ཀྲུང་གོ་བོད་ཀྱི་དྲ་བའི་འཕྲིན། ཚེས15ཉིན། གསར་འགོད་པས་མཚོ་སྔོན་ཞིང་ཆེན་མཚོ་ནུབ་ཁུལ་ཨུ་དྲིལ་བསྒྲགས་པུའུ་ནས་ཤེས་རྟོགས་བྱས་པར་གཞིགས་ན། མིག་སྔའི་བར་ཚྭ་འདམ་གཤོངས་སའི་ལྗང་མདོག་ཟས་རིགས་དང་སྐྱེ་ལྡན་ཟས་རིགས་ཐོན་སྐྱེད་ངོས་ལེན་ཐོབ་པའི་ཁེ་ལས85དང་། ལྗང་མདོག་ངོས་ལེན་དང་སྐྱེ་ལྡན་ཐོན་རྫས388ཟིན་ནས། ལྗང་མདོག་སྐྱེ་ལྡན་ཐོན་རྫས་ཟས་རིགས་ཀྱི་བདེན་དཔང་ངོས་ལེན་བྱས་པའི་ཁེ་ལས་དང་ཐོན་རྫས་མཚོ་སྔོན་ཞིང་ཆེན་གྱི་ཨང་དང་པོར་སླེབས།
ངོ་སྤྲོད་བྱས་པར་གཞིགས་ན། ཉེ་བའི་ལོ་ཤས་རིང་མཚོ་ནུབ་ཁུལ་གྱིས་འགག་རྩ་དང་གནད་སྨིན་ནུས་ཤུགས་ལ་དམིགས་ཏེ་སོན་བཟང་མུ་མཐུད་སྐྱེད་སྲིང་དང་། ཐོན་རྫས་ཀྱི་སྤུས་ཚད་མཐོར་གཏོང་། ཁྱད་ལྡན་སྤུས་རྟགས་སྟོབས་ཆེར་གཏོང་བ། ཚད་ལྡན་ཅན་གྱི་ཐོན་སྐྱེད་ལ་སྐུལ་འདེད། ལྗང་མདོག་སྐྱེ་ལྡན་ཞིང་ཕྱུགས་ཐོན་རྫས་ཕྱིར་གཏོང་བྱ་ཡུལ་གྱི་དཔེ་སྟོན་ཁུལ་དུ་གཏོང་རྒྱུར་མཐུན་རྐྱེན་མི་དམན་པ་བསྐྲུན་ཡོད།
མཚོ་ནུབ་ཁུལ་གྱིས《ཚྭ་འདམ་གཤོངས་སའི་གྲོའི་ཐོན་འབབ་ལེགས་པའི་འདེབས་གསོའི་ལག་རྩལ་ཚད་གཞི》དང《གྲོ་ཡི་ལས་སྣོན། ཐུམ་སྒྲིལ། ཉར་ཚགས། སྐྱེལ་འདྲེན་ཚད་ལྡན་ཚོགས་པའི་ཚད་གཞི》སོགས་ཚད་ལྡན་ཁག་གི་ཚད་གཞི་ཁྱབ་བསྒྲགས་བྱས་ནས《ས་གཤིས་མཚོན་རྟགས་ཀྱི་ཐོན་རྫས་ཚྭ་འདམ་འདྲེ་ཚེར་མ》སོགས་འདེབས་འཛུགས་ལག་རྩལ་དང་སྤུས་ཚད་ཚོད་འཛིན་ཚད་གཞི་ཁག16བཟོས་ནས་ཁྱབ་གདལ་བཏང་ཡོད་པ་རེད། ལས་སྣོན་ཞིབ་ཚགས་ལ་སྐུལ་འདེད་བཏང་ནས་རྒྱལ་ཁབ་ཀྱི་དེང་རབས་ཞིང་ལས་ཐོན་ལས་གླིང་དང་། ཞིང་ཆེན་རིམ་པའི་དེང་རབས་ཞིང་ལས་ཐོན་ལས་གླིང་། ཐོན་ལས་མཉམ་འབྲེལ་སྒྲིག་གཞི་སོགས་ལས་སྟེགས་ལ་བརྟེན་ནས་ཚད་གཞི་ཅན་གྱི་ཐོན་སྐྱེད་ལ་སྐུལ་འདེད་བཏང་སྟེ་རིམ་རྩིས་བྱས་ན་ཐོན་རྫས་རིགས500ལྷག་ཙམ་གསར་སྤེལ་བྱས་ནས་ཁྲོམ་རར་ཞུགས་ཡོད་པ་རེད། དེ་དང་ཆབས་ཅིག་ཐོན་རྫས་ཀྱི་བདེན་དཔང་ངོས་ལེན་ལ་ཤུགས་སྣོན་བརྒྱབ་ཅིང་། མིག་སྔར་ལྗང་མདོག་དང་སྐྱེ་ལྡན་བཟའ་བཅའི་ཁེ་ལས85ལ་བདེན་དཔང་ངོས་ལེན་བྱས་པ་དང་། ལྗང་མདོག་དང་སྐྱེ་ལྡན་ཐོན་རྫས388ལ་བདེན་དཔང་ངོས་ལེན་བྱས་ལ། ལྗང་མདོག་སྐྱེ་ལྡན་ཁེ་ལས་དང་ཐོན་རྫས་ཀྱི་བདེན་དཔང་ངོས་ལེན་བྱེད་ཚད་མཚོ་སྔོན་ཞིང་ཆེན་གྱི་ཨང་དང་པོར་སླེབས།
དེ་དང་ཆབས་ཅིག་མཚོ་ནུབ་ཁུལ་གྱིས“ངོ་མཚར་བའི་ཚྭ་འདམ་གཤོངས་ས”ཞེས་པའི་མཚོ་ནུབ་ཀྱི་ཞིང་ཕྱུགས་ཐོན་རྫས་ས་ཁོངས་ཀྱི་སྤྱི་སྤྱོད་སྤུས་རྟགས་གྲུབ་འབྲས་ཐོབ་པའི་ངང་ཁྱབ་བསྒྲགས་བྱས་པ་དང་འབྲེལ་སྤུས་རྟགས་དབང་ཆ་སྤྲད་པ་རེད། སྤུས་རྟགས་དོ་དམ་ཚད་ལྡན་དུ་བཏང་ནས《“ངོ་མཚར་ཆེ་བའི་ཚྭ་འདམ་གཤོངས་སའི”མཚོ་ནུབ་ཀྱི་ཞིང་ཕྱུགས་ཐོན་རྫས་ས་ཁོངས་ཀྱི་སྤྱི་སྤྱོད་སྤུས་རྟགས་དོ་དམ་བྱ་ཐབས》པར་འགྲེམས་བྱས་ནས་པེ་ཅིང་དང་། ཐེན་ཅིན། ཧོ་པེ་བཅས་དང་། འབྲི་ཆུའི་ཟུར་གསུམ་ཁུལ། ཀྲུའུ་ཅང་གཙང་པོའི་ཟུར་གསུམ་ཁུལ་བཅས་ལ“ས་ཆ་གསུམ་དང་སྟེགས་བུ་བརྒྱ”འཛུགས་སྐྲུན་བྱས་ཏེ་ཀྲེ་ཅང་ཧང་ཀྲིག་དུ“ངོ་མཚར་བའི་ཚྭ་འདམ་གཤོངས་སའི”སྤུས་ལེགས་ཐོན་རྫས་ཀྱི་ཆེད་སྒྲོམ76བསྐྲུན།
གཞན་ཡང་ལྟ་ཞིབ་ཚད་ལེན་བྱས་པར་གཞིགས་ན། མིག་སྔར་མཚོ་ནུབ་ཁུལ་གྱིས་སྐྱེ་ལྡན་རྩྭ་རའི་རྒྱ་ཁྱོན་མུའུ་ཁྲི1092.5དང་ལྗང་མདོག་སྐྱེ་ལྡན་འདྲེ་ཚེར་མ་མུའུ་ཁྲི26ངོས་ལེན་བྱས།