སྟག་རིག་འབྲུག་ཐར།（མཚོ་ལྷོ）
ན་སོ་གཞོན་དུས།
ངས་རྒྱང་རིང་རྒྱང་རིང་གི་རི་ཚོགས་ལ་ཅེར་ནས།
ལྷ་དར་ལྟ་བུའི་རེ་འདུན་གཙང་མ་ཞིག
ཕུགས་བསམ་གྱི་མཁའ་དབྱིངས་སུ་མཐོ་ནས་མཐོ་རུ་བསྒྲེང་ན་བསམས།
ཆུ་མོ་ལྟ་བུའི་རྨི་ལམ་འཇམ་པོ་ཞིག
རེ་སྙེག་གི་ས་ཆེན་དུ་ལྷོད་ནས་ལྷོད་དུ་འཁྱིལ་ན་བསམས།
ལོ་ཟླ་ཟེར་བའི་ཆོམ་རྐུན་དེས།
ངའི་ལང་ཚོ་བརྐུས་ཤིང་ཕུགས་བསམ་གཅོལ་བས།
བ་གམ་ཁང་བརྩེགས་ལ་ན་བུན་འཁྱུད་པའི་ཀློང་དུ།
གཉིད་ལས་མ་སད་པའི་གླ་སྡོམ་ཇི་བཞིན།
མུན་སེལ་གྱི་ཉི་མ་འཆར་སྲིད་ཀྱང་།
དམིགས་པ་ཅི་ཡང་བོར་བའི་ང་ལ་ཅི་ཞིག་ལྷག་ཨང་།
དྭངས་གཙང་གི་སེམས་པ་ཪྙི་ལ་ཤོར་ཚར་བས།
སྙིང་སྟོབས་ཀྱི་འཕར་སྒྲ་ཅི་འདྲའི་དྲག་ཀྱང་།
སྤོབས་པ་ཡི་གད་རྒྱངས་ཅི་འདྲའི་མཐོ་ཡང་།
ཞེ་ལ་ཐོགས་པའི་དབྱར་ལྗོངས་ལ་ད་དུང་བར་ཐག་རིང་ཨང་།
ན་སོ་གཞོན་དུས།
ངས་རྒྱང་རིང་རྒྱང་རིང་གི་གནམ་མཐའི་མཚམས་སུ་ཅེར་ནས།
ཤོག་བྱ་ལྟ་བུའི་དམིགས་ཡུལ་གཙང་མ་ཞིག
འདོད་དོན་གྱི་མཐོངས་དབྱིངས་སུ་མཐོ་ནས་མཐོ་རུ་མངོན་ན་བསམས།
ཁ་བ་ལྟ་བུའི་སེམས་རྒྱུད་དྭངས་མོ་ཞིག
འགྲན་རྩོད་ཀྱི་འཐབ་ར་རུ་བླ་ནས་བླ་རུ་འཕགས་ན་བསམས།
ལོ་ཟླ་ཟེར་བའི་ཆོམ་རྐུན་དེས།
ངའི་ལང་ཚོ་བརྐུས་ཤིང་ཕུགས་བསམ་གཅོལ་བས།
འཛེར་སྒྲས་གནམ་ས་འཁྱོམ་འདྲའི་གུ་དོག་གི་གནས་འདིར།
ཁོ་ལག་མ་རྫོགས་པའི་མཆིལ་བ་ཇི་བཞིན།
མུན་སེལ་གྱི་ཉི་མ་འཆར་སྲིད་ཀྱང་།
དམིགས་པ་ཅི་ཡང་བོར་བའི་ང་ལ་ཅི་ཞིག་ལྷག་ཨང་།
རེ་འདོད་ཀྱི་སྐོམ་པ་མུན་པས་བཏུངས་ཚར་བས།
ལ་རྒྱ་ཡི་མེ་དཔུང་ཅི་འདྲའི་རྫུབ་ཀྱང་།
ཡིད་ཆེས་ཀྱི་གླུ་སྐད་ཅི་འདྲའི་སྙན་ཡང་།
སེམས་པས་འཁྲེང་བའི་དབྱར་ལྗོངས་ལ་ད་དུང་བར་ཐག་རིང་ཨང་།
ད་ནི་མི་རྟག་འཁོར་བ་ཡི་སྒལ་གཞུང་རྡོག་པས་བརྫིས་ཏེ།
བན་བུན་གྱི་མདུན་ལྗོངས་སེམས་པས་སྐྱོར་དུས།
ཟ་ཟི་ཡི་རྨི་ལམ་ལ་བདེན་ཁ་རྩོད་དུས།
ཕྱག་བརྡ་མི་ལྷོད་པའི་གཡབ་མོ་གཏོང་མཁན་དེ་སུ་ཡིན།
ངར་ཤུགས་མི་ཉམས་པའི་སྐུལ་ལྕག་གནང་མཁན་དེ་སུ་ཡིན།
ད་ནི་འདི་སྣང་འཇིག་རྟེན་གྱི་ཟོ་ཆུན་འཕྲུལ་འཁོར་ལག་པས་འཁྱུད་དེ།
མག་མོག་གི་ལམ་ཆེན་ལ་ཁ་ལོ་བསྒྱུར་དུས།
ཕྱོགས་མེད་ཀྱི་དམིགས་སར་བརྩོན་པས་འདུར་དུས།
གོ་འཛོལ་མི་ཐེབས་པའི་ཡོ་བ་བསྲང་མཁན་དེ་སུ་ཡིན།
མཐར་ཐུག་མི་འཆོལ་བའི་འཁྲུལ་བ་སེལ་མཁན་དེ་སུ་ཡིན།
རེ་འདུན་གྱི་མཐོངས་སུ་ཉི་ཟླ་གསལ་ཞིང་།
སྙན་ལྷང་ལྷང་གི་ཁུ་ལོའི་གསུང་སྐད་བརྒྱབ་ཀྱང་།
ངའི་འགྱུར་མེད་ཀྱི་དམ་བཅར་བདེན་པ་བརྡར་བའི་དན་རྟགས་དེ།
མཛེས་སྡུག་གི་བསླུ་བྲིད་ཅིག་མིན་པར་སྨོན།