བོད་ལྗོངས་ཀྱི་གནའ་སྡོང་དང་རྩ་ཆེའི་ལྗོན་ཤིང་གི་ཡོངས་བཤེར་ལས་དོན་ལེགས་འགྲུབ་ཟིན་པ།

ཀྲུང་གོ་བོད་ཀྱི་དྲ་བའི་འཕྲིན། 2018ལོའི་ཟླ5བ་ནས་བཟུང་། བོད་ལྗོངས་ཀྱིས་གནའ་སྡོང་དང་རྩ་ཆེའི་ལྗོན་ཤིང་གི་ཐོན་ཁུངས་ལ་ཡོངས་བཤེར་བྱེད་འགོ་ཚུགས་པ་དང་། མིག་སྔར་ཞིབ་བཤེར་ལས་དོན་ལེགས་གྲུབ་ཟིན་པ་རེད། ད་ཐེངས་ཀྱི་ཡོངས་བཤེར་བྱ་ཡུལ་གཙོ་བོ་ནི་ལྷ་ས་དང་། ཉིང་ཁྲི། ལྷོ་ཁ། གཞིས་རྩེ། མངའ་རིས། ཆབ་མདོ་བཅས་གྲོང་ཁྱེར(ས་ཁུལ)6གི་རྫོང54དང་ཆུས4རེད། བརྟག་དཔྱད་བྱས་འབྲས་ལས་མངོན་དོན། བོད་ལྗོངས་སུ་གནའ་སྡོང38652ཡོད་པ་རེད། དེའི་ནང་རིམ་པ་དང་པོའི་གནའ་སྡོང4590དང་། རིམ་པ་གཉིས་པའི་གནའ་སྡོང15400། རིམ་པ་གསུམ་པའི་གནའ་སྡོང18600བཅས་ཡོད་པ་རེད།

བརྟག་དཔྱད་བྱས་པ་ལས་ཤེས་གསལ། རང་ལྗོངས་སུ་གནའ་སྡོང་རིགས14ཡོད་པ་ལས། ལྷ་ས་གྲོང་ཁྱེར་དུ2དང་། གཞིས་རྩེ་གྲོང་ཁྱེར་དུ1། ལྷོ་ཁ་གྲོང་ཁྱེར་དུ2། ཉིང་ཁྲི་གྲོང་ཁྱེར་དུ5། ཆབ་མདོ་གྲོང་ཁྱེར་དུ2། མངའ་རིས་ས་ཁུལ་དུ2བཅས་ཡོད་ཅིང་། རིགས་དེ་དག་ལས་གྲངས་འབོར་ཉུང་ཤོས་ལ་སྡོང་པོ30དང་མང་ཤོས་ལ་སྡོང་པོ3000ལྷག་ཡོད་པ་རེད།

རང་སྐྱོང་ལྗོངས་ཀྱི་གནའ་སྡོང་དང་རྩ་ཆེའི་ལྗོན་ཤིང་གི་རིགས་ལ་གཙོ་བོ་སྟར་སྡོང་དང་། བོད་ཀྱི་སྦྱར་པ། རྒྱ་ལྕང་། འབྲས་ཆེན་ཤུག་པ། གླ་ཚེར། ཆབ་མདོའི་སྦྱར་པ། ཤུག་སྡོང་ཆེན་པོ། ཡོམ་འབོག སྒྲོ་བ་ཤིང་། རྒྱ་ལྕང་དཀར་པོ། ཚེར་སྡོང་། སྡོང་རིང་ཐང་ཤིང་སོགས་ཡིན་པ་དང་མང་ཤོས་ནི་སྟར་སྡོང་དང་བོད་ཀྱི་སྦྱར་པ་རེད།

ལྗོན་ཤིང་གི་ལོ་ཚད་རིང་ཤོས་ནི་ཉིང་ཁྲི་གྲོང་ཁྱེར་བྲག་ཡིབ་ཆུས་སུ་ཡོད་པའི་ལོ3200ཟིན་པའི་ཤུག་སྡོང་ཆེན་པོ་དེ་རེད། ད་དུང་ཉིང་ཁྲི་གྲོང་ཁྱེར་སྣང་རྫོང་གི་ལོ1000ཟིན་པའི་སྟར་སྟོང་དང་། ཆབ་མདོ་ལྷོ་རོང་གི་ལོ500ཟིན་པའི་བོད་ཀྱི་སྦྱར་པ། གཞིས་རྩེའི་ངམ་རིང་རྫོང་གི་ལོ1000གཡས་གཡོན་གྱི་འབྲས་ཆེན་ཤུག་པ་བཅས་ནི་ལོ་ཚད་རིང་བའི་གྲས་སུ་ཚུད་ཡོད་པ་རེད།  །

རྩོམ་སྒྲིག་པ། མཁའ་མཚོ་སྐྱིད།

དཔྱད་མཆན 0 ཡོད།