ཀྲུང་གོ་བོད་ཀྱི་དྲ་བའི་འཕྲིན། ཟླ6པ་ནི་རྒྱལ་ཡོངས“བདེ་འཇགས་ཐོན་སྐྱེད་ཟླ་བ”ཡིན། ཟླ6པའི་ཚེས1ཉིན་གྱི་ཕྱི་དྲོར། མཚོ་སྔོན་ཞིང་ཆེན་ཡོངས་ཀྱི་ཐོལ་བྱུང་དོན་རྐྱེན་འཕྲལ་བསྟུན་ཐག་གཅོད་ནུས་པ་འཛུགས་སྐྱོང་དང་ཐོན་སྐྱེད་བདེ་འཇགས་དོན་རྐྱེན་ཚབས་ཆེན་འགོག་ཟོན་བྱེད་པའི་ཆེད་དོན་གྲོས་ཚོགས་བསྡུས། ཚོགས་ཐོག་ནས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་བདེ་འཇགས་ཐོན་སྐྱེད་དང་འཕྲལ་བསྟུན་དོ་དམ་སྐོར་གྱི་རྣམ་བཤད་གལ་ཆེན་དང་མཆན་བཀོད་མཛུབ་སྟོན་གལ་ཆེན་གྱི་དགོངས་དོན་ལག་ལེན་མཐར་ཕྱིན་བྱས་པ་དང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཚོ་སྔོན་བྱ་བའི་ཐད་ཀྱི་གསུང་བཤད་གལ་ཆེན་གྱི་དགོངས་དོན་ཕྱོགས་ཡོངས་ནས་དོན་འཁྱོལ་བྱས་པ། ཞིང་ཆེན་ཡོངས་ཀྱི་བདེ་འཇགས་ཐོན་སྐྱེད་དང་འཕྲལ་བསྟུན་ཐག་གཅོད་བྱ་བར་ཞིབ་འཇུག་དང་བཀོད་སྒྲིག་བྱས། ཞིང་ཆེན་ཏང་ཨུའི་ཧྲུའུ་ཅིའམ། ཞིང་ཆེན་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རེན་ཁྲེན་ཀང་གིས་མགོ་འཛིན་མཛད་པར་མ་ཟད་གསུང་བཤད་གནང་། ཞིང་ཆེན་ཏང་ཨུའི་ཧྲུའུ་ཅི་གཞོན་པའམ། ཧྲིན་ཀྲང་ཝུའུ་ཞའོ་ཅུན་གྱིས་གསུང་བཤད་གནང་། ཞིང་ཆེན་ཏང་ཨུའི་རྒྱུན་ལས་ཨུ་ཡོན་ནམ། ཞིང་ཆེན་སྲིད་གཞུང་གི་ཏང་ཙུའུ་ཧྲུའུ་ཅི་གཞོན་པ་ཝང་ལིན་ཧུའུ་གྲོས་ཚོགས་ལ་ཞུགས།
ཁྲེན་ཀང་གིས་ཉེ་བའི་ལོ་འགའི་རིང་གི་རང་ཞིང་གི་ཐོལ་བྱུང་དོན་རྐྱེན་འཕྲལ་བསྟུན་ཐག་གཅོད་ནུས་པ་ཇེ་མཐོར་སོང་བར་ཁས་ལེན་གང་ལེགས་མཛད་ནས། བདེ་འཇགས་ཐོན་སྐྱེད་བྱ་བའི་ཐད་ནས་ཐབས་ཆག་སླ་བཅོས་ཅུང་ཙམ་ཡང་བྱེད་མི་རུང་བ་དང་། སྟེས་དབང་གི་སེམས་པ་ཡོད་མི་རུང་ལ། ཕྱི་ཚུལ་རིང་ལུགས་བྱེད་མི་རུང་བ་དང་། མིར་ཕོག་ཐུག་གཏོང་བར་སྐྲག་པའི་བསམ་བློ་ཡོད་མི་རུང་བར། ངེས་པར་དུ་འགན་འཁྲི་ཕྲག་ཏུ་ལེན་པ་དང་། འགན་སྒྲུབ་ནན་མོ་བྱེད་པ། འཐབ་རྩོད་བྱེད་ཕོད་པ་དང་འཐབ་རྩོད་བྱེད་ཤེས་པ། གྲ་སྒྲིག་ལེགས་པོ་བྱས་ཏེ། བདེ་འཇགས་ཐོན་སྐྱེད་ཀྱི་ཉེན་ཁ་འགོག་སྡོམ་དྲ་རྒྱ་བརྟན་པོར་འཛུགས་དགོས་ཞེས་བསྟན།
ཁྲེན་ཀང་གིས། བདེ་འཇགས་ཐོན་སྐྱེད་བྱ་བ་སྣེ་མང་ཞིང་རྙོག་འཛིང་ཆེ་བས། གཙོ་གནད་དམ་འཛིན་བྱེད་པ་དང་། ཐོན་སྐྱེད་བདེ་འཇགས་དོན་རྐྱེན་ཚབས་ཆེན་འགོག་ཟོན་བྱེད་པ་གཙོར་བཟུང་ནས། ནུས་པ་འཛུགས་སྐྱོང་ལ་ངེས་པ་དོན་གྱིས་ཤུགས་སྣོན་དགོས། ད་ལྟ་སྤེལ་བཞིན་པའི་བརྗོད་དོན་སློབ་གསོ་དང་དཔེ་གཞིར་བརྟེན་ནས་ལེགས་བཅོས་ལ་སྐུལ་བའི་ཆེད་དོན་སློབ་གསོ་བཅོས་སྐྱོང་དང་ཟུང་འབྲེལ་བྱེད་པ་དང་། སྤྱོད་ཚུལ་འཛུགས་སྐྲུན་ལ་ཤུགས་སྣོན་པ། ས་སྲུང་འགན་ཡོད་དང་ས་སྲུང་འགན་ཁུར། ས་ཁུང་འགན་བསྟར་བྱེད་པ་རྒྱུན་འཁྱོངས་བྱེད་པ། འཕྲལ་བསྟུན་དཔུང་སྡེ་སྟོབས་ལྡན་འཛུགས་སྐྱོང་བྱས་ཏེ། ཏང་དང་མི་དམངས་ལ་འགན་ཁུར་བའི་རྣམ་འགྱུར་གྱིས་བདེ་འཇགས་ཐོན་སྐྱེད་དང་འཕྲལ་བསྟུན་ཐག་གཅོད་ཀྱི་བྱ་བ་སྣ་ཚོགས་བཟང་པོར་བསྒྲུབ་དགོས། རིམ་པ་སོ་སོའི་རྩ་འཛུགས་སྡེ་ཁག་དང་འབྲེལ་ཡོད་སྡེ་ཁག་གིས་འཕྲལ་བསྟུན་དོ་དམ་འཐབ་ཕྱོགས་ཀྱི་ལས་བྱེད་པ་དང་ལས་བཟོ་པར་སེམས་ཁུར་དང་གཟིགས་སྐྱོང་བྱེད་པ་དང་། སྐུལ་སློང་འགན་སྲུང་རྐྱེན་སྲོལ་འཐུས་ཚང་དུ་བཏང་ནས། ལས་སྒྲུབ་བྱེད་འདོད་པ་དང་ལས་ཀ་སྒྲུབ་ཐུབ་པ། ལས་དོན་འགྲུབ་པ་བཅས་ལ་ཆ་རྐྱེན་ལེགས་པོ་དང་སྣང་ཚུལ་ཡག་པོ་བསྐྲུན་དགོས་ཞེས་ནན་གྱིས་བསྟན།
ཝུའུ་ཞའོ་ཅུན་གྱིས། ཐལ་དྲག་པའི་ནམ་ཟླ་དང་བདེ་འཇགས་ཉེན་ཁ་རྒྱུན་མཐུད་བསྡུ་གསོག ཁྱབ་ཁོངས་གསར་པའི་ཉེན་ཁ་གསར་པར་ངོས་འཛིན་བྱེད་ཚད་མི་འདང་བའི་གནད་དོན་ཐག་གཅོད་པར་དམིགས་པ་དང་། བདེ་འཇགས་ཐོན་སྐྱེད་ནམ་ཡང་ལམ་དུ་ཡོད་པའི་འདུ་ཤེས་ཇེ་དྲག་ཏུ་བཏང་སྟེ། བདེ་འཇགས་ཐོན་སྐྱེད་ཀྱི་མཐའ་ཐིག་བརྟན་སྲུང་བྱེད་དགོས། ཞིབ་བཤེར་ཟབ་མོ་མི་བྱེད་པའི་གནད་དོན་ཐག་གཅོད་པ་དང་། ཉེན་ཁ་འགོག་སྡོམ་བྱེད་པར་ཤུགས་སྣོན་པ། རྐྱེན་ངན་གྲལ་བཤེར་གནད་ལ་འཁེལ་བ། འགོག་ཟོན་ལམ་སྲོལ་འཐུས་ཚང་དུ་བཏང་ནས། ལྟ་སྐུལ་དོ་དམ་ཇེ་དྲག་ཏུ་གཏོང་དགོས། འགན་འཁྲི་མི་གསལ་བའི་གནད་དོན་ཐག་གཅོད་པ་དང་། ས་གནས་ཀྱི་ཁོངས་གཏོགས་ས་ཆའི་འགན་འཁྲི་སྔར་ལས་ཇེ་དྲག་ཏུ་གཏོང་བ། སྡེ་ཁག་གི་བདེ་འཇགས་ལྟ་སྐུལ་དོ་དམ་འགན་འཁྲི་དངོས་འབེབས་བྱེད་པ། ཐོན་སྐྱེད་ཚོང་གཉེར་སྡེ་ཁག་གི་བྱེད་པོའི་འགན་འཁྲི་གཏན་ཁེལ་གསལ་པོར་བྱེད་པ། འགན་འཁྲི་རྩད་གཅོད་ནན་མོ་བྱས་ཏེ། མི་དམངས་མང་ཚོགས་ཀྱི་ཚེ་སྲོག་རྒྱུ་ནོར་བདེ་འཇགས་ལ་ཁག་ཐེག་བྱེད་དགོས་ཞེས་བསྟན།
ཚོགས་འདུ་བརྙན་ལམ་གྱི་རྣམ་པས་བསྡུས་ཤིང་། ཞིང་ཆེན་དུ་ཚོགས་ར་གཙོ་བོ་བཙུགས་པ་དང་། གྲོང་ཁྱེར་སོ་སོ（ཁུལ）རུ་ཡན་ལག་ཚོགས་ར་བཙུགས་ཡོད། ཞིང་ཆེན་འཕྲལ་བསྟུན་དོ་དམ་ཐིང་དང་ཞིང་ཆེན་སྡོད་ཁང་མཁར་གྲོང་འཛུགས་སྐྲུན་ཐིང་། ཞིང་ཆེན་ཆུ་བེད་ཐིང་། ཟི་ལིང་གྲོང་ཁྱེར། མཚོ་ཤར་གྲོང་ཁྱེར་སོགས་ཀྱི་སྡེ་ཁག་དང་གྲོང་ཁྱེར（ཁུལ）གྱིས་འབྲེལ་ཡོད་བྱ་བའི་གནས་ཚུལ་ཡར་ཞུ་བྱས།
ཚོགས་འདུའི་སྔོན་དུ། ཁྲེན་ཀང་དང་ཝུའུ་ཞའོ་ཅུན། ཝང་ལིན་ཧུའུ་བཅས་ཞིང་ཆེན་འཕྲལ་བསྟུན་དོ་དམ་ཐིང་བདེ་འཇགས་ཐོན་སྐྱེད་ཁྲིམས་འཛིན་ཅུའུ་དང་རྒུད་སྐྱོབ་དངོས་ཟོག་འགན་སྲུང་ཁྲུའུ། ཞོད་འགོག་ཐན་རྒོལ་ཁྲུའུ་རུ་སོང་ནས་རྟོག་ཞིབ་བྱས་པ་དང་། རང་ཞིང་གི་འཕྲལ་བསྟུན་བཀོད་འདོམས་བཀོད་གཏོང་དང་གནོད་འཚེ་ལྟ་ཞིབ་སོགས་གནས་ཚུལ་ལ་རྒྱུས་ལོན་གསལ་པོ་བྱས་པར་མ་ཟད། ཞིང་ཆེན་ཡོངས་ཀྱི་འཕྲལ་བསྟུན་དོ་དམ་འཐབ་ཕྱོགས་ཀྱི་རྒྱ་ཆེའི་ལས་བྱེད་པ་དང་ལས་བཟོ་པར་འཚམས་འདྲི་བྱས། །