ཀྲུང་གོ་བོད་ཀྱི་དྲ་བའི་འཕྲིན། ཚེས་7ཉིན་གྱི་ཕྱི་དྲོ་གསར་འགོད་པས་རང་སྐྱོང་ལྗོངས་གནམ་གཤིས་ལས་ཁུངས་ནས་ཤེས་རྟོགས་བྱས་པར། མངའ་རིས་ས་ཁུལ་དང་ནག་ཆུ་ས་ཁུལ་གྱི་ནུབ་རྒྱུད་ཕུད་རང་ལྗོངས་ཀྱི་ས་ཆ་མང་ཆེ་བར་ཆར་དུས་ཤར་བས་འབྲེལ་ཡོད་སྡེ་ཚན་གྱིས་གློག་འཁྱུག་ཐོག་རྒྱག་དང་སེར་བ་་བབས་པ་སོགས་ཀྱི་གནམ་གཤིས་ལ་དོགས་ཟོན་གྱི་ལས་དོན་ཡག་པོ་བསྒྲུབ་དགོས་པའི་དྲན་སྐུལ་བྱས་ཡོད།
དཔྱད་གཞིའི་ཡིག་ཆ་གསར་ཤོས་ལས་མངོན་པར་གཞིགས་ན། གཟའ་ཟླ་བ་ནས་ཕུར་བུ་བར（ཟླ་7ཚེས་7ཉིན་ནས་ཚེས་10ཉིན་བར）ནག་ཆུ་ས་ཁུལ་དང་། ཆབ་མདོ་ས་ཁུལ། ཉིང་ཁྲི་ས་ཁུལ། གཙང་པོའི་རྒྱུད་བཅས་སུ་ཆར་པ་ཆུང་བ་ནས་འབྲིང་བའི་བར་རམ་ཡང་ན་འབྲུག་ཆར་འབབ་རྒྱུ་དང་ས་ཆ་ཁག་གཅིག་ལ་ཆར་པ་ཆེ་བ་འབབ་རྒྱུ། ས་ཁུལ་གཞན་དག་ལ་སྤྲིན་པ་མང་པོ་འཁོར་རྒྱུ་དང་ས་ཆ་ཁག་གཅིག་ལ་ཆར་པ་སིམ་སིམ་འབབ་རྒྱུ། གཟའ་པ་སངས་ནས་ཉི་མ་བར（ཟླ་7ཚེས་11ཉིན་ནས་ཚེས་13ཉིན་བར）ཉིང་ཁྲི་ས་ཁུལ་དང་ལྷོ་ཁ་ས་ཁུལ་ལྷོ་རྒྱུད་དུ་ཆར་པ་ཆུང་བ་ནས་འབྲིང་བའི་བར་རམ་ཡང་ན་འབྲུག་ཆར་འབབ་རྒྱུ་དང་ས་ཆ་རེ་ཟུང་ལ་ཆར་པ་ཆེ་བ་འབབ་རྒྱུ། ས་ཁུལ་གཞན་དག་ལ་ཆར་པ་ཆུང་བའམ་ཡང་ན་འབྲུག་ཆར་འབབ་རྒྱུ་དང་ས་ཆ་ཁག་གཅིག་ལ་ཆར་པ་འབྲིང་བ་འབབ་རྒྱུ་བཅས་རེད།
