གཅིག གེ་སར་རིག་པའི་ལམ་དུ་བཞུད་པའི་ལོ་རྒྱུས།
དེ་ཡང་སེང་བློན་རྒྱལ་པོའི་ཕོ་བྲང་སྐྱིད་ཀྱི་ལྷ་མཁར་ལྡེམ་པའི་བདག་པོ། སྒྲུང་ངག་སྙན་མོ་ཁུ་བྱུག་མགྲིན་དང་བསྒྲུན་པའི་སྒྲུང་པ། ཆོས་དང་རིག་གནས་ཟུང་ལ་བྱང་ཆ་མངའ་པའི་མཁས་པ། མཚོ་སྔོན་ནང་བསྟན་སློབ་གླིང་དུ་དགོན་སྡེའི་སློབ་དཔོན་གྱི་འཛིན་ཡིག་ཆོ་ལོ་བཞེས་པ་བཅས་ཀྱི་འཕྲིན་ལས་འགངས་ཆེན་མང་པོ་དཀྱུས་གཅིག་ཏུ་ཕྲག་ཏུ་ཐེག་པའི་སྤྲུལ་སྐུ་དབང་ཆེན་འཕྲིན་ལས་མཆོག་ནི། གཟའ་སྐར་འཕྲོད་སྦྱོར་བཟང་བོ་སྟེ་སྤྱི་ལོ་1973ལོའི་ཟླ་6ཚེས་7ཉིན་ཕ་མཚོ་ཤུལ་སྤུ་ལོ་དང་མགོ་བཟའ་ཆོས་སྨིན་གཉིས་ལས་གནས་ཡུལ་མགོ་ལོག་རྨ་སྟོད་མཁར་སྐོར་སྡེ་བའི་འབྲོག་ཁྱིམ་དཀྱུས་མ་ཞིག་ཏུ་སྐུ་བལྟམས། ཁོང་སྐུ་ན་ཕྲ་བའི་དུས་ནས་ལྷན་སྐྱེས་ཀྱིས་བོད་པའི་ཆོས་དང་རིག་གནས་ལ་དགའ་བ་དང་དུངས་པ་ཆེ་བས་ཐོས་བསམ་མི་དམན་པ་མཛད་དེ་གྲུབ་འབྲས་གཡུར་དུ་ཟ་བ་བླངས། སྐབས་དེར་ཁོར་ཡུག་གི་མི་རྣམས་ཀྱིས་དུས་རྒྱུན་ཁོང་ནི་བློ་རིག་ལྡན་ལ་མི་གཤིས་འཇམ་པ། ང་རྒྱལ་མེད་ལ་བྱམས་སེམས་ལྡན་པ། ལྷག་བསམ་ཡོད་ལ་གཏོང་ཕོད་མངའ་བའི་བྱིས་ཆུང་ཡ་རབས་ཤིག་རེད་ཟེར་ནས་གླེང་བཞིན་གདའ།
ཁོང་ཉིད་ཆུང་བའི་དུས་ནས་སྟབས་ལེགས་པ་ཞིག་སྟེ། ཁོང་གི་ཕ་དང་ཨ་ཞང་གཉིས་ནི་གེ་སར་རིག་གནས་ལ་དད་འདུན་ཆེ་ཞིང་ནམ་རྒྱུན་སྒྲུང་གླུ་ལེན་རྒྱུར་ཧ་ཅང་དགའ་བོ་ཡོད་པར་བརྟེན་ཁོང་ལ་ཆུང་བའི་དུས་ནས་གེ་སར་སྒྲུང་གི་བག་ཆགས་ཟབ་མོ་བཞག་ཡོད། ཁོང་ལགས་ལ་ཆུང་དུས་ནས་ལྷན་སྐྱེས་ཀྱི་སྐད་ངག་སྙན་མོ་ཞིག་ཡོད་པར་བརྟེན་དུས་རྒྱུན་རི་ཀླུང་ནགས་གསུམ་དུ་རྐང་བཞི་རྟ་ནོར་ལུག་སོགས་ཀྱི་རྫི་བོ་བྱེད་ཞོར་དུ་ཕ་དང་ཨ་ཞང་གཉིས་ཀའི་སྒྲུང་ངག་ཡག་པོ་སྟེ། སྤྱི་དཔོན་དལ་བ་རིང་མོ། འདན་མའི་ཐ་ལ་དྲུག་འགྱུར། དགའ་སྡེའི་དགྲ་དཔུང་ཟིལ་གནོན། གུ་རུའི་ལྷ་ངག་རིང་མོ། ཤན་པའི་འབྲས་རིང་འབྲས་ཐུང་། ཁྲོ་ཐུང་ཧ་རཱ་ཧུར་ཐུང་སོགས་དང་། ལྷག་པར་སྒྲུང་མཁན་སྐལ་བཟང་གྲགས་པ་དང་དགའ་བདེ་རྫོང་དུར་བུད་ཚོ་བའི་ངག་རིག་སོགས་དམངས་ཁྲོད་ཀྱི་སྒྱུ་རྩལ་པ་གྲགས་ཅན་མང་པོ་ལ་སྦྱང་པ་གང་ནུས་མཛད། ཕྱིས་སུ་《འཁྲུང་གླིང་མེ་ཏོག་ར་བ》《ཧོར་གླིང་གཡུལ་འགྱེད》《རྨ་ས་གཟུང་》 《རྟ་རྒྱུག་ནོར་བུ་ཆ་བདུན》《རྨ་ཤེལ་བྲག》 《འཛམ་གླིང་སྤྱི་བསང་》《དམྱལ་གླིང་རྫོགས་པ་ཆེན་པོ》སོགས་སྒྲུང་དེབ་འདི་ཚོ་ཁོང་ཉིད་ཆུང་དུས་རྫི་བོའི་འགྲོ་རོགས་འབའ་ཞིག་ཡིན་ལ། བཤད་གྱེར་ལ་བྱང་ཆ་ལྡན་པར་གྱུར་འདུག ། དུས་དེར་གཡས་གཡོན་གྱི་གྲོགས་པོ་མང་བོས་ནམ་རྒྱུན་ཁོང་གི་སྒྲུང་ངག་སྙན་མོར་ལོངས་སྤྱོད་བྱེད་བཞིན་མཆིས། ད་དུང་སྒྲུང་དཔེ་ནི་ཁོང་གི་དགེ་བའི་བཤེས་དང་སྡོངས་པའི་གྲོགས་སུ་གྱུར་འདུག། ཡི་གེ་མི་ཤེས་པ་ནི་ཤེས་པ་དང་ཤེས་པ་ནི་བྱང་ཆ་ཡོད་པ་བརྒྱུད་ནས་རིམ་གྱིས་གླིང་རྗེ་གེ་སར་རྒྱལ་པོ་དང་། གླིང་གི་དཔའ་རྟུལ་སོ་སོ། མོ་སྨན་ཚོའི་གཟི་བརྗིད་དང་མཛེས་པའི་ཉམས་འགྱུར། གསུང་གི་ལེགས་བཤད། སྙན་མོའི་དབྱངས་རྟ། དཔའ་ངར་ཞུམ་མེད་ཀྱི་སྙིང་སྟོབས། ལྷག་བསམ་འོད་དཀར་གྱི་ཐུགས་འདུན། ཉམ་ཆུང་འགྲོ་བའི་བྱམས་སེམས་བཅས་པའི་ལོ་རྒྱུས་ལ་གོ་བ་ཆགས་པ་དང་ཡིད་ལ་བརྗེད་ཐབས་མེད་པའི་རི་མོ་བརྐོས་དང་མཚུངས། ད་དུང་ཞོར་དུ་གངས་ཅན་ལྗོངས་ཀྱི་གནའ་བོའི་སྲོལ་རྒྱུན་རིག་གནས་སྣ་ཚོགས་དང་རིན་ཐང་བྲལ་བའི་རི་ཆུའི་རིག་གནས་སོགས་ལ་རྒྱུས་ལོན་དང་སློབ་སྦྱོང་བགྱིད་པའི་གོ་སྐབས་ཀྱང་རྩ་ཆེན་སྩལ་ཏོ།།
ཕྱིས་སུ་རིམ་གྱིས་ཁུལ་དང་རྫོང་། ཡུལ་ཚོ། གྲོང་སྡེ་བཅས་སུ་བསྡུས་པའི་སྒྲུང་བཤད་ཀྱི་འགྲན་བསྡུར་དང་སྤྲོ་ཚོགས་བཅས་སུ་ཞུགས་ཏེ་ཁོང་གི་སྒྲུང་གླུ་སྙན་མོ་བླངས་པར་མང་ཚོགས་ཀྱིས་དགའ་བསུ་ཐོབ་པ་དང་གཟེངས་རྟགས་ཀྱང་བླངས་མྱོང་།
ཁྱད་པར་དུ་2021ལོའི་ཟླ་6ཚེས་26ཉིན་ཁོང་ཉིད་མཚོ་སྔོན་ཞིང་ཆེན་གེ་སར་སྒྲུང་སློབ་ཚོགས་ཀྱི་ལོ་ཚོགས་དང་སྒྲུང་བཤད་ཚོགས་འདུའི་སྟེང་ཞུགས་ནས་སྒྲུང་ངག་སྙན་མོ་བླངས་པར་ཚོགས་ཞུགས་མཁས་པ་དང་སྒྲུང་པ་ཚོས་ཁས་ལེན་དང་གདེང་འཇོག་ལེགས་པོ་གནང་ཞིང་། ད་དུང་སྒྲུང་པ་ཕུལ་བྱུང་ཅན་གྱི་གཟི་བརྗིད་དཔང་ཡིག་གནང་ནས་བསྟོད་པའི་མེ་ཏོག་ཕྱོགས་བཞིར་གཏོར།
སྤྱིར་སྒྲུང་པ་ལ་རིགས་མི་འདྲ་བ་བདུན་ཙམ་ཞིག་ཡོད་པ་ལས། སྒྲུང་པ་གང་འདྲ་ཞིག་ཡིན་ན་ཡང་ཐོག་མར་ཚང་དགོས་པའི་ཆ་རྐྱེན་ནི། གླིང་གེ་སར་རྒྱལ་པོར་སྒོ་གསུམ་གུས་པས་དད་པ་ཟློག་མེད་དང་གསལ་དག་བརྟན་གསུམ་གྱི་བསྐྱེད་རྫོགས་ཀྱི་ལྟ་བ། དེ་མིན་རང་བྱུང་གི་ངག་གི་སྙན་ཆ་བཅས་འཛོམས་ན་ཀུན་གྱིས་དགའ་བསུ་ཐོབ་པ་སྨྲ་མི་དགོས། ཡིན་ནའང་བབས་སྒྲུང་དང་གཏེར་སྒྲུང་པྲ་སྒྲུང་པ་ཚོར་མཚོན་ན་གོང་གི་ཆ་རྐྱེན་དང་མི་མཐུན་པ་ཡང་ཡོད་པས་སྒྲུང་པ་ཡོད་དོ་ཅོག་ཚད་ཐིག་གཅིག་ཡིན་དགོས་པའི་ངེས་པ་མེད་དོ།།
སྒྲུང་བཤད་ཀྱི་ཁྱད་ཆོས་གཙོ་བོ་སྟེ། སྒྲུང་བཤད་པའི་སྐབས་སུ་གཏམ་རྒྱུད་ཀྱི་འགྱུར་བ་ལྟར་གདོང་གི་ཉམས་འགྱུར་སྟོན་པ། ལག་གི་ཕྱག་རྒྱ་མངོན་པ། རྐང་བའི་སྟངས་སྟབས་བསྒྱུར་བ། ད་དུང་སྒྲུང་ཞྭ་དང་སྒྲུང་ལྭ་མནབ་པ། སྒྲུང་རྟ་སྙན་མོས་དབྱངས་འགུག་པ། སྨྲ་བརྗོད་དག་པའི་ཚིག ། གོ་བདེ་ཉན་སླ་བ་སོགས་ཀྱི་ཁྱད་ཆོས་འཛོམ་རྒྱུ་ནི་ཤིན་ཏུ་གལ་འགངས་ཆེའོ།།
སྒྲུང་པ་དབང་ཆེན་འཕྲིན་ལས་ལ་མཚོན་ན་གོང་ཞུའི་ཆ་རྐྱེན་སྤྱིར་བཏང་དུ་འཛོམས་པ་དང་ཁོང་ཉིད་སྒྲུང་པའི་རིགས་བདུན་ལས་བསླབ་སྒྲུང་ངམ་བརྒྱུད་སྒྲུང་ལ་གཏོགས། ཁོང་གི་བློ་ནས་བཤད་པའི་སྒྲུང་དེ་རིགས་སྒྲུང་དཔེ་ལས་བློར་བཟུང་བ་མ་གཏོགས་བབས་སྒྲུང་དང་གཏེར་སྒྲུང་ཇི་བཞིན་བཤད་མི་ཚར་བའི་ཁྱད་ཆོས་མེད་པས་ན་བསླབ་སྒྲུང་ལ་གཏོགས་པ་ཤ་སྟག་རེད། རང་གི་སྡུག་རུས་དང་བརྩོན་འགྲུས་ལ་བརྟེན་ནས་བྱུང་བ་མ་གཏོགས་ལྷ་དང་གཟུགས་མེད་ཀྱི་རོགས་འདེགས་ལས་རང་བྱུང་མིན་པ་ཤེས་དགོས་སྙམ།
གནའ་མིའི་ངག་རྒྱུན་ལ། བརྩོན་འགྲུས་ཅན་གྱི་འདོད་དོན་འགྲུབ་ཟེར་བ་ནང་བཞིན་ད་ལྟ་ཁོང་གིས་སྔར་ལྟར་གླིང་སྒྲུང་ཆད་མེད་དུ་འཆད་གྱེར་བྱེད་པ་དང་མཚུངས་སུ་སྒྲུང་བཤད་ཀྱི་དབྱངས་རྟ་དང་ཉམས་འགྱུར་ལ་སོགས་ཀྱི་རྒྱུ་སྤུས་ཇེ་ལེགས་སུ་གཏོང་གིན་ཡོད་ལ། ཞོར་དུ་ཁོང་གིས་གསར་འཛུགས་གནང་བའི་གླིང་རྗེ་གེ་སར་རྒྱལ་པོའི་ཕ་མཁར་སྐྱིད་ཀྱི་ལྷ་མཁར་ལྡེམ་པའི་རྣམ་ཐར་ཚོགས་པ་དགྲ་ལྷ་དགྱེས་འཛོམས་ཀྱི་འཁྲབ་ཁྲིད་དང་ཟབ་སྦྱོང་ལ་འབད་འབུངས་བྱེད་པ་དང་། ད་དུང་སྒྲུང་ངག་རྙིང་བ་རྒྱུན་ཆད་ལ་ཉེ་བ་དག་ཉམས་པ་སོར་ཆུད་དང་རྒྱུད་འཛིན་ཐད་དུ་བྱ་བ་མང་པོ་སྒྲུབ་བཞིན་ཡོད་ཅིང་། དེ་མིན་མ་འོངས་པར་གཙང་བོའི་རྒྱུན་བཞིན་བསྒྲུབ་རྒྱུའི་ཕུགས་འདུན་དམ་པོ་མཆིས།
2020ལོར་ཁོང་ཉིད་མཚོ་སྔོན་བོད་བརྒྱུད་ནང་བསྟན་སློབ་གླིང་ནས་མཐར་ཕྱིན་དེ་མཚན་ཉིད་རབ་འབྱམས་པའི་ཡོན་གནས་དང་བོད་བརྒྱུད་ནང་བསྟན་དགོན་སྡེའི་དཔེ་ཁྲིད་དགེ་རྒན་གྱི་ཡོན་གནས་བླངས།
ཉེ་ལམ་ད་རུང་དུང་རི་དགོན་པའི་བསྟན་པའི་འགན་དབང་སྤྱི་དང་བྱེ་བྲག་གླིང་རྗེ་གེ་སར་རྒྱལ་པོའི་ཕ་མཁར་སྐྱིད་ཀྱི་ལྷ་མཁར་ལྡེམ་པའི་བདག་སྐྱོང་ཐད་དུ་འབད་འབུངས་ལྷོད་མེད་གནང་བཞིན་མཆིས་སོ།
གཉིས། ཁྱད་འཕགས་ཀྱི་གྲུབ་འབྲས།
གཤམ་དུ་ཡབ་ཆེན་སེང་བློན་གྱི་ཕོ་བྲང་སྐྱིད་ཀྱི་ལྷ་མཁར་ལྡེམ་པ་ཇི་ལྟར་གསར་བཞེངས་གནང་བའི་བརྒྱུད་རིམ་དང་འབྲེལ་ནས་ཁོང་གི་ཁྱད་འཕགས་ཀྱི་གྲུབ་འབྲས་རགས་ཙམ་གླེང་ན་འདི་ལྟ་སྟེ།
གཅིག ། སེང་བློན་གྱི་ཕ་མཁར་ངོས་འཛིན་སྐོར། གཅིག་སྟེ་《མདོ་སྨད་ཆོས་འབྱུང་》དང་མཁས་དབང་དམུ་དགེ་བསམ་གཏན་ལགས་ཀྱི་གསུང་རྩོམ་ལས་བསྟན་པ་ལྟར་ན། རྒྱུ་དར་ས་ནག་ལུང་མདོ་སྟེ་རྨ་སྨད་གཡུ་ལུང་སུམ་མདོ་ཞེས་པ་གཡུ་ལུང་རྡོ་རྗེ་དྲག་རྩལ་ཟེར་བའི་གཞི་བདག་རི་བོ་མཛེས་ཤིང་བརྗིད་ཆགས་པའི་མདུན་ཞོལ་དུ་རྒྱུ་ཆུ་དང་དར་ཆུ་རྨ་ཆུ་སྟེ་ཆུ་གསུམ་འདྲེས་པའི་འདུས་མདོ་དེ་ད་ལྟའི་དར་ལག་རྫོང་གི་སེང་བློན་ཕ་མཁར་གྱི་གནས་འདིར་འཁེལ་ཡོད་ལ། ཕོ་བྲང་སེང་འབྲུག་སྟག་རྩེ་དང་སྤྱི་ལེ་བཅོ་ལྔ་ཡས་མས་སུ་ཆགས་ཡོད་པ་དག་ལས་ཀྱང་གསལ་བོ་ཤེས་ཐུབ། གཉིས་ཏེ་སྒྲུང་ཡིག་རྙིང་པ་《འཁྲུངས་གླིང་》དང་《རྨ་ས་བཟུང་དར་གྱི་མདུད་པ》《རྟ་རྒྱུག་རྒྱལ་འཇོག》《རྨ་ཤེལ་བྲག》བཅས་སུ་བསྟན་པའི་རྨ་སྨད་གཡུ་ལུང་སུམ་མདོ་ཡང་དར་ཆུ་དང་རྨ་ཆུ་རྒྱུ་ཆུ་བཅས་པ་འདྲེས་ཡུལ་འདིར་འཁེལ་ཡོད་པ་སུས་ཀྱང་ཤེས་གསལ་ལྟར་རོ།། གསུམ་སྟེ་གནའ་བོའི་མཁས་གྲུབ་གཉིས་ལྡན་གྱི་སྐྱེས་བུ་དམ་པ་ཚོ་དང་དེང་རབས་ཀྱི་གེ་སར་ཆེད་མཁས་པ་ཚོས་ལས་གཡུལ་དངོས་ལ་རྟོག་དཔྱོད་ཞིབ་འཇུག་བརྒྱུད་ནས་ངོས་འཛིན་བགྱིས་པ་དང་གཅིག་མཚུངས་རེད། བཞི་སྟེ་སེང་བློན་ཕོ་བྲང་བཞེངས་སྐབས་ས་སློག་པ་ལས་གནའ་བོའི་མདའ་མདུང་འཁྲབ་བཅས་ཀྱི་ལྕགས་རིགས་ངོ་མཚར་བ་རྙེད་བྱུང་བ་ལས་སྔོན་གྱི་གཡུལ་འགྱེད་ཀྱི་གནས་ཤིག་ཡིན་པ་ངོས་བཟུང་ཆོག །
གོང་གསལ་གྱི་བརྒྱུད་རིམ་རྣམ་དག་ལས་གསལ་བོར་ཐག་གཅོད་ཐུབ་པ་ནི་ཡུལ་འདི་ཡབ་ཆེན་སེང་བློན་གྱི་ཕོ་བྲང་གི་གནའ་ཤུལ་འཁྲུལ་མེད་ཡིན་པ་མཚོན་ཐུབ་ལ་གེ་སར་སྐུ་ན་ཕྲ་དུས་ཡང་གནས་འདི་ནས་ད་ལྟའི་སེང་འབྲུག་སྟག་རྩེའི་ཡུལ་དེར་ཕེབས་པར་འདོད། འདི་ཡང་སྤྲུལ་དབང་ཆེན་འཕྲིན་ལས་ཀྱི་འབད་པ་ལས་བྱུང་བའི་གྲུབ་འབྲས་ཡིན་པ་གདོན་མི་ཟའོ།།
གཉིས། ཡབ་ཆེན་སེང་བློན་རྒྱལ་པོའི་ཕོ་བྲང་གི་གནས་ཡུལ་ངོས་འཛིན་གསལ་བོ་བྱས་རྗེས། སྤྲུལ་དབང་ཆེན་འཕྲིན་ལས་ཀྱིས་ཕོ་བྲང་གནས་ཡུལ་གྱི་རྒྱུ་ཆ་ཁ་ཚང་དང་སྙན་ཞུ་ཡི་གེ་དག་བསྣམས་ནས་ཞིང་ཆེན་དང་མགོ་ལོག་རིག་གནས་ཅུའུ། དར་ལག་སྲིད་གཞུང་བཅས་པར་ཆས་ནས་དེ་སྐབས་དུས་ཀྱི་འབྲེལ་ཡོད་འགོ་ཁྲིད་དང་གེ་སར་ཆེད་མཁས་པ་རྣམས་པར་ཡར་ཞུས་བྱས། དེར་ཡང་འབྲེལ་ཡོད་འགོ་ཁྲིད་དང་ཆེད་མཁས་པ་ཚོས་གཙིགས་འཛིན་དང་བླངས་གནང་སྟེ་སྐུ་དངོས་སུ་ས་གནས་དངོས་སུ་ཕེབས་ཤིང་། རྟོག་དཔྱོད་གང་ནུས་མཛད་རྗེས་ཚང་མས་མཐའ་གཅིག་གིས་གནའ་ཤུལ་ཁས་ལེན་གནང་པ་མ་ཟད། དར་ལག་རྫོང་མི་དམངས་སྲིད་གཞུང་གི་མཛུབ་སྟོན་ལྟར་འབྲེལ་ཡོད་ལས་ཁུངས་ཀྱིས་སེང་བློན་ཕོ་བྲང་འཛུགས་སྐྲུན་གྱི་འཆར་གཞིར་མཆོག་ཆེན་གནང་། དེ་ནས་ལུགས་མཐུན་གྱི་ངང་ནས་གསར་བཞེངས་ཀྱི་བཀོད་པ་གཏན་དུ་འཁེལ།
གསུམ། དེ་ནས་སེང་བློན་ཕོ་བྲང་གི་འཛུགས་སྐྲུན་འགོ་བརྩམས་ནས་བཞེངས། ཕོ་བྲང་གི་ཕྱིའི་བཀོད་པ་དང་ནང་གི་རྟེན་བཞེངས་ཐམས་ཅད་སྒྲུང་དཔེའི་ནང་དུ་གསུང་བ་ཇི་བཞིན་འཛུགས་སྐྲུན་བགྱིས་པས་གནའ་བོའི་བཟོ་བཀོད་ཀྱི་ཁྱད་ཆོས་ཕུན་སུམ་ཚོགས་འདུག། ནང་གི་རྟེན་བཞེངས་ཏེ་གེ་སར་རྒྱལ་པོ་དང་སེང་ལྕམ་འབྲུག་མོ། དཔའ་རྟུལ་སུམ་ཅུ་བཅས་ཀྱི་སྐུ་བརྙན་བཞེངས་པ་གསོན་ཉམས་ལྡན་ལ། སོ་སོའི་ཐུན་མིན་གྱི་ཁྱད་ཆོས་འབུར་དུ་ཐོན་ཡོད། ད་དུང་གེ་སར་གྱི་ཐང་ག་ལས་བྲིས་པའི་གླིང་སྒྲུང་གི་གཏམ་རྒྱུད་དག་མཐོང་མ་ཐག་ཏུ་ཡིད་འཕྲོག་ལ་སྤྲོ་བ་བསྐྱེད་ཐུབ་པའི་ནུས་པ་ལྡན། ཐང་ག་རེ་རེའི་རི་མོ་དང་བྱུག་པའི་མཚོན་མདངས་དག་ལ་བརྟག་ན་ཚད་ལྡན་ཡིན་པ་མ་ཟད། འགྲོ་སོང་ཡང་ཆེན་པོ་བཏང་ཡོད་པ་ཤུགས་ནས་མཚོན་ཐུབ། སེང་བློན་ཕོ་བྲང་ཕྱི་ནང་བསྐྱར་བཞེངས་ཀྱི་སྤྱིའི་འགྲོ་སོང་ཕལ་ཆེར་དམངས་སྒོར་ཁྲི་1300ལྷག་བཏང་ཡོད། འདི་ཡོངས་རྫོགས་སྤྲུལ་དབང་ཆེན་འཕྲིན་ལས་ཀྱི་འགན་བླངས་ནས་རང་གི་ཚོང་ལས་ཀྱི་དཔལ་འབྱོར་ཡོང་འབབ་ཁོ་ནས་བཞེངས་སྐྲུན་མཛད་དོ། །
བཞི། 2009ལོར་ཁོང་གི་འཆར་འགོད་ལྟར་གླིང་རྗེ་གེ་སར་རྒྱལ་པོའི་ཕ་མཁར་སྐྱིད་ཀྱི་ལྷ་མཁར་ལྡེམ་པའི་ཕོ་བྲང་ཕྱི་ནང་གི་རྟེན་དང་བརྟེན་པ་བཅས་བསྐྱར་བཞེངས་ཀྱི་འགོ་བརྩམས། 2012ལོར་བདེ་བླག་ངང་ལེགས་འགྲུབ་བྱུང་སྟེ་སྲོལ་རྒྱུན་གྱི་འགྲོ་རིམ་ལྟར་རབ་གནས་གཟབ་རྒྱས་ངང་མཛད། སེང་བློན་རྒྱལ་པོའི་གྱི་ཕོ་བྲང་གི་ཕྱིའི་བཀོད་པ་དང་ནང་གི་རྟེན་བཞེངས་ཆ་ཚང་དབང་ཆེན་འཕྲིན་ལས་མཆོག་གི་རྣམ་དཔྱོད་ཀྱི་བློ་རིག་ལས་བྱུང་བའི་ཇུས་འགོད་དང་ནང་དོན་སྒྲིག་གཞི། རྒྱུ་ཆ་ཚད་ལྡན། ལོ་རྒྱུས་ཉམས་ཞིབ་སོགས་ལྟར་འཛུགས་སྐྲུན་མཛད་པར་ཀུན་གྱིས་བསྟོད་བསྔགས་ཡག་པོ་ཐོབ་མྱོང་།
ལྔ། ཡབ་ཆེན་སེང་བློན་གྱི་ཕོ་བྲང་སྐྱིད་ཀྱི་ལྷ་མཁར་ལྡེམ་པ་གཞི་ཆགས་པར་བརྟེན་ནས་གེ་སར་གྱི་ཟློས་གར་ཚོགས་པ་བཙུགས་ཤིང་གླིང་བྲོ་བདེ་ཆེན་རོལ་མོ་འཁྲབ་སྟོན་གནང་དང་གནང་བཞིན་ཡོད་ཅིང་། ད་དུང་གེ་སར་སྒྲུང་པ་སྐྱེད་སྲིང་གི་ལས་འགན་འཁུར་ནས་ཐེངས་མང་ལ་རང་ས་གནས་ཀྱི་སྒྲུང་བཤད་ཚོགས་འདུ་བསྡུས་ནས་སྒྲུང་པ་གསར་བ་འཚར་ལོངས་བྱུང་། དེ་དག་ལས་ཀྱང་སྒྲུང་པ་ལྷུན་པོ་དང་དབང་མཛད། བདེ་ལེགས། དུང་པོ། ཚེ་རྡོར། འཕགས་སྐྱེས། ཞི་འབྲུག །གསེར་སྐྱབས་སོགས་ལ་མང་ཚོགས་ཀྱིས་དགའ་བསུ་ཚད་མེད་ཐོབ་འདུག།
དྲུག ། 2023ལོའི་དབྱར་ཟླ་བརྒྱད་པའི་ནང་ཁོང་གིས་རྩ་འཛུགས་བགྱིས་ནས་ཡབ་ཆེན་སེང་བློན་ཕོ་བྲང་སྐྱིད་ཀྱི་ལྷ་མཁར་ལྡེམ་པ་བཞེངས་ནས་བགྲང་བྱ་བཅོ་ལྔའི་རྗེས་དྲན་གྱི་གེ་སར་རིག་གཞུང་མཁས་པའི་བགྲོ་གླེང་སྤེལ། ཚོགས་འདུ་ཐོག་ཏུ་གེ་སར་རིག་གནས་ཀྱི་གནད་སའི་སྐོར་དང་ད་དུང་རྗེས་དྲན་གྱི་དོན་སྙིང་དགོས་དབང་སོགས་ལ་བགྲོ་གླེང་གང་ལེགས་མཛད་པ་མ་ཟད། ཀྲུང་གོའི་བོད་རིག་པ་ཞིབ་འཇུག་ལྟེ་གནས་ཀྱི་ལས་འཛིན་གཞོན་པ་ཟུར་པ་བློ་བཟང་ལྷུན་གྲུབ་རྡོ་རྗེ་དང་། མཚོ་སྔོན་ཞིང་ཆེན་གེ་སར་སློབ་ཚོགས་ཀྱི་ཚོགས་གཙོ་གཅོད་པ་དོན་གྲུབ་གཉིས་སེང་བློན་ཕོ་བྲང་གི་བློ་འདོན་པར་གདན་ཞུ་བྱས་ཤིང་། མཚོ་སྔོན་ཞིང་ཆེན་དགེ་འོས་སློབ་ཆེན་གྱི་སློབ་དཔོན་ཆེན་མོ་སྟོབས་ལྡན། མཚོ་སྔོན་ཞིང་ཆེན་གེ་སར་སྒྲུང་ཞིབ་འཇུག་ལྟེ་གནས་ཀྱི་ཀྲུའུ་རིན་འགྱུར་མེད་རྗེ། ཀྲུའུ་རིན་གཞོན་པ་སྙིང་བོ་ཚེ་རིང་གསུམ་ནི་སེང་བློན་ཕོ་བྲང་གི་ཞིབ་འཇུག་པ་ཆེན་མོར་གདན་ཞུ་བྱས་ནས་གདན་ཞུ་འཛིན་བྱང་གནང་འདུག །འདི་ཡང་སེང་བློན་ཕོ་བྲང་གི་གེ་སར་རིག་གནས་ཚད་ལྡན་ཅན་དུ་བསྒྱུར་བ་དང་རྒྱུན་འཛིན་དར་སྤེལ་བཅས་པར་ཕན་ནུས་བསམ་གྱིས་མི་ཁྱད་པ་མཆིས་པ་བསྙོན་དུ་མེད་དོ། །
བདུན། དེ་ཡང་ཉིས་སྟོང་བཅོ་བརྒྱད་ཀྱི་སྔ་རོལ་དུ་བདག་སོགས་མཚོ་སྔོན་གེ་སར་སྒྲུང་སློབ་ཚོགས་ཀྱི་ཆེད་མཁས་པས་བསམ་གཟས་ནས་སེང་བློན་ཕོ་བྲང་སྐྱིད་ཀྱི་ལྷ་མཁར་ལྡེམ་པར་རྟོག་དཔྱོད་ཞིབ་འཇུག་བྱས་པ་བརྒྱུད་ནས་2018ལོའི་ཟླ་5ཚེས་13ཉིན་གླིང་གི་ཡབ་ཆེན་སེང་བློན་རྒྱལ་པོའི་ཕོ་བྲང་སྐྱིད་ཀྱི་ལྷ་མཁར་ལྡེམ་པར་གེ་སར་རིག་གནས་ཞིབ་འཇུག་རྟེན་གཞིའི་རྡོ་རིང་བཙུགས་ཤིང་འཛིན་ཡིག་གནང་པ་འདིས། སེང་བློན་ཕོ་བྲང་ཁས་ལེན་དང་ཞིབ་འཇུག་གི་བྱ་འགུལ་སྤེལ་བར་དགེ་མཚན་མི་དམན་པ་མཆིས་འདུག
བརྒྱད། གཞན་ཡང་དབང་ཆེན་འཕྲིན་ལས་ཀྱིས་དབུ་འཛིན་གནང་ནས་དེང་རབས་ཀྱི་གློག་ཀླད་དང་སྐད་འཕྲིན། འཕྲིན་སྟེགས་བཅས་པ་བཀོལ་སྤྱོད་བྱས་དང་བྱེད་བཞིན་མཆིས། ཁྱད་པར་དུ་ཁོང་ཚོའི་འཕྲིན་སྟེགས་གསར་བ་བེད་སྤྱོད་ལེགས་པོ་བགྱིས་ནས་རྒྱལ་ཁབ་ཕྱི་ནང་དང་ཁྱད་པར་དུ་གེ་སར་རིག་གནས་ཀྱི་དོན་གསར་དང་འཕྲིན་གསར་ལམ་སང་ཕན་ཚུན་དུ་སྤེལ་ནས་གསར་འགྱུར་གང་མྱུར་གྱིས་མཐོང་ཐོས་མིག་གི་སྤྱོད་ཡུལ་དུ་གྱུར་ཐུབ་པའི་ནུས་པ་ཐོན་འདུག།དེངས་རབས་ཀྱི་ཆ་འཕྲིན་ཅན་གྱི་ཕྱོགས་སུ་མདུན་དུ་སྐྱོད་པ་འདིར་མངོན་པར་བསྟོད་པར་རིགས་སོ། །
གསུམ། ཕྱིས་འབྱུང་གི་འགན་ཁྲི།
གཅིག །ངེད་ཅག་གིས་བློ་སེམས་འགྱུར་མེད་ཀྱིས་ཞི་ཅིན་ཕིན་མཆོག་གི་མི་རིགས་སྲོལ་རྒྱུན་རིག་གནས་དང་ཁྱད་པར་དུ་གེ་སར་རིག་གནས་སྲུང་སྐྱོབ་དང་རྒྱུན་འཛིན་ལེགས་པོ་དགོས་པའི་སྐོར་གྱི་གསུང་བཤད་གལ་ཆེན་སློབ་སྦྱོང་ལག་ལེན་མཐར་ཕྱིན་བགྱིས་ནས་རྒྱལ་ཁབ་ཀྱི་སྲིད་ཇུས་དང་ཁྲིམས་ལུགས་ནང་བཞིན་གེ་སར་རིག་གནས་ཀྱི་བྱ་བ་བསྒྲུབ་པ་ལས་ཁྲིམས་འགལ་ལུགས་འགལ་གྱི་དོན་ངན་ཏིལ་ཙམ་ཀྱང་བསྒྲུབ་མི་རུང་ངོ།།
གཉིས། ངེད་ཅག་གིས་བྱ་འགུལ་ཅི་ཞིག་སྤེལ་ན་ས་གནས་སྲིད་གཞུང་གི་ཁྲིམས་སྲོལ་ལྟར་བསྒྲུབ་དགོས་ལ། གེ་སར་རིག་གནས་ཀྱི་ནང་དོན་དང་མི་མཐུན་པའི་བྱ་འགུལ་ཉུང་སྤེལ་དང་ཡང་ན་མི་སྤེལ་པ། གལ་སྲིད་བྱ་འགུལ་ཆེན་པོ་སྤེལ་འདོད་ན་ས་གནས་སྲིད་གཞུང་དང་གོང་རིམ་འབྲེལ་ཡོད་ལས་ཁུངས་ལ་སྙན་གསེང་ཕུལ་ཏེ་མཆོག་ཆེན་གནང་ན་ད་གཟོད་ལག་ལེན་བྱེད་ཆོག་གོ།
གསུམ། སྒྲུང་པ་སྐྱེད་སྲིང་དང་ཁོང་ཚོར་རྒྱབ་རོགས་གནང་དགོས། སྒྲུང་པ་ནི་གླིང་སྒྲུང་གི་གསར་གཏོད་པ་དང་རྒྱུན་འཛིན་པ་ཡིན། གལ་ཏེ་སྒྲུང་པ་མེད་ན་སྒྲུང་དཔེ་མེད་ཟེར་ནའང་ཆོག །དེའི་ཕྱིར་དུས་དང་རྣམ་པ་ཀུན་ཏུ་སྒྲུང་བཤད་ཀྱི་ཚོགས་འདུ་བསྡུ་དགོས་ལ། སྒྲུང་པའི་སྐད་ངག་དང་གླུ་རྟ། ཉམས་འགྱུར་བཅས་པ་སྦྱང་བ་གང་ལེགས་བགྱིས་ནས་ནང་བྱན་མཆིས་དགོས། ད་དུང་སྒྲུང་ཡིག་འབྲི་བ་དང་སྒྲ་ཕབ་པ། ཟིན་བྲིས་འགོད་པ་བཅས་སུའང་འབད་འབུངས་བྱས་ནས་ཚད་ལྡན་གྱི་དཔེ་སྐྲུན་ཁང་དུ་པར་སྐྲུན་ལ་བརྩོན་པར་བྱ་དགོས།
བཞི། གེ་སར་ཟློས་གར་གྱི་རྨང་གཞི་བརྟན་པོ་ཆགས་ཡོད་ཀྱང་ད་དུང་ཚད་ལྡན་ཡིན་པའི་ངེས་པ་མེད། དེས་ན་གླིང་བྲོ་བདེ་ཆེན་རོལ་མོ་ཡིན་ན་འདྲ། འཁྲུངས་གླིང་ཟློས་གར་ཆེན་མོ་ཡིན་ནའང་འདྲ། གང་དང་གང་ཡིན་རུང་ཟློས་གར་གྱི་འཁྲབ་གཞུང་དང་འཁྲབ་ཆས། ཉམས་འགྱུར། སྟངས་སྟབས། དབྱངས་རྟ་བཅས་པ་ཚད་ལྡན་ཡིན་དགོས་པ་མ་ཟད། སོ་སོར་ཁྱད་ཆོས་དོད་པོ་དགོས་ལ། གླིང་བྲོ་བདེ་ཆེན་རོལ་མོར་མཚོན་ན་གླིང་གི་བྲོ་གཞས་འབུར་དུ་ཐོན་པ་ཞིག་ཡིན་ན་བོད་པའི་རྡུང་ལེན་གྱི་དབྱངས་དང་བོད་པའི་ཟློས་གར་ཆེན་མོ་བརྒྱད་ཀྱི་སྟངས་སྟབས་དང་གཅིག་མཚུངས་ཡིན་ན་རང་སྟེང་གི་ཁྱད་ཆོས་མེད་པས་གསར་གཏོད་ལེགས་པོ་བགྱིད་དགོས་སོ།།
ལྔ། ཕྱིས་སུ་དགོས་དབང་གིས་གེ་སར་ཆེད་མཁས་པའི་རིག་གཞུང་བགྲོ་གླེང་ཚོགས་འདུ་སྤེལ་ཐུབ་ན་ཤིན་ཏུ་ལེགས། རྒྱུ་མཚན་ཡང་མི་ཤེས་པ་དང་ཚད་ལྡན་མིན་པ་སོགས་མཁས་པའི་བགྲོ་གླེང་བརྒྱུད་ནས་ཐག་གཅོད་བྱེད་དགོས། དཔེར་ན། གླིང་གི་མི་སྣའི་སྐུ་བརྙན་གྱི་ཐང་ག་དང་སྣང་བརྙན། གླིང་བྲོའི་དབྱངས་དང་ཉམས་སྟབས། གེ་སར་ཤུལ་རྟེན་དང་གནའ་རྫས་བཅས་པ་ཞིབ་འཇུག་ཐག་གཅོད་བྱེད་ཆོག
སྲིད་པའི་ཁ་དཔེར། རང་སྐལ་རུས་པ་ཡིན་རུང་བཏོག་དགོས། རང་ཞིང་བྲག་རི་ཡིན་ཡང་བརྐོ་དགོས་ཞེས་པ་ལྟར། གླིང་སྒྲུང་འདི་དཔའ་བོའི་རྟོགས་བརྗོད་ཙམ་ཞིག་མིན་པར། འདི་ལས་བོད་གནའ་རབས་ཀྱི་ཆབ་སྲིད་དང་དཔལ་འབྱོར། རིག་གནས། ཆོས་ལུགས། དམག་དོན། དམངས་སྲོལ། རྩོམ་རིག་སྒྱུ་རྩལ་བཅས་པ་ཀུན་འདུས་ཀྱི་ཕུང་བོ་ཞིག་ཡིན་པས་ངེད་ཅག་མི་རབས་འདིའི་སེམས་ནས་མི་དོར་བ་དང་། ངག་ལས་མི་ཆད་པ། ལག་ནས་མི་ཤོར་བ། གམ་ནས་མི་བོར་བ་བཅས་ཡོང་བར་འབད་པས་བརྩོན་པ་བསྐྱེད་དེ་རང་སྐལ་རིལ་ལུ་མ་འདི་མི་རབས་ནས་མི་རབས་གཙང་ཆུ་རིང་མོའི་རྒྱུན་ཇི་བཞིན་རྒྱུན་ཆད་མེད་པར་མདུན་ནས་མདུན་དུ་སྐྱོད་དགོས་ཤིང་ད་དུང་བསྐལ་བ་མ་སྟོང་བར་དུ་མི་ཆད་པའི་སྨོན་འདུན་ཡང་སྙིང་ནས་ཞུས།
2023ལོའི་ཟླ12པའི་ཚེས22ཉིན་གནའ་མཁར་གྱི་ཐང་ནས་རྒན་པོ་གཅོད་པ་དོན་གྲུབ་ཀྱིས་སྦྱར་བ་མཇུག་བསྒྲིལ་བ་དགེ་ལེགས་འཕེལ།