས་སུ་ཁྱོད་ཚོ་ནར་སོན་རྗེས་དཔེ་ཆ་ཡག་པོ་འབྲི་ཐུབ་ཅིང་།རླབས་ཆེན་གྱི་མི་སྣ་དག་ཏུ་འགྱུར་ཐུབ་ཅེས་གསུངས།
སྐུ་ཞབས་ལུའུ་ཞུན་གྱིས “བྱིས་པ་ཆུང་དུས་ནས་མི་རུ་མ་བརྩིས་ན།ཆེར་ཆགས་དུས་ཀྱང་མི་བྱེད་མི་ཐུབ།”ཅེས་གསུངས་མྱོང་བ་ནང་བཞིན་བྱིས་པར་བརྩི་མཐོང་བྱས་ཏེ། རང་ཚུགས་ཅན་གྱི་མི་ཞིག་ལ་བརྩི་བ་དང་ཁོ་ཚོའི་གདམ་ག་དང་སྒེར་གྱི་གསང་དོན།ཁོང་གི་གྲོགས་པོ་སོགས་ལ་བརྩི་འཇོག་བཅས་བྱས་ནས་རྟག་ཏུ་ཁོ་ཚོ་དང་བསམ་བློ་བརྗེ་རེས་དང་། མི་གཤིས་ལ་བརྩི་མཐོང་།ཁྲིད་སྟོན་ལུགས་མཐུན་བཅས་བྱས་ན་ཁོ་ཚོ་སྔར་ལས་ལེགས་པའི་སྒོ་ནས་འཚར་ལོངས་འབྱུང་ཐུབ།
9. འདོད་བློ་སྐོང་བའི་དུས་བསྒྱང་བ། ཆུང་དུས་ནས་བྱིས་པའི་ངང་རྒྱུད་རིང་པོ་སྐྱེད་སྲིང་བྱེད་དགོས།
ཨ་རིའི་སེམས་ཁམས་རིག་པ་བ་ཝོ་ཨར་ཐེ་ཡིས་བྱིས་པའི་ནར་སོན་གྱི་གོ་རིམ་ལ་རྗེས་འདེད་བརྟག་དཔྱད་ཀྱི་ཚོད་ལྟ་ཞིག་བྱས་མྱོང་།ཁོང་གིས་བུ་བཅོལ་ཁང་ནས་ལོ4ཅན་གྱི་བྱིས་པ་བཅུ་ལྷག་བདམས་ཏེ།མི་རེར་ཀ་ར་གཅིག་རེ་བྱིན་པ་དང་། ཁོ་ཚོར“ཁྱོད་ཚོས་ཀ་ར་འདི་དག་ད་ལྟ་ཟོས་ན་ཀ་ར་གཅིག་ལས་ཟ་རྒྱུ་མེད་པ་དང་།གལ་ཏེ་སྐར་མ20ཡི་རྗེས་སུ་ཟོས་ན་སླར་ཡང་ཀ་ར་གཅིག་སྟེར་རྒྱུ་ཡིན”ཞེས་བཤད། བྱིས་པ་ལ་ལས་ཀ་ར་ཟ་འདོད་ཀྱི་བསླུ་བྲིད་དེ་འགོག་མ་ཐུབ་པར་མྱུར་དུ་ཟོས་པ་དང་། ཡང་བྱིས་པ་ལ་ལ་ཞིག་གིས་སྐར་མ20ལ་བསྒུགས་ཏེ་ཀ་ར2ཐོབ་རྗེས་ད་གཟོད་ཀ་ར་ཟོས།
ལོ་མང་པོར་རྗེས་འདེད་བྱས་མཐར་ཁོང་ཚོས་ཤེས་རྟོགས་བྱུང་བ་ནི། སྐར་མ20ལ་སྒུག་ཐུབ་པའི་བྱིས་པ་དེའི་སྐོར་ནི་ཕྱོགས་གང་ཅིའི་ཐད་ཀྱི་ཕྱོགས་བསྡུས་བྱང་ཚད་བྱིས་པ་གཞན་དག་ལས་མངོན་གསལ་དོད་པོས་བཟང་བར་མ་ཟད།བྱ་བ་གང་ཡིན་ཡང་ལེགས་འགྲུབ་འབྱུང་ཚད་ཆེ་བར་སྣང་།བྱིས་པ་ངང་ཐུང་དེ་དག་ཕལ་ཆེ་བ་ནི་ཨུ་ཚུགས་དང་ཐེ་ཚོམ་ཆེ་ལ།རྟག་ཏུ་གནོན་ཤུགས་ལ་མགོ་སྒུར་ནས་འགན་འཁྲི་ལ་གཡོལ་ཐབས་བྱེད་ཀྱིན་ཡོད་པའི་སྣང་ཚུལ་ཤས་ཆེ་བ་རྟོགས།
དེ་བས་དགེ་རྒན་དང་ཕ་མ་སུ་ཡིན་ཡང་། བྱིས་པ་ཚོ་དང་མཉམ་དུ་དུས་ཡུན་སྐར་མ་གསུམ་གྱི་རོལ་རྩེད་ཅིག་རྩེ་ཆོག བྱིས་པ་དང་དུས་ཚོད་སྐར་མ་གསུམ་གྱི་དུས་ཆད་བྱས་རྗེས། ངེས་པར་དུ་བློ་སེམས་རྩེ་གཅིག་གིས་བྱ་བ་སྣ་གཅིག་སྒྲུབ་ཏུ་འཇུག་དགོས། དེའི་རིང་དུ་ང་ཚོས་མཉམ་དུ་གཏམ་རྒྱུད་ཀྱི་དཔེ་ཆར་བལྟ་བའམ།ཡང་ན་རི་མོ་འབྲི་བ། འགྱིག་འདེད་པ་སོགས་བྱེད་ཆོག སྐར་མ་གསུམ་ལོངས་མ་ཐག་ངལ་གསོ་དགོས།
སྐར་མ3ནི་བྱིས་པས་བློ་རྩེ་གཅིག་ཏུ་སྒྲིམ་ཐུབ་པའི་དུས་ཡུན་ཡིན།དེ་འདྲའི་སྦྱོང་བརྡར་ཐེངས་མང་བྱས་ནས་བློ་རྩེ་གཅིག་སྒྲིམ་གྱི་གོམས་གཤིས་སུ་འཇགས་པར་བྱེད་དགོས།དེ་ལྟར་བྱས་ན་བློ་རྩེ་གཅིག་ཏུ་སྒྲིམ་པའི་གོམས་གཤིས་འཇགས་སུ་འཇུག་རྒྱུར་ཕན་ཞིང་།བྱིས་པའི་སྙིང་རུས་དང་ངང་རྒྱུད་རིང་པོར་ཆགས་རྒྱུར་ཡང་སྦྱོང་བརྡར་བྱེད་ཐུབ།
10. ཚོར་སྒོ་གཅོད་པའི་གཏན་སྲོལ། རང་ཉིད་ཀྱིས་དངོས་སུ་འཚོ་བའི་བྲོ་བ་མྱོང་བ།
སེམས་ཁམས་རིག་པ་བས་མིའི་དབང་བོ་ལྔའི་ཚོར་སྒོ་གཅོད་པའི་ཚོད་ལྟ་ཞིག་བྱས་མྱོང་། ཚོད་ལྟ་ལ་ཞུགས་མཁན་གང་དེའི་མིག་ཤེས་དང་།རྣ་ཤེས།རེག་ཤེས་བཅས་གང་ཡང་ཚོར་མི་ཐུབ་པར་བྱས་ནས་ཁེར་རྐྱང་དུ་ཚོད་ལྟ་ཁང་ཞིག་ཏུ་བཅུག དུས་ཚོད་འགའ་འགོར་རྗེས། ཁོ་ཚོར་དངངས་སྐྲག་དང་འཕྲུལ་སྣང་སྣ་ཚོགས་སྐྱེས། ཉིན་གསུམ་བཞིའི་རྗེས་སུ། ཁོ་ཚོ་ཕྱི་རོལ་གྱི་ཟུག་སློང་ལ་ཚོར་བ་སྐྱེན་པ་དང་། རིག་པ་ཉོབ་པ། བསམ་གཞིག་གི་ནུས་པ་ཞན་པ། སེམས་འཚབ་ཆེ་བ། དངངས་སྐྲག་སྐྱེས་པ་ལ་སོགས་སེམས་ནས་བཟོད་དཀའ་བའི་སྡུག་བསྔལ་སྣ་ཚོགས་བྱུང་སྟེ། མྱུར་དུ་ཚོད་ལྟ་བྱེད་མཚམས་འཇོག་རྒྱུའི་རེ་བ་བཏོན། ཚོད་ལྟ་མཇུག་རྫོགས་ནས་ཉིན་འགའི་རྗེས་སུ་ཁོ་ཚོ་ད་གཟོད་རིམ་བཞིན་རྒྱུན་ལྡན་དུ་གྱུར།
ལག་ལེན་དངོས་ཀྱི་ཚོད་ལྟ་བྱས་པ་བརྒྱུད་སེམས་ཁམས་རིག་པ་བས་ཚོར་ཤེས་ནི་མིའི་ཆེས་གཞི་རྩར་གྱུར་པའི་སེམས་ཁམས་ཀྱི་སྣང་ཚུལ་ཡིན་པ་དང་།ཚོར་བ་བརྒྱུད་དེ་ང་ཚོར་ཕྱི་རོལ་གྱི་ཆ་འཕྲིན་ཐོབ་ཐུབ་པ་པ་དང་། ད་གཟོད་ཁོར་ཡུག་དང་བསྟུན་ཏེ་འཚོ་གནས་བྱེད་ཐུབ་པ་སོགས་ར་སྤྲོད་བྱས།
དེང་སྐབས་ཕ་མ་མང་པོ་ཞིག་གིས་བྱིས་པས་དཀའ་སྡུག་མྱོང་འགྱུར་དང་། བྱིས་པ་ཉེན་ཁར་འཕྲད་དོགས་ཀྱི་སེམས་ཁྲལ་བྱེད་ཆེ་དྲགས་ཡོད།དེ་ལྟ་བུའི་སེམས་ཁྲལ་འོག་འཚར་ལོངས་བྱུང་བའི་བྱིས་པ་རྣམས་ནི་མཐོང་རྒྱ་ཆུང་བ་དང་བློ་ཁོག་དོག་པར་མ་ཟད།སྤྱི་ཚོགས་ཀྱི་ལག་ལེན་མང་པོ་མེད་པའི་དབང་གིས་འབྱུང་འགྱུར་གྱི་འགྱུར་ལྡོག་མང་བའི་སྤྱི་ཚོགས་ཁོར་ཡུག་དང་འཚམ་དཀའ་བར་གྱུར་ཡོད།
དེ་བས་ང་ཚོས་བྱིས་པར་སྣ་མང་ཕུན་སུམ་ཚོགས་པའི་ཕྱི་རོལ་གྱི་ཁོར་ཡུག་ལ་ཧུར་ཐག་གིས་མྱོང་ཚོར་བྱེད་དུ་བཅུག་སྟེ།ཁོར་ཡུག་དང་གནད་དོན་སྣ་ཚོགས་ཁྲོད་རང་གི་མྱོང་ཚོར་དངོས་ལ་བརྟེན་ནས་ཤེས་བྱ་དང་ཆ་འཕྲིན་མང་པོ་ཐོབ་པར་བྱས་ན་ད་གཟོད་བྱིས་པ་རྣམས་རང་རྐྱ་འཕེར་བ་དང་། རང་ཉིད་ཀྱི་བསམ་བློ་ཡོད་པ་རང་དུ་ཆགས་ཐུབ། །