མདུན་ཤོག- གནས་སྐོར།- མཚར་སྡུག་ཡུལ་སྲོལ།

ཚེ་ཐར་གཏོང་བའི་གནད་དོན་བཤད་པ།

  ཡོང་ཁུངས། མཚོ་སྔོན་པོ་དྲ་བ།  2014-08-21 16:21

ཚེ་ཐར་བཏང་ན་ཀུན་སློང་། དམིགས་ཡུལ། སྤྱོར་བ། མཐའ་འབྲས་བཅས་ལ་བསམ་བློ་བཏང་བ་སྔོན་འགྲོའི་སྦྱོར་ཆོས་སུ་དགོས་ཏེ། དུད་འགྲོ་གང་ཡང་འཚོ་གནས་ཀྱི་འཁོར་ཡུག་ལ་བརྟེན་པ་ཡིན་ལ། དཔེར་ན། ཉ་ལ་ཡང་དྲོ་སའི་ཉ་དང་འཁྱག་སའི་ཉ། ཆུ་ལན་ཚ་ཅན་དུ་འཚོ་བའི་ཉ་དང་ཆུ་མངར་མོའི་ཉ། རྒྱ་མཚོའི་གཏིང་གི་ཉ་དང་ཆུ་ཁར་གཡེང་བའི་ཉ་སོགས་རིགས་ཀྱི་དབྱེ་བ་མང་ཞིང་། ཉའི་རིགས་ཀྱི་འཚོ་གསོན་ཆུའི་དྲོ་འཁྱག་དང་། ཉོག་དྭངས། ཚྭ་ཡོད་མེད་སོགས་འཚམས་མི་འཚམས་ཅི་རིགས་ཡོད་པས། ཚེ་ཐར་བཏང་ན་ཀུན་སློང་དགེ་སེམས་ཡོད་པ་ཙམ་གྱིས་མི་ཆོག དེའི་ཕྱོགས་ཀྱི་ཤེས་བྱ་དུ་མ་འཛོམས་དགོས་ཏེ། ཚེ་ཐར་བཏང་བའི་སེམས་ཅན་རྣམས་ཀྱི་འཚོ་གནས་གྱི་ཆ་རྐྱེན། སྤྱི་ཚོགས་ཀྱི་ཁེ་ཕན། འཁོར་ཡུག་གི་ཕན་གནོད་བཅས་ལ་འདང་རྒྱག་ཡག་བྱེད་དགོས། དཔེར་ན། ས་དྲོ་སའི་ཉ་རྣམས་ཆུ་འཁྱག་ཏུ་བཏང་བ་དང་། ཚྭ་ཆུའི་ཉ་རྣམས་ཚྭ་མེད་པའི་ཆུར་བཏང་ནས། ཆུ་མ་འཕྲོད་པས་ཤི་ན། ཚེ་ཐར་བཏང་བ་ཡིན་ནམ་སྲོག་བཅད་པ་ཡིན།

དེ་ནི་ཀུན་སློང་དགེ་བས་སྤྱོར་བ་དང་འབྲས་བུ་མི་དགེ་བ་བྱེད་པར་འགྲོ། གལ་ཏེ་འཁོར་ཡུག་གི་ཆ་རྐྱེན་འཚམས་མི་འཚམས་དང་མཐའ་འབྲས་སོགས་ལ་བསམ་བློ་མ་བཏང་བར་ཉ་སོགས་ཚེ་ཐར་བཏང་ན། ཆུ་མ་འཕྲོད་པས་ཉ་མང་བོ་ཤི་བ་དང་། ཉ་རོ་རུལ་བས་འཐུང་ཆུ་སོགས་སྤགས་པར་བྱས་བས་འཁོར་ཡུག་ལ་གནོད་པར་སོང་ན་དགེ་བ་བྱས་པར་འགྲོའམ་ཅི། གནས་ཚུལ་གཞན་ཞིག་ཀྱང་སྲིད་དེ། ཉ་ཚོང་རྒྱག་མཁན་རྣམས་ཉ་ཚེ་ཐར་གཏོང་མཁན་ལ་ཚོང་ལོག་རྒྱག་པའི་ཆེད་དུ་ཉ་འབོར་ཆེན་འཛིན་པ་དང་། དུས་བཟང་སོགས་སུ་ཚེ་ཐར་གཏོང་བར་ཤེས་ནས་སྒུག་བསྡད་ནས་ཉ་རྒྱ་ཆེན་པོ་འགྲེམ་པ་དང་། དགོན་པའི་ཉེ་འདབས་སུ་ཚེ་ཐར་ལ་ཚོང་ལོག་རྒྱག་པའི་ཆེད་དུ་རི་བོང་དང་ཕུག་རོག་འདབ་ཆགས་སོགས་མང་དུ་བཟུང་ནས་གསོས་ཤིང་། བཙོང་ནས་ཚེ་ཐར་བཏང་བའི་རྗེས་སུ་སླར་བསྡུས་ནས་ཡང་བཙོང་འོར་བཙོང་བྱེད་པའི་སྤྱོད་ངན་སོགས་བརྟག་པ་མཐའ་བཟུང་མིན་ལ་མངོན་སུམ་དུ་ཡོད་པས། ཚེ་ཐར་བཏང་བ་གཡོ་སྒྱུའི་ཚོང་ལོག་སྤེལ་བའི་མཐུན་རྐྱེན་དུ་སོང་ན་ཚེ་ཐར་གཏོང་བའི་དགེ་སེམས་དང་མཐུན་ནམ། གལ་ཏེ་སྤྱང་ཁུ་ཚེ་ཐར་བཏང་སྟེ། ནོར་ལུག་མང་དུ་བསད་པ་དང་། གདུག་སྦྲུལ་མང་དུ་བཏང་བས་མི་ཟོག་གི་གནོད་འཚེ་རུ་གྱུར་བ་དང་། ཙི་གུ་མང་དུ་བཏང་བས་ཞིང་བའི་ལོ་ཏོག་ལ་གནོད་པར་སོང་ན་མང་མང་གིས་ཆོས་དགེ་བ་བྱེད་པ་ལ་ལོག་ལྟ་སྐྱེ་བ་དང་མི་དགའ་བའི་རྒྱུ་རུ་མི་འགྱུར་རམ། མ་བརྟག་ཉམས་དགས་ཚེ་ཐར་བཏང་བ་སོགས་ཆོས་ཀྱི་སྤྱོད་པར་སྤྱི་ཚོགས་སྟེང་ན་མི་འདོད་གཏམ་ངན་མང་དུ་བྱུང་འདུག་པས། ཚེ་ཐར་གཏོང་བར་རྩ་འཛུགས་བྱེད་མཁན་དང་རྗེས་འབྲང་ཐམས་ཅད་ལ་ལེགས་ཉེས་འབྱེད་པའི་རྣམ་དཔྱོད་དང་། ཚན་རིག་གི་ཤེས་བྱ་དང་། སྤྱི་ཚོགས་ཀྱི་ཁེ་ཕན་ལ་འགན་འཁུར་བའི་ལྷག་བསམ་བཅས་ཉུང་དྲག་པས་དེ་དག་གི་རྗེས་སུ་འབྲང་བར་མི་བྱའོ།།

བོད་ཀྱི་ས་ཆ་ན་ཡང་འཁོར་ཡུག་ལ་སྦགས་རྒྱག་པའི་དམངས་ཁྲོད་ཀྱི་གོམས་སྲོལ་མང་དུ་འདུག་སྟེ། དཔེར་ན། བླ་མཚོ་དག་ལ་སྨན་སྣ་དང་འབྲུ་དྲུག་བསྲེ་བའི་གཏེར་བུམ་དང་ཁ་བཏགས་འབོར་ཆེན་དྲངས་པ་དང་། ཤོག་བུར་དཔར་བའི་རླུང་རྟ་ས་ཁྱབ་རྡོ་ཁྱབ་ཏུ་གཏོར་བ་སོགས་ཀྱིས་བླ་མཚོ་འབག་རྩོག་ཏུ་བཏང་བ་དང་། གནས་ཁམས་ཆེན་རྣམས་ཤོག་ལུད་ཀྱིས་འབག་རྩོག་ཏུ་བཏང་བ་སོགས་ཆོས་ལུགས་ཀྱི་གོམས་སྲོལ་ཡིན་ཀྱང་ཉེས་སྐྱོན་མང་བས་སྤང་བ་ཡིན་ནོ།།

སངས་རྒྱས་ཆོས་ལུགས་ནི་རྣམ་དཔྱོད་དཔལ་གྱིས་བརྒྱན་པའི་ཆོས་ལུགས་ཡིན་པས། བྱ་བ་གང་ལ་ཡང་རྣམ་དཔྱོད་མིག་གིས་དགེ་སྡིག་ལེགས་ཉེས་ཕྱེ་སྟེ་བླང་དོར་བྱེད་དགོས་སོ།  །

པར་དབང་གསལ་བསྒྲགས།      ངེད་ཀྱི་སྐོར།      འབྲེལ་གཏུགས་བྱེད་ཚུལ།

གློག་འཕྲིན་ཡིག་སྒམ། tibet3@126.com    ཁ་པར། 0971-8455441

©2006-2013 China Tibetannet Corporation པར་དབང་ངེད་དྲ་བར་དབང་བས་ཆོག་མཆན་མ་ཐོབ་པར་གཞན་གྱིས་རང་དགར་སྤྱོད་མི་ཆོག