རྒྱལ་སྟོན་དུས་ཆེན་ལ་རྟེན་འབྲེལ་ཞུ།

རྒྱལ་ཁབ་བདེ་ན་དམངས་རྣམས་བདེ།།

དམངས་རྣམས་བདེ་ན་རྒྱལ་ཁབ་བདེ།།

རྒྱལ་ཁབ་བདེ་ཞིང་དར་བར་ཤོག།

དམངས་རྣམས་བདེ་ཞིང་སྐྱིད་པར་ཤོག།

དང་པོ། རྒྱལ་སྟོན་དུས་ཆེན་གྱི་བྱུང་བ།

རྒྱལ་ཁབ་གང་གིས་གཏན་འབེབས་བྱས་ཤིང་། རྒྱལ་ཁབ་རང་ཉིད་ལ་དྲན་གསོ་ཞུ་བའི་ཁྲིམས་བཀོད་ཀྱི་གུང་གསེང་སྟེ། དེ་ནི་རྒྱལ་ཁབ་དེའི་རང་བཙན་དང་། རྩ་ཁྲིམས་ཀྱི་མིང་བཀོད་དང་། གཙོ་འཛིན་སྐུ་འཁྲུངས་པའམ་གཞན་པའི་དྲན་གསོའི་དོན་སྙིང་ལྷག་པར་ཆེ་བའི་ལོ་འཁོར་གཅིག་གི་དྲན་གསོའི་ཉིན་མོ་ཞིག་ལ་བྱའོ།།

ཀྲུང་གོའི་གནའ་རབས་སུ་གོང་མ་གསེར་ཁྲིར་མངའ་གསོལ་བ་དང་། གོང་མའི་འཁྲུངས་སྐར་ལ་རྒྱལ་སྟོན་ཞེས་བྱ་ཞིང་། ད་ལྟ་ཀྲུང་གོའི་རྒྱལ་སྟོན་དུས་ཆེན་ནི་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་དངོས་སུ་དབུ་བརྙེས་པའི་དྲན་གསོའི་ཉིན་མོ་སྟེ། ཟླ་10པའི་ཚེས་1ཉིན་ལ་གོ་བར་བྱེད་དོ།།

འཛམ་གླིང་དུ་ལོ་རྒྱུས་ཆེས་རིང་བའི་རྒྱལ་སྟོན་དུས་ཆེན་ནི་ཧྲེང་མ་ལི་ནོ་ཡི་རྒྱལ་སྟོན་དུས་ཆེན་ཡིན་ཏེ། སྤྱི་ལོ་301ལོར། ཧྲེང་མ་ལི་ནོ་ཡིས་ཟླ་9པའི་ཚེས་3གྱི་ཉིན་མོ་དེ་རང་གི་རྒྱལ་སྟོན་དུས་ཆེན་དུ་བཞག་གོ།།

སྤྱི་ལོ་1949ལོའི་ཟླ་12པའི་ཚེས་2ཉིན། ཀྲུང་དབྱང་མི་དམངས་སྲིད་གཞུང་གིས《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྒྱལ་སྟོན་དུས་ཆེན་གྱི་གྲོས་ཆོད།》ཅེས་པར་གྲོས་འཆམ་བྱུང་ཞིང་། ལོ་རེའི་ཟླ་10པའི་ཚེས་1ཉིན་ནི་རྒྱལ་སྟོན་དུས་ཆེན་དུ་གཏན་འབེབས་བྱས་པར་མ་ཟད། ཉིན་མོ་དེ་ནི་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་དབུ་བརྙེས་པའི་ཉིན་མོ་ཡིན་པར་ཁྱབ་བསྒྲགས་བྱས། 1950ལོ་ནས་བཟུང་སྟེ། ལོ་རེའི་ཟླ་10པའི་ཚེས་1ཉིན་ནི་ཀྲུང་གོའི་མི་རིགས་སོ་སོའི་མི་དམངས་རྣམས་ཀྱིས་རྒྱལ་སྟོན་དུས་ཆེན་ལ་རྟེན་འབྲེལ་དུ་དགའ་སྟོན་གཟབ་རྒྱས་བྱེད་པའི་དུས་ཆེན་ཞིག་ཏུ་གྱུར་ཏོ།།

གཉིས་པ། རྒྱལ་སྟོན་དུས་ཆེན་གྱི་དགོས་པ།

1.རྒྱལ་ཁབ་ཀྱི་མཚོན་རྟགས།

རྒྱལ་སྟོན་དུས་ཆེན་གྱི་དྲན་གསོའི་ཉིན་མོ་ནི་ཉེ་རབས་མི་རིགས་རྒྱལ་ཁབ་ཀྱི་ཁྱད་ཆོས་ཤིག་སྟེ། ཉེ་རབས་ཀྱི་མི་རིགས་རྒྱལ་ཁབ་བྱུང་བ་དང་མཉམ་དུ་བྱུང་བར་མ་ཟད། གལ་འགངས་ཆེན་པོར་གྱུར་ཅིང་། དེ་ནི་རང་བཙན་རྒྱལ་ཁབ་ཅིག་གི་མཚོན་རྟགས་དང་། རྒྱལ་ཁབ་དེའི་རྒྱལ་ཁབ་ཀྱི་སྒྲིག་གཞི་དང་སྲིད་དབང་གི་སྒྲིག་གཞི་མཚོན་པར་བྱེད་དོ།།

2.བྱེད་ལས་མངོན་པ།

རྒྱལ་སྟོན་དུས་ཆེན་ལྟ་བུའི་དམིགས་བསལ་དྲན་གསོ་བྱེད་སྟངས་དེ་ཉིད་དམངས་ཡོངས་ཀྱི་རང་བཞིན་ལྡན་པའི་དུས་ཆེན་གྱི་རྣམ་པ་གསར་བ་ཞིག་ཏུ་གྱུར་ཚེ། རྒྱལ་ཁབ་དེ་དང་། མི་རིགས་དེའི་གོང་བུར་འགྲིལ་ཤུགས་མཚོན་པ་དང་། དེ་དང་ཆབས་ཅིག་ཏུ་རྒྱལ་སྟོན་དུས་ཆེན་སྐབས་ཀྱི་རྟེན་འབྲེལ་གྱི་མཛད་སྒོ་གཟབ་རྒྱས་ཆེ་བ་དེའང་སྲིད་གཞུང་གི་འབོད་སྐུལ་གྱི་ནུས་པ་བྱེ་བྲག་ཏུ་མངོན་པ་ཞིག་ཀྱང་ཡིན་ནོ།།

3.གཞི་རྩའི་ཁྱད་ཆོས།

སྟོབས་ཤུགས་མངོན་པ་དང་རྒྱལ་དམངས་ཀྱི་ཡིད་ཆེས་ཆེ་རུ་གཏོང་བ་དང་། གོང་བུར་འགྲིལ་ཤུགས་མངོན་པ་དང་། འབོད་སྐུལ་གྱི་ནུས་པ་འདོན་པ་སྟེ། འདི་གསུམ་ནི་རྒྱལ་སྟོན་རྟེན་འབྲེལ་གྱི་མཛད་སྒོའི་གཞི་རྩའི་ཁྱད་ཆོས་གསུམ་ཡིན་ནོ།།

རྩོམ་སྒྲིག་པ། ཀླུ་འབུམ་ཚེ་རིང་།