ཀྲུང་གོ་བོད་ཀྱི་དྲ་བའི་འཕྲིན། རྡོ་རྗེ་རྒྱལ་ནི་ཀོས་ནན་རྫོང་སུམ་མདོ་གྲོང་རྡལ་ཁ་རྒྱ་སྡེ་བའི་ཡིན་ལ། ཁོང་གིས་རང་ཁྱིམ་གྱི་རྩྭ་ཐང་གི་ཐོན་འབབ་དང་གཟན་རྩྭའི་སྤུས་ཚད་ལོ་རེ་ནས་ལོ་རེར་ཇེ་ཞན་དུ་གྱུར་བཞིན་ཡོད་པ་དང་དུས་དང་རྣམ་པ་ཀུན་ཏུ་བྱེ་མས་ཁྱུར་མིད་བྱེད་ཀྱིན་ཡོད་པ་ཤེས་རྟོགས་བྱུང་ཞིང་། དུས་དེ་ནས་བཟུང་ཁོང་གིས་བྱེ་འགོག་བྱས་ཏེ་མཛེས་སྡུག་ལྡན་པའི་ཁྱིམ་གཞིས་ཤིག་གཏོད་རྒྱུའི་སེམས་ཐག་བཅད་པ་རེད།1996ལོར་ཀོས་ནན་རྫོང་གིས་བྱེ་སྣ་དང་མུ་གེ་ཐང་ཉེ་འཁོར་གྱི་བྱེ་བཅོས་ནགས་བསྐྲུན་ལས་དོན་དེ་རྫོང་ཡོངས་ཀྱི་དོན་ཆེན་ཨང་དང་པོར་བརྩིས་ཏེ། གཞི་ཁྱོན་ཆེ་བའི་སྡོང་འཛུགས་ནགས་བསྐྲུན་གྱི་བྱེད་སྒོ་དངོས་སུ་སྤེལ་བ་རེད། སྐབས་དེར་ཁ་རྒྱ་སྡེ་བའི་རུ་ཁག་དང་པོའི་ཧྲུའུ་ཅི་རྡོ་རྗེ་རྒྱལ་གྱིས་སྡེ་མིའི་སྣེ་ཁྲིད་དེ་སྡོང་འཛུགས་ནགས་བསྐྲུན་གྱི་བྱེད་སྒོ་སྤེལ་བ་དང་། སྐབས་དེ་དུས་དྲོད་ཚད་ཧ་ཅང་དམའ་བ་དང་བྱེ་རླུང་ཆེན་པོ་གཡུག་པའི་རྐྱེན་གྱིས་སྡོང་འཛུགས་བྱེད་པར་དཀའ་ཁག་ཆེན་པོར་འཕྲད། ཡིན་ནའང་རྡོ་རྗེ་རྒྱལ་དང་སྡེ་མི་ཚོའི་སེམས་ནང་དུ་དྲོད་ལམ་ལམ་བྱེད་བཞིན་མཆིས། རྒྱུ་མཚན་ནི་ཁོ་ཚོས་མི་འགྱངས་བར་བྱེ་མ་ལས་རྣམ་པར་རྒྱལ་ཏེ་ཁྱིམ་གཞིས་སླར་གསོ་ཡི་རེ་བའི་འོད་སྣང་མཐོང་འོངས་པས་རེད། དུས་དེ་ནས་བཟུང་རྡོ་རྗེ་རྒྱལ་ལོ་རེ་རེ་བཞིན་ཀོས་ནན་རྫོང་གིས་རྩ་འཛུགས་བྱས་པའི་བྱེ་འགོག་ནགས་བསྐྲུན་གྱི་ལས་དོན་ནང་ཞུགས་ཤིང་། དཔྱིད་ཀར་སྡོང་འཛུགས་ནགས་བསྐྲུན་དང་སྡོང་བོར་སྲུང་སྐྱོབ་དང་མེ་འགོག ནགས་སྲུང་གི་ཤེས་བྱ་དྲིལ་སྒྲོག་དང་རི་སྐྱེས་སྲོག་ཆགས་སྲུང་སྐྱོབ་སོགས་ཀྱི་ལས་དོན་བསྒྲུབས། འདི་ལྟར་ལོ་མང་རིང་རི་བོའི་ནགས་ཚལ་དུ་རྐང་བཙུགས་ཏེ། དཀའ་སྡུག་གི་དངུལ་ཁྲག་ཁྲོད་ནས་བཙུགས་པའི་སྡོང་བོ་དང་ལྗང་མདོག་གི་རེ་བར་སྲུང་སྐྱོབ་བྱས། 
2016ལོར་ཁ་རྒྱ་སྡེ་བའི་ཏང་ཀྲི་པུའི་ཧྲུའུ་ཅི་རྡོ་རྗེ་རྒྱལ་གྱིས་རང་འགུལ་ངང་རེ་འདུན་ཞུས་ནས་ཀོས་ནན་རྫོང་བྱེ་སྣའི་སྐོར་ཞིབ་སྲུང་སྐྱོང་ས་ཚིགས་ཀྱི་ཆེད་ལས་ནགས་སྲུང་བར་གྱུར་བར་མ་ཟད་སྐོར་ཞིབ་ས་ཚིགས་ཀྱི་ཀྲན་ཀྲང་ལའང་བསྐོས་པ་རེད། ནགས་ཚལ་སྲུང་བའི་བྱ་བ་ནི་ཧ་ཅང་དཀའ་སྡུག་ཆེ་མོད། ཁོ་སྔར་བཞིན་རང་གི་བྱ་བའི་ཐོག་ཧ་ཅང་ནན་ཏན་ཡིན་ལ་སེམས་ཀྱང་སྤྲོ་སྐྱིད་ཀྱིས་ཁེངས་འདུག རྒྱུ་མཚན་ནི་ཁོས་ནགས་ཁུལ་འདིར་སྲུང་སྐྱོབ་བྱེད་པ་ནི་རང་གི་ལྗང་མདོག་གི་ཁྱིམ་གཞིས་ལ་སྲུང་སྐྱོབ་བྱས་པ་ཡིན་པ་གསལ་བོར་ཤེས་ཡོད། རྡོ་རྗེ་རྒྱལ་གྱིས་བཤད་རྒྱུར་སྔོན་ཆད་འདི་གའི་རྩྭ་ཐང་ལོ་རེར་སྨི་བཅོ་ལྔ་ནས་ཉི་ཤུ་བྱེ་ཐང་དུ་གྱུར་ཞིང་རྗེས་སུ་སྡོང་འཛུགས་ནགས་བསྐྲུན་ལ་བརྟེན་ནས་བྱེ་འགོག་བྱེ་བཅོས་བྱས་ཤིང་། རྩྭ་ཐང་གི་རྒྱ་ཁྱོན་ཆེ་རུ་ཕྱིན་ནས་ངའི་ཕ་ཡུལ་ཡང་སྔར་ལས་མཛེས་སྡུག་ལྡན་པར་གྱུར་ཡོད། ང་ལོ་དྲུག་ཅུར་སོན་ལ་ཉེ་ཞིང་ལུས་པོ་ཡང་ཇེ་ཞན་དུ་སོང་ནས་སེམས་ཤུགས་ཡོད་ཀྱང་ལུས་ཀྱིས་མི་ལྕོགས་ནའང་སྔར་བཞིན་རང་ཉིད་ཀྱི་མིག་ལ་སྲུང་སྐྱོང་བྱེད་པ་ལྟར་འདི་གའི་རྩྭ་རྩི་ཤིང་ལ་སྲུང་སྐྱོང་བྱེད་དགོས་ལ། ང་ནགས་ཚལ་འདི་དང་འདྲེས་ཡོད་པས་མུ་མཐུད་དུ་སྲུང་སྐྱོང་ཐུབ་རྒྱུའི་རེ་བ་ཡོད་ཅེས་བཤད། 
རྡོ་རྗེ་རྒྱལ་གྱི་བྱས་རྗེས་ལས་ཁོང་གི་ཉེ་འགྲམ་གྱི་མི་ཚང་མར་ཤུགས་རྐྱེན་ཐེབས་ནས་མི་ཚང་མ་ནགས་ཚལ་དང་རྩྭ་ཐང་། རི་བོ་བཅས་སྲུང་བའི་ཁྲོད་ཞུགས་པའི་འདུ་ཤེས་དེ་ཀོས་ནན་གྱི་ས་གཞི་འདིར་རྩ་བ་བརྟན་པོ་ཚུགས་པ་དང་དར་སྲོལ་ཞིག་ཏུ་གྱུར་ཡོད། །
རྩོམ་སྒྲིག་པ། : གངས་བསོད།
