ཀྲུང་གོ་བོད་ཀྱི་དྲ་བའི་འཕྲིན། ཉེ་བའི་ལོ་ཤས་རིང་ལྷོ་ཁ་ས་ཁུལ་གྱིས་རྩྭ་ཐང་སྣོད་བཅུད་སྲུང་སྐྱོང་གི་ཁ་གསབ་བྱ་དགའི་ལས་དོན་གྱི་ལམ་སྲོལ་གསར་པ་དང་མ་དཔེ་གསར་པ་རྒྱུན་ཆད་མེད་པར་འཚོལ་ཞིབ་བྱེད་པ་དང་། “གསར་གཏོད་དྲུག་དང་འཚོལ་ཞིབ་གཅིག”ལ་དམ་པོར་དམིགས་ཏེ་མ་དངུལ་དོན་འཁྱོལ་ལ་དམ་འཛིན་ཤུགས་ཆེན་བྱེད་ཀྱི་ཡོད་པ་རེད། ཞིབ་རྩིས་བྱས་པར་གཞིགས་ན། ས་ཁུལ་དེ་ཡོངས་སུ་2013ལོ་འཁོར་གྱི་རྩྭ་ཐང་སྣོད་བཅུད་སྲུང་སྐྱོང་གི་ཁ་གསབ་བྱ་དགའི་མ་དངུལ་སྒོར་ཁྲི་10668.66དོན་འཁྱོལ་བྱས་ནས། དུད་ཚང་རེར་ཆ་སྙོམས་ཡོང་འབབ་སྒོར་1427འཕར་བ་དང་མི་རེར་ཆ་སྙོམས་ཡོང་འབབ་སྒོར་365འཕར་ཡོད་པ་རེད།
སྲིད་ཇུས་དྲིལ་བསྒྲགས་བྱེད་སྟངས་གསར་གཏོད་བྱེད་པ། ལྷོ་ཁ་ས་ཁུལ་གྱིས་གྲོང་ཚོར་བཅའ་སྡོད་ལས་དོན་རུ་ཁག་གི་ནུས་པ་འདོན་སྤེལ་གང་ལེགས་བྱས་ནས། རང་ངོས་སློབ་སྦྱོང་ལ་ཤུགས་སྣོན་རྒྱག་པའི་རྨང་གཞིའི་ཐོག་འབྲོག་ཁུལ་དང་འབྲོག་དུད་དུ་བསྐྱོད་དེ། གོ་བདེ་ཤེས་སླ་དང་མང་ཚོགས་ཀྱི་ལྟ་འདོད་ཉན་སྤྲོའི་ཐབས་ལ་བརྟེན་ནས་རྩིས་ཞིབ་ཕྲ་རྒྱག་རོགས་བྱེད་པ་དང་། ཐོབ་ཤོར་སྐོར་བརྗོད་པ། ཕན་འབྲས་གླེང་བ་བཅས་བྱས་ནས་རྩྭ་ཐང་སྣོད་བཅུད་སྲུང་སྐྱོང་གི་ཁ་གསབ་བྱ་དགའི་འབྲེལ་ཡོད་སྲིད་ཇུས་དྲིལ་བསྒྲགས་ཧུར་ཐག་བྱས་ཡོད་པ་རེད།
ཕྱུགས་རིགས་བཤས་གཏོང་སྟངས་གསར་གཏོད་བྱེད་པ། རང་སྐྱོང་ལྗོངས་ཀྱི་3:4:3གྱི་ཕྱུགས་རིགས་ཉུང་གཏོང་བསྡུར་གྲངས་ཀྱི་བླང་བྱ་གཞིར་བཟུང་། རྫོང་ཁག་གིས་བྱ་ཐབས་ནུས་ལྡན་སྤྱད་ནས་ཕྱུགས་རིགས་བཤས་གཏོང་ཚད་མང་དུ་གཏོང་གི་ཡོད་པ་རེད། ས་ཁུལ་དང་། རྫོང་། ཤང་། གྲོང་ཚོ། དུད་ཚང་བཅས་རིམ་པ་བཞིན་ཕྱུགས་རིགས་ཉུང་གཏོང་གི་དམིགས་ཚད་འགན་འཁྲིའི་ཡི་གེ་བཞག་པ་དང་། རྫོང་ཁག་གཅིག་གིས་ན་ལོན་ཕྱུགས་རིགས་གཅིག་བཤས་བཏང་བར་ཁ་གསབ་དངུལ་སྒོར་50སྤྲོད་པ་དང་ཕྱུགས་ཕྲུག་གཅིག་བཤས་བཏང་བར་ཁ་གསབ་དངུལ་སྒོར་30སྤྲོད་པའི་ཚད་གཞིར་གཞིགས་ནས་བྱ་དགའ་སྤྲོད་ཀྱི་ཡོད་པ་རེད།
ཕྱུགས་རིགས་གཙང་རྩིས་བྱེད་སྟངས་གསར་གཏོད་བྱེད་པ། ལྷོ་ཁ་ས་ཁུལ་གྱིས་དུས་ཐོག་ཏུ་ཇུས་གཞི་ཞིབ་ཕྲ་བཟོས་ནས་རིམ་པ་རེ་རེ་བཞིན་ཕྱུགས་རིགས་གཙང་རྩིས་ཀྱི་འགན་འཁྲིའི་ཡི་གེ་བཞག་པ་རེད། ཤང（གྲོང་རྡལ）ཁག་གཅིག་གིས་གྲོང་ཚོའི་ནང་གི་སྙན་གྲགས་ཆེ་ཙམ་ལྡན་པའི་མང་ཚོགས་གཙང་རྩིས་ནང་ཞུགས་རྒྱུའི་གདན་དྲངས་པའམ་ཡང་ན་གྲོང་ཚོ་དང་གྲོང་ཚོའི་དབར་སྣོལ་སྡེབ་གཙང་རྩིས་རྒྱག་གི་ཡོད་པ་དང་གཙང་རྩིས་བརྒྱབ་རྗེས་སླར་ཡང་ཤང（གྲོང་རྡལ）ལ་གཙང་རྩིས་དཔང་ཡིག་འཕྱུགས་མེད་ཅིག་སྤྲོད་ཀྱི་ཡོད་པ་རེད། རྫོང་ཁག་གཅིག་གི་ནོར་སྲིད་ཅུས་ཀྱིས་གྲོང་ཚོ་རེར་ཆེད་མངགས་ཕྱུགས་རིགས་གཙང་རྩིས་ཀྱི་ཁ་གསབ་དངུལ་སྒོར་1000སྤྲད་དེ་ཕྱུགས་རིགས་གཙང་རྩིས་ལས་དོན་བདེ་བླག་ངང་སྤེལ་རྒྱུའི་འགན་ལེན་བྱེད་ཀྱི་ཡོད་པ་རེད།
གཞི་གྲངས་ཡོངས་བསྒྲགས་ལམ་ལུགས་གསར་གཏོད་བྱེད་པ། གྲོང་ཚོ་རིམ་པའི་རྨང་གཞིའི་གཞི་གྲངས་ཡོངས་བསྒྲགས་བྱེད་སྐབས་ས་ཁུལ་གྱི་རྩྭ་ཐང་སྣོད་བཅུད་སྲུང་སྐྱོང་གི་ཁ་གསབ་བྱ་དགའི་གཞུང་དོན་ཁང་གིས་གཅིག་གྱུར་ཐོག་གྲོང་ཚོའི་ཨུ་ལྷན་ཁག་ལ་ཆེད་དམིགས་ཀྱི་ཡོངས་བསྒྲགས་ལེ་ཚན་ཞིག་བཟོ་རྒྱུའི་བླང་བྱ་བཏོན་པ་རེད། ཡོངས་བསྒྲགས་ལེ་ཚན་ནང་ཤོག་བུ་དམར་པོས་ཕྱུགས་རིགས་ཉུང་གཏོང་གི་ལས་འགན་སྒྲུབ་མེད་པའི་དུད་ཚང་མཚོན་པ་བྱེད་པ་དང་ཤོག་བུ་ལྗང་ཁུས་རྩྭ་ཕྱུགས་དོ་སྙོམས་ཀྱི་དུད་ཚང་མཚོན་པ་བྱེད་པ་མ་ཟད། མ་དངུལ་རྩིས་བཤེར་རེའུ་མིག་ཡོངས་བསྒྲགས་ཀྱང་བྱས་པས། ཡོངས་བསྒྲགས་གཞི་གྲངས་གསལ་ཐག་ཆོད་མཐོང་ཐུབ་ཁར། ད་འབྲོག་དུད་ཀྱི་ཕྱུགས་རིགས་ཉུང་གཏོང་གི་ཧུར་བརྩོན་རང་བཞིན་ཡང་འཕེལ་བ་རེད།
བྱ་དགའ་དང་ཆད་གཅོད་ལམ་ལུགས་གསར་གཏོད་བྱེད་པ། ལས་ཀ་མ་བྱས་གོང་སྡེ་ཚན་ཁག་གིས་རིམ་པ་རེ་རེ་བཞིན་ལས་ཀའི་འགོ་ཁྲིད་ཚོགས་ཆུང་བཙུགས་ནས། དམིགས་ཚད་ཀྱི་འགན་འཁྲིའི་ཡི་གེ་བཞག་པ་དང་དུས་མཚུངས་རྩྭ་ཐང་གི་སྣོད་བཅུད་སྲུང་སྐྱོང་གི་ཁ་གསབ་བྱ་དགའི་ལས་དོན་དེ་ལོ་མཇུག་གི་ཕྱོགས་སྡོམ་དཔྱད་བསྡུར་ཁྱབ་ཁོངས་ནང་བཅུག་པ་རེད།
མ་དངུལ་བེད་སྤྱོད་གཏོང་སྟངས་གསར་གཏོད་བྱེད་པ། ལྷོ་ཁ་ས་ཁུལ་གྱི་གཙང་པོ་འབབ་རྒྱུད་དུ་ཡོད་པའི་སྣེ་གདོང་རྫོང་སྐྱེད་པ་ཤང་གིས་ས་བབ་དང་བསྟུན་ནས་མང་ཚོགས་རང་མོས་ཀྱི་སྔོན་འགྲོའི་ཆ་རྐྱེན་འོག་རྩྭ་ཐང་གི་སྣོད་བཅུད་སྲུང་སྐྱོང་གི་ཁ་གསབ་བྱ་དགའི་མ་དངུལ་དེ་མ་རྐང་གི་ཐོག་ནས་བྱེ་རྡོ་ར་བ་གསར་པར་ཞུགས་ཏེ་ཁེ་སྤོགས་བགོ་བའི་ཚོད་ལྟ་བྱས་པས་ཕྱུགས་རིགས་ཉུང་གཏོང་གི་ལས་འགན་སྒྲུབ་པ་དང་སྣོད་བཅུད་ཁོར་ཡུག་ལེགས་སུ་ཕྱིན་པ་མ་ཟད། འབྲོག་པའི་འབབ་འཕར་ལ་སྐུལ་འདེད་ཀྱང་གཏོང་བའི་གཉིས་ཁེའི་དམིགས་ཡུལ་མངོན་འགྱུར་བྱུང་བ་རེད།
རྩྭ་ར་རིན་ཡོད་གཞན་སྤྲོད་ཀྱི་ཚོད་ལྟའི་ལས་དོན་འཚོལ་ཞིབ་བྱེད་པ། ཆུ་གསུམ་རྫོང་ཆུ་མདོ་རྒྱང་ཤང་གིས་རྫོང་ཡོངས་སུ་རྩྭ་ཕྱུགས་སྤྱི་ཡོངས་ནས་དོ་སྙོམས་བྱུང་བའི་རྨང་གཞིའི་ཐོག་མང་ཚོགས་རང་མོས་ཀྱི་རྩ་དོན་མཐའ་འཁྱོངས་ཀྱིས་གྲོང་ཚོ་དེ་གའི་ཙུའུ་དང་ཙུའུ་དབར་རྩྭ་ར་རིན་ཡོད་གཞན་སྤྲོད་ཀྱི་ཚོད་ལྟ་བྱེད་ཀྱི་ཡོད་པ་རེད།
(ཚེ་བདེ་སྐྱིད་དང་བསོད་ནམས་བདེ་སྐྱིད་ཆུང་བས་སྒྱུར་ཞུས་བྱས)
