རྒྱ་གར་གྱི་དྲང་སྲོང་གྲོག་མཁར་གྱིས་བརྩམས་པའི་རཱ་མ་ཎའི་རྟོགས་བརྗོད་སྡེ་ཚན་བདུན་དང་དེབ་བརྒྱད་ཀྱི་བདག་ཉིད་ཅན་དེ་ཀྲུང་གོ་མི་རིགས་ཡིག་སྒྱུར་ཁང་བོད་ཡིག་ལོ་ཙཱ་ཁང་གི་ལོ་ཙཱ་བ་ཨོ་རྒྱན་གྱིས་ཆ་ཚང་བོད་ཡིག་ཏུ་བསྒྱུར་ཅིང་བོད་ལྗོངས་མི་དམངས་དཔེ་སྐྲུན་ཁང་གིས་དངོས་སུ་པར་དུ་བསྐྲུན།
རཱ་མ་ཎའི་རྟོགས་བརྗོད་དང་བྷ་ར་ཏ་ཆེན་མོའི་གཏམ་རྒྱུད་གཉིས་ནི་གནའ་བོའི་རྒྱ་གར་གྱི་དཔའ་བོའི་བྱུང་བ་བརྗོད་པའི་སྙན་ངག་རིང་མོ་གཉིས་ཡིན། རྒྱ་གར་དུ་རཱ་མ་ཎའི་རྟོགས་བརྗོད་ལ་ཆེས་ཐོག་མའི་སྙན་ངག་ཏུ་བརྗོད་ཅིང་རྒྱ་གར་རྩོམ་རིག་དང་འཛམ་གླིང་རྩོམ་རིག་གི་ལོ་རྒྱུས་ཐོག་སྐད་གྲགས་ཆེ་ཞིང་རྩོམ་རིག་དང་རིག་གནས་འཕེལ་རྒྱས་ལ་ཤུགས་རྐྱེན་ཆེན་པོ་ཐེབས་མྱོང་། བསྟན་བཅོས་གྲགས་ཅན་འདི་རང་རེ་བོད་ལ་གནའ་ནས་སྐད་གྲགས་ཆེ་ན་ཡང་དུས་ད་ལྟའི་བར་དུ་རྒྱ་གར་གྱི་དྲང་སྲོང་གྲོག་མཁར་གྱིས་བརྩམས་པར་གྲགས་པའི་རཱ་མ་ཎའི་རྟོགས་བརྗོད་ཆ་ཚང་བོད་ལ་འགྱུར་མེད་པས། འདིའི་སྐོར་གྱི་གནས་ཚུལ་ཞིབ་ཕྲ་སུ་ལ་ཡང་ཆ་རྒྱུས་མེད་པར་སྣང་བས་བསྟན་བཅོས་འདི་བོད་ལ་བསྒྱུར་རྒྱུ་ནི་ཤིན་ཏུ་གལ་ཆེན་པོ་རེད། ཉེ་ལམ་ཀྲུང་གོའི་མི་རིགས་ཡིག་སྒྱུར་ཅུས་བོད་ཡིག་ལོ་ཙཱ་ཁང་གི་ལོ་ཙཱ་བ་ཨོ་རྒྱན་གྱིས་རྒྱའི་མཁས་པ་ཆེན་མོ་སྐུ་ཞབས་ཅིས་ཞན་ལིན་གྱི་རྒྱ་འགྱུར་མའི་སྟེང་ནས་རཱ་མ་ཎའི་རྟོགས་བརྗོད་ཆ་ཚང་བོད་ཡིག་དུ་བསྒྱུར་བ་མ་ཟད་བོད་ལྗོངས་མི་དམངས་དཔེ་སྐྲུན་ཁང་གིས་པར་སྐྲུན་བྱས།
༡ རྩོམ་པ་པོ་ངོ་སྤྲོད་མདོར་བསྡུས།
རཱ་མ་ཎའི་རྟོགས་བརྗོད་ཀྱི་གླེགས་བམ་དང་པོ་གཞོན་ནུའི་སྡེ་རུ་འདིའི་རྩོམ་པ་པོ་དྲང་སྲོང་གྲོག་མཁར་ཡིན་པར་བཤད། རྒྱ་གར་དུ་དྲང་སྲོང་འདིའི་སྐོར་གྱི་བཤད་རྒྱུན་ཤིན་ཏུ་མང་། ལ་ལས་དྲང་སྲོང་ཞིག་ཡིན་པར་འདོད། ཁ་ཅིག་གིས་བྱ་རྒྱལ་ཁྱུང་ཆེན་གྱི་བུ་ཡིན་པར་བཤད། ཁོང་ཉིད་རཱ་མ་ཎའི་རྟོགས་བརྗོད་འདི་བརྩམས་པ་ལ་བརྟེན་ནས་རྒྱ་གར་རྩོམ་རིག་ལོ་རྒྱུས་ཐོག་གི་ཆེས་ཐོག་མའི་སྙན་ངག་མཁན་དུ་གྱུར་བ་རེད།
དེས་ན་གྲོག་མཁར་ནི་ང་ཚོས་ད་ལྟ་མཐོང་ཐུབ་པའི་རཱ་མ་ཎའི་རྟོགས་བརྗོད་སྡེ་ཚན་བདུན་དང་གླེགས་བམ་བརྒྱད་ཀྱི་བདག་ཉིད་ཅན་འདིའི་རྩོམ་པ་པོ་ཡིན་ནམ་ཞེ་ན།རཱ་མ་ཎའི་རྟོགས་བརྗོད་ཀྱི་ཐོག་མའི་རྣམ་པའམ་དེའི་བརྗོད་བྱར་གྱུར་བའི་གཏམ་རྒྱུད་རགས་པ་ནི་རྒྱ་གར་དམངས་ཁྲོད་དུ་དུས་སྔ་མོ་ནས་བྱུང་ཞིང་དེ་ནི་དོན་བརྗོད་སྙན་ངག་དང་།བསྟོད་པའི་སྙན་ངག་ཐུང་ངུ་སོགས་ཀྱི་རྣམ་པར་ཁ་ཐོར་དུ་ཡོད། དེ་དག་རིམ་བཞིན་དམངས་ཁྲོད་སྒྲུང་བ་རྣམས་ཀྱིས་སྙན་ནས་སྙན་དང་ངག་ནས་ངག་ཏུ་བརྒྱུད་སྤེལ་བྱས། བརྒྱུད་རིམ་འདིའི་ཁྲོད་རིམ་བཞིན་མ་ལག་ཇེ་རྒྱས་དང་བྱུང་རིམ་འཐུས་ཚང་། རྗོད་བྱེད་ཇེ་སྙན་དུ་བཏང་། དེ་ལྟར་དྲང་སྲོང་གྲོག་མཁར་གྱི་སྙན་དུ་བརྒྱུད་པ་ན་ཁོང་གིས་གཏམ་རྒྱུད་དམ་ངག་རྒྱུན་དེ་དག་ཕྱོགས་བསྡུས་དང་ལེགས་སྒྲིག་བྱས་ཏེ་གཞུང་ཆེན་མོ་འདིའི་བརྗོད་བྱའི་ནང་དོན་གྱི་ཆ་ནས་གོང་བསྒྲིགས་ཤིང་གཏམ་རྒྱུད་ཆ་ཚང་ཞིག་ཏུ་བཏང་བ་དང་། རྗོད་བྱེད་ཚིག་ཉམས་ཀྱི་ཆ་ནས་ཚིག་རྒྱན་དང་མངོན་བརྗོད་ཀྱིས་བཅིངས་ཤིང་སྙན་ངག་གི་ཉམས་དང་ལྡན་པར་བྱས་ཏེ། ཆེས་ཐོག་མའི་སྙན་ངག་ཏུ་འབོད་པ་འདི་བརྩམས་པ་དང་། དེ་ལ་བརྟེན་ནས་རང་ཉིད་ཀྱང་ཆེས་ཐོག་མའི་སྙན་ངག་མཁན་དུ་གྱུར་བ་རེད།
༢ བརྩམས་པའི་དུས།
རཱ་མ་ཎའི་རྟོགས་བརྗོད་དུས་ནམ་ཞིག་ལ་བརྩམས་པའི་སྐོར་ལ་མཁས་པ་མང་པོའི་ལྟ་ཚུལ་མི་མཐུན་ཏེ། རྒྱ་གར་གྱི་མཁས་པ་མང་པོ་ཞིག་གིས་རིག་བྱེད་བཞི་བརྩམས་པའི་རྗེས་ནས་རཱ་མ་ཎའི་རྟོགས་བརྗོད་བརྩམས་པ་ཡིན་པར་འདོད། སྤྱི་ལོའི་སྔོན་གྱི་དུས་རབས་ལྔ་པར་སླེབས་དུས་རྟོགས་བརྗོད་ལ་ད་དུང་ཁ་སྣོན་དང་ཁ་གསབ་བྱེད་བཞིན་འདུག་ཟེར། རྒྱ་གར་གྱི་མཁས་པ་ཅིན་ཏ་མ་ནུ་ཡིས་ངེས་བརྗོད་རིག་བྱེད་ཀྱི་བམ་པོ་བཅུ་བར་བྱུང་བའི་རཱ་མ་ཞེས་པ་ཤིང་རྟ་བཅུ་བའི་བུ་རཱ་མ་ཎ་ཡིན་པར་བཤད། དེས་ན་ངེས་བརྗོད་རིག་བྱེད་ཀྱི་བམ་པོ་བཅུ་བ་དུས་ནམ་བརྩམས་པའི་ལོ་ལ་ཡང་ལྟ་ཚུལ་མི་མཐུན་པ་ཡོད་དེ། ཡོ་རོབ་གླིང་གི་མཁས་པས་སྤྱི་ལོའི་སྔོན་གྱི་ལོ་༡༥༠༠ནང་ཡིན་པར་འདོད།
༣ གཞུང་ཚད་དང་བྱུང་རིམ།
རཱ་མ་ཎའི་རྟོགས་བརྗོད་ལ་སྡེ་ཚན་བདུན་ཡོད། པར་གཞི་རྙིང་མར་ཤོ་ལོ་ཀ་ཉིས་ཁྲི་བཞི་སྟོང་ཡོད་པ་དང་། རྒྱ་གར་གྱི་པ་རོ་ཏ་ཤར་ཕྱོགས་ཞིབ་འཇུག་ཁང་གིས་དག་བསྒྲིགས་བྱས་པའི་པར་གཞིར་སྔར་བཞིན་སྡེ་ཚན་བདུན་ཡོད་མོད། དེ་ལས་བསྐྱར་བཟློས་དང་འབྲེལ་བ་ཆེར་མེད་པའི་ཚིགས་བཅད་མང་པོ་ཞིག་བསྡུས་ཏེ་ཤོ་ལོ་ཀ་༡༨༧༥༥ཅན་དུ་བཏང་འདུག ད་ལྟ་བདག་ཅག་གིས་དངོས་སུ་མཐོང་ཐུབ་པའི་རྒྱ་འགྱུར་ཆ་ཚང་མ་འདི་ནི་སྐུ་ཞབས་ཅིས་ཞན་ལིན་གྱིས་པར་གཞི་འདིའི་སྟེང་ནས་བསྒྱུར་ཅིང་། སྡེ་ཚན་དྲུག་པ་སྟོད་ཆ་སྨད་ཆ་གཉིས་སུ་ཕྱེ་སྟེ་པར་སྐྲུན་བྱས་པས་བསྡོམས་པས་སྡེ་ཚན་བདུན་དང་གླེགས་བམ་བརྒྱད། ཡིག་འབྲུ་ཧ་ལམ་ཁྲི་༣༠༠ཙམ་ཡོད།
སྡེ་ཚན་དང་པོ། གཞོན་ནུའི་སྡེ། ལེའུ་༧༦ཤོ་ལོ་ཀ་༡༩༤༡
སྡེ་ཚན་གཉིས་པ། འཐབ་བྲལ་གྲོང་གི་སྡེ། ལེའུ་༡༡༡ཤོ་ལོ་ཀ་༣༡༧༠
སྡེ་ཚན་གསུམ་པ། ནགས་ཀྱི་སྡེ། ལེའུ་༧༡ཤོ་ལོ་ཀ་༢༠༦༠
སྡེ་ཚན་བཞི་པ། སྤྲེའུའི་སྡེ། ལེའུ་༦༦ཤོ་ལོ་ཀ་༡༩༨༤
སྡེ་ཚན་ལྔ་པ། མཛེས་པའི་སྡེ། ལེའུ་༦༦ཤོ་ལོ་ཀ་༢༤༨༧
སྡེ་ཚན་དྲུག་པ། གཡུལ་གྱི་སྡེ། ལེའུ་༡༡༦ཤོ་ལོ་ཀ་༤༤༣༥
སྡེ་ཚན་བདུན་པ། མཇུག་གི་སྡེ། ལེའུ་༡༠༠ཤོ་ལོ་ཀ་༢༦༦༨