རྟའུ་རྫོང་གིས་སྐྱེ་ཁམས་དང་རིག་གནས། ཞིང་ལས་བཅས་ཡུལ་སྐོར་དང་མཉམ་འདྲེས་འཕེལ་རྒྱས་གཏོང་བའི་འཕེལ་རིམ་རགས་བཀོད།

11.jpg

སྐབས་རིམ་བྱུང་གི་ལྔ་པའི་དུས་ཆེན་ལ་གསོན་ཤུགས་རབ་ཏུ་རྒྱས། 

22.jpg

གོས་རྒྱན་འཁྲབ་སྟོན།

ཀྲུང་གོ་བོད་ཀྱི་དྲ་བའི་འཕྲིན། 2018ལོར་ལྔ་པའི་དུས་ཆེན་སྐབས་བཞི་པ་མུ་མཐུད་ནས་སྐབས་གོང་མའི་དུས་ཆེན་གྱི་མིང་སྤྱད་དེ་དམངས་ཡོངས་ཀྱི་ལུང་སྦྱོང་འགྲན་སྡུར་དང་སོ་ནམ་ཞབས་བྲོ་འགྲན་སྡུར། སོ་ནམ་གླུ་ལེན་འགྲན་སྡུར་སོགས་ཀྱི་བྱེད་སྒོ་སྤེལ་བ་རེད། 2019ལོའི་ལྔ་པའི་དུས་ཆེན་ལ་སླེབས་དུས། དུས་ཆེན་ཚོགས་འདུའི་མིང་ལ་ལྔ་པའི་རིག་གནས་ཡུལ་སྐོར་དུས་ཆེན་དུ་བསྒྱུར་བ་དང་། དུས་ཆེན་ཚོགས་འདུའི་ནང་དོན་ནང་རིག་རྩལ་འཁྲབ་སྟོན་དང་གེ་སར་སྐོར་གྱི་འཆད་ཁྲིད། སྣང་ཚུལ་ཟློས་གར། ལུས་རྩལ་འགྲན་སྡུར། ཡུལ་སྲོལ་གོམས་གཤིས་འཁྲབ་སྟོན་བཅས་ཚུད་ཡོད་པ་རེད།

ལུས་རྩལ་རིག་གནས་ཀྱི་ཁྱད་ཆོས་མངོན་པའི་ལྔ་པའི་དུས་ཆེན་གྱིས་དར་སྲོལ་གསར་པ་མཚོན།

33.jpg

གེ་སར་གྱི་སྣང་ཚུལ་ཟློས་གར།

ཐབས་འབུལ་ཇུས་འབུལ་ཁྲོད་དུ་ལྔ་པའི་དུས་ཆེན་གྱི་ཡིད་དབང་འགུགས་ཤུགས་ཆེ་རུ་ཕྱིན།

 “ཨ་ལ་ལ་མོ་ཨ་ལ་རེད། ཐ་ལ་ལ་མོ་ཐ་ལ་རེད”ཅེས་པའི་སྒྲ་གདངས་ལ་ཉན་ཞོར་ཕན་ཚུན་དཔྱད་གཞིར་འཛིན་འོས་གང་ཡོད་ཐད་ལ་གྲོས་བསྡུར་བྱེད་བཞིན་པའི་སི་ཁྲོན་རོལ་དབྱངས་སློབ་གླིང་གི་བོད་ཆའང་དབྱིས་རིགས་ཀྱི་དམངས་ཁྲོད་ཞབས་བྲོའི་རྣོ་སྦྲེང་རམ་དཀྲོལ་གསར་རྩོམ་ཤེས་ལྡན་མི་སྣ་གསོ་སྐྱོང་བཅར་འདྲི་ཚོགས་པ་ཡང་ལུང་བསྟན་ཡན་ལག་ཚོགས་ར་རུ་བསླེབས་ནས་གེ་སར་གྱི་སྣང་ཚུལ་ཟློས་གར་ལ་བལྟས་རྗེས། མི་རིགས་ཀྱི་ཁྱད་ཆོས་ཆེ་བའི་དམངས་ཁྲོད་སྒྱུ་རྩལ་རིག་གནས་འདི་དག་དྲིལ་བསྒྲགས་བྱེད་ཤུགས་ཆེ་རུ་གཏང་ན་ཕྱོགས་བཞིའི་མི་རྣམས་ཀྱི་ཡིད་དབང་འགུགས་ཐུབ་ཅེས་བཤད་པ་རེད།

རྟའུ་རྫོང་སྲིད་གཞུང་གི་རྫོང་དཔོན་གཞོན་པ་བསྟན་པ་རྡོ་རྗེས་སླད་ཕྱིན་རྟའུ་རྫོང་གིས་ལྔ་པའི་དུས་ཆེན་གྱི་ཟོང་རྟགས་དེ་མུ་མཐུད་ནས་དམ་འཛིན་ཡག་པོ་བྱས་པ་དང་ཆབས་ཅིག  ཡུལ་སྐོར་དང་སྐྱེ་ཁམས། ཡུལ་སྐོར་དང་རིག་གནས། ཡུལ་སྐོར་དང་ཞིང་ལས་བཅས་ཟུང་དུ་འདྲེས་པའི་ལས་རྣམ་གསར་པར་བརྟེན་ནས་ས་གནས་དེ་གའི་ཁྱད་ཆོས་དང་ཟུང་འབྲེལ་བྱས་ཏེ་ལྗོངས་ཁུལ་འདེགས་སྐྱོར་ཅན་དང་ཐོན་ལས་ཁྱད་ཆོས་ཅན། རིག་གནས་མྱོང་རོལ་ཅན་བཅས་ཀྱི་ཞིང་ལས་དང་ཡུལ་སྐོར་མཉམ་འདྲེས་དཔེ་སྟོན་བྱེད་ས་རིགས་བགོས་ནས་གསར་སྐྲུན་བྱ་རྒྱུ་ཡིན། དེར་བརྟེན་རྟའུ་རྫོང་གིས་ཡུལ་སྐོར་གྱི་རྨང་གཞིའི་སྒྲིག་བཀོད་དང་ཞབས་ཞུའི་སྤུས་ཚད་མཐོ་རུ་བཏང་སྟེ་རྒྱུན་ཆད་མེད་པར་འཐུས་སྒོ་ཚང་དུ་གཏང་བ་དང་། ཁྱད་ཆོས་ལྡན་པའི་ཞིང་ལས་ཐོན་ལས་ཁུལ་དེ་སྤྲོ་གསེང་ལྟ་སྐོར་གྱི་མཛེས་ལྗོངས་ཁུལ་དུ་འགྱུར་བ་བྱ་རྒྱུ་ཡིན་ཞེས་བསྟན་པ་རེད།

ཤེས་རྟོགས་བྱུང་བར་གཞིགས་ན། མ་འོངས་པར་རྟའུ་རྫོང་གིས་ད་དུང་རྫོང་ཡོངས་ཀྱི་ཉི་མཚོ་སྡེ་ཁུལ་དང་དཔལ་སྨད་སྡེ་ཁུལ། སྦར་ཞབས་སྡེ་ཁུལ། འདྲ་པ་སྡེ་ཁུལ། གཡུ་ཁོག་སྡེ་ཁུལ་བཅས་སྡེ་ཁུལ་ཆེ་གྲས་ལྔའི་དམིགས་བསལ་གྱི་ས་གནས་ལེགས་ཆ་དང་རང་བྱུང་མཛེས་ལྗོངས། ཡུལ་སྲོལ་མི་ཆོས་སོགས་ཀྱི་གྲུབ་རྐྱེན་ལ་དམིགས་ནས་གཤིས་ཆུ་དང་དཔལ་སྨད་ཡུལ་སྐོར་བསྡུ་འགྲེམས་ལྟེ་གནས་སྐྲུན་ཤུགས་ཆེ་རུ་གཏང་རྒྱུ་དང་།དཔལ་སྨད་ཆོས་ལུགས་རིག་གནས་དང་རང་བྱུང་སྐྱེ་ཁམས་ཡུལ་སྐོར་ཁུལ། གཡུ་ཁོག་རྩྭ་ཐང་གི་ཡུལ་སྲོལ་གོམས་གཤིས་ཡུལ་སྐོར་ཁུལ་སོགས་མྱུར་དུ་བསྐྲུན་ཏེ་རྟའུ་ཡི་ཞིང་ལས་དང་ཡུལ་སྐོར་མཉམ་འདྲེས་འཕེལ་རྒྱས་གཏོང་གང་ཐུབ་བྱ་རྒྱུ་ཡིན་པ་རེད།།

རྩོམ་སྒྲིག་པ། ཀླུ་འབུམ་ཚེ་རིང་།

དཔྱད་མཆན 0 ཡོད།