རྡོ་རྗེ་རྒྱ་གྲམ་གྱི་མཚོན་བྱེད་མདོར་བསྡུས།

རྡོ་རྗེ་རྒྱ་གྲམ་ནི་ལས་བཞི་ལྷུན་གྱིས་འགྲུབ་པའི་མཚོན་རྟགས་ཡིན་ཏེ། མཚོན་བྱེད་དཀར་པོ་ནི། ལྷ་ཀླུ་གནོད་སྦྱིན་དྲི་ཟ་ལ་སོགས་པའི་གདོན་རྣམས་ལས་ཐར་བ་དང་། གློ་བུར་ཡེ་འདྲོག་དུས་མ་ཡིན་པར་འཆི་བ་སོགས། ནད་དང་སྡུག་བསྔལ་བར་ཆད་ཐམས་ཅད་དང་ཉོན་མོངས་པ་དང་ཤེས་བྱའི་སྡིག་སྒྲིབ་ཐམས་ཅད་ཞི་བའི་མཚོན་རྟགས། མཚོན་བྱེད་སེར་པོ་ནི། ཚེ་དང་བསོད་ནམས་དཔལ་འབྱོར་སྙན་གྲགས་དབང་ཐང་གཟི་བརྗིད་ལང་ཚོ་ཟས་ནོར་ལོངས་སྤྱོད་བུ་སློབ་འཁོར་འབངས་མངའ་རིས་ཆོས་སྲིད་དར་ཞིང་རྒྱས་པ་དང་། མཁྱེན་བརྩེ་མཐུ་སྟོབས་ནུས་རྩལ་ཉམས་རྟོགས་ཡོན་ཏན་ཐམས་ཅད་གོང་དུ་འཕེལ་བ་དང་འཇིག་རྟེན་དང་འཇིག་རྟེན་ལས་འདས་པའི་དགེ་ལེགས་ཀྱི་ཡོན་ཏན་ཇི་སྙེད་པ་ཐམས་ཅད་དབྱར་གྱི་ཆུ་གཏེར་ཡར་ངོའི་ཟླ་བ་བཞིན་དུ་འཕེལ་ཞིང་རྒྱས་པའི་མཚོན་རྟགས། མཚོན་བྱེད་དམར་པོ་ནི། འཇིག་རྟེན་ཁམས་ཀྱི་ལྷ་འདྲེ་མི་གསུམ་རྒྱལ་བློན་བཙུན་མོ་སྐྱེ་འགྲོ་ཕོ་མོའི་ཟས་ནོར་ལོངས་སྤྱོད་དང་དྲེགས་ལྡན་མི་དང་མི་མ་ཡིན་མཐའ་བཞིའི་རྒྱལ་ཁབ་མཐའ་དག་གི་མཐུ་བོ་ཆེ་རང་དབང་མེད་པར་མོས་པ་རྣམ་བཞིས་དབང་དུ་འདུ་བའི་མཚོན་རྟགས། མཚོན་བྱེད་ལྗང་གུ་ནི། གནོད་ཅིང་འཚེ་བར་བྱེད་པའི་གཟུགས་ཅན་གཟུགས་མེད་སོགས་ཀྱི་དགྲ་བགེགས་ལོག་འདྲེན་འབྱུང་པོ་དམ་སྲི་སྒབ་འདྲེ་མཐའ་བཞིའི་དམག་དཔུང་བྱད་མ་ལྷ་སྲུང་བཅས་པ་ཐམས་ཅད་ཀྱི་གནོད་པ་ལས་གྲོལ་ཞིང་། སངས་རྒྱས་ཀྱི་བསྟན་པ་དང་སེམས་ཅན་གྱི་བདེ་སྐྱིད་ལ་འཚེ་ཞིང་བྱང་ཆུབ་སྒྲུབ་པ་ལ་བར་དུ་གཅོད་པར་བྱེད་པའི་མ་རུང་གདུག་ཅན་བསམ་ངན་སྦྱོར་རྩུབ་འཆང་བ་ཚར་གཅོད་པའི་དྲག་པོའི་ཕྲིན་ལས་མཚོན་རྟགས། ལྟེ་བ་སྔོན་པོ་ནི། ཞི་རྒྱས་དབང་དྲག་ལས་རབ་འབྱམས་ཐོག་མེད་དུ་ཐམས་ཅད་ལྷུན་གྱིས་འགྲུབ་པའི་མཚོན་བྱེད་བཅོས་སོ།།


རྩོམ་སྒྲིག་པ། རིག་འཛིན་ཚེ་རིང་།

དཔྱད་མཆན 0 ཡོད།