ཀྲུང་གོ་བོད་ཀྱི་དྲ་བའི་འཕྲིན། ཉིང་ཁྲི་གྲོང་ཁྱེར་གྱི་ཕྱོགས་ཁག་གི་སྟོབས་ཤུགས་ཀྱིས་ཕྱར་བ་གྲུ་འདེགས་དང་ཚན་རིག་དང་མཐུན་པའི་ངང་ནད་ཡམས་སྔོན་འགོག་ཚོད་འཛིན་བྱས་ཏེ། ནད་ཡམས་ཕྱི་ཕྱོགས་ནས་མི་འགོས་བ་དང་ནང་དུ་མི་ཁྱབ་པ་བྱེད་པའི་ལས་དོན་ཞིབ་ཕྲ་དང་ཏན་ཏིག་སྒྲུབ་པས། ནད་ཡམས་སྔོན་འགོག་ཚོད་འཛིན་ལ་དུས་མཚམས་རང་བཞིན་གྱི་ཕན་འབྲས་ཐོན་ཡོད།
ཉིང་ཁྲིར་དམངས་ཡོངས་ནས་ནད་ཡམས་སྔོན་འགོག་ཚོད་འཛིན་གྱི་ད་རེས་ལས་དོན་ཁྲོད་གྲོང་ཁྱེར་མི་དམངས་སྨན་ཁང་དང་། རྫོང（ཆུས）ཁག་གི་འཕྲོད་བསྟེན་ཞབས་ཞུའི་ལྟེ་གནས་སོགས་སྨན་ཁང་བརྒྱད་དམིགས་འཛུགས་སྨན་ཁང་དུ་གཏན་འཁེལ་བྱས་པ་དང་ཆབས་ཅིག་རྗེས་གྲབས་སྨན་བཅོས་ཚན་པ་བཙུགས་ཡོད། ད་དུང་སྨན་དོན་པ132གཅིག་གྱུར་འཆར་འགོད་ངང་བཀོད་སྒྲིག་བྱས་ནས་གཙོ་གནད་འགག་སྒོ་དང་ལོགས་བཀར་ཁུལ། སྡེ་ཁུལ་སོགས་སུ་ཕར་འགྲོ་ཚུར་འོང་བྱེད་མཁན་ལ་གྲལ་བཤེར་བྱས་ཏེ། ཞིབ་ཅིང་ཕྲ་བའི་བྱ་ཐབས་ཐོག་ནས་ནད་ཡམས་སྔོན་འགོག་ཚོད་འཛིན་གྱི་ལས་དོན་ཡག་པོ་སྤེལ་ཡོད། དེ་དང་ཆབས་ཅིག་ཁ་རས་དང་ནད་དུག་འགོག་སྨན་སོགས་ནད་ཡམས་སྔོན་འགོག་ཚོད་འཛིན་གྱི་དངོས་ཟོག་དང་ཤ་ཚལ་སྒོང་གསུམ་སོགས་གྲོང་མིའི་འཚོ་བའི་མཁོ་ཆས་མཁོ་སྤྲོད་ལས་དོན་ཡག་པོ་སྒྲུབ་པ་མ་ཟད། འཐབ་ས་དང་པོའི་སྨན་དོན་པ་དང་སྤྱི་བདེ་མི་དམངས་ཉེན་རྟོག་པར་མཁོ་བའི་འགོག་སྲུང་དངོས་རྫས་ཡང་འགན་ལེན་ཡག་པོ་བྱས་ཡོད།
ཤེས་རྟོགས་བྱས་པར་གཞིགས་ན། དེང་སྐབས་ཉིང་ཁྲིའི70%ཡི་འཚོ་བའི་མཁོ་ཆས་ཟི་ཁྲོན་དང་ཡུན་ནན་སོགས་ནས་དབོར་གྱི་ཡོད་པ་དང་། ད་ཡོད་ཀྱི་དངོས་ཟོག་གྲབས་གསོག་འདེང་ངེས་བྱས་ཡོད་པས་གྲོང་ཁྱེར་དེ་ཡོངས་ཀྱི་ཐོན་སྐྱེད་དང་འཚོ་བའི་དགོས་མཁོ་སྐོང་ཐུབ་རྒྱུ་རེད། ནད་ཡམས་ཐོན་ཚུན། ཉིང་ཁྲི་གྲོང་ཁྱེར་གྱི་ཡུལ་སྐོར་ལས་རིགས་གནས་སྐབས་མཚམས་འཇོག་བྱེད་དགོས་བྱུང་ཡོད་པ་དང་། ཉེ་དུས་ནད་ཡམས་སྔོན་འགོག་ཚོད་འཛིན་ལས་ཀའི་དུས་བབ་ལེགས་སུ་ཕྱིན་པ་དང་བསྟུན་ནས། ཉིང་ཁྲི་གྲོང་ཁྱེར་གྱིས་ཞབས་ཞུའི་ལས་དོན་སླར་གསོ་བྱེད་འདོད་ཡོད་པའི་ཡུལ་སྐོར་ཁེ་ལས་ཁག་ལ་ལྟ་སྐུལ་མཛུབ་ཁྲིད་བྱེད་ཤུགས་ཆེ་རུ་བཏང་ཡོད།
སྤྱི་བདེ་མི་དམངས་ཉེན་རྟོག་པས་གནམ་གྲུ་འབབ་ཐང་དང་ལོགས་བཀར་ལྟ་ཞིབ་དམིགས་འཛུགས་མགྲོན་ཁང་། མི་སྣ་ཁག་བགོས་ས་ཚིགས་སོགས་ནད་ཡམས་སྔོན་འགོག་ཚོད་འཛིན་གྱི་འཐབ་ས་དང་པོར་ལས་དོན་ཧུར་ཐག་སྤེལ་ཏེ། མི་དམངས་མང་ཚོགས་ཀྱི་ཚེ་སྲོག་བདེ་འཇགས་དང་གཟུགས་གཞི་བདེ་ཐང་ཡོང་བ་བྱེད་བཞིན་ཡོད།།
རྩོམ་སྒྲིག་པ། མཁའ་མཚོ་སྐྱིད།
ཉིང་ཁྲིའི་ནད་ཡམས་སྔོན་འགོག་ཚོད་འཛིན་ལ་དུས་མཚམས་རང་བཞིན་གྱི་གྲུབ་འབྲས་ཐོབ།