ཀླུ་ཚང་སྨྱུག་རྩེན།
མདང་ནུབ་ངས་རྨི་ལམ་ཞིག་རྨིས་བྱུང་།
གཉལ་ནས་ཡིན་ཟེར། ཐོན་མི་ཡིན་ཟེར།
མགྲོན་པོ་རྒྱུས་མེད་ཅིག་ངའི་ཁང་མིག་དུ་འཛུལ་ཡོང་།
ངས་ཁོང་འབོལ་ཁྲིར་བསུས་རྗེས་ཆུ་ཁོལ་ཚ་བོ་ཞིག་དྲངས།
ཁོང་གིས་ཕྱག་ཟུང་ཐལ་སྦྱར་གྱིས་ཐུགས་རྗེ་ཆེ་གསུངས་བྱུང་།
ངེད་གཉིས་ཀྱིས་ཁ་བརྡ་གང་འཚམ་ཞིག་བྱས།
ཁོང་གིས་མང་པོ་ཞིག་ཧ་གོ་མ་སོང་གསུང་བྱུང་།
ཁོང་གིས་ཡུད་ཙམ་ལ་ཐུགས་བསམ་བཞེས་རྗེས།
གློ་བུར་དུ་ཡར་བཞེངས་ཏེ་ཕར་འགྲོ་ཚུར་ཡོང་འགའ་བྱས།
ང་ལ་འགྲམ་ལྕག་ཅིག་གཞུས།
ཁོང་ན་རེ། སུམ་རྟགས་བོར་འདུག
བརྡ་སྤྲོད་ཉོག་རེད།
བོད་སྐད་གང་རེད།
ངས་མགོ་བོ་བསྒུར་ཏེ།
རང་གི་རྡོག་སྣེ་རུ།
གྲོག་མ་མགྱོགས་མོ་ཞིག་རྒྱུགས་བཞིན་པ་དེ་ལ་བལྟས་ནས་བསྡད།
དོགས་སྣང་ཕྲན་བུ་ཞིག
1
མི་ཞིག་གིས་ཕལ་ཆེར་ང་རང་འབོད་ཀྱིན་འདུག
ཡིན་ནའང་ང་རང་མ་སོང་།
དེ་ཕལ་ཆེར་ང་རང་འགྲོ་ས་ཞིག་མིན་པ་འདྲ།
2
མདང་ནུབ་ངས་ཕལ་ཆེར་རྨི་ལམ་ཞིག་ཀྱང་རྨིས་སོང་།
རྨི་ལམ་དུའང་ཕལ་ཆེར་ང་རང་འབོད་ཀྱིན་པ་འདྲ།
ཏག་ཏག་དེ་དུས་ཕལ་ཆེར་ང་རང་སད་བསྡད་ཡོད།
3
དོ་ནུབ་ང་ལ་གཉིད་ཉལ་བའི་འཆར་གཞི་ཡེ་ནས་མེད།
གལ་ཏེ་གཉིད་ལོག་ཚེ།
སུ་ཞིག་གིས་ཕལ་ཆེར་ང་རང་ཤུགས་ཀྱིས་འབོད་སྲིད།
2015.11.29ཉིན།