བྱ་དཀའི་སྤྱོད་པ་འབུམ་ཕྲག་གིས།། ཟག་མེད་ཆོས་ཀྱི་སྐུ་བརྙེས་ཏེ།། འཕྲིན་ལས་ཉི་ཟླ་འབར་བའི་གཟིས།། རྨོངས་སེལ་ཤཱཀྱ་སེང་གེར་འདུད།། དགེ་མ་མངོན་དགའ་འོ་མའི་མཚོའི།། ངང་མོ་བསིལ་བའི་རྔ་ཡབ་ཅན།། ལེགས་གསུང་དྲི་ཟའི་རྒྱུད་མང་གླུས།། དྲན་པའི་རི་དྭགས་འཛིན་པ་སྩོལ།། བྱེ་བ་ཕྲག་བརྒྱའི་འཇིག་རྟེན་ན།། ཀུན་བཟང་ཉི་མའི་སྣང་གསལ་གྱིས།། ཆེ་ལས་ཆེ་བའི་ཅོད་པན་རྩེ།། ས་ལ་བསྙིལ་བས་དགེ་ལེགས་བྱིན།། བློ་བཟང་འཕྲིན་ལས་ལྷུན་གྲུབ་སྟེ།། ཆོས་ཀྱི་རྒྱལ་མཚན་སྒྲེང་བའི་མགོན།། སྙིང་གི་པད་མོའི་ལྟེ་བ་ལ།། བྱང་ཆུབ་བར་དུ་འབྲལ་མེད་བསྟེན།། གང་གི་གསང་གསུམ་ཡོན་ཏན་མཐའ།། གཞལ་ལ་འཇམ་དབྱངས་ངལ་བྱེད་ཀྱང་།། སྐྲ་རྩེས་བླངས་པའི་ཐིགས་པ་ཙམ།། བརྗོད་འདོད་སྙིང་གི་ཁུང་བུར་ཉལ།། བདག་གི་ཚེ་རབས་ཕྲེང་བ་རུ།། གཟུངས་སྤོབས་ཤེས་རབ་མི་ཟད་པའི།། གཏེར་ལ་འདོད་རྒུར་སྤྱོད་པའི་སླད།། རྣམ་ཐར་སྙིང་པོ་བརྗོད་ལ་སྤྲོ།། མི་འཇིགས་སྟོབས་བཅུའི་རྩལ་ལྡན་རྣམས།། རང་ཉིད་གཤེགས་པའི་ལམ་པོ་ཆེར།། མཁའ་མཉམ་ལུས་ཅན་བཀྲི་མཛད་པ།། ལྷན་སྐྱེས་འགྱུར་མེད་རང་བཞིན་ཉིད།། འཇིག་ལྟ་ཉི་ཤུའི་གཅོང་རོང་དུ།། ལྷུང་བའི་ཉམ་ཐག་སྐྱེ་དགུ་ལ།། འཕྲལ་ཡུན་དགོས་འདོད་ནོར་བུའི་དཔྱ།། ལྷུག་པར་འཇོ་བ་དེ་རྨད་དོ།། ཉིན་བྱེད་སྣང་བས་མི་མཚོན་པའི།། སྤྲུལ་རབས་རྒྱ་མཚོའི་རྡུལ་གྲངས་ལས།། བརྒལ་བས་མཐའ་ཡས་གདུལ་བྱ་ལ།། སྨན་པའི་ལེགས་མཛད་བསམ་ལས་འདས།། བྱིན་རླབས་ཉི་མའི་རྩེ་དགའ་དང་།། དགེ་ལེགས་མི་ཟད་སྦྲང་རྩིའི་དཔལ།། ཅིར་ཡང་འཕྲུལ་བ་དངོས་པོའི་གཤིས།། འཇམ་དབྱངས་འཁོན་གྱི་གདུང་རྒྱུད་ལ།། ཡེ་ཤེས་སྤྱན་གྱིས་མངོན་གཟིགས་ཏེ།། བིས་མདོའི་ཡུལ་གྲུར་དག་པའི་སྐུས།། ལྷུམས་སུ་ཞུགས་པའི་དགེ་མཚན་བསྟན།། ལྷ་དང་བླ་མ་དགོངས་གཅིག་གིས།། བློ་བཟང་ཆོས་ཀྱི་ཉི་མ་ཆེ།། དགེ་ལེགས་རྣམ་པར་རྒྱལ་བ་སྟེ།། མི་འཇིགས་གདོང་ལྔའི་ཁྲི་ལ་བཀོད།། རླབས་ཆེན་ཚོགས་གཉིས་འོ་མའི་བཅུད།། གསོས་སུ་སྨིན་པ་སེང་གེའི་བུ།། འཕྲིན་ལས་ཉི་ཟླ་འབར་བ་ཞིག། གངས་རིའི་རྩེ་མོར་མཆོང་བར་རྩོམ།། རྒྱལ་བ་རྒྱལ་བྱེད་ཚལ་དུ་གཤེགས་པ་བཞིན།། ཆོས་ཀྱི་ཉི་མའི་ཆོས་སྲིད་ཁྲི་འཕང་ལ།། ཡོན་ཏན་ཏིལ་གྱི་གང་བུ་ལྟར་གྱུར་པ།། མཚན་དཔེས་བརྒྱན་པའི་མཆོག་སྤྲུལ་གཞོན་ནུ་འགྱིངས།། འཇིགས་མེད་འཕྲིན་ལས་ཆོས་ཀྱི་རྒྱ་མཚོ་ཆེར།། བསླབ་ཚིག་སྔ་མ་ཤྲ་མ་ནེ་རའི་སྡོམ།། ངེས་པ་ལྔ་བྲལ་ཉེས་མེད་ཕུན་ཚོགས་སུ།། བཞེས་ཏེ་རྣམ་བྱང་ཞི་བའི་ལམ་དུ་ཞུགས།། རྨོངས་མུན་ཐོས་པའི་སྒྲོན་མེས་མ་སྦྱངས་ན།། བླང་དང་དོར་བྱའི་དེ་ཉིད་མི་མཐོང་བས།། མཚན་ཉིད་བཅུ་ལྡན་བཤེས་གཉེན་དུ་མ་ལས།། མདོ་རྒྱུད་སྦྲང་རྩིའི་དགའ་སྟོན་ཚད་མེད་བཞེས།། གང་ཤར་དག་པའི་རོལ་བར་འཆར་བ་ཡི།། གཟིགས་མོར་སྔོན་ནས་གོམས་པའི་བག་ཆགས་ཀྱིས།། སྣང་གྲག་རིག་གསུམ་བདེ་སྟོང་རྣམ་རོལ་ཏུ།། ཤར་བའི་ངང་ལ་ཉིན་དང་མཚན་དུ་འབྱམས།། འདྲེན་པ་ཁྱོད་དང་གཟི་བརྗིད་རྒྱལ་བོའི་དབང་།། གཉིས་མེད་གཉིས་སུ་སྣང་ཞིང་ཤར་བ་དང་།། གཅིག་ཀྱང་དུ་མར་སྟོན་པའི་སྒྱུ་འཕྲུལ་ནི།། སྒྱུ་མ་ལས་ཀྱང་སྒྱུ་མའི་ཆོ་འཕྲུལ་ཉིད།། དགུང་གྲངས་རྒྱལ་སྲིད་གྲངས་སུ་སླེབས་པའི་དུས།། མ་འོངས་དོན་རྣམས་མངོན་གསལ་མཛུབ་ཚུགས་སུ།། སྟོན་པའི་རྡོ་རྗེའི་བཀའ་ལུང་འགྱུར་མེད་པ།། གསུངས་པའི་དོན་དེ་དེ་བཞིན་མངོན་དུ་གྱུར།། ཐུབ་དབང་གངས་རི་ལས་འོངས་པའི།། རྟེན་འབྱུང་ཟབ་མོའི་ཉལ་འགྲོའི་རྒྱུན།། ཀླུ་སྒྲུབ་ཐུགས་མཚོར་འཁྱིལ་བ་གང་།། ཁྱོད་ཀྱི་རྣམ་དཔྱོད་ཧུབ་ཀྱིས་བཞེས།། ཐོས་པའི་མེ་ཏོག་གྲངས་མང་ཡང་།། བསམ་སྒོམ་སྦྲང་རྩིའི་བཅུད་མེད་ན།། བུང་བའི་དགའ་སྟོན་མི་འགྱུར་ཏེ།། རི་མོར་བྲིས་པའི་མར་མེ་བཞིན།། དེ་ཕྱིར་ཐོས་བསམ་ལྗོན་པ་ལས།། སྒོམ་པའི་འབྲས་བུ་ཆེར་སྨིན་པའི།། སྐུ་བཞིའི་རོ་ལ་ལོངས་སྤྱོད་པ།། མཁས་གྲུབ་རྣམ་ཐར་ཁྱོད་ཀྱིས་བཞེས།། དཔག་མེད་བསྐལ་པའི་སྔ་རོལ་ནས།། སྤངས་རྟོགས་མ་ལུས་མཐར་ཕྱིན་ཀྱང་།། གང་ལ་དེ་འཚམས་ཐབས་མཁས་ཀྱིས།། ལམ་ལ་སློབ་པའི་བརྟུལ་ཞུགས་བསྐྱངས།། སྐྱེ་དགུའི་རྨོངས་པའི་མུན་སེལ་བས།། ཉིན་མོར་བྱེད་དང་མཚུངས་མོད་ཀྱང་།། ཉི་མས་ཚ་གདུང་སྐྱེད་བྱེད་ལ།། ཁྱོད་ཀྱིས་སྡུག་བསྔལ་ལྷག་མེད་འཇོམས།། བསྟན་འགྲོའི་ཀུ་མུད་རྒྱས་མཛད་པས།། མཚན་མོའི་མགོན་དང་མཚུངས་མོད་ཀྱང་།། ཁྱོད་ཀྱི་ཡོན་ཏན་ཆ་ཤས་ནི།། འགྲིབ་པ་ནམ་ཡང་མ་མཆིས་སོ།། སྡིག་པའི་ནགས་ཚལ་སྲེག་པ་ལ།། བསྐལ་པའི་མེ་དང་ཆེས་འདྲ་མོད།། མགོན་པོ་ཁྱོད་ཀྱི་ཐུགས་རྒྱུད་ནི།། སྙིང་རྗེའི་རླན་གྱིས་གཏོང་བ་མེད།། ཁྱོད་དང་འདྲ་བ་ཡེ་མེད་པས།། ཨེ་མ་སྐྱབས་མགོན་ཁྱོད་ཉིད་ཀྱི།། དཔེ་ལ་རང་ལས་གཞན་མ་དམིགས།། ཕྱོགས་བཅུའི་རྒྱལ་བ་མ་ལུས་པ།། ཡབ་རྗེ་ཁྱོད་ཀྱི་སྤྲུལ་བ་སྟེ།། ཁྱོད་ཀྱང་རྒྱལ་བ་མ་ལུས་པའི།། རྣམ་འཕྲུལ་ཁོ་ནར་བདག་གིས་འཁུམས།། ཉི་ཟླ་བྱེ་བའི་སྒྲོན་ཐོགས་ཏེ།། སྲིད་ཞིའི་དབྱིངས་སུ་བཙལ་ན་ཡང་།། རྙེད་དཀའི་བསམ་འཕེལ་ནོར་བུ་ནི།། མགོན་ཁྱོད་ཁོ་ན་ལས་གཞན་མེད།། དངོས་ཀྱི་གདུལ་བྱ་རྫོགས་པ་ན།། བདེ་ཆེན་ཆོས་ཀྱི་ཕོ་བྲང་དུ།། ཆེད་དུ་བྱོན་ནས་གློ་བུར་དུ།། མཁའ་སྤྱོད་རྡོ་རྗེའི་ཞིང་དུ་གཤེགས།། འོན་ཀྱང་རྡུལ་བྲལ་ཡེ་ཤེས་སྤྱན།། དྲི་མ་མེད་པས་ཉེར་གཟིགས་ཏེ།། བརྩེ་ཆེན་དོན་ཡོད་ཞགས་པ་ཡིས།། ནམ་ཡང་མི་གཏོང་ཆོས་ཉིད་དོ།། བསམ་མི་ཁྱབ་ལ་དད་བྱས་པའི།། རྣམ་སྨིན་བསམ་གྱིས་མི་ཁྱབ་པས།། བདེ་ལྡན་ཞིང་མགོན་ཁྱོད་ཉིད་ལ།། དད་ཅིང་གུས་པས་འདི་ལྟར་བྲིས།། སྙིང་ལ་རྨོངས་པའི་མུན་པ་ནག། ལྕེ་ལ་ལོག་སྨྲའི་གཏེར་བརྒྱ་བརྡོལ།། སྐལ་ཆད་དག་ལ་སུ་ཞིག་སེམས།། དད་ལྡན་དགའ་བ་སྐྱེ་བར་ངེས།། དུག་ལྔ་སྤུངས་པའི་ལྷུན་པོ་ལ།། སངས་རྒྱས་སྟོང་གི་མཐུ་རྡུགས་པས།། བཞད་གད་སྙིང་རྗེའི་ཡུལ་ལས་ཅི།། ཁྱེད་ཅག་ཅི་དགར་བྱ་བའི་རིགས།། ཚེ་རབས་ཀུན་ཏུ་དགེ་བའི་བཤེས།། འཇམ་དབྱངས་ལྟ་བུས་རྗེས་བཟུང་སྟེ།། ཟབ་རྒྱས་དེ་ཉིད་འབྱེད་པ་ལ།། ཟླ་བྲལ་ཤེས་རབ་ཐོབ་པར་ཤོག།
རྩོམ་སྒྲིག་པ། : མཁའ་འགྲོ་ཚེ་བརྟན།
