ཀྲུང་གོ་བོད་ཀྱི་དྲ་བའི་འཕྲིན། ད་ལོའི་ཚུན་དུ། མངའ་རིས་ས་ཁུལ་གྱི་དབུལ་སྐྱོར་ལས་ཀར་ཏོག་གསར་གློ་ཚད་ཀྱིས་ཤུགས་རྐྱེན་ཐེབས་ཤུགས་ཆུང་དུ་གཏོང་བ་དང་། དུས་བཀག་ལྟར་དབུལ་གྲོལ་འགག་གྲོལ་ཐུབ་པ་བྱ་ཆེད། མངའ་རིས་ས་ཁུལ་གྱིས་ལས་ཀ་བསྐྱར་ཚུགས་དང་ཐོན་སྐྱེད་སླར་གསོ་བྱེད་སྐབས་དབུལ་གྲོལ་འགག་སྒྲོལ་གྱི་ལས་དོན་བྱེད་མཚམས་མི་འཇོག་པ་དང་། དཔྱིད་རྨོད་དཔྱིད་འདེབས་ཀྱི་ལས་ཀར་ཚན་རིག་དང་མཐུན་པའི་སྒོ་ནས་སྐུལ་སྤེལ་བཏང་སྟེ། ནད་ཡམས་འགོག་ཟོན་དང་དབུལ་གྲོལ་འགག་སྒྲོལ་གཉིས་ཀར་དམ་འཛིན་ལྷོད་མེད་ཐུབ་པ་བྱས་ཡོད།
མངའ་རིས་ས་ཁུལ་གྱིས་ཁེ་ལས་རྒྱུན་གཏན་ལྟར་ལས་གཉེར་སླར་གསོ་དང་ལས་གྲྭའི་ལས་ཀ་བསྐྱར་ཚུགས་སོགས་ཀྱི་ཇུས་གཞི་བཟོས་པ་དང་། ཐེངས་ཁག་དབྱེ་སྟེ་དམངས་འཚོ་འཁོར་རྒྱུགས་དང་ནད་ཡམས་འགོག་ཟོན། ནུས་ཁུངས་དང་ཨར་སྐྲུན་རྒྱུ་ཆ་མཁོ་སྤྲོད། འགྲིམ་འགྲུལ་སོགས་དམངས་འཚོའི་ཁྱབ་ཁོངས་ཀྱི་ཁེ་ལས་དང་བྱ་གཞག་ཚན་པ་ཁག་གི་ལས་ཀ་བསྐྱར་ཚུགས་དང་ཐོན་སྐྱེད་སླར་གསོ་བྱས་ཡོད།
ད་བར་ཁེ་ལས་ཁྲི1ལྷག་ཙམ་ལས་གཉེར་སླར་གསོ་ཐུབ་པ་དང་ལས་གཉེར་བྱེད་ཚད་བརྒྱ་ཆ93ཟིན་ཡོད། ཐོན་ལས་དབུལ་སྐྱོར་རྣམ་གྲངས་ཀྱི་ཐོན་སྐྱེད་སླར་གསོ་དང་ལས་ཀ་བསྐྱར་ཚུགས་ལ་སྐུལ་སྤེལ་གཏོང་ཆེད། མངའ་རིས་ས་ཁུལ་གྱིས་ཐོན་ལས་དབུལ་སྐྱོར་རྣམ་གྲངས་ཀྱི་གཟའ་འཁོར་བྱེད་སྒོའི་བཀོད་གཏོང་ལམ་སྲོལ་བཙུགས་ནས། དབུལ་སྐྱོར་རྣམ་གྲངས་ཀྱི་ལས་ཀ་བསྐྱར་ཚུགས་དང་ཐོན་སྐྱེད་སླར་གསོར་མཛུབ་ཁྲིད་བྱས་པ་དང་། ས་གནས་དང་རྫོང་རིམ་པའི་ལས་བྱེད་པས་དབུལ་སྐྱོར་ཐོན་ལས་རྣམ་གྲངས106ལ་ལྟ་སྡོམ་མཛུབ་ཁྲིད་བྱེད་རྒྱུར་བཀོད་སྒྲིག་བྱས་ནས། རྣམ་གྲངས་བདེ་བླག་ངང་སྐྲུན་ཐུབ་པ་བྱས་ནས་དེ་ཚད་ལྡན་བཟོ་ཐུབ་པ་དང་འཁོར་རྒྱུག་ཐུབ་པ། ཕན་འབྲས་ཐོན་ཐུབ་པ་བཅས་བྱས་ཡོད།
ནད་ཡམས་འགོག་ཟོན་གྱི་བྱ་ཐབས་ལག་བསྟར་ནན་པོ་བྱེད་པ་དང་ཆབས་ཅིག་དཔྱིད་རྨོད་དཔྱིད་འདེབས་ལས་དོན་ཚན་རིག་དང་མཐུན་པའི་སྒོ་ནས་སྒྲིག་འཛུགས་བྱེད་པ་དང་། སྲིད་ཇུས་ཀྱི་རྒྱབ་སྐྱོར་བྱེད་ཤུགས་ཆེ་རུ་བཏང་ནས། ཞིང་ལས་རྒྱུ་ཆ་མཁོ་སྤྲོད་སོགས་ཀྱི་ལས་དོན་སྤེལ་ཐོག་ཞིང་འབྲོག་པའི་འབབ་འཕར་དང་། ཞིང་ནང་ཆུ་བེད་འཛུགས་སྐྲུན་སོགས་ལ་གཅིག་འགྱུར་འཆར་འགོད་བྱེད་རྒྱུར་དམ་འཛིན་བྱས་པས་ཞིང་འབྲོག་ལས་ཐོན་སྐྱེད་གོང་འཕེལ་བརྟན་པོ་བྱུང་ཡོད་ལ། རྫོང་དང་ཤང（གྲོང་རྡལ）ཁག་གི་ཞིང་འབྲོག་ལས་ལག་རྩལ་ཁྱབ་གདལ་ས་ཚིགས་དང་ཕྱུགས་ནད་འགོག་བཅོས་ས་ཚིགས། ཤང（གྲོང་རྡལ）ཞིང་འབྲོག་ཕྱོགས་བསྡུས་ཞབས་ཞུ་ལྟེ་གནས། ཚན་རྩལ་ཆེད་མངགས་པ་བཅས་ཀྱི་ནུས་པ་འདོན་སྤེལ་གང་ལེགས་བྱས་ནས། སོན་བཟང་ཉོ་སྒྲུབ་དང་ནད་འབུ་ཕྱོགས་བསྡུས་འགོག་བཅོས། ཞིང་ཁའི་གཡོག་བྱེད་སོགས་ཐད་ལག་རྩལ་མཛུབ་ཁྲིད་བྱེད་ཤུགས་ཆེ་རུ་བཏང་སྟེ། འབྲུ་རིགས་ཐོན་སྐྱེད་ཀྱི་ནུས་པ་དང་གནོད་འཚེ་འགོག་སེལ་གྱི་ནུས་པ་ཆེ་རུ་གཏོང་བཞིན་ཡོད། །
རྩོམ་སྒྲིག་པ། མཁའ་མཚོ་སྐྱིད།
མངའ་རིས་ས་ཁུལ་གྱིས་ནད་ཡམས་འགོག་ཟོན་དང་དབུལ་གྲོལ་འགག་སྒྲོལ་ལས་དོན་ལ་འཐུས་ཤོར་མི་ཡོང་བ་བྱས།