རྩིག་ལྡེབས་ཕྱི་མའི་ངོས་སུ།།
དགའ་འཁྱིལ་རི་མོ་བྲིས་ཀྱང་།།
ཁྲུང་ཁྲུང་ཚང་འཁོར་རི་མོ།།
མིག་གི་དགའ་སྟོན་ཡིན་སོང་།།
པདྨ་རྩ་འཁོར་ཁྱེད་བྱོས།།
པདྨ་བཅད་ལྡན་ང་བྱ།།
སྩག་པའི་ཁ་ཆོན་ཨེ་ཡོང་།།
ང་གཉིས་མཉམ་དུ་བལྟས་ཆོག།
རྫ་ཆུ་འབྲི་ཆུ་གཉི་ག།
ཆུ་ཆེན་བཞི་ཡི་ཡ་གྱལ།།
ང་རང་དྲིན་གྱིས་བསྐྱངས་པ།།
རྫ་རིའི་འོག་གི་ཆུ་རེད།།
གདུགས་དཀར་བསླངས་པ་ལྟ་བུའི།།
བ་ཞོའི་མདངས་མདོག་ཅན་དེ།།
རྒྱལ་བ་དམ་པའི་གསུངས་སུ།།
ཐར་བའི་གནས་ཡིན་གསུངས་འདུག།
ང་རང་དབུས་སུ་ཕྱིན་ཏེ།།
ཀ་བར་དཀྲིས་གསུམ་བརྒྱབ་པ།།
ཀ་བ་བསམས་པ་མིན་ཏེ།།
གདུང་མ་བསམས་པ་ཡིན་སོང་།།
དགུང་གི་ཁྲི་གདུགས་ཉི་མ།།
ཁྱད་མེད་གླིང་བཞིར་འཕྲོས་འདུག།
གོལ་ཁུང་ནང་གི་མེ་ལྕེ།།
ང་ཡི་ཕྱོགས་སུ་མཆེད་ཡོད།།
ཆར་དེ་ཆུ་མོའི་བགྲོད་རོགས།།
ཡིན་འགྲོ་བསམས་ན་དགའ་བ།།
ཆར་དེ་སེར་བའི་སྣ་འདྲེན།།
ཡིན་འགྲོ་བསམས་པ་ཨེ་གནང་།།
དཀར་ཡོལ་རྒྱལ་སྲིད་སྣ་བདུན།།
ལྷ་ཁང་ནང་དུ་བཞུགས་ཚེ།།
ང་རང་ཕྱེ་མར་ཆས་ཏེ།།
མཆོད་པའི་རྫས་སུ་ཕེབས་ཆོག།
དུངས་པའི་མིག་གི་མཐའ་ལ།།
བརྩེ་བའི་མཆི་མ་ཤམ་ཤམ།།
དྲན་པས་གདུངས་པ་མིན་ཚེ།།
མགོ་རུས་བངས་དགོས་མི་འདུག།
བྱམས་པས་བྱབས་བྱབས་བཏང་བ།།
འཇམ་པ་བལ་ལས་འཇམ་སོང་།།
གླིང་ཆེན་མཚོ་རུ་འཇུས་པའི།།
བདེ་བ་དེ་དང་འདྲ་བྱུང་།།
རི་ལ་རི་ཆེན་རི་ཆུང་།།
རི་ཆེན་གཡང་ཆགས་རི་ཡིན།།
རི་ཆུང་བཀྲ་ཤིས་ལྷ་སྒང་།།
རི་ཆེན་བསྐོར་ཏེ་ཆགས་ཡོད།།
ཆུ་ལ་ཆུ་ཆེན་ཆུ་ཆུང་།།
ཆུ་ཆེན་རྨ་ཆུ་འབྲི་ཆུ།།
རི་བོའི་ཤོད་དུ་བབས་ཀྱང་།།
ཆུ་མགོ་གངས་ཀྱིས་བཟུང་ཡོད།།
མཚོ་དེ་ཡར་འབྲོག་གཡུ་མཚོ།།
ཉ་དེ་གསེར་མིག་ཉ་མོ།།
མཚོ་མོ་དྭངས་ཤིང་བསིལ་བ།།
ཉ་མོར་འཁྱུག་རྩལ་རྫོགས་པ།།
ཁྱེད་ནི་ངང་བའི་རྒྱལ་བོ།།
མཚོ་མཐའ་འདི་རུ་འཁོར་ཤོག།
མེ་ལོང་འདྲ་བའི་བསིལ་ཆུས།།
ཁྲུས་ཤིག་ཁྱེད་ལ་གསོལ་ཆོག།།
མ་ཐོབ་ཆུང་འདྲིས་བྱམས་པ།།
ཡ་གའི་དབང་བོའི་གཞུ་རིས།།
བསྙབས་འདོད་བློ་རུ་སྐྱེས་ཀྱང་།།
ལག་ལ་ཟིན་རྒྱུ་མ་བྱུང་།།
ཉི་རྩེ་དབུས་སུ་ཕོག་པས།།
དབུས་ཁུལ་གསེར་གྱི་གླིང་ཕྲན།།
གླིང་འདི་བསྐལ་བརྒྱར་བརྟན་ཚེ།།
གསེར་དབྱུགས་ང་ཡིས་བརྒྱབ་ཆོག།
དབྱར་གསུམ་ཆར་ཆུ་མོད་དེ།།
ལུས་ཀྱིི་གོས་ལྭ་བངས་ཀྱང་།།
གནམ་ལ་ལེ་ཁག་མ་དཀྲི།
ཀླུ་རྒྱལ་ཐུགས་སེམས་བཞེང་འགྲོ།
སྤྲིན་པ་ཁ་དཀར་གཏིང་གནག།
ལྷོ་ནས་བྱང་དུ་ལྡང་སྟེ།།
གླིང་བཞི་བསྒྲིབས་གྲབས་མཛད་པས།།
ཉི་མའི་དགྲ་རུ་ལངས་སོང་།།
གནས་མཆོག་མཚེ་མ་གྲོང་དེ།།
བསོད་ནམས་ཅན་གྱི་ཡུལ་རེད།།
རྒྱལ་དབང་བདུན་པའི་རྗེས་སུ།།
རྡོ་རིང་མཆོག་སྤྲུལ་འཁྲུངས་པ།།
འདུ་ཁང་ཕོ་བྲང་དཀར་དམར།།
ལི་ཐང་ཡུལ་དུ་མཛེས་པ།།
དགེ་བཤེས་དོན་གྲུབ་རྒྱ་མཚོའི།།
མཛད་རྣམ་ཡིད་ལ་འཁོར་བྱུང་།།
ལི་ཐང་ཡུལ་གྱི་ཇོ་བོ།།
ཇོ་བོ་མི་འགྲོ་གསུང་བྱོན།།
ལན་གཅིག་མཇལ་རྒྱུ་བྱུང་བས།།
ལུས་ཀྱི་སྡིག་གྲིབ་དག་སོང་།།
བྱང་གི་རྨ་ཆེན་འབུམ་ར།།
ཆོས་བསོད་ཅན་གྱི་ཡུལ་ཡིན།།
དེ་ལ་དཀྲིས་གསུམ་རྒྱོབ་དང་།།
ལུས་ཀྱི་སྡིག་གྲིབ་དག་ཡོང་།།
གནས་ཆེན་དགེ་བསྙེན་གནས་རི།།
དཀར་བོ་དུང་ལས་དཀར་བ།།
གནས་མཇལ་ཕྱིན་པའི་མི་དེའི།།
སེམས་དང་བསམ་པ་དཀར་བ།།
ལི་ཐང་བྱམས་ཆེན་ཆོས་འཁོར།།
ཕྱོགས་ལས་རྣམ་རྒྱལ་ཡིན་སོང་།།
རྒྱལ་དབང་སྐུ་ཕྲེང་གསུམ་པའི།།
བློ་དང་བཀོད་པ་མཚར་བ།།
ལི་ཆུའི་སྟོད་དུ་འཁྲུངས་པའི།།
ལི་ཐང་ཐང་ཆེན་མཛེས་པ།།
ལི་ཡི་མེ་ལོང་རང་བྱོན།།
བྱོན་པ་དེ་དང་འདྲ་བྱུང་།།
སྐེད་ཆབ་གསེར་ཆབ་དངུལ་ཆབ།།
ཆབ་རྒྱུན་ཆབ་མགོར་འཁྱུད་ཡོད།།
ཆབ་རྒྱུན་དམ་ལྷོད་རན་པ།།
ཆབ་མགོ་བསམས་པ་ལོས་ཡིན།།
འཛབ་ལ་གསེར་འཛབ་དངུལ་འཛབ།།
བྱུ་རུའི་རྒྱན་དུ་འཁྲུངས་ཡོད།།
བྱམས་པས་གནང་བའི་དངུལ་འཛབ།།
གསེར་ལས་འདང་རྩིས་ཆེ་བ།།
དངུལ་གྱི་གློ་ཟུངས་སྟེང་དུ།།
བྱུ་རུས་ཕྲ་རྒྱན་བཏབ་ཀྱང་།།
ནོོར་འཛིན་པ་ཏྲ་མེད་ན།།
རྒྱན་དུ་བརྩི་སྙིང་མི་འདུག།།
བྱ་འབྲུག་ཁ་སྤྲོད་རི་མོ།།
བྱང་གདན་སྟེང་དུ་འཁོད་འཁོད།།
སེམས་པའི་ཉིན་སྲིབ་གཉིས་སུ།།
བྱམས་པའི་འཛུམ་རིས་འཁོར་ཡོད།།
རྟ་སྒ་སྦལ་སྒ་ཐོད་ལེབ།།
འཇའ་འགྲིགས་མཐའ་རྒྱན་སྤྲོས་ཀྱང་།།
རྟ་ཕོས་བྱང་ལམ་གཅོད་དུས།།
རྟ་སྒ་གཡུགས་གྲབས་མཛད་བྱུང་།།
རྫ་རིའི་རྫ་ཆུ་བསིལ་མ།།
ཆུ་ཟོམ་ཁ་རུ་ལྡེམ་ལྡེམ།།
ན་ཆུང་བུ་མོའི་མིག་ཟུང་།།
ལན་བུའི་འོག་ན་ཀེམ་ཀེམ།།
དཀར་སངས་འབྲུག་གཉིས་ཤིག་ལ།།
དངུལ་གྱི་རྐུབ་ཤན་བརྒྱབ་ཡོད།།
ཆུང་འདྲིས་ལོག་ཡོང་དུས་ལ།།
གསོལ་སྐྱེམས་དྲངས་ན་བསམས་ཡོད།།
ཞྭ་མོ་ཚེ་རིང་སྐྱིན་ཁེབ།།
ལྷ་སའི་ཁྲོམ་ན་མི་འདུག།།
མི་འདོད་གསང་གླིང་ཞྭ་མོ།།
ལྷ་སའི་ཁྲོམ་ན་ཤིག་ཤིག།
གསེར་རྐོང་མར་མེ་ཚེ་འབར།།
མར་མེའི་མདངས་སུ་འཐིམ་ཡོད།།
མར་ལོས་ཁ་གསོས་བཏང་བས།།
ངན་སོང་གནས་ལས་དྲངས་བྱུང་།།
ཨ་མས་བསུས་པའི་འོ་ཇར།།
ཇ་ལ་ཁ་ཞག་འཁོར་ཡོད།།
ཇ་མཆོད་ལྷ་ལ་འཕངས་པས།།
ཁ་ལས་རླུང་རྟ་དར་ཡོད།།
འདབ་དྲུག་ཁ་བའི་འདབ་ལོ།།
དགུན་གསུམ་ཙག་གིས་བཅུམས་ཀྱང་།།
ཙག་ལས་ཐར་བའི་སེམས་གཉིས།།
མ་ཤི་ལྷོག་ལྷོག་ལྡིང་ཡོད།།
ད་རེས་དེ་ཙམ་ཞུས་པ།།
རྣ་བའི་བུ་གར་བསྐྱིལ་ཡོད།།
ལོ་ན་རྒ་བའི་དུས་ལ།།
ཕངས་སེམས་བསྐྱེད་དགོས་མི་འདུག།
དགུན་ལ་ལྷགས་རླུང་ལྡང་བས།།
ས་ལ་སེར་ཁ་གས་པ།།
ད་ལོར་བྱམས་པས་གཡུགས་པས།།
མིག་ཟུང་མཆི་མས་བརྣངས་པ།།
བྱམས་པ་རི་ལ་ཕྱིན་པས།།
གོམ་པའི་འདེགས་འཇོག་འཁྱར་འཁྱོར།།
བརྩེ་དུངས་ཅན་གྱི་མི་ལ།།
འདི་འདྲ་གནང་དགོས་མི་འདུག།
ལ་གསུམ་གོམ་པས་འཇལ་ཏེ།།
མཇལ་འཛོམས་འཁྱུག་ཙམ་རེག་དུས།།
དྲན་དང་མ་དྲན་མ་འདྲི།།
མིག་གི་མཐའ་རུ་གཟིགས་རོགས།།
སྙན་འཇེབས་ཚིག་གི་མཆོད་པ།།
བྱམས་པས་ང་ལ་གཏོར་བས།།
ད་ནི་ང་ཡང་མི་སྡོད།།
དྲི་ཆབ་གཙང་མར་ཆས་འདོད།།
བྲག་རི་མཐོ་བ་མིན་ན།།
བྲག་ཅ་འཁོར་ཡུལ་མི་འདུག།
ཡིད་སེམས་སྨྲེང་བ་མིན་ན།།
སྤྱན་ཆབ་བསིལ་དགོས་མི་འདུག།
དུངས་པ་ཆུ་ལ་བསྐྱུར་པས།།
ཉ་སྲམ་ཆུ་ཁར་མངོན་པ།།
ང་ཡི་ཆུང་འདྲིས་བྱམས་པ།།
ཉ་ཞིག་ཡིན་ན་བསམས་བྱུང་།།