ཀྲུང་གོ་བོད་ཀྱི་དྲ་བའི་འཕྲིན། ཚེས་8ཉིན་གྱི་སྔ་དྲོ་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་ཀྲུའུ་ཞི་བློ་བཟང་རྒྱལ་མཚན་གྱིས་རང་སྐྱོང་ལྗོངས་མི་དམངས་སྲིད་གཞུང་གི་རྒྱུན་ལས་ཚོགས་འདུ་གཙོ་སྐྱོང་གནང་ནས་2014ལོའི་ལོ་སྟོད་ཀྱི་ལྗོངས་ཡོངས་ཀྱི་དཔལ་འབྱོར་འཁོར་རྒྱུག་གནས་ཚུལ་ལ་ཁྱོན་ཡོངས་ནས་དབྱེ་ཞིབ་དང་། ལོ་སྨད་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་གཙོ་གནད་ལས་དོན་ལ་ཞིབ་འཇུག་གཏིང་ཟབ་གནང་བ་རེད།
ཚོགས་འདུའི་ཐོག་འདི་ལོ་ནས་བཟུང་རང་སྐྱོང་ལྗོངས་ཏང་ཨུད་དང་སྲིད་གཞུང་གི་ཚད་མཐོའི་མཐོང་ཆེན་དང་སྲ་ཞིང་བརྟན་པའི་འགོ་ཁྲིད་འོག་ལྗོངས་ཡོངས་ཀྱི་གོང་འོག་ཚང་མས་བློ་བརྟན་འགྱུར་མེད་ངང་ཀྲུང་དབྱང་གི་སྤྱི་ཁོག་དཔལ་འབྱོར་སྲིད་ཇུས་ལག་ལེན་བསྟར་བ་དང་། “663”ལས་ཀའི་བསམ་ཕྱོགས་རྒྱུན་ཆད་མེད་པར་གཏིང་ཟབ་ཏུ་གཏོང་བ། བསམ་ཕྱོགས་གསར་གཏོད་ཀྱིས་འཕེལ་རྒྱས་དོན་གཉེར་བྱེད་པ། མཐུན་སྒྲིལ་རྡོག་རྩ་གཅིག་སྒྲིལ་གྱིས་བརྟན་ལྷིང་སྲུང་སྐྱོང་བྱེད་པ། དཔལ་འབྱོར་འཁོར་རྒྱུག་སྤུས་ཚད་རྒྱུན་ཆད་མེད་པར་མཐོ་རུ་གཏོང་བ། མ་འཇོག་གྲུབ་ཆ་སྔར་བས་ལེགས་སུ་གཏོང་བ། རྒྱུ་རྐྱེན་གཙོ་བོའི་འགན་ལེན་དེ་བས་ནུས་ལྡན།
ཁྱད་ལྡན་ལེགས་ཆའི་ཐོན་ལས་འཕེལ་རྒྱས་མགྱོགས་སུ་གཏོང་བ། དམངས་འཚོ་ལེགས་གཏོང་བྱ་ཤུགས་ཆེ་རུ་གཏོང་བ། སྣོད་བཅུད་ཁོར་ཡུག་རྒྱུན་མཐུད་ལེགས་སུ་གཏོང་བ། སྒྱུར་བཅོས་ཁག་གོ་རིམ་ལྡན་པ། སྤྱི་ཚོགས་ཁྱོན་ཡོངས་ཞི་མཐུན་བརྟན་ལྷིང་བཅས་ཡོང་བ་བྱས་པས“བརྟན་ཐོག་ལེགས་བརྩོན་དང་། བརྟན་ཐོག་ཡར་འཕེལ། བརྟན་ཐོག་མཐོར་གཏོང”བཅས་ཀྱི་རྣམ་པ་བཟང་པོ་ཐོན་ཏེ་ལོ་ཧྲིལ་པོའི་འཕེལ་རྒྱས་དམིགས་ཚད་མངོན་འགྱུར་ཐུབ་རྒྱུར་རྨང་གཞི་བརྟན་པོ་བཏིང་ཡོད་པའི་ངོས་འཛིན་བྱས་པ་རེད།
ཚོགས་འདུའི་ཐོག་ལོ་ཧྲིལ་པོའི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་དམིགས་ཚད་ལས་འགན་བདེ་བླག་ངང་ལེགས་སྒྲུབ་བྱ་རྒྱུར་གལ་ཆེའི་དོན་སྙིང་ལྡན་ཡོད་པས་བསམ་བློ་དང་བྱ་སྤྱོད་ལྗོངས་ཏང་ཨུད་དང་སྲིད་གཞུང་གི་ཐབས་ཇུས་བཀོད་སྒྲིག་ཐོག་གཅིག་གྱུར་ཡོང་བ་བྱས་ནས“663”ལས་ཀའི་བསམ་ཕྱོགས་ཁྱོན་ཡོངས་ནས་ལག་བསྟར་དོན་འཁྱོལ་བྱེད་པ་དང་། ཀྲུང་དབྱང་གིས་ནུབ་རྒྱུད་ས་ཁུལ་ལ་རྒྱབ་སྐྱོར་བྱ་ཤུགས་ཆེ་རུ་གཏོང་བ་དང་སྲིད་ཇུས་ཀྱི་ལེགས་ཆ་དེ་བས་མངོན་གསལ་དོད་དུ་གཏོང་བའི་གོ་སྐབས་དམ་འཛིན་བྱེད་པ། ལྗོངས་ཡོངས་ཀྱི་སྤྱི་ཚོགས་ཁྱོན་ཡོངས་ཞི་མཐུན་བརྟན་ལྷིང་དང་འཕེལ་རྒྱས་ཁོར་ཡུག་སྔར་བས་ལེགས་སུ་ཕྱིན་པའི་གོ་སྐབས་བཟང་པོ་དམ་འཛིན་བྱེད་པ། ཡིད་ཆེས་བརྟན་དུ་དང་། གཙོ་གནད་འབུར་ཐོན། བྱ་ཐབས་གསར་གཏོད། དོན་འཁྱོལ་ལ་དམ་འཛིན་བཅས་བྱས་ནས། ལྗོངས་ཡོངས་ཀྱི་དཔལ་འབྱོར་ལེགས་ལ་མྱུར་བའི་ངང་འཕེལ་རྒྱས་འགྲོ་རྒྱུར་ནུས་ཤུགས་ཡོད་རྒུས་སྐུལ་འདེད་གཏོང་དགོས་པ་སྟེ། གཅིག་ནས་དཔལ་འབྱོར་ལས་དོན་ཐད་གཞི་ཚུགས་ས་ཡོད་པ་བྱེད་དགོས་པ་དང་། གཉིས་ནས་གཙོ་གནད་ལས་དོན་ཐད་གནད་ལ་འཁེལ་བའི་ཤུགས་རྒྱག་དགོས་པ། གསུམ་ནས་རྣམ་གྲངས་འཛུགས་སྐྲུན་ཐད་ནུས་ཤུགས་ཡོད་རྒུ་འདོན་དགོས་པ། བཞི་ནས་དམངས་འཚོ་ལེགས་གཏོང་ཐད་རྒྱུན་མཐུད་ཤུགས་སྣོན་རྒྱག་དགོས་པ། ལྔ་ནས་སྒྱུར་བཅོས་སྒོ་དབྱེའི་ཐད་གསོན་ཤུགས་འཕེལ་བ་བྱེད་དགོས་པ་བཅས་ཀྱི་ནན་བཤད་བྱས་པ་རེད།
ཚོགས་འདུའི་ཐོག་རྩ་དོན་གཞིར་བཟུང《ཉིང་ཁྲི་ས་ཁུལ་གྱི་ས་ཆ་བེད་སྤྱོད་ཀྱི་སྤྱིའི་འཆར་འགོད（2006ནས་2020ལོ་བར）》ལ་གྲོས་འཆམ་བྱས་པ་རེད།
